🔸️حلقة 3
خذيت نفس و استجمعت طاقتي الكل...فكيتهم من يدها و نحيت المقلة حطيتها على جنب...غزرتلهم نظرة أخيرة وين حسيت دموعي غلبتني و نزلت على خدي تقويت على روحي و حرقتهم...حرقتهم و حرقت أحلام أخرى معاهم...للحظة حسيت روحي تهديت و منجمتش نتحمل أكثر...قرب مني أكثر...وقف قدامي بالظبط يحكي
حازم:حط في مخك انو انا لي نقرر هوني...و انو حياتك الكل بيدي...و مش كي ممديتش يدي عليك معناها قاعد نسمع في كلام أمك...لا عزيزتي...حقك اللي هي تخلص فيه يوجعك أكثر من الضرب...غير هكا حضر روحك لآخر الأسبوع...واحد من أصحابي يحب ياخوك لولدو و انا بصراحة نحب نقص عليا لقمة زايدة
غمضت عينيا بالقاوي و عاودت حليتهم من غير حتى كلمة معادش فما شي يتقال بعد كلامو و معنديش استعداد باش نغزر لوجهو زادة...عديت عينيا على آخر ورقة و هي تتحرق...و لي كانت تصويرة أمي...خذات مني برشا وقت باش نجمت نرسمها بالطريقة هاذي...بعد عليا يحكي
حازم:كي نرجع نلقى العشى حاضر
خرج من غير ما يزيد حتى كلمة...قربت منها تحكي
حفصة:هيااا قوم مسمعتش فاش كان يقول
دورت راسي قحرتلها...و قربت منها بالوقت...وقفت قدامها نحكي
انا:ماهيش باش تقوم...تحب على العشى حضرو انتي لولدك و تسمم معاه
حفصة:مزلت تحل في فمك يا فقصة...تحب نعاودلو لي تقول فيه
انا:كان تحب نعاود نطلبو أنا
حفصة:طاالعة لأمك متحشمش
انا:لا مزلت نحشم...تعرف علااش..خاطر لتوا مفضحتش بنت بنتك لي عندها علاقة مع أمير أصلان..تعرفو بالقدا الاسم هذا مش هكا
حفصة:إنتي فاش قاعدة تقول
انا:لي نقووول فيه... أنك كاان حاولت تتعرض لأمي مرة أخرى و لا تفتري عليها...انا باش نحكي كلشي لبوها و عاد بوها مش كيما بابا...اول حاجة يطلق بنتك خاطر معرفتش تربي...اما سي ولدك يتقوى على أمي خاطر بينو و بين روحو يعرف لي هي خير منو في كلشي...و خير منك انتي زادة...خاطرك وحدة ظااالمة ما تفرق حتى شي عليه والله و راااس أم لي معنديش أغلى منها...كان مسها مرة أخرى بسببك...نردلكم حياتكم جحيم...بطبيعتي ما عندي شي نخسرووو...مفهووم كلاامي
بقات تغزرلي مصدومة...ردت فلورتها لتالي و بعدت عليا نزلت على أمي عاونتها تاقف و دخلتها لبيتي...قعدتها على السرير نحكي
انا:خليك هوني تو نرجع
خليتها مع أيمن و خرجت...هزيت ألكول و قطن و كلشي نجم نعاونها بيه و رجعت عندها نداوي في جروحها...مرة أخرى لقيت دموعي نزلت عليها...عندو حق هو يوجعني أكثر بيها هي...يوجعني كي يتقوى عليها و يضربها بالطريقة هاذي...يوجعني أكثر كي يذلها قدامي و يخليني عاجزة باش نحميها...حطيت كلشي من يدي و عنقتها بكل قوتي...منعرفش علاش عملت هكا...رغم إني كنت ديما نتغشش منها...ديما على أعصابي منها خاطرها ترضخلو و ما تعمل حتى ردة فعل...أما توا وليت نلوم في روحي خاطرني حسيت اني كنت نظغط عليها انا زادة و نحملها أكثر من طاقتها بتصرفاتي...دوب خذيت نفس و انا نحكي
أنا:سااامحني أمي...سااامحني أمااانك...أنا السبب في كلشي قاااعد يصيير معاااك...مكنتش نعرف لي هو يحب يقهرني بيك أنتي...سااامحني يااا روحي...والله أنا من غيرك نموووت
زينب:ششش هدي رووحك صغرونتي...انا لبااس والله و مدام فيا نفس مستحيل نخليه يحط يدو عليك و لا يخليك تعيش لي عشتو انا معاه
انا:خلينا نهربو من هوني...نهزو أيمن معانا و نمشيو لأي بقعة...فما قانون في البلاد و باش يحمينا منو
زينب:أنا منجمش نخاطر بيكم...منعرفش الحياة خارج البقعة لي احنا مدفونين فيها كيفاش تكون...صدقني حتى أنا تعبت و نحب نتحرر منو
أنا:سمعتو شنية قال ؟ أمي انا منحبش نعرس...صدقني نموت و مناخوش واحد كيفو هو
زينب:باش نحاول نحكي معاه و نقنعو
انا:ماهوش باش يسمعك
زينب:انتي قلت لي بنت عمتك على علاقة مع أمير أصلان
انا:صحيح...علاش تسأل ؟
زينب:متأكدة من كلامك ؟
انا:متأكدة...كي كنت نهز أيمن للمدرسة سمعتهم يحكيو عليها
زينب:مدام الحكاية صحيحة...هدد بيها حفصة مرة اخرى و خليها هي تقنعو باش يتراجع على الفكرة...عالأقل توا
انا:و مبعد ؟ باش نعديو بقية حياتنا هكا ؟
زينب:منعرفش إيمان...حاول إنتي تمنع روحك المرة هاذي لين نخمو في حل نخرجو بيه من هوني
انا:تحكي بجدك ؟
زينب:مستحيل نسمحلو يقهرك أكثر من هكا...اما قبل هذا الكل لازمنا نخمو في كلشي باهي
انا:توعدني أنك باش تمشي معايا ؟ و لي معادش باش نرجعو لهوني مرة أخرى
زينب:نوعدك يا روحي...اما نحبك تتحمل شوية على الأقل لين أيمن يخرج عطلة من غير ما يضيع عامو
هزيتلها براسي باهي و عاودت عنقتها...هذا لي كنت بحاجة أني نسمعو منها...جرعة أمل تخليني نتأكد انو هذا الكل باش يوفى في نهار من النهارات...هزيت روحي شوية قعدت بجنبها و حطيت راسي على صدرها دخل أيمن يحكي
أيمن:نانا قاعدة تحضر في العشا
هزيت راسي غزرت لأمي و ضحكنا مع بعضنا...خاطرني نعرف انو نقطة ضعفها هي عمتي و بنتها و منظنش باش جيني فرصة أحسن من هاذي...باش نرتح امب من شرها مديتلو يدها تحكي
زينب:ايجا عندي أنت زادة
غزرلي بالوقت...هزيتلو براسي باهي...قرب منا بالزربة و ترمى في حضنها...كبست علينا تحكي
زينب:نتوما أحلى حاجة في حياتي
تبسمت و كبست عليها أكثر...لحظات تعداو عليا نسيت المسابقة و الرسومات متاعي لي تحرقو...نسيت ظلم بابا نسيت كلشي و انا في حضنها...خاطر هذا لي ديما بحاجتو انا منعرفش نعيش من غير أمي و مدام فيا نفس باش نعمل المستحيل أني نخرجها من وكر الوحش و نخليها تكمل بقية حياتها مرتاحة و بعيد على الظلم هذا الكل.
#إيمان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
