صرخة صمت 🌬

الحلقة الواحدة و الثمانون

🔸️حلقة 81
🔸️كنان_يحكي:
عديت يدي على وجهي و غزرت لزينب لي باش تخلط عليها نحكي
أنا:خليك تو أنا نخلط عليها
زينب:متأكد ؟
هزيتلها براسي إيه و خرجت وراها...منعرفش علاش عملت هكا...أما شي داخلي يدفع فيا ناحيتها...رغم الحقائق الكل لي ظهرت قدامي...لتوا نحس في روحي مستغرب...منعرفش علاش و كيفاش عرست بيها...أما جزء مني يقول أنو الطفلة هاذي كانت مهمة برشا في حياتي...سألت واحد من الصغار على ثنيتها و خلطت عليها..بقيت وراها من غير ما نوقفها..دخلت للجنينة متاع الحومة لأخرى و قعدت...عديت دقايق واقف نغزرلها...صوت شهقاتها لي لحقتني...خلاتني نقرب منها بالوقت...قعدت بجنبها و قربت منها شوية نزلت بيدي لكتفها نحكي
أنا:إيجا هوني تراه
قربت مني و حطت راسها على صدري...غرست يدي في شعرها نحكي
أنا:ششش يزي كهو
كبست على ظهرها أكثر...كي حطت يدها على صدري دموعها زادت أكثر...لدرجة معرفتش إني نسكتها تنهدت بالقاوي نحكي
أنا:نعرف أنو اللي صار فوق طاقتك...كيما نعرف إني تعبتك معايا...خاطر ما نجمت نتذكر شي من حياتنا مع بعضنا...أما رغم هكا نحبك تكون قوية...و متستلمش من توا
إيمان:أ..أنا ما عندي حتى ذنب...ص..صدقني ما عملتلو حتى شي يخليه يكرهني...كان ديما يحرمني من الحاجات لي نحبها...من قرايتي و من هوايتي و حياتي زادة...أصلا هو السبب لي خلى أمير يوصلي هو اللي وقف ضدي وقت كنت بحاجتو...لتوا منعرفش علااش كان يعاملني بالطريقة هاذي...ياخي أيمن مخممش فيا ؟ أنا زادة كنت بحاجة بابا...كنت بحاجة شكون يحميني ديما...كنت نغير من أصحابي لي يقراو معايا زادة...أنت الوحيد لي سديت الفراغ هذا يا كنان...أنت الوحيد لي عوضت وجودو في حياتي...أنت لي كنت بابا قبل ما تكون اي حد آخر في حياتي..منحبكش تنساني..منحبش نكمل حياتي من غيرك...أنا بالرسمي نحس في روحي ضايعة معادش نعرف شنوة نعمل...منعرفش كيفاش نقنعك أنو أنت حبيتني رغم ظروفي...و لي حياتنا كانت مثالية زادة...و توا منعرفش كيفاش نقنع أيمن لي أنا معنديش ذنب في اللي قاعد يصير معانا...والله كان يضرب أمي بسبب و من غير سبب...و مستحيل تنجم تكمل بقية حياتها مع عبد كيفو
جبدتها من عندي شوية و عديت صوابعي على خدها نمسح في دموعها و نحكي فرد وقت
أنا:إيمااان...هدي روحك توا...حاول تاخو نفس هيا عزيزتي
هزتلي براسها باهي...كبست على خدها كي حسيتها هدات شوية و غزرتلها نحكي
أنا:أغزرلي هوني...صدقني باش نحاول نتذكر كل لحظة جمعتني بيك...كيما نوعدك إني باش نكون معاك ديما...و بالنسبة لأمير هذا...عاوني باش نعرف بقية التفاصيل عليه...و هاذي باش تكون آخر مرة يقرب فيها منك
إيمان:م..مااا نحب حتى شي كنااان...نحبك أنت تتذكرني...نحبك ترجعلي و كهو
قربت مني أكثر و دورت يديها زوز على رقبتي خذيت نفس من ريحتها و كبست على ظهرها نحكي
أنا:كان منجمتش نسترجع ذاكرتي...باش نحبك من أول و جديد...باهيشي هكا
جبدت روحها مني و عدات عينيها على وجهي
حطيت يدي على خدها نحكي
أنا:ساعة نحب نعتذر منك على كلشي قلتو قبيل
دخلت بعضي من كلشي سمعتو و بالنسبة لخوك مزال صغير...من غير ما تاخو في خاطرك منو...إنتي زادة مقصرتش فيه...يعني طبيعي وضعو يكون حساس شوية كي يقارن روحو بأصحابو
إيمان:باش يبقى يعتبرني السبب في كلشي تعدا بيه لتوا
أنا:لااا...كي يكبر يشوف الحقائق و يفهمها أكثر متنساش أنو مزال صغير و ماهوش باش يتقبل كلشي في حياتو بالساهل
إيمان:أنا معادش نعرف شنوة نعمل بالظبط
أنا:حتى شي...توا لازمك ترتاح و كهو...و بخصوص تليفونك باش يبقى عندي الفترة هاذي
إيمان:علاش ؟
أنا:مش لازم تعرف علاش...هيا توا خلينا نرجعو لدار
إيمان:منحبش
أنا:بالله متأكدة إني كنت نحبك
إيمان:شقصدك ؟
أنا:نقصد...أنك عنيدة و بكاية فرد وقت...غير لسانك لي أطول منك
إيمان:كنااان...ياخي توا ولا هذا الكل مش عاجبك
أنا:عاجبني عزيزتي...متخاافش
قحرتلي و قربت مني مرة أخرى...حطيت يدي على ظهرها و قربتها ليا أكثر...حطت راسها على صدري تحكي
إيمان:ياخي يدك ماهيش توجعك ؟
أنا:لا
إيمان:باهي أنت مرتاح عند أمي فاطمة ؟
أنا:أكيد...أما لازمني نسترجع حياتي في أقرب فرصة
إيمان:مفهمتكش
أنا:ساعة إحنا وين كنا عايشين ؟
إيمان:في الفيلا
أنا:متأكدة...ياخي ماهيش كذبة جديدة ؟
إيمان:لاا
أنا:ملا خلينا نرجعو لحياتنا
إيمان:منحبش...منحبش نرجع لتفاصيل حياتنا و أنت ماكش متذكرها
أنا:باهي شنية تقترح ؟
إيمان:منحبش نقترح...نحبك تتقبل وجودي معاك و في حياتك...يمكن هكا تنجم تتذكرني
دورت يدها على جنبي و دخلت في حضني أكثر
نزلت عليها شوية بستها من راسها و كبست عليها أكثر...أصلا التعب ظهر على ملامحها أكثر...كيما حسيتها مش قد بعضها...خاصة بعد اللي تعدا عليها اليوم... نزلت راسي شوية نحكي
أنا:رقدت ؟
إيمان:لااا..أما ليا برشا محطيتش راسي و أنا مرتاحة هكا
عديت يدي على شعرها و خذيت نفس...نحكي
أنا:معادش تبكي بالطريقة هاذي مرة أخرى...مهما كان الأمر كبير و يوجع ميستحقش دموعك و لا حتى تتعب جرايرو باهي
إيمان:خليك معايا و أنا باش نكون لباس في كل وقت
أنا:والله أنا مستحيل نخلي مرتي وحدها
كبست عليا أكثر...خذيت نفس طويل و شيعت راسي لتالي...رغم كل الأحداث لي صارت لقيت روحي متقبل فكرة أنها مرتي و مسؤولة مني...غير هكا كلشي ينجم يتحل مع الوقت.
#إيمان_كنان❤