صرخة صمت 🌬

الحلقة التاسعة عشر

🔸️حلقة 19
🔸️ملاك_تحكي:
هزيت كاسة القهوة في يدي...كبست عليها و رجعت للبيرو متاعي..لقيتها جاية بالزربة...حطت الورقة في يدي تحكي
سناء:ملاك عيش أختي...وصل الورقة هاذي لسي آدم أمانك
أنا:آدم مرة أخرى...مدام سناء أنا نخدم في الأرشيف مش سكرتيرة عندو...دبر شكون يوصلهالو
سناء:كان لازمني نطلعها أنا...أما ولدي مريض و لازمني نخرج توا
أنا:باهي
كبست عليها في يدي...و هزيتها شوية نقرا فيها...طلعت تخص المواعيد متاع الأسبوع هذا و من بينهم إسم إيهاب زادة...قلبي خض بالقاوي...معناها باش يقابلو مرة أخرى...خممت نرميها...أما خفت على سناء...منحبهاش توحل جرايري...حطيت كاسة القهوة من يدي و هزيت روحي طلعت عندو...باقي أفكاري تهز فيا و تجيب منعرفش كيفاش وصلت...أول ما تحل باب الأصونصير خرجت و قربت من البيرو متاعها باش نسلمها الورقة ملقيتهاش كي العادة...أصلا مفهمتش شنية خدمتها هوني...قربت مترددة من البيرو متاعو...من آخر مرة جا عندي معادش قابلتو...مديت يدي شوية و كبست على البواني...منعرفش علاش مدقيتش على الباب كيما وصى آخر مرة...حتى مفهمتش شبيني ديما نحب نعمل عكس كلشي يطلبو خذيت نفس طويل و حليت الباب هزيت راسي باش نحكي...أما في لحظة حسيت روحي ضيعت حروفي و معرفتش شنية نقول...آخر شي توقعتو...نلقاه يبوس فيها...فقت من صدمتي كي جبد روحو منها...يحكي
آدم:ملاااك
مديت يدي بالوقت...غطيت وجهي بالورقة...نسب فيه و في روحي خاطرني دخلت من غير ما ندق...خذيت نفس نحكي
أنا:مدام سناء وصاتني باش نعطيك الورقة هاذي و متوقعتش لي أنت مشغول توا
آدم:ورقة شنية ؟
نزلتها شوية شوية...تنهدت براحة كي ريتها بعدت عليه و غزرتلو نحكي
أنا:منعرفش...نظن المواعيد الخاصة بيك و لا حاجة هكا
قربت مني شوية...فكتها من يدي و غزرتلي ندرا كيف تحكي
رغد:أنا باش نتأكد منهم
تبسمتلي و هزت روحها خرجت...هزيت حاجبي مستغربة من حالتها و عاودت غزرتلو نحكي
أنا:لازمني نمشي توا
آدم:لحظة
بقيت واقفة في بلاصتي...قرب مني شوية و وقف قدامي بالظبط...ضيقت عينيا نحكي
أنا:شنوة ؟
آدم:منقصدش اللي ريتو بكري
أنا:لا عادي...الحق عليا مدقيتش الباب
نزل بعينيه لشفايفي و عاود غزرلي ندرا كيف...يحكي
آدم:تقصد أنو اللي صار مقلقكش
أنا:لا علاش حتى يقلقني...أنت ما تعنيلي حتى شي آدم حتى بالعكس هي أحسن مني و باش تاخو منها لي تحب عليه...و فرد وقت أنا نرتاح منك
هزلي براسو باهي...تبسمت و عطيتو بظهري...خرجت من غير ما نعاود نتلفت ورايا...وقفتني تحكي
رغد:إن شاء الله متكونش تقلقت بخصوص اللي صار
تبسمتلها و كملت ثنيتي من غير حتى كلمة...حليت الباب و نزلت على الزر...تكيت لتالي نحكي
أنا:زايد ميحشمش و يحبني نغير عليه زادة...محسوب باش نموت عليه أنا
نفخت بالقاوي...يمكن هذا أحسن شي صار...عالأقل نرتاح منو و نعرف نخدم كي الناس...خذيت قهوة أخرى و شديت البيرو متاعي...كملت خدمتي كأنو شي ما صار حتى إني محاولتش نخمم في اللي صار مرة أخرى و لا نحطو في مخي أكثر من هكا...محسيتش بالوقت كيفاش تعدا...هزيت صاكي و خرجت...تصادفت معاه بالوقت كمل ثنيتو من غير ما يحكي معايا...غريبة فيه بالعادة ما يضيع حتى فرصة...كملت طريقي من غير ما نخمم...تعديت لإيمان...وين ظطريت نستنى كنان معاها كي العادة...لي وصلنا في ثنيتو...وين عديت الوقت ضايعة في أفكاري...أول ما وصلت بدلت دبشي...و جيت باش نرتب البيت قص عليا صوت تليفوني غزرتلي تحكي
إيمان:شكون ؟
أنا:هذا رقم إيهاب...من وين جاب رقمي
إيمان:هز...شوف شنية يحب منك
خذيت نفس و هزيت عليه...نسمع فيه يحكي بصوت رزين
إيهاب:أخرج نستنى فيك
قربت شوية من الشباك و هزيت الريدو...نغزرلو متكي على الكرهبة...كبست على تليفوني نحكي
أنا:شتعمل هوني ؟
إيهاب:إيجا ملاك...خليني نشوفك
علقت عليه و هزيت الجيلي متاعي لبستها من فوق و هزيت روحي خرجت عندو...قربت منو من غير ما نخمم في اللي باش يصير...لفيت روحي أكثر مع الجو لي بدا يبرد و غزرتلو نحكي
أنا:شتعمل هوني إيهاب ؟ شنية مزلت تحب مني ؟
إيهاب:نحبك إنتي...نحبك ترجعلي مرة أخرى
أنا:نرجعلك ؟ مسهلها الكلمة والله...أنت شنية تحب بالظبط نرجعلك و لا نرجع عبدة عندك...ملقيتش قطوسة أخرى تحبسها في دارك
مد يدو بالوقت...شدني من يدي و جبدني عندو في لحظة يحكي
إيهاب:صدقني باش نتبدل على خاطرك...والله باش نحاول يا ملاك...صدقني معادش نعرف نعيش من غيرك و لا حتى نركز في حياتي
أنا:أنت مستحيل تتبدل يا إيهاب...أنت كي تضمن رجوعي ليك ترجع كيما الأول و أكثر...أنت إستهلكتني لدرجة معادش عندي شي باش نقدمهولك...أنا لتوا معرفتش نرتب حياتي...خاطر إسمي مزال مربوط بإسمك...صدقني أنا ما نحب منك حتى شي...يكفيني أنك تبعد عليا و تخرج من حياتي كهو
إيهاب:إنتي متنجمش تعمل فيا هكا...متنجمش تقتلني بالطريقة هاذي
أنا:هاك أنت قتلتني في بلاصة المرة ألف و مزلت واقفة قدامك...يعني حتى شي ماهو باش يصير عليك
جبدت يدي منو...وخرت خطوة لتالي...و خذيت نفس طويل نحكي
أنا:معادش تجي لهوني مرة أخرى...كان فما بلاصة باش نتقابلو فيها هي المحكمة...تصبح على خير
جبدت روحي منو و عطيتو بظهري...دمعة قوية هبطت على خدي...كانت كافية باش تعبر على كل حرقة في قلبي و كل وجيعة و قهرة عشتها جرايرو...هو ما خلى حتى شي يشفعلو داخلي و لا حتى يخليني نسامحو هو خذا الفرص لي عندو الكل و ما عاد يسالني حتى شي بعد توا.
#آدم_ملاك❤