🔸️حلقة 14
🔸️كنان_يحكي:
عديت عينيا على حركة يديها و طلعت بيهم لملامح وجها لي تبدلت...هزت راسها شوية و غزرتلي ندرا كيف تحكي
إيمان:جابر أصلان هو المالك الرسمي للمنطقة لإحنا فيها يعني الأراضي و العقارات و كلشي غديكا يرجع ليه..كان كلشي عادي وقتها...لين رجع ولدو من أمريكا من 3 سنين لي خلى جابر يعطيه حرية التصرف في كلشي بحكم هو الوريث الشرعي متاعو...أما الفرق الوحيد أنو أمير يعتبر حتى السكان من أملاكو و رفضي ليه و لكل طلب منو خلاه يحطني في راسو...حتى إني تواجهت معاه قبل الحادثة أكثر من مرة
أنا:الحادثة وين صارت بالظبط ؟
سكتت شوية و هزت راسها...غزرتلي ندرا كيف...تحكي
إيمان:في البيرو متاعو
بقيت نغزرلها من غير حتى كلمة...لقيت أنو الأحسن أنها تكمل كلامها من غير أسئلتي...تبسمت على جنب تحكي
إيمان:بابا طلب مني نوصل الفطور للخدامين كي العادة و وقتها كان فما خداام هو اللي دلني على البيرو متاع أمير على أساس بابا يستنى فيا غديكا...أما طلعت لعبة منو باش يحصلني و نجح...حاولت نحمي روحي و كان أقوى مني...قاومت لآخر نفس فيا و كان لقيت فرصة وحدة وقتها راني قتلتو من غير تردد...خاطر اللي صار مش مجرد إغتصاب و كهو...اللي عملو أمير كان محاولة منو باش يعلن ملكيتو ليا و يخليني نرضخلو
غمضت عينيها بالقاوي...خذات نفس طويل و عاودت حلتهم تحكي
إيمان:قدمت شكوى في نفس اليوم متاع الحادثة...حتى أنو الملازم نزار المسؤول على المركز في الدشرة هو اللي عاوني و خلاني نتعدا لطبيب الشرعي هوني في تونس التقرير كان يوضح كلشي تعرضتلو و بابا كان شاهد على الأحداث الكل هو و مجموعة من الناس...خاطر بعد ما خرجت من عند أمير كانت حالتي واضحة...أما التقرير و الأقوال و الشهود...كلشي تبدل نهار المحكمة خاطر ببساطة أمير نجح يشري المحامي و يشري بابا زادة
رجعت شعرها بيديها زوز...لي خلاني نلاحظ رعشتها لي زادت...كبست على كاسة الما و حطيتها في يدها...دوب شربت منها و نزلتها...غزرت لعينيها نحكي
أنا:إيمان كيفاش كانت علاقتك مع بوك ؟
إيمان:مفماش علاقة من أصلو...كبرت و أنا نغزر لظلم متاعو لأمي...توقعت إني كرهتو بعد اللي خلاني نعيشو أما توا ولى ثاني اسم في القائمة متاعي
أنا:شقصدك ؟
إيمان:أنا نحب الراجل هذا يشد الحبس
عديت عينيا على وجها مستغرب و تبسمت بالوقت نحكي
أنا:إنتي هوني تحكي على بوك
إيمان:أنا نحكي على راجل ظالم و مستبد...نحبو يخلص اللي عملو في أمي الكل من ضرب و ظلم و إهانة...فرد وقت هو كذب و شهد بالزور و هذا الشي يعاقب القانون عليه
أنا:كان يثبت لي هو شهد بالزور باش يتحاسب أكيد...أما بالنسبة للموضوع الثاني يرجع لأمك
إيمان:و أمي تحب نفس الشي زادة
أنا:باهي...نخليو المسألة هاذي مبعد...أهم شي توا أنك تتذكر كل حد قابلتو نهار الحادثة بعد أمير أصلان...يعني من وقت خرجت من داركم لين وصلت للكلينيك...أي شاهد و أي دليل باش يكون في مصلحتك
إيمان:منتذكرش إسم الكلينيك
أنا:أمين الأزهر
إيمان:من وين عرفت ياخي ؟
أنا:من التقرير متاعك
إيمان:كيفاش وصلت ليه
أنا:كل قضية الدليل متاعها يبقى في المحكمة
إيمان:أما التقرير مزور
أنا:تتذكر الطبيب لي عدا عليك ؟
إيمان:اي...أما كانت طبيبة..مش طبيب حتى كان معاها زوز زادة
أنا:شكون كان معاك
إيمان:نزار...نقصد الملازم نزار...خاطر الوحيد لي صدقني وقتها و عاوني باش نخلي القضية توصل للمحكمة
أنا:مدامو عاونك لهدرجة علاش مكانش شاهد في القضية متاعك
إيمان:منعرفش...بلكشي كان يولي عندو علم باللي صار يشهد معايا وقتها
عديت عينيا على وجها و سكت شوية...منعرفش شنية لي قلقني من كلامها تالي...خذيت نفس نحكي
أنا:خلينا نبداو من الكلينيك ملا
إيمان:نجم ناخو عنوانها منك ؟ يمكن نجم نقابل الطبيبة غديكا
أنا:أنا باش نمشي معاك...بعد توا أي نقطة تخص القضية هاذي ترجع ليا أنا في الأول
إيمان:باش تجي معايا ؟ أنت ؟
ضيقت عينيا مستغرب من سؤالها و هزيتلها براسي إيه نحكي
أنا:وين المشكلة ؟
إيمان:من ناحية هاذي مفماش مشكلة...أما كيفاش تنازلت باش تمشي معايا هوني المشكلة
أنا:بالله ؟
إيمان:والله...أنت أكثر حد متكبر و مستفز قابلتو في حياتي الكل
أنا:أنااا ؟
حطت يدها على فمها...و هزت روحها وقفت بالوقت تبسمت بالوقت تحكي
إيمان:منقصدش...مجرد تعبير و كهو...خليني نمشي أنا توا خاطر ساعات منركزش في الكلام لي باش نقولو وقت تقرر تمشي للكلينيك أعطيني خبر باهي و حاول تقنع صاحبك يبعد على ملاك...هيا نهارك زين
عطاتني بظهرها و قربت من الباب...هزيت روحي وقفت نحكي
أنا:خلي الرقم متاعك عند نهاد...مدامك مستعجلة لهدرجة إيمان:علااش ؟
أنا:باش نعطيك خبر
إيمان:صحيح...هاني باش نخليه
تبسمت و خرجت من غير ما تعاود تتلفت...بقيت واقف في بلاصتي نحكي
أنا:متكبر و مستفز
دقايق عديتهم نحلل في الجملة هاذي...نفخت بالقاوي نحكي
أنا:شنية علاقة الكلام هذا بالقضية...ساعة على أساس تنازلت عليها...شنية لي قاعد يصير معايا توا
عديت يدي على شعري...وقعت الأوراق اللازمة و خرجت هزيت الرقم متاعها من عند نهاد...تبسمت على جنب...أصلا نحس في روحي داخل على حرب...مش قضية عادية فرد وقت مستغرب من العلاقة لي تربطها مع ملاك...خاطر اللي فهمتو تقريبا أنها هربت بعد ما خسرت القضية...و اللي لاحظتو أنو عزيمتها هي أكبر دافع ليها باش ترجع حقها اكثر من كوني أنا المحامي متاعها.
#إيمان_كنان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
