🔸️حلقة 42
🔸️إيمان_تحكي:
قعدت مع أيمن نقري فيه شوية...مدامني خرجت بكري فرد وقت نستنى في ملاك باش ترجع...قص عليا صوت الباب...خذيت نفس و هزيت روحي بالسيف...ما عاد عيني في حتى شي...كبست على البواني و حليتها ضيقت عينيا مستغربة و أنا نغزرلها...تبسمت تحكي
حنين:أهلا إيمان...نحب نطلب منك حاجة كان مفماش مانع
أنا:تفضل
حنين:عندي إجتماع مهم توا...و خليت الماكلة في الفرن أمي فاطمة تاعبة شوية...يعني كان تنجم تشد بلاصتي لين نرجع
أنا:باهي...هاني باش نمشيلها توا
حنين:عيشك إيمان
تبسمت و رجعت لكرهبتها...عطيت خبر لأمي و لبست الجيلي متاعي...كنت مترددة خاصة أنو مرتو مزالت هوني فرد وقت منجمش نرفض...خاطر فضل خالتي فاطمة كبير و مستحيل نجم نرد جزء منو...دخلت و سلمت عليها نحكي
أنا:إرتاح إنتي هاني باش نكمل اللي خلاتو حنين
فاطمة:عيش بنتي...ربي يحميك
تبسمت و بستها من خدها...دخلت للكوجينة و كملت الباقي...دورت راسي نغزرلها...قربت مني تحكي
فاطمة:سيلين من أمس ما كلات شي...هاني باش نحطلها شوية في الصينية بلكشي يهديها ربي
أنا:ميسالش خالتي تو نحضرهم أنا...وينها توا ؟
فاطمة:بيت كنان
هزيت حاجبي مستغربة...فرد وقت قلبي خض بالقاوي خاطرني متوقعتش باش يعطيها بيتو...هزيتلها براسي باهي و حضرت الصينية...كبست عليها و هزيت روحي عندها...حليت الباب شوية و دخلت نغزرلها...غاطسة في النوم...حطيت الصينية على جنب و دورت عينيا على البيت...نغزر لسوريتو لي محطوطة فوق كرسي البيرو و مريولو لي بين يديها...يعني لهدرجة الكل ماخو راحتو هوني...هذا إذا ماهوش يخمم باش يرجعلها...أصلا شنية يهمني فيه مدام تخليت عليه...هزيت سوريتو في يدي و خرجت من البيت...منعرفش علاش عملت هكا أما محبيتش اللي قاعد يصير حتى طرف...رجعت للكوجينة نحكي
أنا:على أساس كلشي وفى و ماهيش مهمة بالنسبة ليه ملا فاش قام يعطيها في بيتو و خايف عليها لهدرجة زايد ميحشمش كيما صاحبو بالظبط
تهزيت و تحطيت على صوتو...كبست على سوريتو و أنا نسمع فيه يحكي
كنان:شبيك تحكي وحدك ؟
تلفت عندو و حطيت يديا زوز ورا ظهري...مانيش ناقصة أسئلتو توا...خاصة بخصوص سوريتو اللي منعرفش فاش تعمل عندي من أصلو...عدا عينيه على وجهي يحكي
كنان:لباس ماهو ؟
أنا:لباس عليا و مدامك جيت أنت...هاني باش نمشي هوكا كلشي حاضر و حطيت الماكلة لمرتك زادة
جيت باش نمشي...أما حبست كي قرب مني...وخرت لتالي أكثر...لين ضربت في الحيط لي ورايا...قربلي أكثر و حط يدو جنب راسي بالظبط و عدا عينيه على وجهي يحكي
كنان:باش تمشي من غير توضيح و لا جواب
أنا:جواب شنية ؟ أصلا شبيك لاصق فيا هكا
كنان:و إنتي شنية مقلقك في الموضوع ؟ ساعة توحشتك و نحب نبقى قريب منك هكا
نزلت عينيا من وجهو مستغربة...خاطرني توقعت يكون متغشش مني و معادش يحكي معايا بعد اللي صار آخر مرة...مد يدو و هزلي راسي شوية يحكي
كنان:أغزرلي هوني تراه
عديت عينيا على وجهو...غزرتو خلات دقات قلبي تقوا أكثر لدرجة حسيتها باش تفضحني قدامو...عدا صوابعو على خدي يحكي
كنان:تتوقع اللي أنا باش نسلم فيك بعد اللي قلتو..ساعة في رايك إنتي...القضية باش تحبس بالسهولة هاذي ؟ مهما كان السبب اللي خلاك تحكي بالطريقة هاذي و مهما كان الشي لي هددك بيه أمير...القضية هاذي ماهيش باش تحبس يا روحي
أنا:ك..كنان
نزل بصوابعو لشفايفي و سكتني بالوقت...يحكي
كنان:كان باش تبرر عملتك...خليك ساكتة و انا تو نعرف بالموضوع الكل بطريقتي
أنا:طريقة شنية ؟
كنان:خليك من الطريقة توا و خبرني فاش قاعدة تخبي من بكري ؟
كبست على سوريتو ورا ظهري و هزيتلو براسي لا نحكي
أنا:حتى شي
كنان:متأكدة ؟ ساعة كي دخلت لهوني سمعتك تحكي عليا زادة
أنا:مش صحيح...زيد أنت شكون عطاك الحق باش تسمعني
مد يدو شوية...حطها على جنبي...كبس عليا و تبسم يحكي
كنان:والله أنا مكنتش نعرف لإنتي تحكي مع روحك
أنا:كنت نحكي بخصوص مرتك
كنان:طليقتي...ساعة معنديش مرا من غيرك إنتي توا
أنا:أففف كناان مش وقت الدك متاعك...نحكي بجدي
كنان:و من شنية مقلقة صغرونتي ؟
أنا:فاش تعمل عندك لتوا...حتى علاش موجودة في بيتك و حتى دبشك مفروت الداخل
كنان:خالتها باش توصل بعد يومين...و بخصوص الدبش منعرفش
أنا:بالأمارة كانت محضنة مريولك و راقدة...شنية تفسر هذا ؟
كنان:معنديش تفسير...خاطرني مانيش ندخل للبيت عندها
أنا:تحبني نصدقك توا ؟
كبس على جنبي و عدا صوابعو على خدي...يحكي
كنان:مفماش علاش نكذب عليك...زيد على أساس معادش نهمك جملة و باش تتخلى عليا...شبيك مقلقة ملا ؟
عديت عينيا على وجهو...خاطر بالنسبة ليا هذا هو الحل وسط الشي اللي قاعد يصير...أما فرد وقت منجمتش نتعدا اللي نحس فيه ناحيتو...و لا الغيرة لي تملكتني وقت لي ريتها في بيتو و على فرشو زادة...بقيت نغزرلو و نفركس على جواب داخلي...غمضت عينيا مع أنفاسو لي قوات في وجهي...و شفايفو لي إحتلت شفايفي لثاني مرة وين مديت يدي بالوقت...حطيتها على جنبو و كبست عليه مع أنفاسي لي حسيتها تقطعت...دوب جبد روحو شوية و تبسم يحكي
كنان:معادش تقول عكس اللي تحس فيه و هاذي آخر مرة تعاود الكلام لي قلتو قبل...مفهوم
هزيتلو براسي إيه و مديت يديا زوز...حطيت السورية في يدو و دزيتو لتالي...غزرلها مستغرب و ضحك..زربت في خطواتي و خرجت...خاطرني مستحيل نجم نغزر لوجهو أكثر و لا حتى نحكي معاه...بعد اللي صار توا.
#إيمان_كنان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
