🔸️حلقة 60
🔸️ملاك_تحكي:
هزيت راسي شوية من صدرو...و عديت عينيا على وجهو...كبس على أجنابي بيديه زوز و تبسم بالوقت يحكي
آدم:ملاااكي
أنا:معناها توا وليت متاعي رسميا سي آدم
آدم:والله أنا أعلنت ملكيتي ليك من اللحظة لي ريتك فيها
أنا:بالله...أصلا أنا توقعت باش تحبسني بعد الضربة لي كليتها على راسك مش تعرس بيا
آدم:ظاهر الضربة أثرت فيا بطريقة سلبية
أنا:بالله آدددم
آدم:روح آدم...ياخي باش تعاركني حتى في ليلة عرسنا
أنا:عندك حق ميجيش نتعاركو في ليلة هكا
آدم:عيش صغرونتي لي تفهم
تبسمت و مديت يدي شوية...حطيتها على خدو نحكي
أنا:مرسي برشا آدم...بالرسمي متوقعتش باش يكون عرسنا هكا...و حتى أختك هوني زادة
آدم:ملاكي..أنا وعدتك باش نقدملك كلشي كنت تحلم بيه و هذا اللي باش نعملو ديما يا روحي
عديت عينيا على وجهو و نزلت بيدي لكتفو...كبست عليه و عنقتو بالوقت نحكي
أنا:يكفي أنك تكون معايا ديما...خاطرك أحلى حاجة صارت في حياتي الكل
كبس على ظهري و نزل عليا شوية...باسني من خدي يحكي
آدم:مستحيل نتخلى عليك ملاكي...مهما كان اللي باش يصير
أنا:و لا أنا باش نتخلى عليك زادة
جبدت روحي شوية مع الموسيقى لي وفات...حاوط وجهي بيديه زوز و باسني من جبيني...يحكي
آدم:هيا إيجا عزيزتي
كبست على يدو و رجعت معاه...قرب من أسيل يحكي
آدم:صغرونتي...كيفاش تحس في روحك ؟
أسيل:والله أنا فرحانة عاللخر...خاصة إني باش نتعرف على ملاك
أنا:و أنا زادة عزيزتي
أسيل:منحبش وجودي يقلقكم اليوم...مزال فما وقت و نتعرفو على بعضنا أكثر
أنا:أكيد
قرب منها شوية و باسها من جبينها...يحكي
آدم:عيش أختي
تبسمت و أنا نغزرلهم...فقت من سرحتي كي ريت إيمان و كنان قربو منا...غزرلها يحكي
كنان:أهلا بيك أسيل...فرحت بوجودك
أسيل:كنااان...ألف مبروك إن شاء الله
كنان:عيش أختي
آدم:هيا إيجا معانا صغرونتي
كنان:قبل كلشي لازمنا نمشيو لفاطمة توا
آدم:أكيد
شد إيمان من يدها و سبقنا...خلطنا عليهم بالوقت شدها من يدها و عاونها وقفت...تبسمت تحكي
فاطمة:هذا أسعد نهار في حياتي الكل...خاطرني فرحت بولادي الزوز...و تهنيت عليهم
قربت من إيمان شوية...لبستها إسوارة و مدتلي يدها قربت منها شوية...كبست على يدي و لبستني نفس الإسوارة...و غزرتلنا تحكي
فاطمة:نحب نتهنى عليكم نتوما زادة...يعني إذا صار و حد منهم غلط معاكم...يكفي تجو عندي و أنا ندبر راسي معاهم
كنان:بالله فااطمة...تحرض فيهم من توا ؟
إيمان:فكرة باهية...عالأقل فما شكون ينجم عليكم زوز
آدم:منظنش ملاكي باش تشتكي مني
أنا:متاثقش في روحك برشا سي آدم
آدم:صاار ملا ناوية تعملها
أنا:عالأغلب
غزرلي مستغرب...تبسمت و شديتو من يدو...نحكي
أنا:مرسي برشا أمي فاطمة...حبيت هديتك
إيمان:و أنا زادة حبيتها برشا
قربنا منها فرد وقت و عنقناها مع بعضنا...أصلا من غزرتها...واضح قداش فرحانة بالعرس و بكلشي قاعد يصير...عدينا بقية السهرة مع بعضنا...حتى نزار حضر زادة...أصلا كلشي مختلف على عرسي مع إيهاب الضيوف لي تحسهم الكل فرحانين بالعرس...أجواء العيلة لي كنت نفتقرها قبل...خاصة أنو حتى حد من عيلتو كان حاضر و لا حتى عرفني على حد منهم الليلة حسيت روحي أول مرة نعرس و أول مرة نكون عروسة فرحانة بحنتي و راجلي زادة...منعرفش شنية اللي جاي و لا شنوة لي ممكن يصير معانا في المستقبل..أما مستحيل نخلي شي يفسد عليا فرحتي توا...حتى ذكريات الماضي مانيش باش نخليها تاخو مساحتها أكثر من هكا...فقت من سرحتي كي كبي على يدي يحكي
آدم:لباس عزيزتي ؟ وين سرحت ؟
أنا:لباس يا روحي...جيست هاذي أول مرة نعيش فرحة كاملة هكا...أكا علاش نحب نستغل وقتي للأخير
آدم:و باش تعيش أكثر من هكا...يكفي أنك تخليني نعاونك باش تتغلب على الماضي
أنا:أكيد باش نتغلب عليه في وجودك
كبست على يدو و تبسمت...نزل راسو شوية و باسني من يدي يحكي
آدم:شقولك نمشيو توا ؟
أنا:وين ؟
آدم:لدارنا عزيزتي
أنا:توا ؟
آدم:مممم توا...عالأغلب حتى العرسان لاخرين باش يمشيو
أنا:لااا...خلينا نزيدو شوية معاهم
ضيق عينيه مستغرب...سكت شوية و ضحك يحكي
آدم:متطلعش خايفة مني ؟
أنا:لااا...علاش حتى نخاف منك
آدم:غزرتك هاذي تأكد كلامي
أنا:غزرة شنية آدم...أصلا كي أنت تحكي معايا هكا ندخل بعضي
آدم:علاش شعندي قلت ؟
أنا:قاعد توتر فيا حضرتك
جبدت يدي منو و دورت وجهي...نرد في النفس اللي حسيتو تقص عليا...باقي يضحك و شايخ على الفازة قربلي شوية يحكي في وذني
آدم:و راسك ما نقصد حتى شي من اللي فهمتو...أما نحب نقعد مع مرتي شوية...يعني نخليو بقية الليلة خاصة بينا...زيد أنا منحبكش تتوتر و لا تخاف مني ملاكي...تعرف بالقدا لي أنا مستحيل نضرك
نزلت على شفايفي شوية و تلفت عندو...نحكي
أنا:مخفتش منك...تعرف بالقدا لي أنا مستحيل نخاف منك...مش بعد ما سلمتك ثقتي كاملة...أما هكا نحس في روحي متوترة...خاطرني قادمة على مرحلة جديدة في حياتي و كهو
عاود كبس على يدي و باسني منها مرة أخرى يحكي
آدم:والله حتى أنا حاسس بنفس التوتر يا روحي أما بديت نتعود على حياتي الجديدة من توا...مدامك باش تكون موجودة فيها
تبسمت و قربت منو أكثر...دورت يديا زوز على رقبتو و حضنتو بالوقت...أصلا عندو الحق...مفماش حل آخر من غير أنو نتعودو على حياتنا مع بعضنا..خاصة أنو باش نعيشو كلشي مع بعضنا بعد توا...و لا الأشخاص و لا الماضي باش يكون عندهم دور بيناتنا خاطرني باش نحرص إني نبني عالم خاص بينا إحنا و كهو.
#آدم_ملاك❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
