🔸️حلقة 12
🔸️إيمان_تحكي:
حطيت الصحن قدامها و قعدت بجنبها...من وقت رجعنا و هي مش قد بعضها...عديت عينيا على وجها و خذيت نفس نحكي
أنا:ملاك شبيك ؟ هذا الكل خاطر قابلت راجلك ؟
هزتلي براسها لا...كبست على يديها زوز و غزرتلي تحكي
ملاك:لااا...مش من إيهاب...أما اليوم آدم شريك كنان
أنا:اي ريتو قبل...شنية عملك ؟
ملاك:حتى شي...أما حاول يقلل إحترامو معايا
أنا:شنووة ؟ شقلك الساقط ؟
ملاك:منعرفش ما فهمت شي من كلامو...أنا والله نحب نخدم من غير مشاكل يا إيمان...قاعدة نحاول نكون كيف الناس الكل...نجم نحكي و نضحك من غير خوف...أنا وقت كنت مع إيهاب...نحسب حروفي باش نخرجهم
أنا:باهي هدي روحك...حاول تجنبو الفترة هاذي و إذا زاد الشي على حدو...إنتي باش تخلي الخدمة هاذي...باهي ؟
هزتلي براسها باهي...خذيت نفس و عنقتها...منحبهاش تحط راسها في راسو و تعيش نفس اللي عشتو أنا..خليتها
تتعشى بالسيف عليها و لميت البيت...أحسن شي خالتها مكانتش هوني...خاطر ولا وحدة ناقصة خنارها توا...أول ما رقدت غطيتها و شديت فرشي...نخمم في أمي و أيمن و من شيرة أخرى نخمم في اللي صار البارح...رغم أني رفضت نمشي للسوسيتي مرة أخرى...خايفة فرد وقت منلقاش مخرج لقضيتي...أصلا منعرفش علاش لقيت روحي نخمم فيه بالطريقة هاذي...أفكاري غمتني لين غفيت و فقت على صوت المنبه...فيقتها معايا...لبست بالزربة و حضرتلها معايا حاجة تاكلها...خاطرها مش قد بعضها...عديت الثنية نطمن فيها و نوصي فيها فرد وقت حتى أني بقيت على تواصل معاها كل شوية...غطست في الخدمة لي زادت غير العادة...خاطر الطلبيات كثرت..لدرجة مصدقتش لي الوقت قريب يوفى...فقت من سرحتي على صوت نادية تحكي
نادية:إيمان...سي كنان هوني و طلبك إنتي...شوف شنية يحب...خاطرو أهم من أي حد موجود هوني
دورت راسي نغزرلو...قاعد في الطاولة متاع بكري...توقعت بعد اللي صار آخر مرة...ماهوش باش يرجع لهوني...خذيت نفس و قربت من الكنتوار نحكي
أنا:عماااد...حط كلشي من يدك و حضرلي زوز قهوة سادة وحدة بالسكر و وحدة مرة و كاس تاي و هاني انا باش نحضر صحن الحلو
عماد:علاش الزربة هاذي ؟
أنا:لسي كنان
عماد:على حد علمي جا وحدو
أنا:هو طلب هكا
عماد:باهي
جبدت الصينية و حطيت عليها كلشي...كبست عليها و مشيت ناحيتو...حطيتها على الطاولة و فرغتها نحكي
أنا:هوكا كلشي قدامك سي كنان...خاطرني تاعبة و منجمش نمشي و نجي أكثر من هكا...صحة و عافية
ضحك بالوقت...ضيقت عينيا مستغربة و سكت...تكى لتالي يحكي
كنان:شبيك ؟
أنا:شي...أنا باش نمشي توا
عطيتو بظهري باش نمشي...وقفني بالوقت يحكي
كنان:إيماان
كبست على يديا زوز...نزلت على شفايفي و تلفت عندو نحكي
أنا:تفضل
كنان:أقعد
أنا:عندي خدمة و مفما حتى شي يخليني نقعد معاك
كنان:نحب نسمع لي جيت عليه من أول و جديد
عديت عينيا على وجهو...و خذيت نفس طويل...نحكي
أنا:مش لازم سي كنان...خاطر لا أنت باش تصدقني و لا أنا نرجع لبلاصة تطردت منها...سامحني لازمني نمشي توا
وخرت خطوة لتالي و عطيتو بظهري...نمشي بالزربة...رغم انو الفرصة جات لعندي لثاني مرة...أما منجمتش نتنازل منجمتش ننسى لي صار و طريقة كلامو معايا...كيما منجمش نوكل محامي...هو بيدو مش مصدقني...حتى معنديش ثقة فيه بعد اللي عملتو معاه...نخاف نلقى روحي في قالب إنتقام و نخسر أكثر...دخلت للبيت بالزربة...مدام وفى الدوام متاعي...بدلت دبشي و عدلت شعري...خليت ميساج لملاك و خرجت من غير ما نتلفت ورايا...هزيت راسي نغزرلو متكي على الكرهبة متاعو...منعرفش إمتى لحق يخرج...أصلا ظاهر فيه يستنى فيا...قربت منو نحكي
أنا:شبيك مزلت هوني ؟
كنان:والله هاذي أول مرة نلاحق موكل عندي مش العكس
أنا:شنية لي يخليك مهتم سي كنان ؟ أنت حتى كان تولي محامي متاعي ماكش باش تستفاد شي
كنان:أما زادة منحبش شكون يقصدني و نرجعو
أنا:هوكا طلعت عندك شوية رحمة
غزرلي ندرا كيف...نزلت على شفايفي بالوقت...و دورت وجهي نحكي
أنا:على كل حال...أنا مستحيل نوكل محامي طردني من البيرو متاعو
كنان:معناها تحب على إعتذار مني
هزيت عينيا في وجهو...غزرتلو بالوقت...دوب تبسمت و هزيتلو براسي إيه نحكي
أنا:مممم ماهيش فكرة خايبة
كنان:صااار
عاودت هزيتلو براسي إيه...عدا يدو على وجهو و غزرلي ندرا كيف يحكي
كنان:على حد علمي حتى إنتي لازمك تعتذر
انا:ما عملت شي أنا
كنان:بالله ؟
أنا:أنت حكيت معايا بطريقة خايبة...و رغم هكا نعتذر منك نعرف روحي تسرعت و مقصدتش نعمل أكاكا...أمااا أنت مستحيل تعتذر...خاطرك كينان العامري
كبست على صاكي...وخرت خطوة لتالي...خذيت نفس طويل و عطيتو بظهري باش نمشي...كبس على يدي بالوقت و رجعني عندو...لحظة وحدة كانت كافية باش تمنع المسافة لي بيني و بينو...عديت عينيا على وجهو مستغربة و مصدومة من ردة فعلو...من غزرتو و من كبسة يدو زادة...عدا عينيه على ملامح وجهي و تكلم من غير ما يعطيني فرصة باش ننطق حرف وسط الموقف هذا
كنان:منقصدش لي قلتو نهارتها
أنا:يعني ؟
كنان:يعني أنا نعتذر على سوء التفاهم
عديت عينيا على تفاصيل وجهو و لي أول مرة نثبت فيها بالقدا...متوقعتش باش يعتذر بالسرعة هاذي...و رغم هكا نحب نسمع كلمة أخرى منو...كلمة وحدة تخليني ناثق فيه و في الخطوة هاذي...خاطر منحبش نعيش نفس الشي مرة أخرى...و لا نتخبط وسط الصراعات هاذي...خاطر أهم شي عندي من الإعتذار هذا و من كلشي...هو أنو يصدقني و كهو.
#إيمان_كنان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
