🔸️حلقة 4
شديت الفران على جنب...هزيت العشا في يدي و نزلت من الكرهبة...أول ما دقيت عليه...حلي الباب داخل بعضو ضيقت عينيا نحكي
أنا:منطلعش جيت في وقت غالط ؟
آدم:لااا كنت نرتب في الصالة...هيا إيجااا
دخلت وراه...نلقاه يلم في لي بوات متاع البيتزا و الكيسان ضحكت نحكي
انا:ياخي كنت عامل حفلة هوني ؟
هز حاجو و ضحك على جنب...حطيت من يدي و ترميت على الفوتاي...نحكي
أنا:زيد هز هاذي
آدم:كنان صارت حاجة ياخي ؟
انا:طلقت سيلين
غزرلي ندرا كيف و فلت كلشي من يدو في لحظة ضحكت و تكيت لتالي نحكي
أنا:شبيك ؟
آدم:سمعتك بالقدا ؟ و لا قاعد نستخايل ؟
أنا:سمعتني مليح سي آدم
ضيق عينيه مستغرب و ترمى بجنبي...سكت شوية و غزرلي يحكي
آدم:طلقتها طلقتها ؟
أنا:طلقتها لفظي و مزال توقيعها
آدم:هكا من غير مشاكل ؟
انا:تنجم تقول الناس الكل شهدت علينا كي العادة
آدم:حتى انا منتوقعش العكس و خليتها وحدها
انا:عطيت خبر لبوها باش يهزها...خاطر حتى حد ماهو باش يهديها غيرو
آدم:نفهم منك لي وليت حر توا ؟
جيت باش نحكي...نوقز تليفونو...غزرت لرقم متاعها و ضحكت نحكي
انا:عالأغلب وليت حر
آدم:معناها وحلت في راسي أنااا تواا
أنا:هيااا قوم لم الدنيا هااذي...جيت باش نبدل جو مش نحكي عليها...سكر تليفونك في هالليلة الكلبة و جيبلي حاجة نشربها
آدم:صااار باش تردني سرفور متاعك توااا
أنا:هياا فيسع...عالأقل نعملو بارتي و لا زوز مع بعضنا
آدم:والله فكرة لحظة برك
عاود لم الدنيا بالزربة...سكرت تليفوني و تليفونو فرد وقت خاطرني نعرفها بالقدا...ماهيش باش تهدا و لا ترضى باللي صار...كيما منحبش نتنازل لتهديداتها بأنها باش تقتل روحها و لا تعمل أي شي آخر...أحسن شي معادش نقابلها جملة الفترة هاذي...و لا حتى نشوف وجها...حط الدبوزة و الكيسان فوق الطاولة يحكي
آدم:خبر هكا لااازم إحتفاال طويل
انا:محسوب إحتفالك يكمل من غير وحدة من النسا لي عندك
آدم:الحق عليا قاعد نفرهد فيك
ضحكت بالوقت و تكيت لتالي...شعل التلفزة و رمى ال manette في يدي يحكي
آدم:كان نربحك توا...انا نختار وين نكملو السهرية
انا:و اذا صار العكس تأكد انو برشا خدمة تلقاها تستنى فيك
آدم:باااهي خلينا نشوفو تراه
تبسمت و كبست عليها في يدي...لحظات و لقيت روحي في وسط اللعب...قص علينا صوت الباب لي يضرب بالقاوي لي خلاه يسجل هدف ضدي...ضحك يحكي
آدم:شرفتنا طليقتك
انا:متوقعتش العكس صراحة
آدم:تذكر لأنا ربحتك...معناها انا باش نطلع نحضر روحي لين انت تتخلص منها
ضحكت و هزيتلو براسي باهي...خذيت نفس طويل و هزيت روحي حليت الباب...هدت عليا بالوقت...تضرب فيا ورا بعضو و تصيح
سيلين:علاااش عملت فيااا هكا يا كنااان...علاش تخرج فيا من حياتك و تعرفني نموت عليك
جيت باش نحكي...طاحت تحت ساقيا...و ك بست على ساقي تحكي
سيلين:أمااانك متعملهاااش...اعطيني فرصة وحدة كهو
خذيت نفس طويل و نزلت عندها...كبست على اكتافها و وقفتها نحكي
انا:سيلين أعمل عقلك و استوعب انو اللي تعمل فيه غااالط...وجودي معااك ماهوش باش يفيدك بحتى شي
سيلين:اما عالأقل كنت معايا...حتى انت ولا مرة حاولت تسمعني و لا تعطيني فرصة نوضحلك
أنا:نفرضو ان تعديت لي صار...تتوقع مني باش نحبك ؟ إنتي حتى معطيتنيش الفرصة هاذي يا سيلين معطيتنيش فرصة باش نحبك قبل تتوقع باش نحبك توا
سيلين:اما بقيت معايا...شنية لي خلاك تاخو القرار هذا توا ياخي تحب في شكون كنان ؟ جااوبني...طفي النار لي شعلتها دااخلي
انا:لااا...تعرف علاش ؟ خاطرك إنتي قتلت فيا الثقة في النسا الكل...انا جرايرك إنتي يا سيلين ما نجم نأمن حتى مرا لا على حياتي و لا أسراري زادة
سيلين:ك..كنان
انا:انساني و عيش حياتك...خاطر المرة هاذي حتى شي ماهو باش يخليني نتراجع على قراري
غزرتلي ندرا كيف و عنقتني بالوقت...كبست عليا لدرجة اني عجزت باش نبعدها عليا...رغم انها عزت بيا اما حتى كان حاولت مستحيل نجم نصلح لي تكسر و لا حتى نجم ناثق فيها مرة اخرى...كلشي نحب عليه اني نحط حد لعلاقة سامة...ليا و ليها...احسن ما تربط حياتها بيا و تضيع روحها اكثر من هكا...هزيت راسي شوية نغزر لسي طارق لي يغزرلها بإنكسار...اما هو أكثر حد فينا يعرف بنتو..يعرف انها متتقبلش الخسارة...كيما انو ستانست تعيش بمبدأ انو اللي تحبو يكون بين يديها...و هذا اللي وصلها للحالة هاذي اليوم...يمكن هو السبب الأول خاطرو رباها متفرقش بين الصحيح و الغالط...بين انها تفهم لي ليها و لي عليها زادة تنهدت بالقاوي و جبدت روحي منها...حطت يدها على خدي و قربتلي أكثر باش تبوسني...وقفتها نحكي
انا:بوك يستنى فيك
وخرت خطوة لتالي...قرب منها بالوقت و جبدها عندو يحكي
طارق:هيا إيجا خلينا نمشيو
مشات معاه من غير ما تنزل عينيها من وجهي...فقت من سرحتي على صوت آدم يحكي
آدم:شنية لي صار ؟
انا:لي كان لازم يصير من سنين فاتت
آدم:أنت لباس ؟
انا:أحسن من أي وقت تعدا عليا
آدم:يعني ؟
انا:مدامك كسبت الرهان...خلينا نعديو الليلة على كيفك
آدم:تفضل كنان العامري...السهرية على حسابي أنا
ضحكت و خلطت عليه...اختار الكرهبة الثانية و لي بالعادة مستحيل ينجم يستغنى عليها...ركبت و حطيت الحزام نحكي
انا:باش يجي نهار و ناخوها منك
آدم:وقتها باش يكون أكبر تحدي بيناتنا و مستحيل نخليك تطلع رابح منو
انا:متتأملش برشا...ساعة كي نحب حاجة ناخوها
ضحك و نزل على الفيتاس...تكيت لتالي و تنهدت براحة توا بالظبط ما نحب نخمم في حتى شي...لا في اللي فات و لا في اللي جاي زادة.
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
