صرخة صمت 🌬

الحلقة الخامسة و الخمسون

🔸️حلقة 55
🔸️كنان_يحكي:
خذيت نفس طويل و عديت عينيا على روحي مرة أخرى...هاذي أول مرة نحس روحي مرتاح و مستعد للي نعمل فيه...عكس خطبتي على سيلين قبل...توا بالظبط كلشي مختلف...الظروف...الوقت...و دقات قلبي لي رضخت للحب...طول السنين لي فاتت متوقعتش باش ناخو ثنية كيما هاذي و لا حتى نلقى لي نفركس عليه أكا علاش معنديش إستعداد باش نأجل و لا نضيع وقت أكثر من اللي فات عليا...حتى مستحيل نكون مرتاح إذا مكانتش معايا تحت سقف واحد..خاصة بعد اللي تعدا علينا الكل...هزيت راسي شوية نغزر لفاطمة...لحقت باش تحضر روحها...تلفت عندها نحكي
أنا:إيجااا فطومة
فاطمة:ربي يفرحني بيك أكثر من هكا يا روحي
تبسمت و قربت منها شوية...بستها من جبينها نحكي
أنا:يكفي أنك ديما بجنبي
فاطمة:قبل ما نخرجو من هوني و قبل ما تعمل الخطوة هاذي...نحبك تسامحني كنان...خاطرني شغشبتك معايا و تحصرت على حاجة مش بيدك صدقني أنت أكثر من ولدي...أنت أمانة الغالية و مستعدة باش نعطيك عمري المهم عندي أنك فرحان و مستقر قي حياتك 
كبست على يدها و عديت عينيا على وجها نحكي
أنا:صدقني هاذي أول مرة نحس إني قاعد نمشي على الثنية الصحيحة...و إيمان الوحيدة لي تنجم تعوضني على كل خسارة تعديت بيها قبل...منها عرسي بسيلين
فاطمة:منحبش حياتك السابقة تأثر على علاقتك مع إيمان...رد بالك عليها و حطها في عينيك...خليك السند لي باش تتكى عليه وقت تضيق بيها الدنيا و رد بالك تجي ضدها مهما كان اللي باش يعرضكم نعرف لي أنت باش تعمل هذا الكل...أما نحبك تتذكر كلامي في كل مرة تجي تغلط فيها
أنا:تهنى فاطمة...مستحيل نضرها و لا حتى نتخلى عليها زادة
عاودت بستها و جيت باش نحكي...قص علينا صوت الباب...ضيقت عينيا نحكي
أنا:وينها حنين..شبيها محلتش ؟
فاطمة:تلقاها تحضر في روحها
أنا:باهي هاني باش نحل أنا
جبدت روحي منها و خرجت البيت..جات عيني عليها
غمزتني تحكي
حنين:والله هاذي أول مرة نشوف كنان العامري مستعد لهدرجة
أنا:والله مش كل يوم نخطب
حنين:هيا فيسع...هاك طلعت معندكش ذرة صبر
ضحكت و قربت من الباب...حليتها نغزرلو واقف كابس على البوكي تاع الورد في يدو و على الشكولاطة في يدو الثانية...ضيقت عينيا نحكي
أنا:متطلعش غالط في العنوان سي آدم ؟
آدم:أبعد من قدامي شوية...حاجتي بفاطمة
بعدت من الباب و خليتو دخل...غزر لحنين يحكي
آدم:شقولك ؟
حنين:شفما سي القيصر ؟
آدم:والله حتى أنا باش نخطب زادة
ضيقت عينيا مستغرب و عديت عينيا عليه...نحكي
أنا:تخطب شكون ؟
آدم:ملااكي
أنا:بالله ؟
آدم:والله هكا قررت...مدام أنت باش تخطب...أنا باش نخطب زاادة
عديت عينيا على فاطمة و حنين لي يضحكو بالساكت قرب من المرايا شوية و غزرلي يحكي
آدم:شبيك ؟
قربت منو شوية...و مديت يديا زوز...عدلتلو كول سوريتو نحكي
أنا:هكا وليت حااضر 
آدم:باهي برشا...خلينا نمشيو ملا
فاطمة:هيا برك...عالأقل كان عطيت خبر لطفلة
آدم:للأسف ماهيش تحكي معايا
أنا:بالله سي الشباب ؟ و كيفاش ناوي تخطبها ؟
آدم:منعرفش...زيد مناش متعاركين زادة...هيا برك ماكش باش تحل معايا تحقيق توا
عاود هز بوكي الورد و الشكولاطة و سبقني...غزرتلي حنين تحكي
حنين:كناان...هيا فيسع
شاورتلي للورد متاعي...هزيتلها براسي باهي...دخلت بعضي و هزيتو مع باكو الشكولاطة و خلطت عليه نحكي
أنا:ماكش متوتر ؟
آدم:لااا...و أنت ؟
أنا:منعرفش
آدم:بالله...ياخي أول مرة تخطب فيها أنت ؟
أنا:مانيش ناقصك آدم...زيد أنت تعتبر دخيل توا
آدم:والله نتوما عيلتي الوحيدة توا و من غير ما نكلفو الجماعة...أكا علاش قررت باش نعملو خطبة جماعية
أنا:تفضل ملا
ضحكت و خلطت عليه...مد يدو و دق الباب...يحكي
آدم:شبي وجهك أصفر ؟
أنا:قولها لروحك
فاطمة:يزي أنت و هو
سكت على صوت الباب لي تحل...نغزر لزينب لي ضيقت عينيها مستغربة...ضربتو بيدي باش يحكي قحرلي و غزرلها يحكي
آدم:والله يا زينب...حتى أنا جيت باش نخطب
زينب:مرحبا بيك آدم
آدم:عيشك
زينب:مرحبا بيكم الكل
تبسمت و دخلت وراه...تبسمت كي لمحتها...عديت عينيا عليها في لحظة...من الروبة الروز كرام لي على بدنها لخصلات شعرها و لمعة شفايفها...لي مذقتش كيفهم لتوا...لي خلاني نحب نقربلها و ناخوها في حضني و نشبع بيها و بريحتها أكثر...خذيت نفس طويل و كملت دخلت...قرب مني شوية يحكي
آدم:وينها ملاكي ؟
أنا:شيعرفني آدم ؟ أسأل أيمن
آدم:أيمن إيجا لحظة تراه
حط يدو على كتفو و نزل عندو شوية...يحكي
آدم:ملااك وينها ؟
أيمن:في بيتها مع إيمان
آدم:برا خبرها لي أنا نستنى فيها هي زادة و من غير ما طول عليا باهي
أيمن:علااش تستنى فيها ؟
آدم:والله حتى أنا نحب نخطبها
أيمن:معناها باش يمشيو زوز من هوني
أنا:أكيد لا و منحبكش تخاف...خاطر حتى حد ماهو باش يفكهم منك
أيمن:منحبش ملاك تعرس
آدم:يرضيك نبقى وحدي هكا ؟
أيمن:أنت كبير توا...تنجم دبر أمورك وحدك
آدم:مش كلشي...هيا برا خبرها
أيمن:ملا من غير ما تعرس إيمان
قحرلنا و مشى...ضحكت بالوقت..عدا يدو على وجهو يحكي
آدم:على أساس أنا ناقص توا...من غير شي ماهيش قابلة بيا
أنا:والله لازمك تحاول أكثر...خاطر كلنا نعرفو الشي لي تعدات بيه ملاك...معناها لازمك برشا صبر سي آدم
آدم:باش نصبر صدقني...و مستحيل نخليها بيها بعد ما وعدتها
تبسمت و هزيتلو براسي باهي...خاطر نعرف وضعو و لي قاعد يمر بيه...مدامني في نفس الوضع معاه حتى انا مستعد باش نعمل أكثر على خاطر إيمااني خاصة اني مستحيل نجم نتخايل حياتي من غيرها بعد توا.