صرخة صمت 🌬

الحلقة الواحدة و الستون

🔸️حلقة 61
🔸️إيهاب_يحكي:
عديت يدي على رقبتي و خدمت الكرهبة بالجهد لي بقى عندي...كأنو الدنيا مزال تحب تعطيني ضربات أقوى من اللي فاتت...هاذي أول مرة نحس في قلبي يوجع فيا بطريقة غريبة...لدرجة حسيتو باش ياقف في أي لحظة...منحبش نصدق لي أنا خسرتها و لي ماهيش باش تكون ملكي مرة أخرى...منحبش نخمم في فكرة أنو فما راجل آخر معاها توا و باش يحط يدو عليها باش يملكها و تولي خاصة بيه هو و كهو نزلت على الفيتاس أكثر و مديت يدي...نمسح في دموعي لي تمردو عليا و لي ثاني مرة يهبطو جرايرها و يخليو وجيعة قلبي تقوى أكثر...للحظة حسيت روحي في حلمة منحبش نصدقها و لا حتى نفكر فيها...أصلا حسيت روحي ضايع لدرجة منعرفش شنوة نعمل و لا وين نمشي...و ملقيتش سبيل غيرها منعرفش كيفاش شديت ثنية دارها و لا حتى كيفاش وصلت...شديت الفران و هزيت روحي نزلت...نمد في الخطوة بالسيف إستندت بيدي على الحيط لي بجنب بابها و دقيت عليها...دقايق و حلتلي...غزرتلي مصدومة تحكي
سيلا:إيهاااب ؟
أنا:منعرفش علاش جيت لهوني...أما إنتي الوحيدة لي تنجم تفهمني توا
سيلا:أنت لباس ؟
أنا:لا مانيش لباس
سيلا:باهي...شقولك تدخل توا ؟ يعني منظنش نجمو نحكيو هوني
عديت عينيا على وجها و دخلت معاها...أصلا معنديش جهد باش نرجع لتالي و لا حتى نحب نبقى وحدي...عديت عينيا على صالة...طلعت هادية كيما البيرو متاعها بالظبط...شاورتلي للفوتاي تحكي
سيلا:تفضل أقعد...تو نرجعلك
هزيتلها براسي باهي و ترميت في وسط الفوتاي تكيت راسي لتالي...محاولة مني باش ننسى كلشي صار...عالأقل نلقى روحي و منضيعهاش أكثر...فقت من سرحتي كي رجعت عندي...حطت الصينية على الطاولة و غزرتلي تحكي
سيلا:القهوة هاذي باش تخليك ترتاح شوية
أنا:مش لازم
غزرتلي مستغربة و قربت مني شوية...قعدت بجنبي تحكي
سيلا:باهي إيهاب...تنجم تخبرني شنية لي قاعد يصير معاك بالظبط...ياخي الحكاية تتعلق بملاك زادة ؟
هزيتلها براسي إيه و عديت يدي على وجهي...نحكي
أنا:صحيح
سيلا:حكيت معاها مرة أخرى ؟
أنا:لااا و منظنش باش يفيد الكلام معاها بعد توا
سيلا:و السبب ؟
أنا:خاطرها ولات ملك راجل آخر...نجح في أنو في يفكها مني
سيلا:مفهمتكش
أنا:عرس بيها
هزت عينيها في وجهي من غير حتى كلمة...حتى أنا منعرفش كيفاش خرج معايا الكلام و لا حتى كيفاش نجمت نقولو...خاطر بيني و بين روحي منحبش نصدق اللي صار الكل...حطت يدها على يدي تحكي
سيلا:إيهاااب
أنا:متحاولش تواسيني سيلا...خاطر حتى شي ماهو باش يخفف عليا...أصلا جيت عندك...خاطرني ما نجم نحكي لحتى حد اللي نحس فيه توا
سيلا:تعرف لي أنا معااك ديما إيهاب
أنا:نعرف...أما الليلة بالظبط...منحبكش تمارس مهنتك معايا سيلا...يكفي أنك تسمعني و تبقى بجنبي كهو
سيلا:هذا لي باش نعملو...زيد إحنا أصحاب توا و هذا واجبي معاك
تبسمت و هزيتلها براسي إيه...عديت يديا زوز على وجهي و غمضت عينيا بالقاوي...نستحضر في كل لحظة عشتها معاها...للحظة لي ريتها ولات ملك راجل آخر غيري أنا...خذيت نفس نحكي
أنا:وافقت عليه...من غير ما تخمم تعطيني فرصة وحدة باش نصلح لي كسرتو...حتى ولات تحبو في شهور...وين أنا عديت معاها سنين طويلة...كلشي تكسر في لحظة و منظنش باش نجم نسترجعها مرة أخرى
كبست على يدي أكثر...و عدات عينيها على وجهي تحكي
سيلا:نعرف أنو مفما حتى شي ينجم يخفف عليك صدمة اللي صار...أما مجبور باش تتعود...كيما مجبور باش تكون قوي و تكمل حياتك خاطر فما حاجة أهم لازمك تعمل عليها إيهاب..لازمك تحارب الماضي متاعك و تبدا من جديد...أنت بالرسمي تستحق بداية جديدة إيهاب
أنامتعودتش على حياتي من غيرها...ملاك كانت الوحيدة لي تخليني نقاوم...و لي تخلي تكون وجهتي واضحة
سيلا:مش صحيح...هذا الكل مش صحيح إيهاب مدامك عديت شهور من غيرها...تنجم تقاوم روحك أكثر و تكمل من غيرها...أنت حبيتها صحيح...أما ضريتها فرد وقت...زيد متنجمش تجبر حد باش يحبك بالسيف...كيما مش لازم تحمل روحك هذا الكل أنت خسرت مرتك...مش بالظرورة تخسر نفسك زادة
أنا:حاااولت...صدقني كل لحظة عديتها وحدي حاولت نتعدا فكرة وجودها في حياتي...حاولت حتى نتناسى إني نحبها و نعشقها...أما فما شي أقوى مني يخليني نرجع لتالي بالسيف عليا سيلا
سيلا:قاوم...خليك أقوى من روحك...أنا عندي ثقة لأنت باش تنجح و باش تتعدا الماضي و يمكن تقابل وحدة تبادلك الحب...يمكن أنت لتوا ملقيتش شطرك الثاني بالحق
أنا:تتوقع اللي عشتو معاها قبل كذبة ؟
سيلا:لا ماهوش كذبة...أما حقيقة ناقصة...خاطر حبك ليها كان حب تملك إيهاب و إلا مستحيل كنت تتصرف معاها بالطريقة هذيكا...أنت ربطت علاقتك بملاك باللي عشتو في الماضي...أكا علاش...أعطي مساحة للألم لي موجود داخلك و عيشو للأخير أما لازمك ترجع أقوى على خاطر روحك و كهو...باهي
كبست على يدي أكثر...كأنها تقوي فيا...هزيتلها براسي باهي و قربت منها أكثر...حضنتها بالوقت منعرفش علاش عملت هكا و لا حتى كيفاش قربت منها...أما في اللحظة هاذي بالظبط...بحاجة شكون يحتويني و لا على الأقل بحاجة ملجأ و هي الوحيدة لي تنجم تفهم اللي قاعد يصير معايا...يمكن أكا علاش جيت لهوني من غير ما نخمم و لا نتردد زادة كبست عليها و غمضت عينيا...هارب من كلشي صار و كلشي باش يصير بعد توا...هارب من وجيعتي لي نحس فيها ماشية و تقوى و حتى من الأفكار الخايبة لي حسيتها باش تتمكن مني و تخليني نسترجع كلشي خسرتو مهما كان الثمن في الأخير.
#إيهاب_سيلا❤