صرخة صمت 🌬

الحلقة الثامنة و الأربعون

🔸️حلقة 48
🔸️ملاك_تحكي:
عديت دقايق و أنا واقفة في بلاصتي...لتوا منجمتش نستوعب الكلام لي سمعتو منو و لا حتى نتحكم في رعشة الخوف لي تمكنت مني في لحظة...أصلا كل مرة تجي سيرتو و لا نشوفو...نتذكر كلشي عشتو معاه في السنين لي فاتت...خلي توا يهدد فيا بآدم...منحبش حتى نتوقع شنية ممكن يصير...فرد وقت نحس في روحي ضايعة...خاطر حتى آدم خايفة منو يخيب ظني بعد ما وثقت فيه...و منحبش نتعدا مشاعري ناحيتو خاطرني أول مرة نعيشها...تهزيت و تحطيت على صوت مدام عائشة...لي قربت مني تحكي
عائشة:ملاك لباس ماهو ؟
أنا:لبااس...مدام وفى الدوام نجم نخرج توا
عائشة:أكيد عزيزتي
تبسمت بالسيف و رجعت لتالي..لبست كبوطي
هزيت صاكي و خرجت...دخلت بعضي كي ملقيتوش يستنى فيا كيما العادة...خاصة أنو اليومين هذوما مزال تاعب من اللي صار...هزيت راسي شوية نغرز لكرهبتو شد الفران و نزل بالوقت...خذيت نفس و قربت منو بالزربة...عنقتو من غير ما نقول كلمة وحدة...عدا يدو على ظهري يحكي
آدم:شبيها ملاكي ؟
كبست عليه أكثر مع السؤال متاعو...للحظة خفت من فكرة إني باش نخسرو و ماهوش باش يكون معايا جراير إيهاب...تنهد بالقاوي يحكي
آدم:ملااك...قاعد نحكي معاك عزيزتي
خذيت نفس و جبدت روحي شوية...عديت عينيا على وجهو نحكي
أنا:مفما حتى شي
عدا صوابعو على خدي و ضيق عينيه...يحكي
آدم:نسمع فيك...رد بالك تخبي عليا
أنا:قتلك مفما حتى شي آدم
آدم:إيهاب مرة أخرى ؟
بقيت نغزرلو من غير حتى كلمة...عدا يدو على وجهو يحكي
آدم:كان هوني ؟
هزيتلو براسي إيه...وين ملامح وجهو تكبست أكثر خذيت نفس نحكي
أنا:آددم
آدم:كنت باش تخبي عليا...أنك قابلتو و حكيت معاه ؟
أنا:لااا...مكنتش باش نخبي عليك...أما
سكت كي تذكرت كلامو التالي و وخرت خطوة لتالي شدني من كتافي يحكي
آدم:أما شنوة ملااك ؟
هزيت عينيا في وجهو و خذيت نفس طويل...نحكي
أنا:إ..إيهاب يعرف بعلاقتنا
آدم:علاش كنت ناوية تخبيها ؟
أنا:مش هكا...أما هو بالذات منحبوش يقرب مني و لا يحاول يضرك جيست خاطرك معايا
آدم:خايفة عليا ؟
أنا:نحكي بالحق آدم...منحبش إيهاب يحطك في راسو و لا يحاول يضرك جرايري أنا
آدم:ما ينجم يعملي حتى شي...يكفي أنك تسمع كلامي و معادش تخبي عليا حاجة هكا
أنا:معناها ماهوش باش يكون عائق بيناتنا...مهما كان اللي باش يعملو ؟
كبس على خدي...و جبدني عندو بالوقت يحكي
آدم:إيجا هوني تراه
عنقني و غرس يدو في شعري...كبس عليا يحكي
آدم:لا توا و لا مبعد...باش نخليه يكون عائق بيناتنا يا روحي...مستحيل نخليه هو و لا غيرو يقربلك و لا حتى يحاول يضرك
أنا:منحبش نرجع للحبس متاعو مرة أخرى و لا نكون أسيرة عندو
جبدت روحي منو شوية و حطيت يديا زوز على صدرو نحكي
أنا:كيما منحبش يحرمني من الحاجات اللي نحبها بعد توا
آدم:ملا في الأخير طلعت تحبني
أنا:آدددم
آدم:روح آدم...يززي كهو...قتلك لي هو ما عندو وين يوصل...و مدام ماكش مرتاحة هوني...من غير ما تكمل فيها الخدمة هاذي
أنا:لا أنا مرتاحة في خدمتي...و مانيش باش نلقى أحسن منها
آدم:على حد علمي تحب تكمل قرايتك...ياخي باش توفق بينهم و بين المطعم زادة
أنا:منعرفش آدم...أما باش نحاول...مستحيل نحبس خدمتي جيست خاطرني خايفة منو...أنا مستحيل نعطيه الفرصة هاذي و نخليه يحطمني أكثر من هكا
آدم:اللي تحب عليه باش يصير...و الواطي مستحيل يقربلك و لا يفرض عليك حاجة و أنا معاك...يكفي أنك تخبرني بكلشي يصير معاك و معادش تعطيه فرصة و تقعد تسمع في كلامو...واضح
هزيتلو براسي إيه و عاودت عنقتو...نزل عليا شوية باسني من راسي يحكي
آدم:هيا إيجا...مدام صغرونتي مش قد بعضها مانيش باش نخليها وحدها
أنا:قصدك باش تكمل عليا
ضحك بالوقت و قرصني من خدودي...يحكي
آدم:بالله يا فرخة...ساعة تحب تتخلص مني
مديت يدي شوية...حطيتها في يدو و كبست عليها نحكي
أنا:آدددم
آدم:أشكي
أنا:ياخي خبرتك لي أنا بديت نتعلق بيك
آدم:و هاذي حاجة باهية و لا خايبة ؟
أنا:بالله ؟
آدم:والله...عالأقل نجم نحضر روحي بالقدا
أنا:علاش داخل لحرب أنت...زيد ديما تحسب الأمور مهزلة
آدم:ريت علاش قتلك نحضر روحي...خاطرني قادم على برشا تقلبات منك
أنا:يااا آدم يززي
ضحك بالوقت و حط يدو على خدي...نزل عليا شوية و باسني من خدي...يحكي
آدم:أنا نحب أكثر من هكا ملاااك
أنا:شنوة ؟
آدم:نحبك تعطيني قلبك ملاك و تعشقني بنفس الطريقة لي عشقتك بيها...نحبك تحس بيا أكثر من هكااا
عديت عينيا على وجهو و هزيتلو براسي باهي رغم الخوف لي حسيتو...خاطرني لتوا نخاف نعطيه هذا الكل و يجبد بيا في النهار من النهارات..إذا عينو طاحت على طفلة أخرى...مد يدو شوية و بعدلي خصلات شعري لتالي يحكي
آدم:معادش تخاف مني...أنا تبدلت و باش نتبدل أكثر على خاطرك
أنا:معناها ماكش باش تحب أي طفلة أخرى ؟
آدم:ملاااك...ياخي أنا قاعد نلعب...في بالك لي نلقاها قدامي نحبها
أنا:هاك حبيتني أنا
آدم:و إنتي ماكش أي وحدة يا روحي
هزيتلو براسي باهي...كأنو قرا أفكاري و قاعد يطمن فيا...كبس على يدي و باسني منها يحكي
آدم:هيا إيجا خلينا نمشيو
أنا:وين ؟
آدم:متهمش البلاصة مدامك معايا
تبسمت و كبست على يدو...من غير ما نسألو أكثر ولا نضيع في أفكاري زادة...خاطرني نحب ناثق فيه و في كلامو...مدامو باش يتبدل على خاطري...مجبورة باش نسمح لعلاقتنا تاخو مساحة أكبر...يمكن باش نعيش معاه كلشي تحرمت منو مع إيهاب...و الأهم من هذا الكل إني نعيش معاه العشق و الحب الحقيقي لي كان حلمة من أحلامي الصغيرة.
#آدم_ملاك❤