صرخة صمت 🌬

الحلقة السادسة و العشرون

🔸️حلقة 26
🔸️كنان_يحكي:
هزيت راسي شوية نغزرلها مروهج...جمدت في بقعتي و منجمتش نقدم خطوة وحدة...منجمتش نستوعب لي صار فقت من سرحتي كي غابت على عيني...منعرفش على روحي كيفاش وصلت عندها...بعدت الناس لي دايرين بيها و نزلت عندها بالوقت...مديت يدي بالسيف بعدتلها خصلات شعرها...لي لصقت مع دمها نحكي
أنا:إ..إيمان...إيمان حل عينيك أمانك
كبست على خدها أكثر...قلبي خض بالقاوي و أنفاسي تقطعت...هزيت راسي غزرلهم نحكي
أنا:حد يطلب الإسعاااااف تواا
قرب مني واحد من أمن السوسيتي و وقف قدامي يحكي
هو:جايين في الطريق سي كنان
خذيت نفس و انا نعدي في يدي على وجها...محاولة مني باش نخليها تفيق...خاطر ما نحب نخمم في حتى إحتمال آخر...مسحت الدم لي ماشي و يقوا و هزيت راسي نغزر لآدم لي نزل عندي يحكي
آدم:إيمااان...شبيها...شنية لي صار كناان ؟
بقيت نغزرلو من غير حتى كلمة...أصلا الأصوات الكل حسيتها بعيدة...و لقيت روحي قاعد بجنبها من غير ردة فعل...عاودت غزرتلها نحكي
أنا:أ..أنا السبب
آدم:كنااان هدي رووحك
كبست على يدها بالوقت...و بعدت شعرها لتالي أكثر نحكي
أنا:رد باالك تسلم في رووحك...رد بالك تخليني...حل عينيك أماانك
هزيت راسي شوية...عديت عينيا عليهم و غزرت لآدم نحكي
أنا:وييين الإسعااااف لتوااا
آدم:كناان هدي روحك أماانك
أنا:أنا السبب...أنا لي خوفتهاااا مني و إلا مصاارش هذا الكل
هزيت راسي شوية نغزر للإسعااف لي وصلت...هبطو في لحظة و قربو منها...غزرلي واحد منهم يحكي
هو:شنية صاار بالظبط
أنا:ضربتها كرهبة
هو:أبعد شوية ميسيو ؟
أنا:عاايشة ؟
بقيت نستنى في جوابو...منعرفش كيفاش خرج معايا السؤال هذا...أما معاادش نحب نخمم في إحتمالات أخرى هزلي براسو إيه...بعدت عليها شوية و هزيت روحي وقفت خلطت عليهم بالوقت و ركبت بجنبها...كبست على يدها بكل قوتي...نعدي في عينيا بيناتهم...معادش عندي طرف جهد باش نسأل على حاجة...خذيت نفس نحكي
أنا:تحمل..تحمل إيمااان..خليك قوية كيما نعرفك..متفقدش
روحك من توا...مزال فما برشا حاجات باش تعيشهم عزيزتي
غمضت عينيا بالقاوي و عاودت حليتهم...منعرفش كيفاش صار هذا الكل في لحظة...الخوف لي تملكني صعيب إني نوصفو...يمكن الحاجة الوحيدة لي تأكدت منها أنو كلشي صار معايا لتوا...مش مجرد مشاعر و كهو...غرقت فيها قبل ما نلحق ننقذ روحي من اللي عشتو...و رغم نعرف أنو ثنيتي معاها مسدودة...أما لأول مرة منجمش نمنع روحي و قلبي عليها...فقت من سرحتي على صوت الباب لي تحل خلطت عليهم و دخلت معاها...بقيت واقف في بلاصتي نغزرلهم لين غابت على عيني...دورت راسي شوية نغزر لآدم لي حط يدو على كتفي يحكي
آدم:متخاافش...باش تمنع منها أنا متأكد
جيت باش نحكي قص عليا صوت الراجل لي واقف ورانا كي قربلي متردد يحكي
هو:منقصدش لي صااار...منعرفش كيفاش خرجت في وجهي و منجمتش نتحكم في الكرهبة
هديت عليه من غير ما نخمم مرتين...كبست على الفاست متاعو و رجعت بيه لتالي نحكي
أنا:والله كان تصيرلهاااا حاااجة...حد ماهو باش يفكك من يدددي
آدم:كنااان سيب الراااجل...مش وقت الحديث هذا توا
كبست عليه أكثر و عاود رخفت يديا في لحظة...بعدت عليه و كبست على راسي من تالي نحكي
أنا:الحق علياااا أناا...أنااا لي خليتها تخااف مني...أنا لي سكرت عليهااا الباب يااا آدم...كانت تتخايل فيااا أمير الكلب...أكااا علاش هربت مني بالطريقة هاااذي
آدم:بااهي...هدي روحك توااا...أهم شي نعرفو حاالتها و أنت في الحالة هاذي ما تنجم تعاونها بحتى شي
كبست على راسي أكثر و جبدت روحي منو...معادش نجم نستوعب أكثر و لا حتى نسمع صوت حد فيهم...لتوا ملامحها محبتش تغيب على عيني...منعرفش كيفاش غفلت على حالتها و الشي لي عاشتو و تصرفت معاها بالطريقة هاذيكا...هزيت راسي نغزر للفرملية لي خرجت و قربت مني تحكي
هي:حد منكم يعرف زمرة دمها ؟
بقيت ساكت شوية...تعدا التقرير متاعها بين عينيا...خذيت نفس نحكي
أنا:B negatif
هي:حد منكم عندو الزمرة هاذي ؟
هزيتلها براسي لا...حتى لي ضربها معندوش نفس زمرتها غزرلي يحكي
آدم:هاني باش نطلب ملا و رغد و اللي نعرفهم زادة
أنا:بااهي
نزلت راسي شوية...نغزر لدم متاعها لي مزال على يدي كبست عليها و شيعت راسي نغزر للباب...وين آدم بقى يعمل في الإتصالات متاعو...متعداش نص ساعة...ملاك كانت وصلت...قربت منا تحكي
ملاك:شنية لي صااار ؟ إيمااان وينهااا ؟
بقيت ساكت من غير حتى كلمة و آدم نفس الشي...غزرتلي تحكي
ملاك:شبيكم ساااكتين حد منكم يجاوبني
آدم:ملااك هدي رووحك...إيمان تعرضت لحادث و باش تمنع منو...و لازمنا شكون يتبرعلها توا
ملاك:أنا A positif
آدم:مينفعش
هزيت راسي نغزر للفرملية لي قربت منا و غزرتلي تحكي
هي:واحد من رجال الإسعاف طلب مني باش نسلمكم الصاك متاعها خاطر تليفونها من بكري ينوقز
قربت منها ملاك...فكاتو من يدها و جبدت تليفونها...ردت عليه قبل ما يعلق و بعدت علينا شوية تحكي... دقايق و رجعت ساكتة من غير حتى كلمة...أصلا حتى حد منا ما عندو طاقة باش يحكي بعد اللي صار...الوقت تعدا رزين
برشا...لدرجة خلاني عاجز حتى باش نخمم في اللي باش يصير...هزيت راسي نغزر للفرملية مرة أخرى...لي غزرتلنا تحكي
هي:زمرة دمها نادرة و لازمنا دم فيسع
نزار:أنا نتبرعلها
دورت راسي بالوقت...غزرتلو مستغرب...كيفاش و إمتي وصل لهوني و عرف باللي صار ؟ كبست على يدي نهدي في روحي خاطرو آخر حد نحب نقابلو توا و منعرفش إذا باش نجم نتحكم في روحي و أعصابي أكثر من هكا.
#إيمان_كنان❤