🔸️حلقة 10
خذيت نفس نهدي في روحي...وقفت من بلاصتي و عاودت هزيت عينيا في وجهو نحكي
أنا:أنت فاااش قااعد تقول يااخي ؟ كيفااش يجي في مخك لأنا نعمل هكا...في رااايك أنا نستغل في القانون باش نوصل لغايتي...العبد هذااا رااهو إغتصبني إغتصبني يااا حضرة المحااامي...علااش حد ما يحب يصدقني...وين المشكلة في الموضوع...شنية الحاجة الغريبة لي قاعدة نقول فيها ترااه...علاااش حد ما حب يصدقني لا الناس و لا القاااضي...حتى بابا وقف معاااه مش معاايا..أصلا أنت كيفاش تسألني حاجة هكا..علاش كل كيف بعضكم..سااعة توقعت لي تفكيرك ماهوش منحط كيفهم أما طلعت غاالطة فيك...تعرف الحق مش علييك...الحق عليا أنا...كان لازمني نفهم أنو واحد كيفك ميستحقش يكون محامي والله أعلم قداش من بريئ ضاع جرايرك
حط ستيلو من يدو و تكى لتالي...هزني و حطني يحكي
كنان:تنجم تسكر الباب معاك كي تخرج
كبست على صاكي نهدي في روحي...تلفت باش نمشي أما منجمتش...عاودت درت عندو و قحرتلو نحكي
أنا:بالله عندي سؤال قبل ما نمشي...كان تسمح بالطبيعة
هز حاجبو مستغرب...قربت من البيرو متاعو شوية نحكي
أنا:أنت تحكي مع الكليونات متاعك الكل هكا ؟
كنان:نحكي مع الكليون حسب القضية متاعو
أنا:و أنت تتوقع توا لأنا قاعدة نكذب عليك ؟
كنان:مفماش أب يشهد ضد بنتو...و أنا مجبور نعرف تفاصيل القضية...مش نصدق لي نسمعو من زوز كلمات
أنا:كنت تنجم تسألني بطريقة أخرى...أما ظاهر لتوا متعلمتش تحترم مشاعر الكليونات متاعك و على فكرة مفما حتى شي من اللي أنت قلتو
كنان:كيما مفما حتى شي يخليني نصدق كلامك...تنجم تمشي توا
كبست على يدي بكل قوتي...نهدي في روحي...خاطر للحظة حسيت برغبة أني نخرج فيه غشي الكل...قحرتلو نحكي
أنا:زايد متحشمش
كنان:شنية قلت ؟
أنا:قلت لي أنت متحشمش و متكبر زادة و مغرور و غلطت برشا خاطرني فكرت أنو واحد كيفك ينجم يعاوني
كنان:مدموزال إيماان تفضل توااا
نزلت راسي شوية..نغزر لكاسة الما لي فوق البيرو..جيت باش نمشي...أما رجعت في آخر لحظة...كبست عليها و رميت الما على وجهو نحكي
أنا:هذا باش المرة الجاية تعرف تتعامل مع الكليونات متاعك
وقف مصدوم...حتى انا منعرفش على روحي كيفاش عملت معاه هكا...أما منجمتش نتحمل الكلام لي قالو و آخر فرصة كانت تعتمد عليه...ضاعت مني و خلاتني نضيع أكثر...جا باش يحكي عطيتو بظهري و زربت في خطواتي لقيت صاحبو في الباب يغزرلنا مستغرب دزيتو بيدي نحكي
أنا:أبعد أنت زادة...أنا الغالطة خاااطر توقعت لانا في سوسيتي محترمة
قربت بالزربة من الاصونصير...نحل فيها كيما عمل صاحبو قبيل محبتش تتحل...ضربتها بيدي و سااقي نحكي
أنا:حتى الأبواب هوني كي مولاها
كبست على صاكي و نزلت الدروج لي محبش يوفى اصلا منعرفش في اما طابق كنت...محسوب حاصر روحو الفوق على أساس باش يخطفوه...الواطي لي ميحشمش...وقفت نرد في النفس...حسيت روحي تعبت برشا...خاصة أني ما كليت حتى شي لتوا و ظاهر باش نبدا رحلة جديدة تستدعي باش نلقى خدمة و محامي آخر...خسارة الأسبوعين لي عديتهم نفركس عليه...عديت يديا زوز على وجهي و رجعت شعري لتالي نحكي
أنا:شنية باااش تعمل يااا إيماان...كيفاش باش تحل هذا الكل
تنهدت بالقاوي و كملت نزلت...فرد وقت نخمم شنوة لي لازم نعملو توا...خاطر بالرسمي حسيت روحي فديت من الأوتيل هذاكا و من الأشكال لي نشوفها يوميا غديكا و من غزرتهم زادة...جيت باش نخرج...حبست على صوتها من تالي تحكي
ملاك:إيماان ؟
دورت راسي مستغربة..جات عيني في عينها..متوقعتش باش نقابلها بعد نهار المحكمة...كيما لتوا منعرفش شنوة صار معاها...تبسمت نحكي
أنا:ملاااك
قربت مني بالزربة و عنقتني...رغم أنها ثاني مرة نتقابلو فيها...تبسمت تحكي
ملاك:شحالك ؟ شنية صار معاك...بقيت في بالي والله
أنا:للأسف خسرت القضية و أنتي ؟
ملاك:و انا عطاني جلسة صلح...نظن القاضي مستعجل على موتي
ضحكت بالوقت...فرد وقت حسيت بفرحة غريبة خاطر أسبوعين محكيتش مع حد...حتى امي معرفتش نوصللها عاودت غزرتلها نحكي
أنا:أنتي هوني باش تقابل محامي ؟
ملاك:لاا...أنا باش نولي نخدم في الأرشيف هوني...لازمني نعتمد على روحي باش نبدا من جديد
أنا:ربي يوفقك ملا
ملاك:إذا ما عندك شي...نعملو قهوة مع بعضنا و لا حتى تاي كان تحب
هزيتلها براسي إيه...خاطرني بالرسمي بحاجة شكون نحكي معاه و هذا لي صار بالفعل...قعدنا في بلاصة قريبة و هادية...منعرفش كيفاش حكيت كلشي صار معايا لتوا و هي زادة نفس الشي...تبسمت نحكي
أنا:ملااك كان تحب نبقاو على تواصل...خاطرني ما نعرف حتى حد هوني
ملاك:إيمان إنتي قداش ناوية تبقى في الأوتيل هذاكا
انا:منعرفش...لازمني نلقى خدمة باش نجم نكري دار صغيرة...خاطر اللي معايا يا دوب يكفيو كرا متاع شهر واحد...منحبش نبقى نتنقل حتى نعرف لي ولى عندي مدخول ثابت
ملاك:شقولك تجي معايا...البيت كبيرة و توسعنا زووز
أنا:لااا يا روحي...ياخي انا باش نزيدلك مشاكلي فوق لي عندك...يكفي انك سمعتني
ملاك:إيمااان...أنا زادة كنت بحاجة شكون يعاوني و لقيت مدام ذكرى...يعني الفلوس لي تقعد بيهم في أوتيل خليهم على جنب و كي تلقى خدمة تنجم تكري و زيد إنتي ما تعرف حد غادي...هكا نلقاو بعضنا...أما فما مشكلة صغيرة
عديت عينيا على وجها مستغربة...عوجت فمها تحكي
ملاك:لازمنا نشريو فرش جديد ليك انتي و فرن زادة
ضحكت بالوقت...خاطرني متوقعتش طيبة قلبها توصل معاها لهوني...فرد وقت بقيت مترددة أني نقبل و لا نكمل نشق طريقي وحدي.
#كنان_ايمان💔
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
