🔸️حلقة 7
🔸️إيمان_تحكي:
حليت عينيا على نهار جديد...متوقعتش أني نرجع لدار هاذي بعد اللي تعدا علياا...هزيت روحي من فرشي...نمد في الخطوة بالسيف...ظاهر الكل مزال راقد...دخلت لصال دوبان...عبيت الما كيما جا و قعدت على الكرسي لي موجود...كلشي نحب عليه توا أني نغسل بدني و نتخلص من كل لمسة و نفس تعدا عليه...يمكن نرتاح و نجم ناخو نفس نقي بعدها...غطست الليفة في الرغوة و مديت يدي نفرك في لحمي...بكل قوتي...بقوة الحرقة لي نحس فيها داخلي...هزيت راسي شوية مع صوتها تحكي
زينب:إيمان يا روحي...أنتي هوني ؟
بقيت ساكتة من غير حتى كلمة...كبست على البواني و دخلت عندي...قربت مني شوية...تحكي
زينب:علااش عملت في روحك هكا ؟
فكتها من يدي و كملت اللي كنت نعمل فيه أما بالسياسة الما لي قاعد يطيح عليا حسيتو ينظف في بدني من لمسة يديه المسخة...غسلتلي شعري فرد وقت و نزلت عليا شوية تحكي
زينب:هيا إيجا عزيزتي
هزيت روحي وقفت بالسيف...دورت المنشفة عليا و تلفت عندها...عينيا وساعو بالوقت...مديت يدي مروهجة عديتها على الزروقية لي تحت عينها و نزلت بيهم لشفايفها نحكي
أنا:إمتى ضربك ؟
زينب:متحطش في بالك
انا:جاوبني أمي
زينب:أمس
أنا:و السبب
زينب:منعرفش...يحب يخرج غشو و كهو...خاطر الملازم حذرو...كان يمسك يتحاكم حتى هو
خذيت نفس طويل و قربت منها أكثر...حضنتها بيديا زوز نحكي
انا:سامحني يا أمي
زينب:أنتي ما عندك حتى ذنب و صحيح قبل ما ننسى المحامي باش يجي لهوني يحكي معاك
انا:كيفاش هكا ؟
زينب:بعد ما وصلنا أمس لهوني...قالي لي هو باش يبعث محامي
انا:باهي برشا...انا باش نستناه ملا
هزتلي براسها باهي...كبست على يدها و خرجت معاها لتوا نحس في خطواتي رزينة و بدني مهدود...حبست على صوتها تحكي
حفصة:طلعت بنت بنتي أشرف منك...ان شاء الله متكونش حبلة و تفرض علينا الوسخ متاعك هوني
جات أمي باش نتكلم...كبست على يدها و هزيتلها براسي لا...خاطر ما تستحق حتى تبرير مني بخصوص لي صار و لا حتى نستنى منها أنها تفهمني...خاطر بالرسمي هي أكثر شخص نكرهو بعد أمير و بابا...دخلت لبيتي و بدلت دبشي كيما جا...هزيت راسي نغزر لأيمن لي يطل عليا...بين أنو يدخل و لا يتراجع...تبسمت نحكي
أنا:إيجا هوني
قرب مني بالزربة...قعد قدامي و حط يدو على خدي يحكي
أيمن:أنتي لباس ؟
أنا:مدام أنت معايا باش نكون لباس يا روحي
أيمن:توحشتك برشا إيمان و نانا قاعدة تحكي في كلام خايب عليك
أنا:و أنت صدقتها ؟
أيمن:مستحيل...أنا نصدقك أنتي و أمي كهو
مديت يدي شوية...دورتها عليه و عنقتو...هو و أمي الحاجة الوحيدة لي نحسها سند بالنسبة ليا و لي باش تخليني نقاوم أكثر...هزيت راسي على صوت الباب لي تحل...غزرتلي تحكي
زينب:المحامي مع حازم يستنى فيك
خذيت نفس طويل و هزيت روحي وقفت...رجعت شعري بيديا زوز و خرجت لعندو...لقيتو قاعد يستنى فيا...قعدت مقابلاتو في الطاولة...غزرلهم يحكي
كمال:ميسالش تخلونا وحدنا
حازم:مفماش داعي
كمال:هذا القانون سي حازم
غزرلو بنظرة ثابتة...أما متحركش من بلاصتو...خذيت نفس نحكي
أنا:ميسالش...مفما حتى شي نخبيه...انا نحب ناخو حقي من أمير أصلان...غير هكا كلشي حكيتو تلقاه في المحضر سي كمال
كمال:باهي برشا...نجم ناخو الأدلة ؟
أنا:أكيد
دورت راسي غزرت لأمي لي دخلت جابت التقارير متاع الكلينيك...لي أصلا معاودتش قريتهم...و لا ثبت فيهم حطيتهم قدامو نحكي
انا:هوني تلقى التقرير الطبي و الصور و تحليل الحمض النووي
كمال:القضية باش تتحول للمحكمة اليوم بعد استجواب أمير أصلان...أكا علاش باش نحاول نعجل في القضية و اول جلسة باش تكون بعد شهر تقريبا
أنا:باهي برشا...نستنى في التفاصيل من عندك سي كمال
هزلي براسو باهي...كبس على التقارير و خرج...قرب مني بالوقت و ضرب يديه زوز على الطاولة...يحكي
حازم:أنتي بااااااش تتنازل على القضية هاااذي و قبل ما توصل للمحكمة زااادة
عديت عينيا على وجهو...توقعتو يعصب...يضربني...اما مش يجبرني نتنازل على حقي بالطريقة هاذي...قحرتلو نحكي
انا:بأمارة شنوة ؟
حازم:القضية هااااذي بااش تقضي علينا...تتوقع أنتي باااش تربح أمير أصلان في المحكمة و لا عيلة أصلان باش تخلينا في حالنا بعد ما تشتكي بولدهم ؟
أنا:في رايك شنوة باش يصير فيااا أكثر من هكا ؟
حازم:علاااااش مخممتش في هااذي قبل مااا تعمل عملتك معااااه
نطرت الكرسي لتاالي و هزيت روحي وقفت...غزرتلو بتحدي نحكي
انا:إغتصبني...إغتصصصصبني...هااااذي الكلمة الصحيحة يا باباااا...هذااا لي متحبش أنت تستوعبووو...و أصلااا صار كلشي بسببك أنت...خاااااطرك الوحيد لي تخلي بنتك توصل المااااكلة للخدامين و الوحيد لي متحترمش مرتك و تخليها طيبلهم...أماااا هوما عكسك...هوما فاهمين قيمة اللي يملكوه و أنت لاااا...و صدقني والله...والله...كااان تحاااول تاقف في طريقي و لا تعطل القضية...نشتكي بيك أنت زااادة...و من غير ما نخمم...خاااطر متنجمش تتوقع قدااااش نكرهك و قدااااش نحشم بيك زاادة
مد يدو ضربني كف بكل قوتو...و قرب مني باش يكمل يضربني...وقفت بيناتنا هي و أيمن فرد وقت...لي خلا يترااجع...هز صبعو في وجهي يحكي
حازم:مزااال حسااابنا ياا إيماان
هز الفاست متاعو و خرج...مسحت الدم من شفايفي و بقيت نغزر للباب لي خرج منها...بعد توا ما عندي شي نخسرو...أكا علاااش مستحيل نخليه ياقف في وجهي و لا ثنية الحق كيما يعمل ديما و لا هو و لا غيرو يمنعني باش نحط أمير أصلان ورا القضبان.
#إيمان💔
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
