🔸️حلقة 16
🔸️آدم_يحكي:
حليت عينيا على نهار جديد...هزيت روحي بالسيف عملت دوش خفيف...بدلت دبشي...خذيت قهوتي و هزيت روحي خرجت من غير شي...راني روطار على الكور...فرد وقت أكثر من قضية تستنى فيا...منعرفش على روحي كيفاش وصلت للفاك...قدمت الكور كيما جا...حتى هوما ساعتين ورا بعضهم...و رجعت لكرهبتي مديت يدي باش نحل الباب...أما للحظة حسيت يدي رزنت عليها و أنا نغزرلها نعرف لي هي متقراش هوني أما فاش تعمل و في شكون تستنى...قلبي خض بالقاوي و انا نثبت في تفاصيلها و ملامح وجها..ساقيا و وحشي ليها هزوني لعندها من غير ما نحس...لدرجة منعرفش كيفاش وصلت عندها...هزت راسها غزرتلي ندرا كيف تحكي
أسيل:آدددم
عديت عينيا على وجها لي عندي عليه برشا...و خذيتها في حضني من غير ما نخمم لا في ردة فعلها و لا في اللي باش يصير زادة...كبست عليها و خذيت نفس من ريحتها نحكي
أنا:توحشتك يا روحي...توحشتك قد وجيعتي منك
حطت يديها زوز على صدري...دزتني شوية و بعدت عليا تحكي
أسيل:خليك بعيد عليااا آددم...معااادش تقربلي مرة أخرى لا تحكي معاياااا و لا حتى تحاول تبررلي...يكفي أنك تبعد علياااا و كهووو
أنا:أسيل يززي كهو...خلينا نحكيو مرة وحدة كهو...بعدها القرار في يدك
أسيل:لاااا و اللي تحاول تعمل فيه...ماهو باش يرجع ل فاات و لا حتى يصلح منو...أكااا علاش معادش تقربلي مرة أخرى
جيت باش نحكي...قصت عليا كي مدت يدها و مسحت دمعتها...قربت من صحبتها و بعدت عليا من غير ما تقول حتى شي آخر...عديت يدي على وجهي...و بقيت نشيع فيها لين غابت على عيني...رجعت لتالي جهامة من غير روح...حتى منعرفش كيفاش نجمت نسوق و لا كيفاش وصلت لسوسيتي...طلعت للبيرو متاعي عرضتني رغد تحكي
رغد:عندك إجتماع توا مع لي سطاجيار و موعد بعد ساعتين
أنا:ألغي كلشي
رغد:أمااا الكل يستنى فيك
أنا:معاااادش تناقشني و مااا تخلي حتى حد يدخل عندي
رغد:باهي
دخلت و نطرت الباب ورايا...مديت يدي و نزلت كلشي موجود على البيرو...بلكشي نجم نهدا شوية...باقي نمشي و نجي باش نطرشق...كأنو كلشي عاود تسكر في وجهي مرة أخرى...فقت من سرحتي على صوت الباب غزرتلها مستغرب و قحرتلها نحكي
أنا:فااش تعمل هووني ؟
ملاك:مدام سناء طلبت مني باش نوصلك هذوما...أكيد مجيتش من راسي
قربت منها بالزربة...فكيتهم من يدها و رميتهم على الأرض نحكي
أنا:ملاااا معااادش تجي...معااادش تحط سااقك هوني مرة أخرى...و آخررر مرة تدخل للبيرو هذاااا من غير ما دق على البااااب و لاااا تاااخو إذني
ملاك:يااااخي مجنون...شبيك عليا ؟ علاااش أنا نحب نجي لهوني و لا نشوف وجهك...مش أنت لي ديمااا تطلب فيااا بسبب و من غير سبب
أنا:أخرررج من هوووني
ملاك:بااااش نخررج...أصلا الحق عليااا من الأول إني رجعت لهووني
أنا:معااادش ترجع مرة أخرى ملااا...يكووون أحسن أنك معااادش توريني وجهك
غزرتلي ندرا كيف و وخرت خطوة لتالي...عطاتني بظهرها تحكي
ملاك:حقيير و سااقط
قربت منها شوية...جبدتها من يدها...دورتها عندي و دزيتها على الباب نحكي
أنا:عاااود لي قلتوو
ملاك:س..سيبني
أنا:حل فمممك و عااود لي قلتووو ؟
ملاك:آدددم سيبني توجع فيااا
أنا:أغزرلي هووني...متخلينيش نحطك في راااسي و لا حتى نوريك وجهي الثاني خاطرك باش تتعب برشا مفهوم كلاااامي
ملاك:أنا ريت الأسوء منك...أما توا أكدتلي لي كلكم صنف واااحد
عديت عينيا على وجها...للحظة فقت على روحي و عاللي قااعد نعمل فيه...أصلا منعرفش علاش عملت هذا الكل و لا حتى كيفاش خرجت غشي فيها...يمكن خاطرها جات في ثنيتي...مع إني وصيت رغد ما تخلي حتى حد يدخل عندي...خاطرني في الحالة هاذي منجمش نتحكم في أعصابي و لا حتى نفرق الصحيح من الغاالط...دزتني لتالي تحكي
ملاك:م..معاادش تقربلي و معااادش تحط يدك عليا عالأقل إلتزم بالوعد متاااعك...حرااام عليك والله
بقيت نغزرلها من غير حتى كلمة...حلت الباب و خرجت عديت يدي على وجهي...مستغرب من كلامها...لي لقيت روحي نخمم فيه وسط اللي قاعد يصير الكل...شقصدها لي الكل صنف واحد...هزيت راسي نغزر لكنان لي دخل عندي...ضيق عينيه مستغرب يحكي
كنان:شنية صاار هوني ؟ و شبيها الطفلة خرجت تبكي من عندك...شنية عملتها زاادة ؟
أنا:ممسيتهاش...حتى منعرفش علاش تصرفت معاها هكا
كنان:آدم شنية لي صار ؟ شبي حالتك هكا ؟
أنا:حتى شي...قابلتها مرة أخرى و صدتني كي العادة
كنان:أسيل مرة أخرى ؟
هزيتلو براسي إيه و ترميت على الفوتاي لي بجنبي غزرلي يحكي
كنان:هاذي حاجة متوقعة منها...يزي ما حملت روحك الذنب...كان تحبك بالرسمي...يجي نهار و تسمعك...زيد حرام لي عملتو في الطفلة بلا سبب...هكا ترعب فيها كل ما تجيك الفرصة
أنا:خرجت من هوني تبكي ؟
كنان:والله هذا لي ريتو أنا
عديت يديا زوز على وجهي و هزيت روحي وقفت نحكي
أنا:هاني باش نخلط عليها...خاطر بالرسمي لي صار فوق طاقتي
كنان:اللي قاعد يصير توا هو اللي فوق طاقتك...مخك قااعد يطير معاها...رغم أنك ماكش لاااحق جملة
أنا:الله غالب
ضحكت و هزيت روحي خرجت...رغم اني مش حامل روحي...أما زادة مقصدتش نبكيها الفرخة...أول ما وصلت للبيرو متاعها...وقفتني سناء تحكي
سناء:ماهيش هوني سي آدم
أنا:وين مشااات ؟
سناء:قالت لي هي قدمت طلب الإستقالة متاعها و ماهيش باش ترجع لهوني مرة أخرى
كبست على يدي بالوقت..متوقعتش باش تمشي بالزربة هاذي...وين خلاتني معلق مرة أخرى...بين إني نخلط عليها و لا الأحسن نخليها تبعد من هوني جملة.
#ملاك_آدم❤
VOUS LISEZ
صرخة صمت 🌬
Любовные романы🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
