🔸️حلقة 46
🔸️إيمان_تحكي:
حليت الباب و هزيت روحي خرجت...عديت عينيا على دارهم و زربت في خطواتي...منحبش نتذكر لي صار أمس و لا حتى نحكي معاه زادة...مدامو يحب يكون معاها هي...ضيقت عينيا على صوت تليفوني...علقت عليه كي لقيتو هو يطلب...أصلا تعمدت نخرج بكري باش منتصادفش معاه...منعرفش على روحي كيفاش وصلت للمعهد...وقفتني الطفلة لي في الرسيبسيون تحكي
هي:فما شكون يحب يشوفك...تلقاه في قاعة الإجتماعات
هزيتلها براسي باهي و كملت طريقي...حليت الباب بالوقت و هزيت راسي نغزرلو...عاطي بظهرو...كبست على صاك بالوقت...خاطرو آخر نحب نحكي معاه و لا نقابلو...تلفت عندي...هزني و حطني و قرب مني شوية يحكي
أمير:أهلا بيك
أنا:شتعمل هوني ؟
أمير:نظن فما حاجات قعدت عالقة بيناتنا لتوا و لازمنا نحلوها مع بعضنا
أنا:مفما حتى شي بيناتنا باش نحلوه...و مفما حتى شي يخليك تخاف مني بعد توا
أمير:معناها لتوا منجمتش تتخلى على الثقة متاعك في روحك
عديت عينيا على وجهو و قربت منو بخطوات ثابتة وقفت قدامو بالظبط نحكي
أنا:علاش مش صحيح ؟
خذيت نفس طويل...غزرت لعينيه و كملت نحكي
أنا:أنت تخاف مني يا أمير...تخاف من قرب ليك و من كلامي و من غزرتي والأهم تخاف من انك تضعف قدامي...هذا اللي يخليك تحط روحك في موضع قوة و تستعمل العنف باش تخبي خوفك...خاطرك أضعف من أنك تواجه مخاوفك
عدا عينيه على وجهي و تبسم على جنب...يحكي
أمير:صحيح و خوفي ولا يقتصر عليك إنتي...كان فما شي نخاف منو...هو إني نكمل حياتي من غيرك
أنا:و أنا مستحيل نكون مع شخص كيفك...اللي عملتو فيا أنت...متوقعتش باش نعيشو في حياتي الكل و صدقني...باش يجي نهار و تتحاسب على كلشي عملتو
أمير:قتلك قبل لي أنا راضي بكل عقاب يجي منك و حتى باش نحاول نتبدل على خاطرك...يكفي أنك تكون معايا و كهو
أنا:و إذا رفضت...تغتصبني مرة أخرى و لا تقتلني ؟
أمير:لااا...أما باش ندمر كل حد يقرب منك و لا يحاول يحط عينو عليك...و إنتي قبل ما تعمل أي خطوة تذكر أنك متاعي أنا و كهو
أنا:و أنا مانيش خايفة منك يا أمير أصلان...لا تهديدك و لا نفوذك يخلوني نتنازل لواحد كيفك أنت
أمير:و ماكش باش تكون معاه زادة
أنا:كنان أبعد من أنك تتحداه و تاقف في وجهو...أما تذكر لي انا مانيش لعبة تحارب عليها باش تربحها في الأخير
وخرت خطوة لتالي و عطيتو بظهري من غير ما نسمع كلمة أخرى منو و لا نغزرلو...من غير شي مخي مش فوقي من أحداث أمس...لدرجة منعرفش كيفاش كملت الدوام متاعي...لميت رسوماتي و خرجت لقيتو يستنى فيا برا كي العادة...قحرتلو و كملت ثنيتي خلط عليا بالوقت و جبدني من يدي دورني عندو يحكي
كنان:إيمااان
عديت عينيا على وجهو و جبدت يدي منو...وخرت خطوة لتالي نحكي
أنا:شنية تحب مني أنت زاادة ؟
كنان:إيمااان...متهبلنيييش ●●●● خلينا نحكيو مرة وحدة كيما خلق ربي
أنا:بالله...هااك وليت تكفر عليا ضربة وحدة...ملا أقعد هوني وحدك...ما نحب لا نحكي معاك و لا نسمعك زادة
كنان:مش على كيفك...هيا إيجااا
أنا:مانيش باش نجي معاك
كنان:توقعت مخك أكبر من أنو تخلي الغيرة تأثر عليك لهدرجة
أنا:أنا ؟ غرت ؟
كنان:ملاا شنوة تفسر هذا اللي تعمل فيه ؟
أنا:حتى شي...مدامك تحب تكون معاها...معااادش تقرب مني مرة أخرى
كنان:الصبر يااا ربي...الصبر
أنا:وليت انا الغالطة توا
قرب مني أكثر و عاود جبدني من يدي...ضربت فيه بالوقت...كبس عليا يحكي
كنان:أغزرلي هوني...الموضوع هذا باش نحكيو فيه بالسياسة و لا بالغصب...أكا علاش باش تتحرك قدامي تواا
أنا:ياااخي بالسيف ؟
كنان:إي بالسيف...هيا فيسع
حاولت نجبد روحي كبس عليا أكثر...طاوعتو كي ريت الجماعة لي معايا في المعهد خارجين...حلي الباب ركبت و خلط عليا...طار بيها بالوقت...نفخت بالقاوي نحكي
أنا:شنية تستخايل في روحك تعمل ؟
كنان:نخليك تسمعني...خاااطرني أكثر شي نفد منو حد ياااخو موقف و يفسر الأمور كيما يحب هووو
أنا:والله أنا قاااعدة نتصرف حسب اللي ريتووو مش من راااسي
كنان:بالله و شنية صورلك مخك ؟
أنا:مش مهم تعرف لي صورهولي مخي...و مانيش مستعدة باش نسمع حتى تبرير منك...مهما كااان مرتك و أنت حر فيهااا
كنان:باااهي...كيما تحب ملا
هزيت عينيا في وجهو و قحرتلو...كبس على الفولون من غير ما يحاول يحكي معايا أكثر..لدرجة منعرفش كيفاش وصلنا لسوسيتي...شد الفران بالقاوي يحكي
كنان:أنزل
أنا:علاش جبتني هوني ؟
كنان:عندي خدمة مهمة لازمني نكملها
أنا:باااهي...هاني باش ناخو طاكسي و نرجع لدار
كنان:والله إنتي مجبورة باش تبقى معايا لين نكمل و كي تحط عقلك في راسك بعدها نحكيو
أنا:شعندي نعمل هوني ؟ كنااان شبيك اليوم ياخي ؟
مد يدو فكلي صاكي و طيشو لتالي...بقيت نغزرلو مستغربة...حلي الباب يحكي
كنان:أزرب روحك
هزيت روحي نزلت...سكر الباب بالقاوي و جبدني من يدي...بقيت نطاوع فيه خاطرني مفهمتش شبيه كيما استغربت من ملامح وجهو لي تكبست...غزر لطفلة لي قاعدة في ريسيبسيون يحكي
كنان:أعطي تعليمات للكل هوني...أنو مدموزال إيمان متنجمش تخرج من غيري
أنا:شنووووة ؟
كنان:والله خدمتي باش طول و أنا معنديش ثقة في تصرفاتك و هبالك
أنا:و معندكش حق باش تحبسني معااك هوني زادة
كنان:هيا عزيزتي
كبس على يدي أكثر...يمشي فيا وراه...وين بقيت نفك في روحي منو لين وصلنا للاصونصير...حل الباب يحكي
كنان:أدخل
جبدت يدي منو و دخلت...قحرتلو و دورت وجهي باش منغزرلوش أكثر...وين باقي يتصرف كأنو ما عمل حتى شي و مش هو الغالط في الحكاية زادة .خرجت وراه و خلطت عليه للبيرو متاعو...وقف عند الباب و شاورلي للفوتاي يحكي
كنان:هيا أزرب روحك
دخلت و دورت راسي نغزر للباب...ردها من غير ما يسكرها...يحكي
كنان:متخافش...تعرفني مستحيل نضرك
نزلت عينيا من وجهو و مشيت قعدت على الفوتاي دخل ورايا و شد بلاصتو من غير حتى كلمة...تكيت لتالي نغزرلو...وين بديت نفد...نفخت بالقاوي نحكي
أنا:قداش باش نبقاو هوني
كنان:تعدات نص ساعة...يعني عالأغلب مزال عندي 3 ساعات خدمة
أنا:شنووة ؟
كنان:و من هوني لوقتها منسمعش حسك
قحرتلو و نزلت راسي نغزر لطاولة لقيت في وسطها لعبة...منعرفش علاش حسيتها بألعاب الذكاء...قربت منها شوية نلعب بيها...رغم أنو حسها قوي...خاطرها عبارة على حديد...قحرلي يحكي
كنان:إيماان...نقص الحس
قويت فيها أكثر...وين حسيتو كرز أكثر..باش حبستها
هزيت روحي وقفت و قربت شوية من البيرو متاعو نتفرج في الديكورات لي موجودة...خاصة الكراهب لي مرصوفين قدام بعضهم...و غزرتلو نحكي
أنا:نحب نمشي من هوني...هيا أعطيهم خبر باش يجيبولي صاكي و يخلوني نخرج
كنان:مش قتلك منسمعش حسك
أنا:بالله ؟ لااا يزززي غاالط و تزيد تتأمر عليا من فوق
كنان:إيماااان...شد بلاصتك توااا
أنا:متصيحش عليااا
هز عينيه في وجهي و حط الستيلو من يدو يحكي
كنان:شنوة تحب توا ؟
أنا:نمشي من هوني
كنان:لي عندي قلتو و إنتي ماكش باش تخرج من هوني...حتى كان ظطرينا نعديو ليلة هوني ماكش خارجة حتى تحط مخك في راسك و تتعلم تسمع الكلام و متصدقش كلشي تشوفو و تسمعو
أنا:بالله...شنية كنت تحب مني نشوف أكثر...و أنت حاطها في حضنك و تواسي فيها
كنان:هاذي آخر مرة نقلك فيها شد بلاصتك
أنا:فديت...مدامك جبتني لهوني ملا مجبور باش تتحملني و مدام طلبت منهم باش ميخلونيش نخرج هاني باش ننزل نعمل قهوة و نستناك لوطة
كنان:هاني باش نطلبهالك لهوني...إرتاح إنتي
أنا:أففف منك
مديت يدي شوية...هزيت ورقة...فكيت الستيلو من يدو و دوسي كان محطوط على جنب...غزرلي مستغرب قحرتلو نحكي
أنا:باش نرسم عليه و نرجعو
عطيتو بظهري و ترميت في وسط الفوتاي...تبسمت و أنا نرسم فيه...حتى غطست في الرسمة و معادش إهتميت بيه...فقت من سرحتي على صوتو يحكي
كنان:فاش قاعدة ترسم ؟
أنا:حتى شي...ألتهى أنت في خدمتك و أنا في رسمة متاعي...هكا باش منعلقوش في بعضنا أكثر
كنان:يكون أحسن
هزيت راسي غزرتلو مع صوت تليفونو...علق و حطو على جنب...ضيقت عينيا نحكي
أنا:متطلعش هي لي تطلب فيك
كنان:متحيرش روحك إنتي...خليك في الرسمة متاعك
أنا:معاادش عيني...وصلني توا و لا باش نمشي وحدي
كنان:على فكرة متنجمش تنزل حتى اللوطة...يعني من غيري ماكش باش تتحرك من هوني
هزيت روحي وقفت مرة أخرى...غزرلي يحكي
كنان:هات نشوف شنية رسمت
أنا:و تخليني نمشي من هوني
كنان:حسب الرسمة
هزيتها في يدي و قربت منو شوية....وقفت قدامو نحكي
أنا:مش قبل ما تطلبهم و تعطيهم تعليمات يخلوني نمشي
هزلي براسو باهي و مد يدو بالوقت خطفها من يدي حاولت نفكها منو قبل ما يشوفها...وخر بالكرسي متاعو لتالي و جبدني عندو في لحظة...لدرجة منعرفش كيفاش لقيت روحي في حملتو...تخضيت من الفازة و معرفتش شنوة نعمل بالظبط...حطيت يدي على كتفو نحكي
أنا:ك..كناان فاش تعمل ياخي ؟
حطو يدو على آخر ظهري و كبس عليا أكثر...عدا عينيه على وجهي يحكي
كنان:نحاول نشوف وين غطست قبيل...و مبعد باش نحلو موضوعنا
أنا:باهي سيبني قبل
كنان:خليك
عدا صوابعو على خدي وين حسيت دقات قلبي قوات و باش تفضحني قدامو...فرد وقت منجمتش ناخو نفس بالقدا...خاطر هاذي أول مرة نقربلو لهدرجة...حتى أكثر من قبل زادة...هزلي راسي شوية يحكي
كنان:بشنوة تحبنا نبداو ؟
أنا:حتى شي
كنان:علاش جيت أمس ؟
أنا:خاطرك قتلي مانيش باش نطول...أما كذبت عليا و عديت شطر وقتك معاها
كنان:سيلين تعاني من نوبات هستيرية ساعات لي يخليها تكسر الدنيا الكل و مرات تضر روحها زادة يعني كان حليت الباب و دخلت...تستوعب كلشي وحدك
أنا:ملا باش تواسيها تقوم تعنقها و تعطيها أمل لي أنت باش تكون معاها
كنان:أنا باش نكون معاها...أما مش بالطريقة لي صورهالك مخك...كلشي نجم نعملو إني ندعمها ماديا و معنويا باش تاقف على ساقيها مرة أخرى..غير هكا مفما حتى شي يربطني بيها
أنا:يعني معادش عندك مشاعر ناحيتها ؟
هزلي براسو لا...كبست على كتفو و خذيت نفس نحكي
أنا:باهي...ملا خليني نقوم أنا توا
كبس على ظهري و لصقني فيه أكثر...حسيت بأنفاسو لي ضربت على وجهي...رجعلي خصلات شعري لتالي بيدو لأخرى يحكي
كنان:حديثنا مزال موفاش لتوا
أنا:شنوة زادة ؟
كنان:هاذي آخر مرة...تغير فيها من سيلين...خاطر مفما حتى شي يربطني بيها
أنا:و هاذي آخر مرة...تسمح لشكون تعنقك و لا تقربلك
حطيت صبعي شيرة قلبو...غزرت لعينيه و كملت نحكي
أنا:أنت متاعي وحدي كنان و مانيش مظطرة باش نشاركك مع حد...يكفي أنك تستناني كيما وعدتني و كهو...خاطرني لتوا نحس في روحي ضايعة و حتى كان قبلت عرضك...مانيش باش نكون الطفلة لي تحب تكمل حياتك معاها...مدامني لتوا منجمتش نتخلص من بقايا أمير داخلي
غرس يدو في شعري و قرب لشفايفي أكثر يحكي
كنان:ششش...معادش نحب نسمع إسمو على لسانك مرة أخرى
أنا:أما هو حقيقة منجمش نهرب منها بمجرد إني معادش ننطق إسمو
مديت يدي مترددة و حطيتها على خدو مع ملامح وجهو لي تكبست...نحكي
أنا:أكا علاش نحبك تعاوني...خليني نتخلص منو بوجودك معايا كنان
كبس على شعري أكثر و عدا شفايفو فوق شفايفي باش يحكي...أما سكت مع صوت الباب لي تحل بالوقت.
VOUS LISEZ
صرخة صمت 🌬
Roman d'amour🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
