صرخة صمت 🌬

الحلقة الواحدة و التسعون

🔸️حلقة 91
🔸️ملاك_تحكي:
مديت يدي شوية...حليت الباب و دخلت...تبسمت و أنا نعدي في عينيا على تفاصيل بيتهم...متوقعتش باش تطلع هكا...قربت من خزانتهم و عديت يدي على دبشهم كلشي نستنى فيه إني نهزهم بين يديا و نشم ريحتهم خذيت نفس و كملت تفقدت البيت كيما كل مرة...ما نحب ننسى حتى شي يخصهم حتى في بيتنا أنا و آدم...حطيت سرير لكل واحد منهم فقت من سرحتي على صوت تليفوني...تبسمت و هزيت عليه بالوقت نحكي
أنا:آدم...وينك لتوا ياخي ؟ هاني طلبتك قبيل و مهزيتش عليا
آدم:سامحني ملاكي...كانت عندي جلسة...صارت معاك حاجة ياخي ؟ موجوعة ؟
أنا:لا مفما حتى شي من هذا طمن
آدم:الفترة هاذي لازمك متبقاش وحدك ملاك...خاطرك باش تولد في أي لحظة يا روحي
أنا:متخافش عليا...ياخي باش طول برا ؟
آدم:لاا يا روحي...ساعة شقولك تحضر روحك خلينا نتعشاو ليلة برا
أنا:لا خلينا نتعشاو هوني و نحضرو فيلم مع بعضنا
آدم:ملااك أعفيني منهم الأفلام هذوما...هاك خليتني نحضر أفلام ديزني الكل
أنا:مش الكل...زيد شبيك تكش من توا...معادش نحب مش لازم
آدم:باهي يا روحي...شعندي نعمل...إختار الفيلم لي تحب عليه و متتحركش برشا واضح
أنا:واضح حبي
ضحكت و علقت عليه...خاطر ديما يرضح في الأخير عديت نظرة أخيرة على البيت و خرجت...حطيت يدي على كرشي نحكي
أنا:ليلة زادة باش نحضرو فيلم خاص بينا
تبسمت و نزلت اللوطة...قعدت على الفوتاي و حليت البيسي...محاولة مني باش نختار فيلم لبعد العشا ضيقت عينيا مع صوت الباب...للحظة توقعت أنو هو نسى مفاتحو...خاطر بالعادة يدخل وحدو...هزيت روحي بالسيف...خاصة بعد ما رزنت الفترة هاذي منعرفش على روحي كيفاش وصلت للباب...كبست على البواني و حليتها...هزيت راسي شوية وين جات عيني في عينها بالظبط...متوقعتش باش نشوفها مرة أخرى و لا حتى توقعت أنها باش تجي لهوني..خذيت نفس نحكي
أنا:فااش تعمل هوني ؟
أسيل:نحب نحكي معااك
أنا:مفما حتى شي بيناتنا باش نحكيو فيه
كبست على البواني باش نسكر الباب...شدتها بيدها و غزرتلي تحكي
أسيل:ملااك أمااانك...مانيش باش ناخو من وقتك برشااا...أسمعني شوية برك عيش أختي
أنا:ياخي قاعدة تحضر للعبة جديدة
أسيل:لااا...والله لااا...و رحمة خويا معنديش نية إني نضرك مرة أخرى...أنا جيست نحب نحكي معاك و نصلح لي كسرتو شهور لتالي...خاطر معرفتش نبدا من جديد بعد اللي عملتو
عديت عينيا على وجها و هزيتلها براسي باهي منعرفش إذا خطوة صحيحة مني و لا العكس...أما حبيت نسمعها بعدت شوية من الباب نحكي
أنا:تفضل
أسيل:عيشك
خذيت نفس و دخلت وراها...قربت منها شوية نحكي
أنا:تحب تشرب حاجة
أسيل:لااا...منحبش نتعبك معايا
هزيتلها براسي باهي و قعدت بجنبها...غزرت لكرشي و تبسمت تحكي
أسيل:شنية جنس الجنين ؟
أنا:طفلة و طفل
أسيل:تووأم ؟
أنا:مممم توأم
تبسمت و غزرت لكرشي...سكتت شوية و هزت راسها تحكي
أسيل:باش تسمي الصغرون رائد مش هكا ؟
أنا:صحيح...هاذي رغبة آدم زادة
أسيل:مبروك عليكم
أنا:عيشك
أسيل:ملااك...أنا جيت هوني باش نحكي في كلشي صار
أنا:نظن مش لازم نحلو الموضوع هذا مرة أخرى
أسيل:أسمعني أمانك...أنا قبل سنين من توا كانت عندي عيلة كاملة...أما بين ليلة و نهار تقلب كلشي توفى رائد و مرتو...توفى بابا زادة...آدم قرر يعيش وحدو و بقيت أنا مع أمي و كبرت على فكرة أنو آدم هو السبب لي خلاني نخسر عيلتي...أما وقت بديت نستوعب الحكاية و نفهم اللي صار لقيت أنو إهتمامو ولى خاص بيك إنتي...و فكرة إني باش نخسرو من جديد إستقرت في راسي...هذا اللي خلاني نكرهك كيما مانيش باش ننكر إعجابي بإيهاب في الفترة هذيكا...رغم أنو تراجع عاللي يعمل فيه و محبش يضرك
رجعت شعرها لتالي...عاودت غزرتلي و كملت تحكي
أسيل:كلام أمي و غيرتي منك...كانو السبب الرئيسي لي خلاني نضرك...خاطرني حبيت آدم ليا وحدي كيما متقبلتش فكرة أنو الكل يجري وراك باش يرضيك
أنا:أسيل...أنا مكنتش باش نحرمك من خوك و لا حتى ندخل بيناتكم...أما إنتي مخليتش فرصة لينا باش نتعرفو على بعضنا...تتوقع أنو آدم مكانش بحاجتك ؟ بالعكس هو ولا مرة تخلى عليك...إنتي متتوقعش فرحتو بيك أول ما قررت تسكن معانا..هذا كان واضح في تصرفاتو و في كلامو زادة...هو خاف يخسرك لدرجة أنو وقف في صفك رغم أنك إنتي لي الغالطة
مدت يدها شوية...مسحت دموعها و غزرتلي تحكي
أسيل:أنا فهمت هذا الكل مأخر برشا...و للأسف نعرف لي هو ماهوش باش يسامحني...خاطرني خيبت ظنو فيا...أكا علاش نحب تسامحني إنتي ملاك على كلشي خايب عملتو معاك و يا ريت تخبرو إني نادمة على كلشي زادة
أنا:بالنسبة ليا سامحتك...خاطر لي صار كان درس لعلاقتنا أنا و آدم...غير هكا أحكي معاه...نظن حتى هو مستعد باش يسامحك
أسيل:لااا من غير ما يغزر لوجهي مرة أخرى و يكرهني أكثر...أنا باش نسافر مع أمي الأسبوع الجاي غير هكا يا ريت تخبرو أنو يوافق يشوف المحامي متاعي بخصوص أمور تخص الخدمة في السوسيتي
أنا:وين باش تسافر ؟
أسيل:فرنسا
هزت روحها وقفت...وقفت في جرتها و جيت باش نحكي...قص علينا صوت الباب لي تحل...دورت راسي شوية جات عيني في عينو...غزرلها مستغرب...حط القضية لي في يدو و قرب منا شوية...من غير ما ينطق بحرف واحد..كأنو قاعد يستوعب في وجودها هوني بعد اللي صار و بعد الشهور لي تعدات علينا الكل و رغم هكا نظن أحسن شي أنهم تقابلو توا...عالأقل يحلو آخر فصل من حكايتهم..في الأخير يبقاو أخوة رغم كل الخلافات لي بيناتهم.
#ملاك_آدم❤