🔸️حلقة 6
🔸️زينب_تحكي:
نزلت راسي نغزر للكاسة لي طاحت من يدي...تأخر الوقت و لتوا ما رجع حد منهم...نزلت نهز في القطع يدي تحلت بالوقت...نطرتهم و وقفت بالزربة...كبست على الجرح نحكي
انا:يا ربي قدر الخير
قلتها و هزيت راسي نغزر للباب لي تخلع في لحظة دخل هايج غير العادة...قرب مني بالزربة و شدني من شعري يحكي
حازم:وييينها بنتك...وينهاااا ؟
نطرت روحي منو...وخرت لتالي مروهجة من كلامو...و قحرتلو نحكي
انا:ش..شقصدك ؟ على أسااااس إيماان باش توصلك لقفة للمعمل كيما أنت تطلب منها...وين عندهاااا تمشي
حازم:بنتك كاااانت مع أمير أصلاااان ياااا لالة...والله أعلم شنية صااار بالظبط...والله يااااا زينب...والله كااان يطلع لي في مخي صحيح ندفنهاااا...تسمع فياااا ندفنهااا حية
انا:أنت فااااش قاااعد تقووول...ياااخي واعي لروحك يااا حاازم...كيفاش يجي في مخك لي إيمااان تعكل حااجة هكااا
حازم:أنااا ريت حااالتها...أصلا وينهااا هي ؟ وينهااا ؟
دخل يلوج عليها و خلاني في بلاصتي مصدومة من اللي سمعتو...خاطرني نعرف بنتي و نعرف انها مستحيل تعمل حاجة هكا...خاصة مع أمير أصلا...هي أصلا تبخر بريحتو فقت من سرحتي على صوت الباب...زربت في خطواتي و حليت من غير ما نخمم...نغزر للعون لي كبس على يديه زوز يحكي
هو:هوني يسكن حازم عبد العزيز ؟
هزيتلو براسي إيه...خلط عليا بالوقت وقف ورايا يحكي
حازم:شفما ؟
هو:الملازم نزار...بعثني باش نعلمكم انو المدموزال إيمان عبد العزيز...في الكلينيك توا
حازم:قصدك في المستوصف ؟
هو:لا في تونس مش هوني
انا:ش..شبيها بنتي ؟
هو:تعرفو غادي...تفضلو معايا
حازم:خليك هوني أنتي
انا:مستحيل...تسمع فياااا ؟ مستحيل نخلي بنتي وحدها
جبدت صباطي لبستو و طيشت الطابلية من يدي...خرجت من غير ما نتلفتلو و لا نخمم في اللي باش يعملو مبعد و حليت الباب ركبت...خلط عليا و ركب معاه من قدام حطيت يدي على قلبي...من بكري مش مطمني عليها...من بكري نحس في حاجة خايبة صارت لبنتي نوارتي...و اللي تحملت كلشي على خاطرها هي و كهو...الخوف لي حسيتو معشتوش قبل...حتى بعد اللي عشتو مع حازم...مستحيل نجم نعيش كان تصيرلها حاجة...انا جبت بنتي على صغر كنت صغيرة لدرجة كنت نحسها بنتي و اختي فرد وقت كنت نخاف حتى من بكاها...اما كانت تعويض بالنسبة ليا تعويض على الوحدة...على حازم اللي لقيت روحي عندو بين ليلة و نهار...و اللي عمري ما حسيتو بعطفو رغم اني كنت قاصر وقتها و مكنتش نعرف على شنوة قادمة...فقت من سرحتي على صوتو يحكي
هو:وصلنا
مديت يدي حليت الباب...قلبي خض بالقاوي قبل ما ندخل حتى اني كنت نمد في الخطوات ورا بعضهم و هوما ورايا حبست كي ريت الكوميسار واقف جنب الباب...وقفت قدامو بالظبط من غير حتى كلمة...عدا عينيه على وجهي
يحكي
نزار:هدي روحك مداام و اسمعني...أختك لباس توا
انا:ب..بنتي
غزرلي ندرا كيف و عدا يدو على وجهو متردد...خذيت نفس نحكي
انا:خبرني شنية صااار...بنتي شبيهااا ؟
نزار:بنتك تعرضت لإغتصاب من طرف أمير أصلان
عديت عينيا على وجهو...مصدومة من اللي سمعتو منو للحظة حسيت الدنيا دارت بيا و شعرة لا طحت...لقفني بيدو يحكي
نزار:مداام انتي لباااس ؟
جبدني حازم من يدي...كبس عليا بقوة و غزرلو يحكي
حازم:وينها تواا ؟
نزار:تتلقى في العلاج المناسب
نزل راسو قحرلي و شدني من وجهي بالوقت...يحكي
حازم:صدقني باااش نقتلها بيدياااا زوز الكلبة و نقتلك معاااهاااااا
غزرتلو مصدومة لهدرجة مخممش في بنتو و شنية لي تصارع فيه الداخل...فكني من عندو و وقف في وجهو يحكي
نزار:سي حااازم...نظن الكلاام هذا كان توجهو لأمير أصلان يكون أحسن...و انا إخترت نجيب بنتك لهوني باش حقوقها متضيعش أكثر من هكااا...اللي تخمم فيه توا زاايد و مااا عندك حتى حق بااش تمسها لا هي و لا أمهاا
حاازم:و شكوووون حضرتك باش تدخل في عيلتي ؟
نزار:القااانون يسمحلي و كان مزلت باش تتمادى سي حاازم باش تظطرني نوقفك تواا
هزيت راسي قحرتلو...في اللحظة هاذي كرهتو أكثر من اي وقت فات عليا قبل...دموعي نزلو و منجمتش نصبر عليها أكثر...غزرتلو نحكي
انا:نحب نشووف بنتي توااا...أمااانك
نزار:باهي
طلب الطبيبة و خذا الإذن منها...غزرت لحازم لي شادد روحو على شعرة و دخلت عندها...هزيت راسي شوية نغزرلها...غاطسة في النوم...قربت منها شوية نثبت فيها أثار الضرب واضحة على وجها...هاذي أول مرة نشوفها هكا و أول مرة حد يهز يدو على بنتي...حتى بوها مكنتش نسمحلو يتمادى معاها...كيفاش يعمل فيها هكا...حطيت يدي على خدها...نتحسس في لي تراص متاع صوابعو دموعي طاحو عليها بالوقت...نزلت عليها أكثر نشم في ريحتها و نحكي فرد وقت
انا:سااامحني يااا روحي...سااامحني يا عزيزة قلبي معرفتش نحميك...يااا ريتني سمعت كلااامك و هربتك من غااادي...يااا ريتني كنت قوية كيفك
كبست عليها أكثر...للحظة خفت...خفت من أني نخسرها خفت من أني معادش نشوفها مرة اخرى...كيما خايفة من الكسرة لي باش نلقاها في غزرتها...خايقة أنها تنفرني و تكرهني...عديت يدي على شعرها و بستها من جبينها...رغم قوة الوجيعة لي اجتاحت روحي...أما منحبش اللي صار يخسرني فيها...منحبش بنتي تضيع بالطريقة هاذي و هي لتوا ما لحقت تحقق شي من اللي تحلم بيه...منعرفش شنية باش يعرضنا و لا شنوة باش نواجهو...اما اللي يهمني انها تحل عينيها و تغزرلي مرة اخرى...و انا نوعدها مستحيل نخليها وحدها و لا نخلي حد يقرب منها و يضرها مرة أخرى.
#زينب_إيمان💔
VOUS LISEZ
صرخة صمت 🌬
Romantik🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
