صرخة صمت 🌬

الحلقة الثامنة عشر

🔸️حلقة 18
🔸️إيمان_تحكي:
بقيت واقفة جنب الباب...نستنى فيها باش تتحل...من آخر مرة حبست بينا...معادش نأمن فيها...كيما منجمش نطلع الدروج هذاكا الكل باش نوصل لهوني...باقي على أعصابي لين تحل الباب خرجت بالزربة كي عادتي و خذيت نفس طويل لقيت السكرتيرة متاعو ماشية وقفتها نحكي
أنا:سي كنان هوني ؟
نهاد:عندو إجتماع توا...تنجم تستناه في البيرو متاعو
أنا:لازمني نرجع للخدمة...منعرفش علاش طلبني توا مدام عندو إجتماع
نهاد:منجمش نقطع الإجتماع عليهم توا
أنا:باهي...هاني باش نستناه
خذيت نفس طويل و دخلت للبيرو متاعو...ترميت على الفوتاي نستنى فيه...الوقت وقف كأنو ماهوش يتعدا يعني كان مش صاحب الكافي هو لي عطاني علم باش نجي لهوني...مستحيل كنت نطلب إجازة أخرى خاطرني نعرف كثرت عليه و مش من صلاحياتي لي قاعد يصير...حطيت صاكي على جنب و هزيت روحي وقفت...خاطرني فديت من القعدة من غير حتى شي قربت شوية من البيرو متاعو عديت صوابعي على اللوحة لي محفورة عليه حروف إسمو و دورت راسي نغزر لشهادات متاعو و جوائز و كراهب صغار مرصوفين ورا البلار...تبسمت بالوقت خاطر البيرو هذا قد ماهو هادي و منظم...يعكس شخصيتو فرد وقت...رغم لتوا منعرفوش بالقدا و منعرفش وين باش ترصيلي في آخر الثنية هاذي...أما شي داخلي طمني ناحيتو و يقولي لي هو مستحيل يغدر بيك و يدو باش تقعد ممدودة ليك في كل مرة إحتجتها...ساعات منعرفش اذا هذا إحساسي و لا الكلام لي أنا نقنع في روحي بيه خاطرني نحسو الوحيد لي ينجم يخرجني من المتاهة هاذي..غير هكا أنا قتلت كل إحساس آخر فيا...معادش عندي أحلام تتعلق براجل و لا بصغار...كرهت الجنس هذا و العرس و كلشي يخصو...أكا علاش أكثر حاجة تهمني منو...هي الثقة...خاطر كان صار و كسر ثقتي فيه يكون قتل فيا جزء آخر مني و اللي باش يخليني ما نأمن لحتى حد بعدو...مهما كان يكون...تنهدت بالقاوي و عديت عينيا مرة أخرى على الحاجات لي موجودة ورا البلار...و نزلت بيهم لتصاور لي محطوطة على جنب البيرو متاعو هزيت واحد من les cadre في يدي...تبسمت و أنا نغزر لتصويرتو هو و آدم...ظاهرة من أيام المدرسة معناها طلعو أصحاب من بكري...شنية لي يخلي لآخر مهبول هكا منعرفش..زعمة بالرسمي عندو إنفصام في الشخصية كيما قالت ملاك...أصلا متوقعتش كنان باش يعاودلو و شعرة لا تمشي فيها جرايري...فقت من سرحتي على صوت الباب لي تحل...تبسمت نحكي
أنا:كناان
ضيقت عينيا كي مردليش...دورت راسي بالوقت نغزر لطفلة لي كانت معاه آخر مرة هوني...قحرتلي و نطرت الباب وراها تحكي
سيلين:شتعمل هوني ؟
أنا:علاش البيرو متاعك ؟
تبسمت على جنب و قربت مني بخطوات ثابتة وقفت قدامي بالظبط...هزتني و حطتني تحكي
سيلين:إنتي تعرف مع شكون تحكي ؟
أنا:لا و ميهمنيش نعرف
سيلين:واضح...أصلا إنتي كيفاش تدخل لهوني من غير ما يكون كنان موجود
أنا:كيما دخلت إنتي
حطت صاكها على البيرو...قعدت على الكرسي متاعو تكات لتالي و قحرتلي تحكي
سيلين:تنجم تخرج ملا...ساعة خليك شوية...نحب نتعرف بيك قبل ما تمشي...شتعمل هوني و شنية علاقتك بكنان ؟
أنا:شمدخلك إنتي ؟ شكون أنا و شنعمل هوني و علاقتي بكنان...حاجة متخصكش
سيلين:خمم قبل ما تجاوبني...خاطرك بالطريقة هاذي باش تحل حرب على روحك صدقني
أنا:بالرسمي...و إنتي تستخايلني باش نخاف منك
سيلين:بالظبط...لازمك تخاف
تبسمت و حطيت الكادر من يدي...هزيت عينيا في وجها نحكي
أنا:أغزرلي هوني...كان إنتي تهدد أنا نفذ...و كان إنتي مهبولة و ترمي في بلاك عليا...أنا هبالي ما يقدو حد و صدقني كان يطلع عليك...متعرفش سااقك من راسك أكا علاش إحترم روحك أحسنلك
سيلين:والله مكنتش نعرف لي كنان نزل للمستوى هذا
كبست على يدي نهدي في روحي...منحبش نغلط فيها و أنا منعرفهاش من أصلو...قحرتلها نحكي
أنا:هاك إنتي معندكش مستوى من أصلو و ظاهر ماهوش مرحب بيك هوني...على حد علمي آخر مرة خرجت من البيرو هذا مطرودة
غزرتلي ندرا كيف و هزت روحها وقفت...قربت مني بالزربة و وقفت قدامي تحكي
سيلين:إنتي كيفاااش تسمح لروحك تحكي معايا بالطريقة هاااذي...ساعة متطلعش إنتي صحبتو الجديدة
أنا:لااا عاااد...ميطلعش هو لي تخلى عليك ؟
مدت يدها باش تضربني...شديتها بالوقت...كبست عليها و قربتلها أكثر نحكي
أنا:رد باالك...أنا مانيش كيف الناس لي تحاول تستعبدهم مهما كنت تكون...يدك متتهزش في وجهي مرة أخرى خاطر ردة فعلي المرة الجاية ماهيش باش تعجبك
بقات تغزرلي من غير حتى كلمة... أصلا تقحيرتها كانت كافية باش تعبر عالشي لي في داخلها...تحل الباب بالوقت دخل مستغرب و هو يغزرلنا...نطرتلها يدها و وخرت خطوة لتالي...قربت منو و وقفت قدامو تحكي
سيلين:شكوون هاذي كنان ؟ شكون الكلبة هاااذي ؟
كنان:إحترم روحك سيلين...أصلا إنتي شتعمل هوني ؟
سيلين:أنا و لا هي ؟ ياااخي هاذي صحبتك الجديدة ؟ هااذي لي تخون فياا معاها
كنان:سيليييين يززززي كهووو...يزززي من فضايحك فاش يهمك إنتي...شنية يخصك فيها و في علاااقتي معاها يااخي متعبتش من اللي تعمل فيه...أصلا بصفتك شنوووة تحكي في الكلام هذا
سيلين:بصفتي مرررتك يا كنااان...مرتك
هزيت راسي بالوقت...جات عيني في عينو..منعرفش علاش صدمني كلامها التالي...و اللي متوقعتوش جملة أصلا ولا مرة جا في بالي لي هو معرس..و لا حتى طرحت السؤال هذا لروحي..كيما منعرفش علاش تصدمت هكا و دخلت بعضي...خذيت نفس و تداركت روحي...أحسن شي نعملو توا إني نخرج من هوني و كهو...مديت يدي رجعت بيها خصلات شعري ورا وذني...و قربت منهم شوية...هزيت صاكي من الفوتاي و وقفت قدامو نحكي
أنا:أنا باش نمشي توا...نخليكم تحلو أموركم العائلية وحدكم
نزلت عينيا من وجهو و هزيت روحي باش نخرج...كبس على يدي بالوقت...لي خلى دقات قلبي تخض بالقاوي..دور راسو شوية و غزرلي يحكي
كنان:خليك إيمان...هي لي باش تخرج من هوني
سيلين:أنت فاش ق..قاعد تقول...كنان شنية لي قاعد يصير هوني ؟
كبس على يدي أكثر و جبدني عندو...جيت باش نحكي يدو دارت على جنبي بالوقت...لي خلاني مصدومة منو و من تصرفاتو و من دقات قلبي لي متحبش تهدا...تبسم يحكي
كنان:شكك صحيح...أنا و إيمان مع بعضنا
غزرتلو ندرا كيف و هزت عينيها في وجهي...بقيت ساكتة من غير حتى كلمة...منعرفش علاش حسيت روحي بكشت و معرفتش نتصرف في الوضع لي حطني فيه...قربو ليا و كبست يدو...أنفاسو القريبة مني و ريحتو و غزراتها هي زادة مع لمعة عينيها...حاجات خلاتني نفقد تركيزي و منعرفش إذا نلومها هي خاطر من تصرفاتها واضح حد ما ينجم يتقبلها و لا نلومو هو خاطر كان من المفروض ياقف معاها و يعاونها باش تبدل من روحها...مش يعاملها بالطريقة هاذي...بطبيعتي منحبش الراجل لي يهين المرا و ينقص من قيمتها و يقهرها بالطريقة هاذي...بالرسمي حسيت روحي عاجزة بين موقفي ناحية اللي قاعد يصير مهما كان منقبلش طفلة أخرى تتقهر جرايري أنا و بين إني نسكت و مندخلش روحي بيناتهم...رجعت شعرها بتوتر و هزت صاكها من البيرو تحكي
سيلين:أنت متنجمش تعمل فيا هكا...مستحيل تتخلى عليا يا كنااان...صدقني مستحيل نخليك تتهنى معاها مهما صاار
كنان:اللي يطلع بيدك متقصرش فيه...سكر الباب وراك كي تخرج
غزرتلو ندرا كيف و هزت روحها خرجت...جبدت روحي منو مع خبطة الباب...و مديت يدي ضربتو لصدرو نحكي
أنا:شنية هذاااا لي عملتووو...أنت كيفاااش تكذب عليها بالطريقة هاااذي...و تحطني في وسط اللعبة هاذي
كنان:كنت بحاجة مساعدتك
أنا:بالله ؟ هكااا من غير ما تسألني...معناها باش تغيض مرتك...تستعمل فيااا أنا
كنان:منظنش كنت باش تردني
أنا:لا يا سيدي باش نردك...خاااطر اللي تعمل فيه ميجيش و مش بااهي في حق مرتك...ياااخي مريتش حالتها و هي خارجة من هوني...مخفتش عليها كان تصيرلها حااجة
كنان:متخاافش عليها مستانسة
أنا:مستانسة ؟ والله أنت آخر حد توقعت منو المعاملة هاذي و لأقرب وحدة منك زادة
كنان:إيمااان يزززي كهو...اللي صار تستحقو و تستحق أكثر منو زاادة...الموضوع هذا منحبش نحكي فيه مرة أخرى تفضل أقعد توا
أنا:لااا مانيش باش نقعد...مش قبل ما تعتذر منها و تفهمها أنو الكلام لي قلتو مش صحيح..أنا منحبش نكووون طرف في اللعبة هاااذي و لا نكون عدوة مرتك لي منعرفهاش أصلا
كنان:معااادش تخمم فيها ملاا
أنا:هذااا اللي طلع معاااك في الأخير
كنان:إيمااان قتلك يزززي و أخرج منها الحكاية و كانك عاللي صار...نعتذر منك أما مدخلش روحك في حاجة متخصكش و خاصة في علاقتي مع مرتي
أنا:عندك حق...أصلا الحق عليا أنا خاطرني مزلت واقفة هوني...و حط في بالك انو مساعدتك ليا متعطيكش الحق باش تتحكم فيا و لا تستعملني باش تغيض مرتك و لا غيرها
عدا يدو على وجهو كأنو يهدي في روحو و غزرلي باش يحكي...قصيت عليه كي عطيتو بظهري و خرجت...خاطر ما عندي حتى إستعداد باش نسمع كلمة أخرى منو...زربت في خطواتي...لدرجة منعرفش كيفاش وصلت للأصونصير...حليت الباب و دخلت...الغصة لي شدتني من كلامو...خلات دمعة تهبط على خدي...منعرفش شنية لي قهرني بالظبط
الموقف لي حطني فيه و لا طريقة كلامو معايا لي منحبهاش جملة...مسحتها بيدي و خذيت نفس طويل نحكي
أنا:الساااقط...الوااطي...ياخي باش تبكي جرايرو توا...الله لا تربحك يا كنااان...الحق عليااا خاطرني وثقت فيك من الأول...حتى أنت طلعت تخمم كيما الكل
سكت شوية و هزيت براسي لا...نعرف لي هو مش كيما بابا و أمير و اللي كيفهم...أما حتى لي عملو شي ميتغفرش و مستحيل يخليني نتنازل و نرجع لهوني مرة أخرى و لا حتى نخليه يستعملني ضد مرتو أصلا ستانست بخيبات الأمل و لي صار مش جديد عليا أكيد باش نلقى حل غيرو..أول ما تحل الباب...هزيت روحي و خرجت...نمشي بالزربة...كلشي يهمني توا إني نخرج من السوسيتي متاعو و كهو...و معادش نرجع لهوني مرة أخرى...فرد وقت منجمتش نسكت باقي نسب فيه ورا بعضو...عديت يديا زوز على خدودي نحكي
أنا:زاايد ميحشمش...على أساس أنا لي حبيت ندخل روحي في علاقتو مع مرتو...واااطي
سكت كي ضربت فيه بالوقت...وخرت لتالي و هزيت راسي غزرتلو...غمزني يحكي
آدم:شبيك ؟
أنا:شمدخلك أنت زاادة...زاايد حد فيكم ما يحشم هوني
آدم:لااا عااد...ميطلعش كنان السبب في حالتك هاذي
أنا:أبعد من ثنيتي توا...أحسن ما نخرج غشي الكل فيك أنت
آدم:قولي ساعة...صاحبي لباس ؟ متكونش عملتلو حاجة
كبست على صاكي أكثر نهدي في روحي...خاطر منجمش نتحملو هو زادة...ضحك يحكي
آدم:نمشي نتأكد يكون أحسن
عدا عينيه على وجهو و كمل طريقو...خذيت نفس طويل نحكي
أنا:الله لا تربحك أنت زادة
رجعت شعري و هزيت روحي خرجت...زربت في خطواتي أكثر...لدرجة منعرفش كيفاش وصلت للكافي...استلمت خدمتي بالوقت...خاطر كانت الحاجة الوحيدة لي باش تلهيني و تخليني ننسى اللي صار بكري...خاصة إني نحس في روحي مغزلة عليه لتوا...و متوقعتش منو أنو يعمل معايا هكا و لا يحكي معايا بالطريقة هذيكا جملة...فرد وقت...كنت نلوم في روحي خاطر سكت قدام مرتو و خليت روحي وسط اللعبة هاذي.
#إيمان_كنان❤