🔸️حلقة 38
🔸️كنان_يحكي:
جبدت روحي منها شوية...و عديت عينيا على وجها حلت عينيها شوية و غزرتلي...هاذي أول مرة خدودها يحمارو لهدرجة...لين حسيتهم باش يطرشقو حتى شفايفها شهاوني باش نغطس فيهم مرة أخرى...لي لتوا مش مصدق إني قدمت على خطوة هكا معاها و بستها من غير ما نخمم في اللي جاي...أما وسط هذا الكل مغابتش عليا غزرتها الضايعة و خوفها لي يجبد فيها لتالي...خذيت نفس و نزلت بيدي من جنبها لآخر ظهرها عنقتها و غرست يدي لأخرى في شعرها...محاولة مني باش نهدي الأفكار لي قاعدة تدور في مخها الكل
كبست يديها على أجنابي...خلاتني ننزل عليها أكثر خذيت نفس من ريحة شعرها و دخلتها في حضني أكثر دقايق محبيتش نحرم روحي منهم و لا حتى نخمم في اللي باش يصير مبعد فقت من سرحتي كي تحل الباب جبدت روحي شوية و شديتها من يدها نحكي
أنا:هيا إيجا
خلطت عليا من غير ما تسألني...أصلا حسيتها مش قد بعضها خاطر مش بالعادة تسكت...أكا علاش الهدوء متاعها يخوفني..دخلت للبركينغ و قربت من الكرهبة جبدت يدها مني تحكي
إيمان:ن..نحب نمشي من هوني
خذيت نفس و قربت منها شوية...حاوطت وجها بيديا زوز و عديت عينيا على دموعها لي تحصرو بين جفونها نحكي
أنا:إيماان...أغزرلي هوني تراه...منحبكش تخاف و لا تخمم في اللي صار بسلبية باهي
إيمان:سيبني كناان
أنا:لااا مانيش باش نسيبك...كان متغشة من اللي صار تنجم تخرج غشك فيا...أما متستناش مني نبعد
جبدت روحها منها و عطاتني بظهرها...ثواني و عاودت دارت عندي...وين كانت دموعها غلبتها و نزلت...غزرتلي تحكي
إيمان:منحبش نضيع معاك في الحلمة هاذي كنان منحبش نلقى روحي في دوامة منجمش نخرج منها أنت توا معايا و غدوة تنجم تكون في بلاصة أخرى منحبش نكسر روحي أكثر من هكا و ماكش مجبور تعيش مع التقلبات متاعي...أنا قتلك قبل لي أحلامي تقصت و ماتت من غير اللي قاعدة نسعى على خاطرو إذا أنت قاعد تقرب مني باش تبعد في الأخير متقربليش كنان
قربت منها شوية و خذيتها في حضني مرة أخرى كبست عليها و عديت يدي على شعرها نحكي
أنا:و أنا قتلك قبل عمري ما إعتبرت ظروفك حاجز بالنسبة ليا...أنا حاجتي بيك إنتي...نحب نكمل ثنيتي معاك و نعدي بقية عمري بجنبك...إذا إنتي وافقت عليا بالطبيعة و قبل هكا باش نحكيو على كلشي نحبك تعرف كلشي تعديت بيه في حياتي السابقة بعدها القرار يرجع ليك...أكا علاش نحبك تستناني لين نرجع
جبدت روحها مني و هزت راسها شوية...غزرتلي مستغربة تحكي
إيمان:باش تسافر بالرسمي ؟
مديت يدي شوية...مسحت بقية دموعها...و تبسمت نحكي
أنا:مممم صحيح
غزرتلي من غير ما تقول حرف آخر...خذيت نفس نحكي
أنا:يعني نحب نعرف إذا إنتي باش تستناني و ترد على تليفوناتي زادة
إيمان:وين باش تسافر ؟
أنا:ألمانيا
سكتت شوية و نزلت راسها مرة أخرى...كأنها تستوعب في اللي قلتو...تبسمت نحكي
أنا:شبي صغرونتي ؟
جبدت روحها مني و رجعت شعرها لتالي...تحكي
إيمان:مانيش صغيرة كناان...و زيد أنت كي باش تسافر القضية تتعطل أكثر...ميجيش هكا
ضحكت بالوقت و عاودت قربت منها...دوب غزرتلي و بعدت عينيها من وجهي...خذيت نفس نحكي
أنا:مانيش باش نطول
إيمان:قداش تبقى ؟
أنا:أسبوعين
إيمان:أسبوعين ؟
هزيتلها براسي إيه و حطت يدها على رقبتها...تحكي
إيمان:معناها كنت باش تسافر من غير ما تخبرني ؟
أنا:إيجا هوني تراه
إيمان:لا مرتاحة هكا
جبدتها من يدها لعندي و عديت عينيا على وجها نحكي
أنا:كنت باش نعطيك خبر
إيمان:وااضح...يعني كان مجاتش حنين متاعك...مانيش باش نعرف
أنا:على أساس مغرتش منها
إيمان:علاش حتى نغير...أمورك متهمنيش
أنا:بالله ؟
إيمان:والله
أنا:معناها نبدا نفركس على شكون تهتم بيا أكثر
إيمان:علااش صغير باش تحب شكون يهتم بيك ؟
ضحكت و كبست على يدها أكثر...جات باش تحكي عنقتها بالوقت نحكي
أنا:ششش ما تقول حتى شي آخر...يعني صحيح مانيش بحاجة شكون يهتم بيا...أما ميسالش نحبك إنتي تهتم بيا و تحبني
نزلت راسي شوية غزرتلها...قعدت ساكتة من غير ما تجاوبني...بستها من راسها نحكي
أنا:إيماان...نحب كي نرجع لهوني ناخو إجابتي منك
هزت راسها شوية و عدات عينيها على وجهي...عديت صوابعي على خدها و نزلت بيهم لشفايفها نحكي
أنا:يعني نحب ناخو فرصتي معاك...بالمختصر نحب نعدي بقية حياتي معاك
إيمان:و أنت تنجم تستناني ؟
أنا:نستنى...صدقني باش نستناك لآخر نهار في عمري
تبسمت و عاودت عنقتني...رغم مخذيتش الجواب من عندها أما هاذي كانت أول مرة تكون ردة فعلها ناحيتي هكا...كبست عليها و تنهدت براحة...خاطر متوقعتش قربها و كان إشارة كافية بالنسبة ليا غرست يدي في شعرها و انا نسمع فيها تحكي
إيمان:علاش باش تسافر ؟
أنا:خدمة
جبدت روحها مستغربة...بعدتلها شعرها بيدي و كملت نحكي
أنا:فما مشروع صغير بديتو مع آدم...يعني لازمني نسافر باش نكمل بقية الإجراءات و طلبتك اليوم باش نعلمك و نقلك اذا صار شي في غيابي آدم موجود و ماهوش باش يخليها بيك...فرد وقت تهز عليا و متخلينيش متحير عليك
إيمان:باهي كنان
أنا:هيا إيجا خليني نوصلك
إيمان:منحبش نعطلك معايا
أنا:هيا عزيزتي...إنتي بالذات مستحيل تعطلني
نزلت عينيها من وجهي و جبدت روحها مني...تبسمت و خلطت عليها...توا بالظبط ما نحب نخمم في حتى شي من غيرها و من غير اللي عشتو معاها توا...حتى معنديش إستعداد باش نبعد عليها جملة.
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
