🔸️الحلقة 2
🔸️آدم_يحكي:
حليت عينيا شوية و عديت يدي على وجهي...محاولة مني باش نصحصح أكثر...دورت راسي شوية نغزرلها مديت يدي شوية...بعدتلها خصلات شعرها لتالي...نثبت في ملامح وجها...تبسمت بالوقت و انا نتذكر في كلامو ساعات يبدا عندو الحق...حتى أسمائهم تتلفلي...اما اللي قدامي توا مش كيما الكل...لتوا منعرفش شنوة شدني ليها خذيت نفس طويل و هزيت روح لبيت البانو..عملت دوش خفيف تفرهدت بيه...أول ما لبست الكاب...تحل الباب هزيت راسي نغزرلها...هزيتها و حطيتها...و ركزت نظري على يديها لي كابسين على الكاب فوق صدرها قربت منها شوية نحكي
أنا:المرة الجاية تعلم دق قبل ما تدخل
حطت يدها على كتفي و قربتلي أكثر...غزرت لشفايفي تحكي
رغد:على حد علمي إحنا مناش في الخدمة
مديت يدي شوية...كبست على وجها...و دزيتها لتالي نحكي
أنا:أي بلاصة نبدا موجود فيها متدخلهاش قبل ما تستأذن وااضح
جات باش تحكي قصيت عليها...كي نزلت على شفايفها دوب عضيتها و جبدت روحي مع صوت الباب نحكي
أنا:خليك هوني
رغد:نستنى فيك
جبدت الغطا عليها في لحظة...طاح عالارض...عديت عينيا على بدنها...تبسمت و هزيت روحي خرجت شايخ في مخي...منعرفش شكون باش يجي مع الصباح..أصلا مفماش من غير كنان لي يهد عليا...و البون مجيش في أيام العطلة...خذيت نفس و حليت الباب...و ريت آخر حد توقعتو...عديت عينيا على ملامح وجها...ما تبدل فيها شي على آخر مرة ريتها و لا نقول هي نفسها بعد السنين الطويلة لي تعدات و الخسارة لي تعدينا بيها رخفت يدي عالبواني و دخلت نحكي
أنا:توقعت لي المدام شذى مترجعش لبلاصة تطردت منها قبل
شذى:آدددم يزززي...ياااخي مفديتش من معااملتك ليا ؟
انا:أصلا شكونك أنتي باش نحسن معاملتي ليك
شذى:أمك و كااان عجبك و لا لا انت ولدي
انا:لاااا عاااد إنتي لتوا متعلمتش مفهوم الأمومة
شذى:ميزيينش من الكلام الجارح ؟
أنا:هذا لي تستهلو أنتي
جبدت الكاسة و خدمت الكافتيار...معينيش باش نغزرلها جملة...قربت مني أكثر...حطت صاكها عالكنتوار و مدت يدها باش تمسني...وقفتها نحكي
انا:رد بااالك تحط يدك علياا
جبدت يدها بالوقت كبست عليها و وخرت خطوة لتالي تحكي
شذى:خلينا نحكيو مرة وحدة كهو
انا:مفما حتى شي نحكيو عليه...بالمعنى الصحيح منحبش حتى نتذكر أنك مزلت عايشة
شذى:متنجمش تتخلى علينا بالبساطة
كبست عالكاسة في يدي...طيشتها بكل قوتي تكسرت بحذا ساقيها...قربت منها بالزربة...وقفت في وجها نحكي
انا:أمااااا انتي تخليت...انتي تخليت عليناااا...طول السنين هاااااذي عشت لروووحك و كهووو...اما وقت لي رجعت خذيت مني حياااتي...كسرتنا و كسرتني انا بسبب قراارتك الغاالطة...و بسبب مكانتك و اعتقاداتك الفاسدين
شذى:انا كلشي عملتو كااان على خاطركم و كهو
انا:إنتي ما عملت حتى شي على خاطرنا...كنت و مزلت كلشي تعملو على خاطر الفلوس و كهو...عرست مع بابا لسبب هذااا و حاولت تكبرنا بنفس تفكيرك...تتوقع مني بعد اللي خليتني نخسرو مزلت باش نعطيك فرصة و نقلك أمي مرة أخرى...ساعة شنية لي خلاك تتنازل و تجي لهوني مرة اخرى...متطلعش كملت فلوس مصطفى الطهرواي و تحب شكون يصرف عليك ؟
شذى:آدددم يزززي كهو...متقللش من احتراامك ليااا أكثر
أنا:شقولك نعطيك شيك على بياض...اكتب المبلغ لي تحبو و متخلينيش نشوف وجهك مرة أخرى
هزت راسها شوية...غزرت لرغد لي هابطة من الدروج تبسمت على جنب تحكي
شذى:معناها مزلت في عوايدك...ديما مع نساك
أنا:تستنى فيا نتصلح و نعمل عيلة سعيدة كيما لي عندك
شذى:عالأقل تصلح من روحك...خاطر وليت حديث الساعة تشهرت بالنسا لي عندك أكثر من خدمتك..ياخي لهدرجة متهمكش سمعتك و لا سمعة عيلتك
أنا:هاك قلتها سمعتي معروفة و رغم هكا مزلت ناجح حتى شي ما أثر عليا و إنتي تعرف هذا بالقدا خااطر أخباري الكل عندك
شذى:ملا كان عندي حق كي منعت أسيل تجي معايا و تشوف المنظر هذا
بقيت نغزرلها من غير حتى كلمة...قلبي خض بالقاوي...و متوقعتش باش تجبد سيرتها...خذيت نفس طويل نحكي
انا:اخرج من هووني
شذى:ان شاء الله تفيق على وضعك قبل ما تخسر كلشي
أنا:متخلينيش نطيح من قيمتك أكثر و نخرجك بيدي ااخرج من هوووني و معاادش تخليني نشوف وجهك مرة أخرى
هزت صاكها و خرجت...غمضت عينيا و عاودت حليتهم مع صوت الباب...محاولة مني باش ناخو نفس نهدي بيه أعصابي...قربت مني تحكي
رغد:شفما آدم ؟ شكون هاذي ؟
أنا:أمشي من هوني توا
رغد:أماا
انا:متخلينيش نعاود كلامي مرة اخرى
رغد:بااهي كيما تحب...نشوفك مبعد
جبدت روحها مني و عاودت طلعت...قربت من الكنتوار بالوقت...قلبت الكاسة و عبيتها...نحب ننسى اني ريتها و حكيت معاها...فرد وقت منحبش سيرة أسيل تتجبد قدامي خااصة منها هي...يكفيني لي خسرتو جرايرها يكفي الكابوس لي عشت بيه طول المدة هاذي...ساعة متأكد انو ما يجي وراها كان الخسارة...أكا علاش مستحيل نسمحلها تقتحم حياتي و لا تحاول تكون جزء منها...أصلا انا فقدت برشاا حاجات...حاجات ماتت داخلي و معرفتش نسترجعهم مرة اخرى...كنان الوحيد لي كان في ظهري و اللي بدينا كلشي مع بعضنا...لغاية ما وصلنا هوني...و منعتبرش روحي عندي عيلة من غيرو هو و امي فاطمة كهو...خذيت آخر رشفة و شيعت راسي...نحب ننسى كلشي صار دقايق لتالي...حسيت بيها كي خرجت تنهدت بالقاوي...و عديت يديا زوز على وجهي..صورتهم حضرت بين عينيا مرة اخرى و حضرت معاها كل إحساس خايب تعديت بيه و عاش معايا طول السنين هاذي.
#آدم_شذى💔
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
