صرخة صمت 🌬

الحلقة التسعون

🔸️حلقة 90
عديت عينيا مصدومة من كلامو...متوقعتش يحكي على اللي صار بالطريقة هاذي...كيفاش ينجم يلعب لعبة مسخة هكا...من غير ما يخمم فيا و لا في اللي ممكن نعيشو بعد الحادثة...مديت يدي نمسح في دموعي ورا بعضها...خاصة بعد ما ريت كنان و هو كابس على يدو و يغزرلو...للحظة خفت أنو يتهور و يضربو...حطيت يديا زوز على كرشي...نهدي في روحي...هزيت عينيا في وجهو...كي غزرلي يحكي
أمير:سامحني إيمان...سامحني على كلشي عملتو معاك...خاطرني طولت برشا باش استوعبت اللي نعمل فيه...كيما حاضر لأي عقاب يستنى فيا
بقيت ساكتة من غير حتى كلمة...قرب مني شوية شوية و شدني من يدي يحكي
كنان:لباس يا روحي ؟
أنا:لباس...خليك قريب مني و كهو
كبست على يدو و هزيت راسي نغزر للقاضي لي قاعد يتشاور مع الأعضاء لي معاه...غزرت لكنان نحكي
أنا:شنوة باش يصير توا ؟
كنان:اللي كان لازم يصير في أول جلسة
هزيتلو براسي باهي و غزرتلو مرة أخرى...منعرفش إذا الكابوس هذا باش يوفى و لا باش يمتد معايا أكثر من هكا...توقعت برشا أسباب من أمير...غير أنو ياخو الموضوع كأنو لعبة...لعبة خلاتني نعيش في ضياع كبير و خوف مكنتش نعرفو قبل...نفسها اللعبة لي عرفتني على الراجل لي واقف في ظهري و يحمي فيا و لي خلى الحقيقة تظهر للكل زادة...كبست على يدو أكثر محاولة مني باش نقوي روحي أكثر...هزيت روحي وقفت بعد ما قرر القاضي أنو يعلن على الحكم...وقفو الكل في جرتنا...وين لقيت روحي واقفة نفس الوقفة لي وقفتها شهور لتالي...أما الوضع مختلف...مواقفنا مختلفة...و ادوارنا تقلبت زادة...دور راسو شوية غزر لعبير و تبسم...حتى هي خسرت برشا جرايرو...و عرف قيمتها مأخر...أصلا منعرفش كيفاش باش تواجه اللي جاي وحدها...خاصة أنها مزالت صغيرة على كلشي قاعد يصير معاها...خذيت نفس و غزر للقاضي...لي بدا يحكي
القاضي:بعد النظر في القضية و إعادة التحقيق و بعد ظهور جميع الأدلة و البيانات التي توضح حقيقة إغتصاب المدعوة إيمان عبد العزيز من طرف أمير أصلان...و بموجب القانون...قررت المحكمة بخصوص المدعو...محسن عمارة...توقيف عمله و الإيداع الحبس لمدة 3 سنوات بتهمة التزوير و التحايل على القانون مع عدم مزاولة مهنته مرة أخرى و بالنسبة للمدعو كمال السامي...قررت المحكمة حبس المتهم 5 سنوات لإخلاله بشرف مهنته و إخفاء الأدلة الخاصة بالقضية و التحايل على القانون...مع عدم مزاولة مهنته كمحامي مرة أخرى أما المدعو حازم عبد العزيز 
دورت راسي بالوقت و عديت عينيا على وجهو..تبسم و هزلي براسو باهي...نزلت عينيا من وجهو مع دموعي لي هبطت و غزرت للقاضي لي كمل كلامو يحكي
القاضي:حكم عليه بالسجن لمدة سنة...لتقديمه شهادة مزورة ضد إيمان عبد العزيز و محاولته طمس الحقيقة
سكت شوية و دور راسو غزر لأمير...كبست على يدو أكثر من غير ما نحس و من غير ما نزل عينيا على وجهو...فرد وقت نسمع في القاضي يحكي
القاضي:بعد إعادة النظر في القضية و سماع الشهود و إعتراف المتهم بفعلته...التي تمس بحرية المدعوة إيمان عبد العزيز و إنتهاك حرمة جسدها و إلحاق الأذى بيها حكم على المدعو أمير أصلان بموجب قانون الإغتصاب بالسجن مدة 5 سنوات و بتهمة التزوير و إخفاء الأدلة الخاصة بالقضية 3 سنوات ليصبح مجموع سنوات سجنه 8 سنوات رفعععت الجلسة.
غمضت عينيا بالقاوي و عاودت حليتهم...تبسمت مع دموعي لي هبطت...لحظات تعدات عليا...منجمتش نتحرك فيها و لا نستوعب حكم القاضي...كبس على يدي و عنقني بالوقت...عدا يدو على شعري و باسني من راسي يحكي
كنان:وفاات يا رووحي
كبست عليه من غير حتى كلمة...كأني ضيعت صوتي جملة...جبدت روحي منو و ضحكت نحكي
أنا:كاابوس أميير أصلاان وفى يا كنااان
ضحك و عاود عنقني...جبد روحو مني شوية و مسحلي دموعي يحكي
كنان:نحبك تنسى كلشي عشتو قبل توا يا روحي واضح ؟
أنا:فما حاجة أهم لازمني نعملها توا...قبل ما نخرجو من هوني
غزرلي مستغرب...حليت صاكي و جبدت 1000 دولار لي عطاهالي و جبدت روحي من كنان...قربت منو شوية و وقفت قدامو...مديت يدي شوية و حطيتها في مكتوبو نحكي
أنا:هذوما فلوسك...يمكن يفيدوك في الأيامات الجاية
غزرلي من غير حتى كلمة...وخرت خطوة لتالي وقفني بالوقت يحكي
أمير:إيمااان
دورت راسي غزرتلو...عدا عينيه على وجهي و تبسم يحكي
أمير:أنا بالرسمي آسف على كلشي عشتو جرايري أصلا فهمت و إستوعبت هذا الكل بعد ما حسيت إني باش نخسرها...غير هكا متخلوهاش وحدها...عبير صغيرة و منحبهاش تحمل الذنب هذا معايا
أنا:أنت مذنب في حقها زادة...خاطر لي عملتو معاها كان إستغلال ليها
أمير:نعرف...و مانيش باش ننكر اللي عملتو...أما في الأخير حبيتها و حبها نفسو لي خلاني نفهم روحي و نستوعب عدد الغلطات لي عملتها طول حياتي
هزيتلو براسي باهي و عطيتو بظهري...قطعت المسافة لي بيني و بينو و دخلت في حضنو مرة أخرى...عنقتو بكل قوتي نحكي
أنا:كناااني...أنت أملي و فرحتي في الدنيا هاذي منعرفش كيفاش كنت باش نتخطى هذا الكل من غيرك...مرسي برشا على كلشي عملتو على خاطري و على حبك الكبير ليا يا عمري
نزل عليا شوية...باسني من راسي و كبس عليا أكثر لحظات و دارو بينا الكل في لحظة...عيلتي لي كانت تتكون من أمي و خويا كهو...توا كبرت أكثر على قبل لي خلاني نكتشف...أنو مهما كان اللي خسرتو في الماضي...ربي عوضني بحاجات أقوى منو و أولهم كنان..اللي عطاني كلشي و عوضني على الدنيا الكل.
#إيمان_كنان❤