صرخة صمت 🌬

الحلقة الواحدة و العشرون

🔸️حلقة 21
🔸️إيمان_تحكي:
خذيت نفس طويل و هزيت روحي وقفت...نغزر لنزار لي وقف في الوسط باش يشهد...دقات قلبي قوات أكثر...رغم عندي ثقة فيه...أما منجمش ناثق في أمير و في اللي باش يعملو...غزرة كنان في الوضع هذا...كانت كافية باش تهديني...دورت راسي مع صوت القاضي وقت لي مد يدو و شاورلو يحكي
القاضي:تفضل سي نزار
دور راسو غزرلي و تبسم...نزار كان الوحيد لي صدقني وقتها و مدلي يدو من غير ما يخمم في اللي باش يصير فيه...رغم انو يعرف عيلة أصلان و شنوة تنجم تعمل حتى خدمتو تحول منها جراير القضية...تبسمتلو رغم وضعي و خوفي من اللي جاي...تلفت للقاضي يحكي
نزار:سيدي القاضي...في التاريخ الموضح عندك...و بالتحديد بعد الظهر...دخلت عندي إيمان عبد العزيز و الحالة لي كانت فيها و الكدمات لي على وجها و بدنها تثبت أنها تعرضت لإغتصاب و المتهم الوحيد وقتها كان أمير أصلان
دورت راسي شوية غزرت لأمير...لي تبسم على جنب تجاهلت موقفو و ركزت مع كلام نزار مرة اخرى
نزار:و انا لي هزيتها لكلينيك أمين الازهر و أشرفت عليها لين خرجت...و استلمت التقارير بيدي زادة...شنية لي صار بعدها و كيفاش تبدل كلشي في لحظة منعرفش
القاضي:أما كلامك ماهوش دليل كافي...و إذا كنت أنت لي قيدت المحضر علاش إسمك ماهوش موجود عليه
كنان:على خاطر حتى المحضر تبدل و هذا هو المحضر الأصلي لي يتوافق مع تاريخ الحادثة
قرب من القاضي شوية و قدملو الدوسي لي في يدو..وين كمل نزار كلامو يحكي
نزار:المدة لي خدمت فيها غديكا...تعلمت إني مناثقش في عيلة أصلان برشا...أكا علاش خليت نسخة من المحضر عندي...و على خاطر تحولت من المركز لي كنت فيه معرفتش تاريخ الجلسة و لا شنية صار فيها
كنان:بناءا على شهادة سي نزار و المحضر لي في يدك...أنا نطلب تحقيق فوري في ملابسات الحادثة..و مع الأشخاص المساهمين فيها
كمل كلامو و وخر خطوة لتالي...وقفنا مع صوت القاضي و هو يحكي
القاضي:نظرا لأقوال الشاهد و الأدلة المرفوقة...المحكمة تقبل بفتح تحقيق بملابسات الحادثة...كما تطلب من أمير أصلان عدم مغادرة البلاد قبل نهاية التحقيق...و الجلسة الثانية بعد 3 أشهر من تاريخ اليوم...رفعت الجلسة
غمضت عينيا بالقاوي و عاودت حليتهم...رغم أنو مزال حر أما يكفي أنو في دائرة الإتهام و القاضي طلب تحقيق آخر بخصوص الحادثة...قرب مني شوية يحكي
كنان:إرتحت توا ؟
هزيتلو براسي إيه و عديت عينيا على وجهو...منعرفش علاش حسيت إني نحب نكسر الحاجز لي بيني و بينو و نترمى في حضنو...طول الفترة لي فاتت كان السند لي يتمد في كل مرة نحس روحي باش نطيح...تبسم يحكي
كنان:ملا خليك قوية...خاطر قدامنا ثنية طويلة
أنا:مش برشا 3 أشهر
كنان:لاا خاطر التحقيق باش ياخو وقت و إحتمال تكون جلسة النطق بالحكم زادة
أنا:بلكشي ما وصلو لشي
كنان:و ماهمش باش يوصلو
أنا:شقصدك ؟
كنان:أمير حرق الأدلة الكل لي تثبت إدانتو و شهادة نزار حلت الثنية قدامنا أما ماهيش دليل كافي...و المحكمة صعيب برشا توصل لحاجة ماهيش موجودة
أنا:يعني مستحيل نجم نهزم أمير مش هكا ؟
كنان:الأدلة هاذ إحنا لي باش نجيبوها مش المحكمة...يعني يا فرخة نحبك ترتاح شوية خاطر فما برشا خدمة تستنى فينا
تبسمت بالوقت...قد ما وترني...رتحني في الأخير...فقت من سرحتي على صوت نزار لي وقف جنب كنان يحكي
نزار:شحالك إيمان ؟
أنا:والله أنت آخر حد توقعت يكون هوني توا...مرسي برشا نزاار...على كلشي عملتو معايا لتوا
نزار:من غير مزية...حتى فرحت إني ريتك مرة أخرى و طمنت عليك
أنا:عيشك...نجم نعرف المركز لي تخدم فيه توا
نزار:في مقاطعة بعيدة من هوني...قدمت طلب تحويل و على قريب باش نكون في أحد المراكز لي هوني
أنا:إن شاء الله
كنان:خلينا نمشيو توا
أنا:نشوفك مرة أخرى نزار
هزلي براسو باهي و تبسم...خلطت على كنان لي ملامح وجهو تبدلت في لحظة...مركزتش برشا خاطرني لتهيت بملاك لي قربت مني و عنقتني تحكي
ملاك:إن شاء الله المرة الجاية يتحط في الحبس
أنا:إن شاء الله يا روحي و إن شاء الله الأسبوع الجاي تخرج من هوني حرة
ملاك:إن شاء الله يا ربي
دورت راسي شوية...غزرت لأمير...لي قرب من كنان و وقف في وجهو بالظبط يحكي
أمير:نهنيك...سي كنان طلعت شاطر كيما يحكيو عليك بالظبط
كنان:متحسش لي شهادتك مزال بكري عليها...تنجم توفر الكلام هذا كي تلقى روحك بين أربع حيوط
أمير:معنديش شك في اللي باش توصلو...أما اللي يهمني أكثر من القضية و الحبس هي الطفلة لي قدامك توا بالمختصر...كان نعرف أنو حد غيري مسها و لا حط يدو عليها و لا قاعد تاخو في حقك منها بطريقة أخرى...وقتها تولي عندنا ثنية أخرى..حاجتي أنا ما يمسها حتى حد غيري
هزيت عينيا غزرتلو مصدومة من الكلام لي يقول فيه و لي متوقعتوش منو جملة...جيت باش نحكي...قص عليا كنان لي مد يدو و ضربو بالوقت وين خلاه يوخر لتالي مروهج..هد عليه أكثر يحكي
كنان:رد بالك تاقف في وجهي مرة أخرى...خاطر حتى القانون ماهوش باش يفكك من يدي يا واااطي
قرب منو آدم شدو بالوقت و وقف بيناتهم...يحكي
آدم:كنااان يزززي..مش وقتها العركة هاذي جملة
وخر خطوة لتالي و تلفت عندي...استغربت من غزرتو ليا و ملقيتش حروف باش نفسر بيها اللي صار...جبد روحو من آدم و قرب مني أكثر...جبدني من يدي بالوقت و جرني معاه لدرجة منعرفش على روحي كيفاش وصلت اللوطة و مفهمتش تضرفاتو و لا حتى اللي يعمل فيه..صحيح الكلام لي قالو أمير في بلاصتو أما أنا شمدخلني و شبيه يعمل معايا هكا وسط التفكير هذا الكل لقيت روحي نتبع فيه من غير حتى كلمة أخرى...أول ما وصلت للكرهبة...نطرت يدي منو و وخرت خطوة لتالي...محاولة مني باش نفهم اللي قاعد يصير...قحرتلو نحكي
أنا:كنااان شفمااا...فااش تعمل ياخي ؟
مد يدو خلي الباب و شاورلي بيدو للكرهبة...يحكي
كنان:أركب
قربت منو شوية و عاودت سكرت الباب بالقاوي...نحكي
أنا:لااا مانيش باش نركب معااك...قبل ما تفهمني شبيك ؟ عاود حل الباب مرة أخرى و جبدني من يدي...ركبني بالسيف عليا يحكي
كنان:رد بالك تتحرك
سكر الباب بالقاوي و خلط عليا...خدم الكرهبة و طار بيها غزرتلو مصدومة نحكي
أنا:خلينااا ملااك وحدهااا...زيد المحكمة بعيدة على الدار
كنان:ماهيش وحدها...آدم موجود
أنا:آددم ؟ تحبهم يقتلو بعضهم ياااخي ؟
دور راسو غزرلي ندرا كيف و نزل على الفيتاس أكثر يحكي
كنان:متخافش عليهاا
أنا:كنااان...ياخي هذا الكل جراير الكلام لي قالو أمير ؟
كبس على الفولون من غير ما يجاوبني...عديت عينيا على رقبتو لي حمارت و عروقها لي برزت أكثر...هاذي أول مرة نشوفو في الحالة هاذي...خذيت نفس نحكي
أنا:باااهي...نعتذر منك عاللي صاار
شد الفران بالقاوي...لدرجة حسيت باش نفقد توازني...دور راسو و غزرلي يحكي
كنان:على شنوة قاعدة تعتذر ؟
أنا:متوقعتش باش يحكي معاك بالطريقة هذيكااا...أصلا الكل قاعد يخمم في نفس الشي
كنان:في شنوووة ؟
سكت بالوقت...منعرفش علاش منجمتش نجاوبو...أما متأكدة لي الكل يعتقد انو فما علاقة بيناتنا...خاطر محامي في الوزن متاعو صعيب باش يقبل بقضية هكا...ضرب يدو على الفولون...يحكي
كنان:نستنى فيييك تجاوبني
أنا:متصيحش عليااا...زيد شبيك متغشش مني لهدرجة ؟ توااا كل كلمة يقولها أمير تعمل عليها هكااا
كنان:معاااادش تجبد ●●●● سيرتو على لساانك
أنا:شبيك تكفر زااادة ؟
كنان:الواطي هذاكا..متتقابلش معاه جملة و لا حتى تحاول تحكي معاه زادة...مهما كان السبب...تسمع فيا
أنا:مفماش علاش نحكي معاااه...و أنت تعرف هذا بالقدا و حتى منعرفش علاش حكى معاك بالطريقة هذيكا
كنان:خاطر الهدف متااعو وااضح...اللي عملو الكل باش إنتي توافق عليه و تكون معاااه 
أنا:نعرررف...نعرف هذا الكل يا كنان...مش لازم تذكرني فيه
هزلي براسو باهي و عدا يدو على وجهو...يحكي
كنان:و نزار ؟
أنا:شبيه ؟
كنان:على أساس شنوة تحب تشوفو مرة أخرى
أنا:شمدخل نزار توا ؟
كنان:جاوبني
أنا:منعرفش...أنا جيست حبيت نشكرو و
كنان:و شنية زادة ؟
أنا:نعرف منو شنية لي صار في المدة اللي فاتت...أما أنت علاش تسأل فياا ؟
كنان:تحول لمقاطعة أخرى و نجمت نعرف لوين بمساعدة شكون...أكا علاش جا اليوم و شهد معاك...يعني مفما حتى شي يستدعي باش تقابلو مرة أخرى
أنا:و أنت في شنية يقلقك الموضوع ؟
كنان:حط حزامك
ضيقت عينيا مستغربة...خاطرني توقعت منو يجاوبني على سؤالي...خذيت نفس و كبست على صاكي نحكي
أنا:أنا باش ننزل هوني...خاطر ظاهر إحنا اللي باش نقتلو بعضنا
مديت باش نحل الباب...سكرها من عندو...غزرتلو نحكي
أنا:كنااان...حل الباب توااا
كنان:حط حزامك و لا إنذار الكرهبة باش يبقى يزمر على راسي
تبسمت بالوقت و تكيت لتالي...غزرت لطريق نحكي
أنا:مانيش باش نحطو ملا
كنان:بالله ؟
أنا:والله
كنان:باهي
غزرلي ندرا كيف و خدم الكرهبة..شوية و زاد في الفيتاس
أكثر...عامل فيها بلعاني...كبست على صاكي من غير ما نقول حتى كلمة...مدامو يعمل هكا باش يخليني نتنازل غمضت عينيا...نسب فيه في سري...ضحك يحكي
كنان:خفت ؟
أنا:لااا
حليت عينيا شوية شوية و دورت راسي لشباك...نهدي في روحي...نقص شوية السرعة خاطر دخلنا في الزحمة..جيت
باش نحكي أما سكت و أنا نغزر لبوتيك خاص بأدوات الرسم و آخر بجنبو يبيع اللوحات...للحظة سرحت في ذكرياتي و الرسومات متاعي...في أمي لي كانت تشجعني ديما...وين حسيت بحاجتها أكثر في غيابها و حرقتي قوات كي منجمتش نوصللها و لا حتى نعرف وينها...مديت
يدي و مسحت دمعتي مع الكرهبة لي تحركت...أما منجمتش نبعد نظري عليهم...تكيت لتالي كي بعد أكثر من غير ما نحكي معاه...دقايق و عاود حبس قدامهم...غزرتلو مستغربة نحكي
أنا:علاش حبست هوني ؟
كنان:باش نشري شوية حاجات
أنا:من هوني ؟
كنان:مممم كان تحب تنجم تعاوني...شقولك ؟
تبسمت بالوقت و هزيتلو براسي باهي...للحظة نسيت لي إحنا متعاركين
حليت الباب و خلطت عليه...حتى دخلت قبلو للبوتيك وين لقيت روحي ضايعة من اللي نغزر فيه...هاذي أول مرة تصادفني الحاجات لي نحبها بالطريقة هاذي...عملت دورة و نسيت وجودو معايا جملة...هزيت راسي نغزرلو...يهز في الحاجات و يحط فيها بلا مبالاة...قربت منو نحكي
أنا:مزال مقررتش ؟
كنان:عاوني إنتي
أنا:كنان ياخي أنت تفهم في الرسم
كنان:لا..نقصد شوية...قلت نستغل وقتي و نتعلم حاجة جديدة
أنا:أنت ؟
كنان:مممم أنا...فما مشكلة
أنا:لااا...فكرة مليحة الصراحة
كنان:إنتي عندك فكرة عليه
أنا:على شنوة ؟
كنان:الرسم
أنا:الرسم موهبتي الوحيدة...هاني باش نعاونك تختار لي تحب عليه
كنان:بالرسمي
تبسمت و هزيتلو براسي إيه...عاونتو باش يختار لي حاجتو بيه...الغريبة أنو شرا كلشي تقريبا...مركزتش معاه و خذيت شوية أوراق و أقلام حاجتي بيهم..الرسم الحاجة الوحيدة لي تفرحني و مانيش باش نضيع الفرصة هاذي
خلصت بالفلوس لي كانت عندي و بقيت نستنى فيه..طلب
من الطفل يحطهملو في الكرهبة..ضحكت نحكي
أنا:بالمعدل هذا باش تتحول من محامي لرسام مشهور
كنان:إذا إنتي رضيت تعلمني
أنا:مممم باهي...خلينا نمشيو توا
ضحك و خلط عليا...بالنسبة ليا كانت جولة كافية باش ترتحني و تخليني ننسى كلشي تعديت بيه اليوم.
#كنان_إيمان❤