🔸️حلقة 23
عديت عينيا على وجهو...منعرفش من وين خرجلي هذا زادة و لا حتى كيفاش وصل لهوني...باقي يغزرلنا يستنى في حد فينا يجاوبو...تبسمت تحكي
إيمان:تفضل ؟
نزار:لباس ؟
إيمان:لباس...كنت باش ناخو الطلبيات لي برا و سي كنان كان باش يمشي
نزار:باهي...هاني باش ندخل أنا توا
إيمان:باهي...تو شوية نرجعلك
تبسم و دخل...بقيت نغزرلو من حتى كلمة...جبدتها من زندها قبل ما تمشي و دورتها عندي نحكي
أنا:شيعمل هوني هذا ؟
إيمان:شيعرفني ؟ زيد أنت شمدخلك فيه ؟
أنا:من وين عرف لي إنتي تخدم هوني ؟
إيمان:مدامك وليت تتحرى على كلشي...أسألو أنت
أنا:باهي...تو نشوفو آخرتها معاه
إيمان:وين ماشي ؟
أنا:كمل خدمتك إنتي
إيمان:كنااان
رخفت يدي عليها و شديت ثنية الطاولة متاعو...جبدت الكرسي و قعدت مقابلو...نحكي
أنا:أهلا بيك سي نزار
نزار:عيشك
أنا:مفاجأة منك...متوقعتش باش تلقاها بالسرعة هاذي
نزار:صراحة اللي صار صدفة
أنا:كيفاش يعني ؟
نزار:أنا كنت في السوسيتي عندك...حبيت نقابلك بخصوص موضوع زينب أم إيمان أما عرفت لي أنت ماكش موجود و هذا أقرب كافي لسوسيتي و متوقعتش لي إيمان تخدم هوني
أنا:حتى في السوسيتي فما كافي زادة
نزار:نعرف...ريت هذا أما حبيت نكتشف المنطقة أكثر
دورت راسي شوية...نتبع فيه وين قاعد يغزر...جات عيني عليها...تحط في الكافي لطفلة و تضحك...كبست على يدي و حطيتها على الطاولة نحكي
أنا:إن شاء الله حبيت المنطقة هوني
نزار:عاللخر
أنا:باهي برشا ملا
تكى لتالي و عاود غزرلها مرة أخرى وين لقيت روحي فقدت أعصابي أكثر و معادش عندي صبر باش نتحملو أكثر من هكا...تبسم يحكي
نزار:بعد الحادثة...متوقعتش لي أنا باش نقابلها مرة أخرى كنت نعرف لي عيلة أصلان باش تنقذ ولدها و تمنعو من التهمة أما من أول مرة دخلت فيها عندي عرفت اللي هي مختلفة و اللي مستحيل تسلم في حقها خاصة لواحد كيما أمير و الدليل أنها وصلت لهوني و بالأخص ليك أنت
كبست على يدي أكثر و خذيت نفس نهدي في روحي تبسمت نحكي
أنا:الفضل يرجع ليك زادة
نزار:عملت واجبي و كهو
أنا:نجم نعرف شنية عرفت بخصوص زينب ؟
نزار:لي نجمت نعرفو...أنهم لتوا في الدشرة...يعني إحتمال شرا دار جديدة غديكا و لا أمير عطاه وحدة
أنا:نفهم من كلامك أنو حتى عيلتو مزالت معاه ؟
نزار:أكيد
أنا:كيفاش تأكدت ؟
نزار:الدليل أنو أيمن عبد العزيز طول الفترة لي فاتت كان يحضر للمدرسة و تغيب في الفترة الأخيرة كهو
أنا:من وقت سألنا عليهم إحنا
نزار:بالظبط
أنا:رغم هكا...حد ما ينجم يفرض عليها تخرج من عندو من غير رضايتها
نزار:والله بعد لي ريتو منتوقعش لي هي باش تبقى معاه أكثر من هكا
أنا:باهي برشا..من غير ما تعرف إيمان بالحكاية...عالأقل لين نعرفو شنوة باش يصير
نزار:باهي طمن
هزيت راسي شوية نغزرلها...قحرتلي و وقفت قدامنا تحكي
إيمان:شنية تحب تشرب سي نزار ؟
نزار:قهوة مرة
إيمان:و أنت سي كنان ؟
أنا:نفس الشي
غزرتلي ندرا كيف و هزتلي براسها باهي...دقايق و رجعت حطت القهوة تحكي
إيمان:فما طلبات أخرى
نزار:لا...تفضل أقعد إيمان
أنا:متنجمش تقعد...فما خدمة تستنى فيها
قحرتلي و قعدت بجنبي...تبسمت بالوقت...تحكي
إيمان:عرفي يعرفك...معناها مفماش مشكلة اذا قعدت شوية
عديت يدي على وجهي و تكيت لتالي نهدي في روحي غزرلها يحكي
نزار:شحالك إيمان ؟ وين قاعدة توا ؟
إيمان:مع صحبتي في دار أمها و الأسبوع هذا يمكن ننقلو لدار جديدة
أنا:شبيني منعرفش بيه الموضوع هذا ؟
إيمان:هاك عرفت توا...زيد أمس حكيت مع مول الدار و يمكن باش نقابلو اليوم
أنا:وين الدار هاذي ؟
إيمان:في نفس الحومة
أنا:يعني ملقيتش بلاصة غيرها ؟
قربتلي أكثر...لين حسيت بأنفاسها لي ضربت في وجهي تحكي
إيمان:و أنت شنية مقلقك في الموضوع ياخي باش تسكن معايا
أنا:سكر الموضوع هذا توا...نحكيو فيه مبعد
إيمان:على أساس خرجتك من عقلك...شبيك تدخل في أموري لتوا
أنا:باهي يا إيمان باهي
نزار:كلشي لباس ؟
إيمان:لباااس...كيفاش عرفت لي أنا نخدم هوني ؟
نزار:تعديت صدفة و كانت أحسن صدفة عالأقل نجم نطمن عليك
قربت منها شوية و نزلت عليها...نحكي في وذنها
أنا:هاك لقيت شكون يطمن عليك...أسألو بلكشي يحب يولي الحارس الشخصي متاعك
حطت يدها على يدي بالوقت و دارت عندي شوية...جات عيني عليها..غزرتلي ندرا كيف تحكي
إيمان:كناان
عديت عينيا على ملامح وجها من غير ما نجاوبها...جات باش تحكي...كبست على يدها بالوقت و غزرتلو نحكي
أنا:سي نزار..إذا كان فما اي شي يخص القضية...رقمي عندك
نزار:أكيد...أنا لازمني نمشي توا...فما خدمة تستنى فيا
إيمان:مكملتش قهوتك
نزار:مرة أخرى...أكيد باش نجي نطمن عليك
إيمان:عيشك
نزار:رد بالك على روحك
هزتلو براسها باهي و جات باش تخلط عليه...كبست على يدها و وقفتها نحكي
أنا:وين ماشية ؟
إيمان:نخلي الراجل يمشي من غير ما نودعو ؟
أنا:علاش استدعيتو لدارك...هوكا في كافي...كيفو كيف الناس الكل
إيمان:بالله شنية مشكلتك معاه ؟ شنية عملك ؟
أنا:في الأصل إنتي شبيك مهتمة بيه لهدرجة ؟
إيمان:شمدخلك فيا كنان ؟ شبيك اليوم قاعد تخرنن على كلشي...ساعة انا باش نمشي نشوف خدمتي
جبدت روحها مني و وقفت...كبست على الفنجان...خذيت رشفة منو و عاودت حطيتو بالوقت...متوقعتش تطلع حلوة لهدرجة...دورت راسي غزرتلها..ضحكت بشماتة و مشات...ساعة كان لازمني نتوقع الفازة هاذي منها بعد اللي صار...تكيت لتالي و ضحكت أصلا منعرفش شبيني هبلت عليها لهدرجة..كيما معادش نعرف و لا حتى نخمم في اللي باش يصير بعد توا
#كنان_إيمان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
