🔸️حلقة 25
🔸️آدم_يحكي:
هزيت راسي شوية نغزرلهم مستغرب...طلع بالرسمي فما حاجة غريبة قاعدة تصير بيناتهم...خذيت نفس و غزرتلو نحكي
أنا:ناوي تبقى هوني
نفخ بالقاوي و هز روحو وقف...قرب مني شوية و شيع راسو يغزرلهم...عدا يدو على وجهو يحكي
كنان:خلينا نمشيو توا
جيت باش نحكي...سبقني و خلاني واقف...أصلا من بكري مش قد بعضو...خلطت عليه بالوقت...ركب بجنبي و تكا لتالي...خدمت الكرهبة نحكي
أنا:حكيت معاها ؟
كنان:لاا
أنا:بالله ؟ و شنية كنت تعمل ؟
كنان:الطفلة مش قد بعضها...تحبني نحكي معاها بالسيف عليها
أنا:عالاقل تفهم منها شنية لي قاعد يصير...سينو حكاية مش قد بعضها واضحة...هاك حتى انت كيفها بالظبط
كنان:تتوقع سمعت حديثنا عند فااطمة ؟
ضيقت عينيا مستغرب و دورت راسي غزرتلو...نحكي
أنا:لا منتصورش
كنان:ملا شنية لي يخليها تتقلب لهدرجة في رايك ؟
أنا:منعرفش...سألت ملاك و قالت نفسيتها تاعبة خاطر حبست من خدمتها و خاطرها توحشت أمها زاادة
كنان:ماهوش مبرر يااا آدم...إذا كنت نعرف إيمان حتى شوية مش هذا المشكل لي مقلقها...كان توحشت أمها راهي خبرتني كيما عادتها...الحكاية أكبر من هكااا
أنا:تحب تفهمني أنو إيمان سمعت و تصرفت من غير ردة فعل...هذا مش طبعها...خاطر حسب اللي نعرفو عليها ماهي باش تعدي اللي سمعاتو بالساهل
كنان:لازمني نحكي معاها...كان سمعت حديثنا...مجبور باش نفسر كلشي صار
أنا:تفسر شنية كنان ؟ تقولها لأنا عاشق فيك و منجمش نكون معاك خااطر ظروفي متسمحليش...في رايك باش تستوعب الكلام هذا...إذا محكيتش كلشي عندك
كنان:آدددم قتلك الموضوع هذا بالظبط تسكر...ياااخي باش تركبهاالي توااا زادة ؟
أنا:الموضوع ماهوش باش يتسكر بالطريقة لي تحب عليها أنت...و اللي عشتو مع سيلين مينطبقش على غيرها و زيد نظن هاذي أول مرة تأثر فيك طفلة لهدرجة
سكت من غير ما يجاوبني...بالعادة منحبش نحكي معاه في الموضوع هذا و لا حتى نخليه يراجع روحو...أما كان فما إحتمال صغير لي إيمان تنجم تقلب الموازين الكل و تخليه يستقر في حياتو...بالمعنى الصحيح ميضيعش أكثر من هكا...غزرتلو نحكي
أنا:كناان...كان أنت باش تحكي معاها مظطر باش توضح كلشي...حتى علاقتك مع سيلين...خاطر منظنش لي هي باش تتخلى عليك بالساهل
كنان:نعررف...أنا أكثر حد نعرف سيلين و لي قاعد يدور في راسها زادة
أنا:و شنية ناوي تعمل ؟
كنان:حاليا باش نخليها ترتاح شوية و بعدها باش نحكي معاها و نفهم اللي قاعد يصير الكل
أنا:إن شاء الله...أحسن ما تسوء حالتك أكثر
كنان:شو شكون يحكي...محسوب أنت ناقص عليا...أصلا كان جا حد و قالي الجحش لي قدامك باش يطيح على راسو منصدقوش
أنا:والله حتى كان جا حد و قالي نفس الكلام...مانيش باش نصدقو انا زادة
ضحك بالوقت و دور راسو شوية...غمزني و هو يحكي
كنان:و شنية ناوي تعمل توا ؟ هوكا الطفلة ولات حرة
أنا:منعرفش...صحيح ولات حرة أما منعرفش إذا مزالت متعلقة بيه و لالا...يمكن طلقت جيست خاطر منجمتش تعيش معاه
كنان:شنية صار في الجلسة ؟
أنا:صراحة متوقعتش باش يقبل يطلق و لا حتى يتصرف كأنو محترم قرارها في الإنفصال...كيما متأكد أنو الطلاق ماهوش النهاية بالنسبة ليه و مزال باش يحاول معاها أكثر
كنان:مدام هكا علاش يوافق على الطلاق ؟
أنا:حسب التقارير متاعها لي قريتهم...القضية حتى كان طولت تقلب لصالحها...الغريب في الحكاية مفهمتش كيفاش ينجم يضرها مدامو يحبها
كنان:بعد اللي عشتو مع سيلين...نجم نتوقع كلشي من العباد...المهم إذا إقتنعت ملاك بيك...شنية آخر خطوة ؟
أنا:مفهمتكش
كنان:توا وليت متفهمش ؟ ساعة متطلعش ناوي تعرس ؟
أنا:أنا ؟ نعرس ؟
كنان:علاش عندك مخطط آخر ؟
أنا:منعرفش كنان...مخممتش في النقطة هاذي جملة و منظنش نقدم على خطوة هكا
كنان:تتوقع ملاك باش ترضخلك و تبقى معاك من غير عرس
سكت شوية...خاطرني ملقيتش رد لكلامو...رغم كلشي صار لتوا و رغم اعترفت لروحي و ليها إني عشقتها و هبلت عليها فرد وقت...أما ولا مرة خممت في الخطوة هاذي لا معاها و لا مع غيرها...استانست بحياتي هكا..حتى متوقعتش باش يجي نهار و نلقى روحي نجري ورا طفلة بالطريقة هاذي و الأغرب أنها كانت معرسة...بالمعنى الصحيح مرت موكلي...ضحكت على الصدفة و نزلت على الفيتاس أكثر...غزرلي يحكي
كنان:مجاوبتنيش
أنا:معنديش جواب...إذا حبت تبقى معايا مانيش باش نخليها بيها لآخر لحظة في عمري و إذا العكس هي حرة كيما حطيتها في مخي و تعلقت بيها...كيما نجم ننساها
كنان:معناها ماكش باش تعرس بيها
أنا:منعرفش و منحبش نخمم في الموضوع هذا توا
كنان:باااهي...معناها راجلها نقصد طليقها فرصتو قدامها أكبر منك...أكا علاش لازمك تعمل حسابك من توا
عديت عينيا على وجهو و عاودت غزرت لطريق كبست على الفولون أكثر...منعرفش علاش حسيت روحي دخلت بعضي من كلامو...أصلا من وقت عرفت لي هي معرسة و أنا على أعصابي...خلي لي صار قبل الجلسة و الوضع لي كانو فيه زادة..زعمة ينجم يقنعها و يخليها ترجعلو ؟ مجرد سؤال طرحتو لروحي...خلى قلبي يدق بالقاوي حتى مستغرب في روحي و في الحالة لي وصلتلها...ولا مرة توقعت إني نوصل نغير على وحدة و بالطريقة هاذي مديت يدي شوية نزلت البلار و حليت فلس سوريتي محاولة مني باش ناخو نفس و نطرد الأفكار لي هدت عليا في لحظة خاطر مستحيل نجم نستخايلها معاه و لا مع غيرو...كيما منجمش نخليها تعيش نفس الشي اللي تعدات بيه مرة أخرى...خذيت نفس طويل و استبعدت الأفكار لي في راسي الكل خاطر مدامها تحررت منو...باش تكون تابعتني بعد توا
#آدم_ملاك❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
