🔸️حلقة 43
🔸️ملاك_تحكي:
بقيت نمشي و نجي على أعصابي...خاطرها طولت غير العادة و حتى تليفونها مسكر و حتى كنان مهزش عليا...غزرت لطاطا زينب لي من بكري مش قد بعضها منجمتش نطمنها...خاطرني حتى أنا على أعصابي خاصة بعد اللي عرفتو منها بخصوص أمير...خذيت نفس نحكي
أنا:طاطا...أنا باش نمشي عند خالتي فاطمة...خليها هي تطلب كنان يمكن يهز عليها
زينب:مطولتش إنتي زادة عيش بنتي
أنا:باهي طمن
لبست كبوطي و هزيت روحي خرجت...لفيت روحي أكثر مع النسمة الباردة لي ضربتني و قربت من الدار مديت يدي بالوقت و دقيت الباب...حلتلي حنين و غزرتلي مستغربة تحكي
حنين:أهلا ملاك تفضل
أنا:لازمني نشوف خالتي فاطمة ضروري
حنين:هوكا قاعدة في صالة
هزيتلها براسي و دخلت...قعدت بجنبها...غزرتلي تحكي
فاطمة:لباس يا روحي ؟
أنا:نطلب في كنان مهزش عليا
فاطمة:علاش شنية صار ؟
أنا:يمكن إيمان راهي معاه توا...أكا علاش لازمني نسألو ضروري
فاطمة:حنين أطلبو إنتي عيش بنتي
حنين:باهي أمي
هزيت روحي وقفت نغزرلها...تكات على الطاولة تطلب فيه ورا بعضو...و غزرتلي تحكي
حنين:حتى أنا مهزش عليا
جيت باش نحكي قص عليا صوت الباب ضيقت عينيها مستغربة تحكي
حنين:يمكن هو...هاني باش نحل أنا
بقيت واقفة في بلاصتي نستنى فيها...و نغزر للباب فرد وقت...أول ما حلتها ترمات في حضنو تحكي
حنين:آددم...وينك لتوا ياخي ؟
حط يدو على ظهرها و هز عينيه في وجهي...للحظة حسيت روحي عندي برشا مريتوش...باستو من خدو و جبدت روحها تحكي
حنين:جيت في وقتك
آدم:شنية لي صار ؟
دورت وجهي بالوقت...خاطرني بالرسمي معادش نحب نغزرلو و لا نحكي معاه...فرد وقت نسمع فيها تحكي معاه
حنين:آدم ميسالش تطلب كنان...خاطر ما هز على حتى حد فينا
آدم:علاش صارت حاجة ياخي ؟
حنين:منعرفش...يمكن إيمان راهي معاه توا...خاطر ملاك تحيرت عليها
خذيت نفس و هزيت عينيا في وجها...نحكي
أنا:مش لازم...أنا باش نمشي توا...تصبحو على خير
غزرتلي مستغربة...هزيت روحي و خرجت من غير ما نركز معاهم...خاصة بعد اللي صار آخر فترة...ساعات نحس في روحي مزلت حاقدة عليه لتوا بسبب اللي عملو معايا...قبل ما نوصل لدار...قص عليا صوتو من التالي
آدم:ملاااك
حبست في بلاصتي و كبست على يدي...خذيت نفس طويل و تلفت عندو...قرب مني بخطوات ثابتة و عدا عينيه على وجهي يحكي
آدم:ملاك شنية لي قاعد يصير ؟
أنا:حتى شي
جيت باش نمشي...وقفني مرة أخرى...يحكي
آدم:تمشي بعد ما تفهمني لي صار و لا باش نمشي نسأل مدام زينب و نعرف الموضوع
أنا:إيمان طولت غير العادة...أكا علاش حبيت نحكي مع صاحبك...يعني مفما حتى حاجة تخصك باش تحاول تفهم
آدم:ملاك إذا كان الموضوع مهم خلي خلافنا على جنب و نحلوه مبعد
أنا:مفما حتى خلاف بيناتنا باش نحلوه...يكفي أنك معادش تقرب مني مرة أخرى
آدم:مش على كيفك...و باش تسمعني بالسيف عليك زادة
أنا:زايد مع شكون نحكي...انا باش نمشي توا
آدم:خليك...هاني باش نطلب كنان...طمن على صحبتك و أدخل لدار
بقيت نغزرلو و هو يطلب فيه...لحظات كانت كافية باش نعدي عينيا على تفاصيل وجهو مع الضو لي ضارب فيه...درت راسي أول ما غزلي...نسمع فيه يحكي
آدم:كنان وين تليفونك ياخي ؟
قربت منو شوية باش نسمع كنان...حط مكبر بالوقت كأنو فهم عليا...نسمع فيه يحكي
كنان:خليتو عالصامت و مفقتش بيه...صارت حاجة ياخي ؟
آدم:إيمان معاك ؟
كنان:مممم معايا
هزيت عينيا في وجهو و قحرتلو...عدا يدو على شعرو يحكي
آدم:وينكم توا ؟
كنان:في داري
عينيا وساعو بالوقت...خاطرني متوقعتش جوابو ضيق عينيه يحكي
آدم:صارت حاجة ياخي ؟
كنان:نحكيو مبعد...هاني باش نعطي خبر لملاك و أمها و نجيبها مبعد...مشات الحكاية من مخي و لا راني حكيت معاهم قبيل
آدم:ملاك معايا...هاني باش نعطيها خبر توا...إذا صارت مشكلة أعلمني
كنان:باهي
علق عليه و غزرلي مستغرب...ضيق عينيه أكثر يحكي
آدم:شبيك تغزرلي هكا ؟
أنا:علاش راهي في دارو ؟
آدم:منعرفش...ياخي انا لي قتلو هزها معاك لدارك زيد كنان ماهوش باش يضرها طمن
أنا:نعرف لي هو خير منك...زيد علاش هز عليك أنت و إحنا لا
آدم:وين نعرف عليه ياخي...باش تحاسبني على هاذي ياخي ؟
أنا:أنا الغالطة لي مزلت واقفة معاك لتوا
عطيتو بظهري و جيت باش نمشي...جبدني من يدو و دورني عندو بالوقت...يحكي
آدم:خليك و حاول تسمعني مرة وحدة كهو أماانك
جبدت يدي منو و وخرت خطوة لتالي...نحكي
أنا:معادش تحط يدك عليا مرة أخرى و لا حتى تقربلي زادة
آدم:متنجمش تهرب مني ديما...خاطرك في الأخير مجبورة باش تسمعني
أنا:مانيش باش نسمعك و ماكش مظطر باش تفسرلي خاطر حتى شي ماهو باش يتبدل...أصلا أنا مستحيل نكون معاك أنت
آدم:و مستحيل نخليك ترجع ليه زادة...حط في مخك لي إنتي وليت متاعي يا ملاك..بالسياسة و لا بالغصب إنتي ليا أنا و كهو.
بقيت نغزرلو من غير حتى كلمة...وخر خطوة لتالي و عطاني بظهرو...شيعتو لين ركب في كرهبتو و طار بيها...وين بالرسمي منجمتش نتحرك من بلاصتي خاطر هاذي أول مرة نحسو على أعصابو لهدرجة فرد وقت مستغربة في حظي لي يحط في ثنيتي كان المختلين أصلا أنا مستحيل مزلت نقبل بحد بالسيف عليا و نعيش معاه تحت سقف واحد لأي سبب من الأسباب خاطر اللي عشتو و تعديت بيه قبل مستحيل نخليه يتعاود معايا و لا نعاود نعيش نفس التجربة مرة أخرى.
#آدم_ملاك❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
