🔸️حلقة 40
🔸️كنان_يحكي:
شديت الفران على جنب و هزيت روحي نزلت...جاب ربي نجمت نعرف بلاصتها من تليفونها...زيد بالرسمي الوضع زاد على حدو...و منجمش نتجاهلها في وسط الظروف هاذي...أصلا من وقت رجعت معاودش ريتها و لا سمعت صوتها...هزيت راسي شوية نغزرلها...تنهدت بالقاوي و قربت منها قعدت بجنبها...من غير حتى كلمة...غزرتلي و عاودت دورت راسها...عديت يدي على وجهي...نحكي
أنا:هاني قدامك توا...فسرلي شنية لي صار
قعدت ساكتة...لي خلاني نمد يدي لعندها...نزلت بيها لكتفها و تكيتها عندي...حطت راسها على صدري...بقيت ساكت خاطرني منجمتش نعرف السبب ورا حالتها هاذي و نعرف لي الموضوع مش سيلين...خاطر هذا الكل صار في الليلة لي رجعت فيها...منعرفش علاش عندي إحساس لي أمير ورا كلشي قاعد يصير...أما لقيت روحي مربوط بسكاتها و ما نجم نعمل حتى شي..عديت يدي على شعرها نحكي
أنا:باش تخليني محير عليك هكا ؟
جبدت روحها مني بالوقت و هزت عينيها في وجهي تحكي
إيمان:علاش تتحير عليا...مدام عندك شكون أهم مني لازمك تهتم بيه توا
أنا:مهتميتش...أنا عملت واجبي مش أكثر
إيمان:الواجب ؟
أنا:إيماان
إيمان:متحاولش تفسرلي...خاطر أمورك متهمنيش
أنا:بالله...ياخي كل مرة تغير فيها لازمني ناكول على راسي من غير ما تفهم السبب
إيمان:مغرتش...قتلك لي أنا ما نغير من حتى حد...أصلا مرتك و أنت حر فيها
أنا:ماهيش مرتي...و نظن حكينا في الموضوع هذا
إيمان:أنا باش نمشي توا
جات باش تقوم...كبست على يدها و رجعتها عندي نحكي
أنا:خليك...أول شي باش تفهمني شبي حالتك هكا و من غير ما تخبي عليا و بعدها نحلو حكاية سيلين
إيمان:كناان...سيبني أماانك...نحب نبقى وحدي
أنا:و أنا مانيش باش نخليك وحدك
عدات عينيها على وجهي...من غير حتى كلمة...تنهدت بالقاوي نحكي
أنا:إيماان...توا بالظبط باش نحكي معاك بصفتي المحامي متاعك...يعني إذا كان فما شي يخص أمير أصلان نحب نعرفو منك توا
جبدت يدها من يدي...كبست عليها و هزتلي براسها لا تحكي
إيمان:كناان...قتلك مفما حتى شي...علاش قاعد تظغط عليااا ياخي
أنا:مانيش نظغط عليك...أما زادة منجمش نخليك و إنتي في الحالة هاذي
إيمان:نجم نحل أموري وحدي
أنا:نعررف...نعرف لي إنتي تنجم تحلها وحدك...و عندي ثقة فيك...أما معنديش ثقة في الواطي أمير و في اللي ينجم يعملو
إيمان:قتلك لي الموضوع معندوش علاقة بأمير
أنا:أما ردة فعلك تقول العكس...ساعة نفرضو الموضوع يخص أمير...علاش قاعدة تجنب فيا ؟ و علاش تحاول تبعد عليا
إيمان:هكااا أحسن...مش لازم تقلق روحك بيا
مديت يدي بالوقت و عديت صوابعي على خدها..نحكي
أنا:أغزرلي هوني تراه
هزت عينيها في وجهي...خذيت نفس باش منضيعش في غزرتها أكثر...و تبسمت نحكي
أنا:قتلك قبل لي أنا حاجتي بيك و نحبك تكون معايا و ليا يعني مهما كان اللي قاعدة تتعدا بيه...يخصني أنا زادة و نحب نعرفو
إيمان:و حاجتك بمرتك زادة و إلا مكنتش جبتها عند أمك
أنا:بخصوص سيلين منجمش نخليها وحدها الفترة هاذي
غزرتلي مستغربة وين خدودها حمارو أكثر...كبست على يدها نحكي
أنا:توفى بوها من يومين...جاتو جلطة و منجمش يمنع منها و هي ما عندها حتى حد غيرو و سيلين كي تتعب نفسيتها تضر روحها
إيمان:معناها معادش عندها غيرك
أنا:عطيت خبر لخالتها و باش تكون هوني على قريب
إيمان:باهي برشا
أنا:شقولك نمشيو توا ؟
إيمان:وين ؟
أنا:منعرفش...مدامك متحبش تحكي شنوة صار...خلينا نبدلو جو مع بعضنا
إيمان:منحبش...مرتاحة هكا و ما عيني في حتى شي
كبست على يدها و وقفتها معايا...هزت راسها شوية غزرتلي...دموعها تلمت على جفونها...عدات يدها على خدها تمنع فيهم و تحكي فرد وقت
إيمان:كناان أماانك...قتلك ما نحب نجي معاك لحتى بلاصة
أنا:شنية هذا ؟
عديت صوابعي على خدها نمسح في دموعها قربتلي أكثر و دخلت في حضني تحكي
إيمان:معاادش تسألني كناان...متسألنيش خاطرني مانيش باش نجم نجاوبك
أنا:علاش الخوف هذا الكل و من شنية ؟
إيمان:من كلشي...أنا معادش نحب نخسر أكثر من هكا و قربك مني قاعد يضر فيا
هزت عينيها في وجهي و كملت كلامها...تحكي
إيمان:منحبش نتعلق بيك أكثر من هكا
عديت عينيا على وجها...مديت يدي شوية...غرستها في شعرها و عاودت حضنتها...كبست على أجنابي أكثر تحكي
إيمان:أنا خايفة من روحي...خاطرني قاعدة نحب فيك كنان
ضيقت عينيا مستغرب و جبدتها من عندي شوية حطيت يدي على خدها نحكي
أنا:صحيح لي سمعتو توا ؟
إيمان:قتلك معاادش تسألني
تبسمت و هزيتلها براسي باهي...خاطر بالرسمي مش مصدق لي سمعتو منها...حاولت تجبد روحها...رجعتها عندي نحكي
أنا:خليك عندي
إيمان:خلينا نمشيو توا
أنا:والله منظنش باش نخليك تبعد عليا بالساهل
إيمان:كنااان
أنا:روح كناان...حد ما قلك إعترف...خاطر كلشي ينجم يستنى قدام اللي قلتو
إيمان:أففف منك
ضحكت و كبست عليها...خاطر بالرسمي متوقعتش باش نسمع الكلام هذا منها...نزلت عليها شوية و بستها من راسها...و عديت يدي على شعرها محاولة مني باش نهديها خاطرني متأكد لي فما حاجة ورا هذا الكل...و الأهم أنو أمير عندو يد فيها..مدامها خايفة لهدرجة..فرد وقت منجمش نظغط عليها أكثر...و نخلي حالتها تولي أسوء من هكا...أكا علاش مانيش باش نحل معاها الموضوع توا مش قبل ما ترتاح و نحاول نفهم اللي صار بالظبط...بالمعنى الصحيح...باش نحط أمير أصلان في راسي و مستحيل نخليه يوصل للي يحب عليه بعد توا.
#إيمان_كنان❤
VOUS LISEZ
صرخة صمت 🌬
عاطفية🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
