🔸️حلقة 30
🔸️نزار_يحكي:
حطيت يديا زوز في مكاتبي و هزيت عينيا في وجها من بكري نراقب في تصرفاتها مع الدكتورة...هاذي ثاني مرة نتقابلو فيها...رغم ظروفها و اللي تعدات بيه الكل أما حتى شي ما غطى على ملامحها...قد ماهي تشبه بنتها تختلف عليها شوية...حتى منعرفش علاش لقيت روحي نعمل في اللي نجم عليه باش نوصل ليها و نفهم اللي صار معاها...كيما منعرفش علاش كلمت الإسعاف باش ينقذوه فقت من سرحتي على صوتها تحكي
زينب:نجم نخرج توا ؟
هي:لا..إنتي باش ترتاح عندنا ليلة...خاطر حالتك تاعبة برشا و من غدوة تنجم تخرج الصباح...باهي
هزت راسها شوية غزرتلي...خذيت نفس و قربت منها شوية نحكي
أنا:زينب...عندها حق الدكتورة...خليك هوني ليلة و من غدوة تنجم تخرج
زينب:وعدتني باش تخليني نشوف بنتي اليوم
أنا:باهي...هاني باش نطلب منها هي لي تجيك لهوني يكفي أنك تسمع كلامي توا
زينب:ب..باهي
هي:هاني باش نخلي شكون تعاونك تبدل دبشك و تعملك سيروم...غير هكا حاول ترتاح و ما تخمم في حتى شي
زينب:عيشك
أنا:هاني برا أنا...نرجع بعد شوية
هزتلي براسها باهي...خذيت نفس و خلطت على الدكتورة نحكي
أنا:دكتورة...تنجم طمني عليها ؟
هي:حبيتها تبقى هوني...خاطرني باش نطلب تحليل دم مدام تعرضت لضرب و حالتها تاعبة...و تحسبا لنفسيتها منجمتش نسألها شنية صار
أنا:نحب على تقرير طبي...يخص حالتها...خاطر باش يفيدها برشا
هي:باهي...هاني باش نحضرو و إن شاء الله تتلهاو بيها أكثر من هكا
أنا:باهي عيشك
وخرت خطوة لتالي نستنى في الفرملية لين خرجت و قربت مني تحكي
هي:هاني عطيتها مهدئ...ماهيش باش تفيق قبل ساعتين
هزيتلها براسي باهي...حليت الباب و دخلت نغزرلها..لحقت باش تغطس في النوم...أصلا حالتها متسمحش باش تقاوم أكثر...و متوقعتش باش نلقاها في الحالة هاذي زادة أصلا متوقعة من واحد باع بنتو من غير ما يخمم...كيفاش تحملت معاه طول السنين هذوما منعرفش...ميستهلش تعطيه من عمرها و ترضى تتحمل الإهانات و الضرب لهدرجة...فقت من سرحتي على صوت تليفوني...حطيتو على الصامت و خرجت من البيت...منحبهاش تفيق جرايري توا...تبسمت و هزيت عليها نحكي
أنا:رووحي
شروق:وينك لتوا...وعدتني باش تخرجني اليوم
أنا:صحيح...أما الله غالب...جاتني خدمة مستعجلة...كان مفماش مشكلة...نعوض بنتي غدوة
شروق:وعد ؟
انا:وعد يا روح قلبي
شروق:باااهي أما نحبك تكون موجود معانا على العشا أمااانك
أنا:أكيد باش نكون مع شروقتي...و كان ملحقتش في الوقت نحبك تاكل بالقدا و تكمل الواجبات لي عندك الكل باهي
شروق:باهي باباتي
أنا:رد بالك على روحك
شروق:و أنت زادة
تبسمت و علقت عليها...أصلا مدامني واقف لتوا...خاطرها هي موجودة في حياتي و لي كانت السبب الوحيد لي خلاني نقاوم لتوا...منجمش نستخايل نهاري من غيرها و من غير ما نسمع صوتها...خذيت نفس و طلبت كنان لي هز عليا يحكي
كنان:مدام زينب لباس ؟
أنا:لباس...هاني جبتها للكلينيك...حالتها كانت تاعبة أكا علاش خليتها راقدة توا
كنان:باهي برشا...خليك بجنبها أنت...لين نخبر إيمان و نفهمها في اللي صار
أنا:خبرها توااا...خاطر أمها تحب تشوفها...يعني كان تفيق أكيد باش تعاود تسألني عليها
كنان:باهي...هاني باش نخليها تقابل خوها ساعة و مبعد نجيبها للكلينيك
أنا:باهي...هاني باش نخليلك عنوان الكلينيك في ميساج
كنان:باهي
علقت عليه و بعثتلو عنوان الكلينك...عديت يدي على وجهي و خذيت نفس طويل...قبل ما نرجع للبيت لي هي فيها مرة أخرى...هزيت الكرسي و حطيتو قدامها...ترميت عليه و عديت عينيا على ملامح وجها...لي لقيت روحي نثبت فيهم أكثر...و نفس الأسئلة هدت عليا مرة أخرى كيفاش وحدة كيفها هي...تتحمل الوحش متاع حازم أصلا الظاهر عدات حياتها الكل معاه بالطريقة هاذي...حتى يستهل اللي صار فيه اليوم...لحظات تعدات لقيت روحي سارح بين ملامح وجها و ذكريات الماضي...لي كنت نهرب منها ديما...منعرفش علاش لقيت روحي نستحضر فيها توا زعمة شنية وجه الشبه بيناتهم ؟ في شنية تشبها باش لقيت روحي نفركس على ملامحها في زينب...اللي منجمتش نبعد عينيا منها...رغم إني منحبش نرجع للماضي و لا حتى نتذكر لي صار...حتى إني وقت قابلتها أول مرة متوقعتش لي هي أم إيمان...يعني لتوا مستغرب قداش عرست في عمرها...دخلت في حرب أسئلة مع روحي وين منجمتش نخرج منها...عديت يدي على وجهي نحكي
أنا:يزززي نزاار يزززي...لي تعمل فيه ميجيش...خاطرها لتواا مرت راجل و أنت عمرك ما حطيت عينك على حاجة غيرك
عاودت غزرتلها مرة أخرى...نظن معادش فما شي يخليها تتلز باش ترجعلو و لا حتى تعطيه من روحها أكثر من هكا خااطرو باش يدمرها و يقضي عليها...هزيت روحي وققت هارب من الأفكار اللي هدت عليا...من الماضي و من اللي قاعد يدور في راسي...بعدت الكرسي بيدي و هزيت روحي خرجت لبرا...شيعت راسي لتالي...محاولة مني باش ناخو نفس يبردني و يطرد الأفكار الكل من راسي..منحبش نتعدا حدودي و نكسر الثقة لي حطتها فيا و هي في الوضع هذا...كلشي لازمني نخمم فيه...هو كيفاش نمنعها منو في أقرب وقت و من غير ما نضرها أكثر..هزيت راسي نغزر للفرملية لي قربت مني و حطت التقرير متاعها في يدي...حليتو نقرا فيه...و تبسمت بالوقت...الحل اللي باش يمنعها ولا بين يديا توا...هذا باش يكون دليل كافي أنو يمنعها منو و يخليها تسترجع حريتها اللي تسلبت منها..و خلاتها تعدي شطر حياتها مع سجانها في الجحيم و اللي باش تكون نهايتو على قريب برشا.
#زينب_نزار❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
