صرخة صمت 🌬

الحلقة الخامسة

🔸️حلقة 5
حليت عينيا شوية شوية...للحظة حسيت روحي في عالم آخر...ملامح وجهو بدات تحضر و تغيب قدامي لتوا نحس في بدنو رزين فوقي...رزين لدرجة أني منجمتش نسترجع أنفاسي لي حسيتها تقطعت..عدا صوابعو على خدي...يحكي
أمير:مبروك يا روحي
غمضت عينيا مع دمعة قوية نزلت من عيني و تغلغلت في وسط شعري...مسحها بشفايفو و هز روحو وقف يلبس في دبشو و يريقل في روحو...كأنو ما صاار شي...تقويت على روحي و تقعدت نلم في الروبة على بدني...محاولة مني باش نغطي لي بقى منو...تبسم على جنب و عاود قرب مني...شدني من زندي و وقفني بقوة...نطرت روحي منو و نزلت عينيا من وجهو...قربلي أكثر...لين منع المسافة لي تفصلني عليه و نزل يحكي في وذني
أمير:نحبك تتذكر لي صار بالقدا..تذكر أني أول واحد ملكت بدنك و حطيت بصمتي عليه...قتلك قبل متتحدانيش خاطرني لي نحب عليه نوصلو...و أنتي كنت غايتي يا إيمان
حط يدو على رقبتي من تالي و كبس عليا بقوة...يحكي
أمير:أغزرلي هوني
كبس على شعري أكثر...لي خلاني نهز عينيا في وجهو غزرتلو بحقد الدنيا الكل...تبسم يحكي
أمير:توقعت انب نشوف العكس...أما الظاهر مزلت مستوعبتش لي صار عزيزتي
شيعلي راسي لتالي أكثر...لين حسيت بأنفاسو لي ضربت في وجهي مرة اخرى...غزرلي بتحدي و كمل كلامو يحكي
أمير:أنتي بعد توا وليت متاعي و تحت رحمتي يا إيمان
بالفلاقي نحب كي نشاورلك تجي عندي...في الوقت و البلاصة لي أنا نحددها...و إلا وقتها نخليك تلعن الساعة لي ريتني فيها...و هاذي آخر مرة تخمم تحط راسك في راسي خاطر انتي الوحيدة باش تطلع خاسرة في الأخير
نزل عليا أكثر باش يبوسني...دورت وجهي بالوقت مستحيل نخليه يحط شفايفو عليا مرة أخرى...رخف يدو و جبد روحو لتالي...هزني و حطني يحكي
أمير:تنجم تمشي توا
لميت روحي أكثر من غير ما ننطق بحرف واحد...و تلفت عطيتو بظهري...دوب نجمت نمد الخطوة من الوجيعة لي بين ساقيا و في بدني...أول ما وصلت للباب وقفني يحكي
أمير:لحظة
قرب مني بخطوات ثابتة...وقف قدامي بالظبط...و حط 100 دولار في صدري...يحكي
أمير:حقك لازم يكون بالدولار يا روحي...و حط في بالك انو في كل لقاء باش تاخو كيفهم
دور المفتاح و حلي الباب...حطيت يدي على صدري و كبست عليها...كمشتها في كف يدي و خرجت من غير ما نغزرلو...صوت الباب لي سكرو ورايا رجعني للواقع و بديت نسترجع و نستوعب لي صار معايا...خذيت نفس طويل و هزيت روحي نمد في الخطوة بالسيف...ضو الشمس لي جهر في وجهي مرة أخرى...هزيت راسي نثبت في وجهو غزرلي مصدوم...لي خلى دبوزة الما طيح من يدو...قربلي بالزربة و كبس على وجهي بيدو يحكي
حازم:إيمااااان...شنية لي صااار ؟ شبي حااالتك هكااا...حل فممك
بقيت نغزرلو من غير حتى كلمة...نحى الفاست متاعو غطاني بيها...و قعد يخض فيا و هو يحكي
حازم:انطططق إيماااان شنية لي صااار
هزيت راسي شوية نثبت في الرجال لي وراه و منهم لي حاول يهديه...جبدت روحي منو و وخرت خطوة لتالي هو بالذات منحبش نشوف وجهو و لا نسمع صوتو خاطر بطريقة مباشرة و لا العكس...هو السبب في اللي قاعدة نعيش فيه الكل...عطيتو بظهري من غير ما نجاوبو و لا نسمع بقية صياحو...كلشي نحب عليه اني نبعد من البلاصة هاذي قد ما نجم و منهم الكل زادة تقويت على روحي أكثر...و مشيت...لين وليت نسمع في صوتو بعيد و هو يصيح عليهم باش يخلوه يدخل لأمير...يمكن حتى هو فهم شنية لي صار الداخل خاطرو أكثر واحد يعرفو شنية يسوا و شنية ينجم يعمل غمضت عينيا بالقاوي و عاودت حليتهم...خاطر نحس في روحي باش نطيح و معادش عندي جهد باش نثبت في الثنية أكثر...مديت يدي استندت على الحيط حطيت يدي على كرشي كبست عليها و رديت كلشي رغم أني مكليتش بكري...أما خواطري دارت و اللي صار معايا عيفني في روحي...نزلت راسي نغزر للفلوس لي حطهم في صدري قبيل...عاودت كبست عليهم بنفس الحقد متاع بكري...خذيت نفس طويل و رجعت شعري لتالي...كملت ثنيتي من غير ما نخمم في حتى شي ممكن يصير بعد توا...لدرجة منعرفش كيفاش وصلت للمركز...هزيت راسي نثبت فيه دقايق و دخلت من غير ما نتردد...غزرت لأول واحد قابلني...قربلي مصدوم يحكي
العون:لباس أختي ؟
أنا:نحب نقدم شكوى
العون:باهي إيجا معايا
قرب مني باش يعاوني...جبدت روحي بالوقت...نزل يديه يحكي
العون:باهي متخافش مانيش باش نمسك...تفضل معايا
عديت عينيا على وجهو و هزيتلو براسي باهي...تنهدت بالقاوي و دخلت معاه لبيرو الكوميسار...لي هز راسو و غزرلي مستغرب يحكي
هو:شفما هوني ؟
العون:المدموزال تحب تقدم شكوى
هو:بخصوص شنوة ؟
انا:الإغتصاب العمدي
هزني و حطني و حط يديه زوز فوق البيرو متاعو يحكي
هو:ضد شكون ؟
أنا:أمير...أمير أصلاان 
هز عينيه في وجهي...و غزرلي ندرا كيف...نعرف لي الإسم هذا يخاف منو الكل هوني...اما مستحيل نستسلم و نسلم في الوعد لي قطعتو عليه...مدامو تعدا حدود معايا و تعدا على بدني...مانيش باش نخليه يرتاح في حياتو...مهما كان اللي باش يعرضني...و أولهم غزرات الكوميسار و العون لي معاه...يمكن منعرفش القانون في البلاد هاذي و منعرفش شنية ل باش يعرضني...أما حقي باش ناخو من أمير كان مش اليوم غدوة...دقايق قعدت تفصل بيني و بينو...بين انو يصدق كلامي و يكتب المحضر...و لا يطردني من هوني و يكون في صف عيلة أصلان الحاكمة...بالنسبة لأمير التحدي وفى اليوم...اما بالنسبة ليا بدا توا و ماهوش باش يوفى قبل ما نحطو ورا القضبان...هز روحو وقف و مد يدو شاورلهم باش يخرجو...قرب مني بالوقت وقف قدامي بالظبط...يحكي
هو:متأكدة من اللي تقول فيه
انا:انت باش تكتب المحضر هذا ولا لا ؟
غمضت عينيا بالقاوي...نقاوم في الدوخة لي شدتني و في خواطري لي لتوا قاعدة دور...نزلت راسي شوية نغزر لدم لي جرى بين ساقيا...و لي خلى دموعي لي كانت محصورة تنزل ورا بعضها...جبد الكرسي بيدو يحكي
هو:إيجا أقعد هوني
انا:م..مجاوبتنيش
هو:أقعد ساعة
خذيت نفس طويل و قعدت...حط كاسة الما في يدي و قعد مقابلني يحكي
هو:حد من عيلة أصلان يعرف لإنتي جيت هوني ؟
انا:ن..ناوي تعطيهم خبر...حتى انت باش تغطي عليه ؟
هو:كان يطلع كلامك صحيح...أعرف لي حتى محضر ماهو باش يوصل للمحكمة...خاطر جابر أصلان مستحيل يخلي ولدو يتحبس جرايرك انتي
انا:أنت أول واحد باش تمنع أنو المحضر هذا يوصل للمحكمة
هو:انا مانيش خدام عند عيلة أصلان باهي
انا:شنية لازمني نعمل ؟
هو:المحضر ميكفيش وحدو...لازمك تتعدا لطبيب الشرعي قبل 24 ساعة و للأسف المستوصف تابع ليهم زادة
عديت يديا زوز على وجهي...للحظة حسيت روحي باش نطرشق...خاطر متوقعتش انو باش يصير معايا هذا الكل فرد وقت منجمتش نحبس تفكير...و لا نتراجع في اللي نعمل فيه...غزرتلو نحكي
انا:شنية الحل ؟
هو:انا باش نكتب المحضر هذا توا و انتي باش توقع عليه بعدها...باش نمشيو لتونس
انا:تونس ؟
هو:معندكش حل آخر...كان تحب القضية هاذي تدخل للمحكمة لازمك تعدي عند طبيب شرعي معندوش علاقة بعيلة أصلان
انا:ش..شنية لي يخليني ناثق فيك ؟
هو:انا منتاجرش بأعراض الناس...مدامك دخلت لهوني أنتي في أمان لين توصل للي تحب عليه...و مهمتي توفى وقت قضيتك توصل للمحكمة العليااا
هزيتلو براسي باهي...أصلا معنديش حل آخر...جبد روحو مني و نادى على واحد من الأعوان باش يكتب المحضر و غزرلي يحكي
هو:احكي على كلشي من بداية معرفتك بيه
انا:باهي
كبست على يديا زوز و انا نحكي على لقاءتنا مع بعضنا قبل و الكلام لي كان يدور بيناتنا...أما لساني رزن...رزن وقت لي تذكرت باب البيرو متاعو لي تسكرت عليا...هزلي براسو باهي باش نكمل...خذيت نفس طويل نحكي
انا:اللعبة بدات توا...ه..هذا كان اول شي قالو قبل ما يتهجم عليا...د..دزني عالفوتاي و كي قاومتو...ضربني لي خلاه يطيحني عالأرض...خبشتو من رقبتو و صدرو ت..تنجم تتحقق من كلامي...كيما خليت لي تراص على ظهرو زادة
مسحت دموعي لي غلبتني مرة اخرى و نحيت الفاست متاع بابا...و غزرتلو نحكي
انا:ق..قطعلي روبتي من هوني...و آثار متاعو موجودة على بدني الكل زادة
نزل راسو و وقف من بلاصتو قرب مني و هز الفاست متاعو هو حطها على أكتافي يحكي
هو:خلي هاذي ماهيش رزينة على بدنك و طويلة
كبست عليها و غطيت بدني أكثر...شد الأوراق عليه و غزرلي يحكي
هو:وقع هوني
شديت الستيلو من يدو و وقعت على المحضر...ختم عليه و قربلي يحكي
هو:تنجم تتحمل مسافة الطريق ؟ خاطرك لتوا تنزف
لميت ساقيا أكثر و هزيتلو براسي إيه...دور راسو و غزر للعون يحكي
هو:ما نحب حتى حد يعرف اللي صار هوني...قبل ما نرجع
هيا تفضل
كبست على يديا زوز...محاولة مني باش نكتم الوجيعة لي حسيتها داخلي...حتى منعرفش كيفاش وصلت للكرهبة متاعو...غزرتلو نحكي
انا:م..مزال فما دم...ماهوش باش يقلقك ؟
هزلي براسو لا و حلي الباب...جبدت روحي منو و ركبت من تالي...خلط عليا و خدم الكرهبة...تكيت راسي على البلار...نغزر لثنية و نعدي في يديا زوز على كرشي باش نخفف الوجيعة لي قوات...مزلت عايفة بدني و ريحتو لي مزالت في خشمي...ساعتين لي عديتهم في طريق كانو أطول من لي تخيلتهم...و هديت أكثر كي ريت روحي قدام كلينيك...هبط بالزربة و طلب مساعدة خاطرني تقريبا فقدت قوتي الكل...لدرجة منعرفش كيفاش قعدت على الكرسي و لا كيفاش وليت في وسط الكلينيك...حتى اني لقيت روحي وحدي خاطر الباب تسكر في وجهو..دوب نجمت نركز معاهم...أول خطوة كانت من الطبيبة هي أنها نحات الدم من ظوافري بال coton tiges و حطتهم في أكياس...كيما سمعتها و هي تحكي على النزيف و الحمض النووي...كيما ريتها و هي تاخو في تصاور لبدني...للحظة حسيت أني تخدرت أكثر...و دموعي شاحت على وجهي حطت يدها على خدها تحكي
هي:مدموزال تسمع فيا ياخي
حليت عينيا شوية نثبت فيها...كبست على يدي تحكي
هي:انا عطيتك حقنة منع الحمل...كيما انو النزيف محبش ياقف و لازمنا دم توا...كان تعرف زمرة دمك جاوبني
كبست بيدي على الفرش...راسي رزن عاللخر و منجمتش نسمع بقية كلامها و لا حتى نجاوبها...الأحداث بدات تتعاود قدامي بتفاصيلها...و قوتي لي جيت بيها لهوني كأنها تبخرت و معادش حسيت بيها جملة...وين صوت صياحي قوا...لحظة وحدة خرجت فيها الغصة لي شديتها ساعات طويلة حتى بدني تمرد عليا رغم الوجيعة و خلاني نتهز و نتنفض...كأنو اللي صار باش يتعاود معايا مرة أخرى دقايق تعدات وين كلشي رجع لبلاصتو و هديت بصفة غريبة...لدرجة حتى الوجيعة معادش حسيت بيها كلشي لقيت روحي نحب عليه...أني نرقد و كهو غريبة برشا صدف القدر معايا...اليوم كان ينجم يكون أحلى يوم في حياتي...لو شاركت في المسابقة و ربحت اما الفرحة هاذي تحولت لأسوء كابوس باش يرافقني و يكون ونيسي لغاية ما ناخو حقي بيدي و نقضي على أمير أصلان و على كلشي يتعلق بيه...مهما كان اللي باش نتعدا بيه بعد توا...ماهوش باش يهدني...و مستحيل نكون ضحية ليه و لا غيرو...صحيح أنا خسرت جولة...أما مخسرتش الحرب.
#إيمان_أمير💔