صرخة صمت 🌬

الحلقة الثانية و الثمانون

🔸️حلقة 82
🔸️إيمان_تحكي:
عديت عينيا على وجهو و كبست على كرشي أكثر منعرفش كيفاش خرج معايا الكلام...أما منجمتش نتحمل الوضع هذا أكثر من هكا...تعبت من كلشي قاعد يصير معايا في الفترة هاذي...عدا يدو على وجهو يحكي
كنان:خليني نوصلك
قربت منو شوية و مديت يدي باش نحطها على صدرو وخر لتالي بالوقت يحكي
كنان:متمسنيش
كبست على يدي و رجعتها لتالي مصدومة من ردة فعلو خذيت نفس و عاودت غزرتلو نحكي
أنا:ك..كناان
كنان:تحب تقنعني أنو الصغير هذا ولدي ؟
أنا:نعرف...أنك باش تستغرب الموضوع
كنان:ياخي باش تحاول تبررلي توااا ؟
أنا:كناااان...أنا نعرررف بحكاااية أنك مجيبش صغار من الأول...أما طلعت غااالط
كنان:فااااش قاعدة تحكي ياخي ؟
أنا:نقصد أنو سيلين هي لي دبرت الموضوع هذا الكل باش مطلقهاااش
كبس على شعرو أكثر و عطاني بظهرو...منجمتش نقرب منو...خاطر خفت أنو ردة فعلو تكون أقوى..خذيت نفس نحكي
أنا:حاول تفهمني أماانك...أنا تعبت كناان...معادش نعرف شنوة نعمل بالظبط و لا حتى كيفاش نتصرف في الوضع لي إحنا فيه...كيما معادش نجم نخبي الحكاية هاذي عليك أكثر من هكا
تنهد بالقاوي و تلفت عندي...غزر لكرشي...يحكي
كنان:خلينا نمشيو توا
أنا:منحبش...مش قبل ما تحاول تفهم اللي صار
كنان:نفهم شنيييية إيمااان...ياااخي أنا نجمت نستوعب قصة عرسي و حياتي الجديدة..باش نستوعب حبااالتك توا ؟
أنا:كنااان يااا روحي...أفهمني المرة هاذي كهو
كنان:خلينا نمشيو توا...أنا بحاجة وقت إيمان
عطاني بظهرو و رجع للكرهبة...خذيت نفس طويل و خلطت عليه...ركبت من غير حتى كلمة...أصلا منجمتش نخمم في اللي باش يصير..شد الثنية من غير ما يغزرلي و لا يحكي معايا...عديت يديا زوز على كرشي و تكيت لتالي...منجمش نلومو خاطر حتى هو وضعو صعب و كلشي مبهم بالنسبة ليه أما فرد وقت تعبت أكثر و معادش نعرف شنوة نعمل حتى قرايتي ضيعتها...و معرفتش كيفاش نبدا من جديد و لا كيفاش نتأقلم مع وضع كنان...دخلت في دوامة متاع أفكااار...فقت منها كي وصلنا للحومة شد الفران و دور راسو للبلار...خذيت نفس و نزلت من غير ما نحاول معاه أكثر...أول ما سكرت الباب...طار بيها مرة أخرى...رجعت خصلات شعري لتالي و مشيت لدار...حلتلي أمي تحكي
زينب:إيمان لباس يا روحي ؟
أنا:خبرتو بكلشي
زينب:إيجا أقعد ساعة
كبست على يدي و دخلتني معاها...قعدت على طرف الفوتاي...و شديت كاسة الما من يدها...شربت منها شوية نحكي
أنا:مصدقنيش يا أمي
ملاك:إيماان...هدي روحك...متنجمش تلوم كنان و هو في الوضع هذا
زينب:ملاك عندها حق
أنا:نعرف...أما نفسيتي تعبت...معادش نجم نتحمل هذا الكل...هو ما يتذكر حتى شي من اللي عديناه مع بعضنا و منعرفش قداش باش يدوم الوضع هذا منحبش نجيب الصغير هذا و بوه مش متذكرو و لا حتى مصدق أنو ولدو
زينب:هدي روحك توا...و أكيد الحكاية تتحل مع الوقت عزيزتي
أنا:و يمكن متتحلش...كنان إذا مسترجعش ذاكرتو باش يفسخني من حياتو
زينب:كناان ميعملش هكا...خليه براحتو و أكيد باش يتذكر كلشي مع الوقت
هزيتلها براسي باهي و وقفت بالوقت...نحكي
أنا:أنا باش ندخل نرتاح شوية
زينب:عالأقل كول حاجة
أنا:معينيش أمي
جبدت روحي منهم و دخلت للبيت سكرت الباب و قربت من الشباك شوية...هزيت الريدو على أمل إني نشوفو...منحبش نتحير عليه توا و لا نبقى على أعصابي خاصة أنو من أيامات مساقش الكرهبة...حطيت يدي على كرشي نحكي
أنا:باش يتذكرنا أكيد...أصلا هو يحبني و ماهوش باش يتخلى عليا و لا عليك زادة
عديت ساعتين على نفس الحالة...وين لقيت روحي نسترجع في كل لحظة عديتها معاه...هزيت راسي على صوت الكرهبة...تنهدت براحة كي ريتو نزل منها عالأقل طمنت لي هو لباس...وخرت لتالي و قعدت على طرف السرير...و عاودت وقفت...خرجت من البيت من غير ما نخمم وقفو زوز مع بعض...غزرتلهم نحكي
أنا:تو نرجع
زربت في خطواتي و خرجت من الدار...وفقتو قبل ما يدخل
أنا:كنااان
تلفت عندي شوية...قربت منو و وقفت قدامو نحكي
أنا:نعرف إني تعبتك معايا برشا...أما خلينا نحكيو مرة أخرى
كنان:أنا تاعب توا...و بحاجة راحة
أنا:و أنااا تاعبة زادة...كلشي ولى ضدي في لحظة الظروف...أيمن و أنت زادة كنان...ياخي لهدرجة فكرة الصغير جاتك صعيبة و منجمتش تستوعبها ؟
كنان:أرجع لدار توا...مش وقت الكلام هذا توا
أنا:شقصدك ؟
كنان:ما نقصد شي إيمان
أنا:أنت مش مصدقني ؟
كنان:قتلك مش وقت الكلام هذا...زيد مدامك حبلة برا إرتاح على روحك...نحلو الحكاية مبعد
أنا:فهمت عليك...أتو كي توصل لحل أعلمني بيه
وخرت خطوة لتالي و عطيتو بظهري..مديت يدي شوية و حطيتها على صدري...نهدي في دقات قلبي لي قوات و نوازن في روحي باش نجم نرجع لدار...تقويت على روحي و زربت في خطواتي...حتى دموعي منجمتش نتحكم فيهم...و لأول مرة نحس روحي ضايعة...و معادش نعرف أنو طريق نكمل فيها و لا أنو مرسى نحط عليه...منحبش نبعد عليه...كيما منجمش نقرب منو أكثر من هكا...و الخوف من فكرة أنو هو ماهوش باش يتذكرني مرة أخرى...قاعد يكبر داخلي في كل لحظة...أصلا هو جزء مني و حياتي من غيرو شبه مستحيلة...خاطرني عشت و عرفت الحب معاه هو و كهو...كنان عطاني كلشي فقدتو في حياتي الماضية و عوضني على كل لحظة حرمان تعديت بيها...منحبش نستخايل أنو باش يجي نهار و نتحرم من وجودو معايا جملة.