صرخة صمت 🌬

الحلقة الثالثة و الثمانون

🔸️حلقة 83
حليت عينيا على صوت الباب...جيت باش نحكي أما سكت كي ريتو يقرب مني...هزيت روحي شوية تقعدت وقفني بيدو يحكي
كنان:خليك...متعبش روحك
عديت عينيا على وجهو من غير حتى كلمة...أصلا شوفتو كافية بالنسبة ليا...أما فرد وقت منجمتش ننسى لي صار معايا...و مزلت عند قراري في أنو البعد هو الحل الوحيد في الفترة هاذي...عالأقل باش نحمي صغيري من الظغط لي أنا فيه...غزرلي يحكي
كنان:إنتي لباس توا ؟
هزيتلو براسي إيه...قربلي أكثر وين دقات قلبي بدات تقوا مع كل خطوة منو...خاطر متوقعتش باش يدخل عندي...عدا يدو على وجهو و غزرلي يحكي
كنان:إيماان...بالرسمي منقصدش لي صاار..أنا جيست كنت بحاجة راحة و كهو
أنا:عاادي ما صاار شي
جبد الكرسي و قعد مقابلني...كبس على يدي و هز عينيه في وجهي يحكي
كنان:أغزرلي هوني...آخر فترة تعبت برشا و قربك مني كان يظغط عليا..خاطر بالرسمي ما نجمت نتذكر حتى شي اللي عشناه مع بعضنا...كيما منحبكش تتعب معايا و لا حتى تخسر صغيرك بسببي إيماان
أنا:كان تحب تتأكد أنو الصغير ولدك تنجم تعمل تحليل مدامنا هوني
كنان:لااا...مستحيل نعمل حاجة هكا...حتى إني مصدق كلامك إيمان أما رغم هكا مزلت ضايع...معاد نعرف نعمل حتى شي من غير ذاكرتي...حتى شي ما عندو طعم بالنسبة ليا...كأني ضايع في عالم وحدي
جبدت يدي منو شوية و كبست عليها...خذيت نفس نحكي
أنا:تنجم تاخو وقتك الكل كنان...خاطر حتى أنا بحاجة راحة الفترة هاذي...حتى ما نحب نخمم في حتى شي من غير صغيري و كهو
كنان:شقولك ترجع معايا للفيلا...خلينا نحاولو مع بعضنا من جديد...يمكن هكا نجم نهتم بيك أكثر
أنا:لااا منحبش...خاطر مش مستعدة نعيش تحت أي ظغط كنان...حتى متأكدة أنو مزال فما شك داخلك بخصوص الصغير هذا...و مانيش باش نلومك زادة أنت معذور و أنا مانيش باش نظغط عليك أكثر...أكا علاش معادش تتحير عليا...يكفي أنك تكون مرتاح و كهو
كنان:مانيش مرتاح إيمان...و مستحيل نرتاح قبل ما نسترجع ذاكرتي و حياتي لي خسرتها جراير الحادث
سكت خاطرني قاعدة نحس بنفس الشي زادة معرفتش نرتاح في بعدو عليا و لا حتى نهتم بروحي كيما يهتم بيا هو...كنان كان و مزال السند لي نتكى عليه في كل مراحل حياتي و بعدو عليا خلاني نطيح من القمة لقاع الأرض...ضعت لدرجة أنو معادش نعرف نتصرف و لا ناخو قرار صحيح بخصوص حياتنا...نزلت عينيا من وجهو مع صوت الباب...دخلت ملاك تحكي
ملاك:أمي زينب رجعت و الإجراءات كاملة باش تخرج عزيزتي
أنا:باهي برشا ملا...حتى أنا تخنقت من الجو هوني
كنان:أنا باش نوصلك
أنا:لا متعبش روحك..باش نمشي مع آدم و ملاك
عدا يدو على وجهو و تنهد بالقاوي...هزلي براسو باهي يحكي
كنان:باهي كيما تحب...يكفي أنك متبعدنيش عليك
أنا:أنت لي قررت تبعد عليا
كنان:مبعدتش...أنا جيست محبيتش نضرك معايا
أنا:أما ضريتني كنان...خاطر مفما حتى شي أقوى من بعدك عليا...أنا تعبت برشا خاطرني منعرفش نعيش من غيرك
تنهد بالقاوي و عدا يدو على وجهو...خذيت نفس طويل...هديت روحي شوية و غزرت لملاك...لي قربت مني تعاون فيا...هز روحو وقف يحكي
كنان:نشوفك بعد شوية
هزيتلو براسي إيه...أول ما خرج...غزرتلي تحكي
ملاك:حتى حد ما نجم يمنعو باش يدخل عندك
أنا:ميسالش ملاك...قولي كلشي حاضر
ملاك:مممم هاني باش نوصلك أنا و آدم و بعد تجي أمي زينب و أيمن يعديو معاك ليلة...خاطر اليومين هذوما لازمك عناية خاصة
هزيتلها براسي إيه...حتى أنا منحبش نبقى وحدي و وجود أمي معايا يرتحني...حضرت روحي كيما جا و خرجت...لقيتو يستنى فينا مع آدم لي داخل بعضو على أساس باش يعمل جريمة...قرب مني شوية يحكي
كنان:متأكدة أنك تحب تمشي معاه ؟
أنا:أنا باش نكون مرتاحة هكا كنان
هزلي براسو باهي و عدا عينيه على وجهي يحكي
كنان:رد بالك على روحك ملا
أنا:باهي عيشك
عدا يدو على شعري و تبسم بالوقت...خذيت نفس و جبدت روحي منو...خلطت على آدم و ملاك...عديت بقية الثنية سارحة في أفكاري...منعرفش إذا قراري صحيح و لا غالط...أما الأيامات هذوما بحاجة راحة حتى من روحي...أول ما وصلنا...هزيت روحي نزلت و كبست على الفاليز متاعي...حتى إني رفضت باش نخليهم يخلطو عليا...يزي ما تعبتهم معايا...عديت الكارت و كبست على البواني...قلبي خض بالقاوي خاطرني متوقعتش باش نرجع لهوني من غير كنان غريبة برشا كمية الراحة لي حسيت بيها من أول خطوة سيبت الفاليز من يدي و زربت بخطواتي لبيتي...تنهدت براحة و ترميت في وسط سريري بعد ما هزيت برفانتو في يدي...أصلا من غير شي ريحتو معبية الفرش من أيامات...كبست على مخدتو نحكي
أنا:توحشتك برشا يا روحي
سكت شوية و حطيت يدي على كرشي...نحكي
أنا:زعمة شكونها ؟ أصلا هو من إمتى يجيب بنات لأمي فاطمة...ياخي أنا باش نبقى ديما على أعصابي جرايرو زيد بكري برشا أفكار جاو في مخي و هو بجنبي و هذا كل بسببك أنت...معادش نجم نتحكم في روحي كي يبدا بجنبي
غمضت عينيا على ريحتو...بالرسمي توحشتو السخطة و منعرفش كيفاش باش نعدي بقية الأيام من غيرو خاصة إني معادش باش نشوفو...يمكن هكا هو يرتاح من الظغط متاعي زادة...خاطر حتى أنا تعبت أكثر و تعبت صغيري معايا...فرطت فيه و في صحتو لدرجة إني كنت باش نخسرو في لحظة خاصة أنو الوحيد لي يخليني قوية لتوا...كبست على مخدتو أكثر...ليا برشا محسيتش روحي مرتاحة هكا...حتى للحظة حسيت أنو موجود معايا من ريحتو القوية...لي خلاني نغطس في النوم من غير ما نخمم في حتى شي آخر.