صرخة صمت 🌬

الحلقة السادسة و الثلاثون

🔸️حلقة 36
فقت من سرحتي كي قربت مني و وقفت قدامي...تغزر للباب و تحكي فرد وقت
حنين:شنية لي صار ؟
أنا:منعرفش
حنين:كنان...متطلعش عملتلها حاجة ؟
أنا:بالله شعندي نعمل...ساعة حنين قولي
حنين:شنوة ؟
أنا:شقصدها لي أنا قاعد نلعب على الحبلين ؟
حنين:منعرفش...متطلعش لقاتك مع وحدة أخرى
أنا:وين باش تلقاني بالله...طلعت متغشة مني خاطر هزيت عليك و هي لا
حنين:لاا عااد
أنا:شنوة ؟
حنين:البرنساس متاعك...غايرة عليك مني
أنا:إيماان ؟ تغير عليا أنا ؟
حنين:عندك تفسير آخر سي كنان ؟ ساعة ماشي في بالها لي فما شي بيناتنا...هذا اللي قصداتو بكلامها أنك تلعب على الحبلين
أنا:أما فهمتها طبيعة علاقتنا قبل...زيد مفما حتى شي يدل أنها غارت بالحق
حنين:بالله ؟ ملا شنية تسمي لي صار ؟
أنا:منعرفش...بالعادة سيلين تقوْم الدنيا و تقعدها
حنين:والله ظاهر سيلين أثرت عليك و زيد هاكي مضروبة في راسها...مش نفس الشي...زيد أنت واقع في مشكلة بالرسمي...يعني توا لازمك تخمم كيفاش ترضيها
أنا:أما مغلطتش...أول ما وصلت للبيرو...طلبتك و قتلك خليت تليفوني في الدار...خاطر بعد ما حكيت مع آدم خليتو فوق الطاولة و خرجت
حنين:والله أنا طلبتك من تليفون الخدمة من غير ما نبررلها علاش مهزيتش عليها
أنا:يعني كان طلبتني مكنتش باش نهز عليها
حنين:كنااان أنا و أنت نعرفو لي صار...أما هي لا و طبيعي تفسر الحكاية كيما تحب...نظن أنت لازمك تشرحلها و تخليها تصدقك...كيما لازمك تاخوها على قد عقلها في الأخير مزالت صغيرة
دورت راسي غزرتلها بالوقت...بعدت عينيها من وجهي ضحكت نحكي
أنا:علاش إنتي إمتى كبرت ؟
حنين:نبقى أكبر منها
أنا:إيجا...إيجاا
حنين:ماكش باش تحكي معاها ؟
أنا:مش توا...عالأقل لين تهدا شوية
حنين:إمتى ؟
أنا:حنين يزي من الأسئلة توا...أنا باش نمشي لسوسيتي توا و نرجع نشوف فاطمة مبعد
حنين:بااهي نشوفك مبعد
تبسمت و رجعت للكرهبة...منعرفش على روحي كيفاش وصلت لسوسيتي...من غير شي عندي أكثر من قضية لازمني ندرسها...عديت بقية النهار في البيرو...غاطس في الخدمة و في اللي صار...فكرة أنها غارت بالرسمي خلاتني شايخ عليها أكثر...هزيت راسي على صوت الباب لي تحل ضيق عينيه يحكي
آدم:فاتني شي ؟
أنا:كيما شنوة ؟
آدم:والله عندي برشا مريتكش مرتاح هكا...متطلعش عامل حاجة ورا ظهري
أنا:و عاللخر زادة
آدم:و شنية لي صار ؟
أنا:والله فما حاجة مهمة لازمني نصلحها توا...بعدها نقلك شنية لي صار
آدم:الحكاية تتعلق بإيمان ؟
أنا:بالظبط
سكرت الدوسي و هزيت روحي وقفت...لبست الفاست متاعي نحكي
أنا:هيا قوم خلينا نمشيو...و لا عندك مخططات أخرى ؟
آدم:لااا...هاني قاعد نصلح من روحي
أنا:والله مذا بيا نشوفك مستقر في حياتك
تبسم و خلط عليا...شدينا ثنية الحومة...ركا كرهبتو ورايا و نزل...حليت البلار نحكي
أنا:تو نخلط عليك
آدم:شفما ؟
أنا:فما موضوع باش نحلو مع إيمان...نحكيو مبعد
آدم:باهي
تكيت لتالي و هزيت تليفوني طلبتها...محبتش تهز كي العادة...خذيت نفس و بعثت ميساج <<أخرج توا و لا باش نظطر ندخل أنا >> دورت راسي شوية نغزرلها هزت ريدو تغزر لكرهبتي...زمرتلها بالوقت وين رجعت لتالي و خرجت عندي...بقيت نستنى فيها الداخل عاودت زمرتلها...كبست على الجيلي متاعها و قربت مني...حلت الباب و ركبت تحكي
إيمان:كنااان...شنية تستخايل في روحك تعمل ؟
سكرت الباب من جيهتها و خدمت الكرهبة...غزرتلي مصدومة تحكي
إيمان:فاش تعمل ياااخي ؟
أنا:باش نحكيو في بلاصة أخرى
إيمان:قتلك مفما حتى شي باش نحكيو فيه
أنا:هدي روحك...منحبكش تخاف مني...زيد فما حاجات باش نوضحهم و نحبك تسمعهم مني
إيمان:و أنا قتلك منحبش...زيد مخبرتهمش لي أنا باش نبعد
أنا:مانيش باش ناخو من وقتك برشا
إيمان:كنااان
أنا:أمااانك
إيمان:باااهي
عوجت فمها شوية و دورت راسها لشباك...تبسمت و نزلت على الفيتاس...منعرفش إذا لي نعمل فيه صحيح و لا غالط...أما مرة أخرى نحب نوضح اللي قاعد يصير بيناتنا و الأهم بالنسبة ليا إني معادش نخليها تفهمني بالغالط و لا تخاف مني...وصلت لبقعة كالم...بالعادة نجيها وحدي و لا مع آدم...شديت الفران و حبست الكرهبة...بقيت ساكت شوية...دقايق كانت كافية باش نسترجع كلشي تعديت بيه من وقت عرست بسيلين لتوا...منتذكرش لحقت باش نعيش هذا الكل و لا نلحق باش نبني عيلة مستقرة...أصلا منجمتش نعطي لروحي فرصة معاها...بعد اللي كسراتو و لقيت روحي عايش سنين وحدي...خاطر وجودها مكانش يفرق معايا...من غير المشاكل متاعها لي كنت مجبور باش نتعامل معاهم...كيما منجمتش ناثق في مرا أخرى و لا ناخو خطوة أخرى و ندم عليها...وسط هذا الكل منعرفش كيفاش لقيت إيمان قدامي...حتى كانت أول قضية غريبة تصادفني و حتى هي مش كيما أي موكل تعاملت معاه قبل...وجودها خلاني نحس أنو الفراغ لي كنت نحس بيه إختفى فجأة...كيما لقيت روحي نحب نسمع كلامها على أحلامها الصغيرة و اللي تحب توصلو بخلاف قضيتها خاطرني كنت ندور في حلقة فارغة من غير أهداف و من غير ما نعرف في أنو بِر باش ترصيلي فقت من سرحتي على صوتها تحكي
إيمان:نسمع فيك كنان
دورت راسي شوية و عديت عينيا على تفاصيل وجها على لون عينيها...خدودها و شفايفها زادة...وين حسيت بنفس الرغبة ناحيتها...فرد وقت معادش نعرف إذا كانت الخطوة هاذي صحيحة و لا غالطة و إذا باش يجي نهار و ترضى تكون معايا و متاعي...رغم الظروف الكل.
#إيمان_كنان❤