🔸️حلقة 84
🔸️سيلا_تحكي:
هزيت راسي شوية نثبت في روحي...هاذي ثاني مرة ناقف في نفس البقعة و بنفس الروبة..منجمتش نتحكم في دقات قلبي و لا في الخوف لي تملكني...حليت يدي شوية و غزرت لصورتو لي في الكوليي...نحكي
أنا:سامحني ليث...خاطرني موفيتش بوعدي ليك و باش نكون لغيرك...صدقني مستحيل ننساك...أنت كنت و باش تبقى جزء مني ديما
بست تصويرة و سكرت الكوليي...حطيتو في الصندوق لي لميت فيه كلشي يخص الماضي و سكرتو حتى هو...نحب نبدا من جديد من غير ما نخلي الماضي يقيدني أكثر...دورت راسي شوية على صوت الباب و غزرت لبابا لي دخل عندي...للحظة تعاود قدامي نفس السيناريو...خاطر وقتها جاني بالطريقة هاذي و خبرني بموت ليث...قربت منو شوية نحكي
أنا:إ..إيهاب لباس ؟ صارتلو حاجة ياخي ؟
سالم:ششش هدي روحك عزيزتي...إيهاب لباس عليه أما كانك حاضرة...خليني نخرجك توا...خاطر الكل يستنى
أنا:ميسالش نزيد شوية ؟ بحاجة إني نهدي روحي قبل ما نخرج
تبسم و هزلي براسو إيه...باسني من جبيني يحكي
سالم:محلاك عزيزتي كيما كل مرة
أنا:عيشك بابا...ربي ميحرمنيش منك
سالم:و لا يحرمني منك يا بابا
عدا يدو على خدي و خرج...خذيت نفس طويل و حطيت يديا زوز على كرشي نهدي في روحي...تحل الباب مرة أخرى...مشى في بالي بابا رجع...جيت باش نحكي...أما سكت كي ريتو هو...عدا عينيه عليا و قرب مني مني بخطوات ثابتة...وقف قدامي بالظبط و غزرلي يحكي
إيهاب:شبيك داخلة بعضك عزيزتي...ياخي ناوية تهرب من العرس ؟
أنا:يزززي إيهاب...والله متوترة عاللخر
وخرت خطوة لتالي و قربت من المرايا نعدل في شعري...هزيت راسي شوية نغزرلو من مرايا... كي قرب مني و دور يديه زوز على رقبتي...مديت يدي شوية و عديت صوابعي على الكوليي نحكي
أنا:محلاه
نزل عليا شوية و باسني من رقبتي...تبسمت و تلفت عندو...حطيت يديا زوز على صدرو... باسني من جبيني يحكي
إيهاب:إنتي أحلى يا روحي...توا بالظبط ما نحبك تخمم في حتى شي...كيما منحبكش طول عليا زادة
هزيتلو براسي إيه و عنقتو بالوقت...نحكي
أنا:هاني باش نخلط عليك بعد شوية
إيهاب:نستنى فيك
جبدت روحي منو شوية...وخر لتالي و قرب باش يخرج كبس على البواني...وقفتو نحكي
أنا:إيهاااب
تلفت عندي في لحظة...تبسمت و خذيت نفس نحكي
أنا:نحبك
إيهاب:و أنا نموت عليك يا روحي
غمزني و خرج...تنهدت براحة عكس الخوف لي كنت نحس فيه بكري...حتى إني خلطت عليه اللوطة مع بابا بعد لحظات...قربت منو شوية...باسني من جبيني و جبدلي الكرسي قعدت...تعدات مراسم العرس خفيفة لدرجة إني مزلت مش مصدقة لي أنا وليت مرتو و على إسمو و أنو لي قاعد يصير حقيقة...كبس على يدي و باسني منها...تبسمت و عديت عينيا على وجهو...عديت بقية الوقت مش مصدقة لي قاعد يصير معايا...حتى الخوف لي كنت نحس في ساعات لتالي وفى كي بدا العرس...هزيت راسي شوية نغزر لوائل لي قرب منا صافح إيهاب و سلم عليا على غفلة يحكي
وائل:مبروك صغرونتي
أنا:عيشك وائل
تبسمت و قربت من إيهاب أكثر...لي جبدني لوسط الصالة...يحكي
إيهاب:فاش يعمل هذا هوني ؟
أنا:منعرفش شكون استدعاه والله
خذيت نفس و قربت منو أكثر...حطيت يدي على صدرو نحكي
أنا:من غير ما نخليو حد ينغص علينا فرحتنا إيهاب
تنهد بالقاوي و هزلي براسو إيه...كبست على صدرو أكثر و تبسمت...عديت دقايق في حضنو من غير ما نخمم في حتى شي من اللي فاتنا و لا من اللي جاي زادة أصلا هذا آخر شي كنت نحلم بيه...راجل نحبو و عرس و عيلتي دايرة بيا زادة...كيما متوقعتش باش يستدعي شطر أصحابو و اللي يعرفهم محسيتش بالوقت كيفاش تعدا..وائل قعد بعيد علينا لدرجة معادش ريتو مرة أخرى...عدا يدو على جنبي يحكي
إيهاب:خلينا نمشيو
أنا:مزال بكري
إيهاب:بكري بالنسبة ليك إنتي يا روحي
كبس على يدي و جبدني معاه...قبل ما نقول كلمة إعتذر من بابا و أمي و خلانا ننسحبو...قبل ما يمشي حد...حلي الباب ركبت و خلط عليا...كبس على يدي يحكي
إيهاب:ملا ناوية تعدي ليلة في داركم
أنا:شبيك تغزرلي هكا...تعرفني ندخل بعضي
إيهاب:والله أنا لي وليت داخل بعضي من اللحظة لي عرفتك فيها
أنا:بالله سي إيهاب
ضحك و كبس على يدي أكثر...جبدني عندو حطلي راسي على صدرو يحكي
إيهاب:نأجلو عركنا للأيامات الجاية عزيزتي
أنا:علاش شفما ليلة ؟
نزل راسو شوية...دوب غزرلي و كبس على الفولون يحكي
إيهاب:صار متعرفش فاش يستنى فيك ليلة
أنا:يا إيهاب شبيك تحكي معايا هكا...ساعة أنت عرست بيا باش تهددني
إيهاب:والله إنتي لي خايفة من غير سبب
أنا:محسوب مش أنت السبب
إيهاب:هدي روحك عزيزتي...حتى شي ماهو باش يصير من اللي في مخك...يعني عالأقل لين تكون مستعدة
نزلت على شفايفي شوية..كأنو قرا الأفكار لي في مخي...مديت يدي شوية و عديت صوابعي على رقبتو نحكي
أنا:مكنتش نعرف أنو أنت باش تكون متفهم لهدرجة يا روحي
إيهاب:والله إذا بقيت تستفز فيا هكا...منوعدكش برشا
ضحكت و هزيت روحي شوية...بستو من خدو و كبست عليه أكثر نحكي
أنا:أنت أحلى هدية في حياتي إيهاب...مرسي برشا على كلشي عملتو على خاطري
إيهاب:و أنا كنت باش نضيع من غيرك..أصلا متوقعتش باش يجي نهار و نجم نبدل من روحي حتى شوية
تبسمت و عنقتو أكثر...باسني من راسي و عدا يدو على ظهري..حتى أنا متوقعتش باش يجي نهار و نعيش هذا الكل و لا حتى إني نحب و نبني حياتي من جديد...و الأهم متوقعتش باش نحب واحد من الحالات لي كانت عندي و لي نعتبرها أحلى صدفة تعدات عليا في حياتي الكل
#إيهاب_سيلا❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
