🔸️حلقة 66
🔸️إيهاب_يحكي:
عديت يدي على وجهي و تنهدت بالقاوي...لتوا نحس في روحي داخل بعضي و منعرفش شنوة ازمني نعمل بالظبط...حتى الطبيبة متاعها أول ما سمعت لي هي هوني جات عندها و رغم هكا مانيش فاهم شبيها و لا باش مريضة بالظبط...حتى منعرفش قداش تعدا وقت و هي الداخل...أصلا مشيت صدقة للبيرو متاعها..معناها كان فما إحتمال تتعب أكثر و هي وحدها...منعرفش علاش اللحظات هذوما رجعو بيا لتالي...وقت كنت نوصل ملاك لنفس البيت لي هي فيها و كنت نستنى بالطريقة هاذي و بنفس التوتر و خوفي من إني نخسرها ساعات نحس لي هي بالرسمي تحررت مني...عالأقل تعيش لي تحرمت منو معايا و ساعات نحن ليها و لريحتها و لكلشي جمعني بيها...خرجت من أفكاري مع صوت الباب لي تحل قربت من الطبيبة نحكي
أنا:شحالها توا ؟
هي:لباس...ماهيش باش تفيق قبل ساعتين...أنت شكونك ولا مرة ريتك معاها قبل
أنا:ميهمش شكون أنا...أما حالتها تهمني و نحب نعرف شبيها بالظبط
هي:منعرفش إذا كانت باش توافق إني نخبر حد آخر بحالتها
أنا:نظن لازمني نعرف...خاطر الحالة هاذي قاعدة تتكرر معاها و يمكن المرة الجاية مانيش باش نلحقها
هي:باهي...سيلا تعاني من تكيسات في الرحم و حتى في المبايض زادة...من فترة طويلة و إستهزائها بالعلاج هو لي خلاها توصل للحالة هاذي
أنا:و شنية الحل توا ؟
هي:لازمها تاخو العلاج اللازم و في أقرب فرصة مش تعتمد على المسكنات و كهو...خاطر هذا ضروري و إلا
أنا:شنوة ؟
هي:و إلا باش تظطر تنحي الرحم و هكا باش تتحرم
من أنها تولي أم...إن شاء الله أنت تنجم تقنعها و يا ريت الكلام هذا يبقى بيناتنا
هزيتلها براسي باهي و عديت يدي على وجهي مصدوم من كلامها...خاصة إني متوقعتش لي هي تعاني من هذا الكل...خذيت نفس نحكي
أنا:نجم نشوفها توا ؟
هي:أكيد تفضل...و قبل ما ننسى...لازمها تاخو راحة الفترة هاذي و متخدمش زادة
أنا:باهي عيشك
وخرت خطوة لتالي...حليت الباب و دخلت عندها جبدت الكرسي و قعدت بجنبها...عديت عينيا على وجها و تبسمت...هاذي أول مرة يكون حد قريب مني لهدرجة...لدرجة إني ما نخبي عليه حتى شي...كيما ساعات ننسى لي هي طبيبة و نكتفي بصداقتي بيها فقت من سرحتي كي حركت يدها و حلت عينيها دورت وجها شوية و غزرتلي...تبسمت نحكي
أنا:الحمد على سلامتك
سيلا:إ..إيهاب
كبست على يدها و عديت عينيا على وجها...نحكي
أنا:ششش...متعبش روحك...لازمك تسترجع عافيتك في أقرب فرصة
سيلا:شنية لي صار ؟ قداش عندي هوني ؟
أنا:والله الدكتورة متاعك قالت ماكش باش تفيق قبل ساعتين...أما صار العكس...المهم توا خبرني كيفاش تحس في روحك...مزلت موجوعة ؟
سيلا:لااا...الفضل يرجع ليك..يعطيك الصحة
أنا:تنجم تشكرني مبعد..أول شي لازمك ترتاحي..ثاني
شي و الأهم هي أنك تاخو العلاج متاعك كامل
سيلا:أنا لباس...يعني ماهيش أول مرة...شوية وقت و نرتاح
أنا:سييلااا...من غير ما تحاول تخبي عليا...خاطرني عرفت كلشي من الدكتورة متاعك...و معندكش حل آخر من غير أنك تتعالج و ترتاح من المرض هذا جملة
جبدت يدها مني...حطتها على كرشها و قحرتل تحكي
سيلا:معندكش الحق تستجوب الطبيبة على مرضي
أنا:هاني عطيتو لروحي الحق...زيد مدامك تعطي لناس في الأمل باش تقاوم...إنتي باش تعمل نفس الشي سيلاا...لازمك تداوي في أقرب فرصة
سيلا:نحب نخرج من هوني و كهو
أنا:بااهي...هاني باش نكمل الإجراءات...متتحركش من بلاصتك...مش قبل ما تشوفك الدكتورة متاعك و نفهمو منها شنية لي لازمك تعملو بالظبط
سيلا:إيهااب...من غير ما تحاول تظغط عليااا
أنا:والله معندكش حل آخر...مظطرة باش تتحملني الفترة هاذي
تبسمتلي من غير حتى كلمة...طلبت الطبيبة و خليتها تعاود نفس الكلام قدامها...كملت الإجراءات و خرجتها معايا...كبست على يدها...خاطرها لتوا تمد في الخطوة بالسيف...حليتلها الباب ركبت...غزرتلي تحكي
سيلا:مفاتح الدار في البيرو
أنا:باهي...حاول ترتاح توا...هاني باش نهتم بالباقي
سيلا:عيشك إيهاب
تبسمت و خدمت الكرهبة...تعديت للبيرو متاعها جبت مفاتحها و شديت الثنية لدارها...حليت الباب و دخلتها...نغزر لدنيا لي داخلة بعضها شوية...عكس آخر مرة...نزلت على شفايفها شوية تحكي
سيلا:ملحقتش باش نرتبها
أنا:ميسالش...المهم راحتك توا...أقعد هوني تراه
كبست على يدي و قعدت...خذيت نفس و قعدت بجنبها نحكي
أنا:أغزرلي هوني سيلا...مانيش باش نظغط عليك خاطرني نعرفك تاعبة توا...أما نحبك توعدني لي إنتي باش تخمم في كلام الدكتورة متاعك و باش طبقو...نعرف رحلة العلاج صعبة شوية...أما متأكد لي إنتي قوية...زيد كان إنت إحترمت مواعيدك متظطرش لتدخل الجراحي
سيلا:هاني ناخو دوايا في وقتو
أنا:مش هذا لي قصدتو...فما تحاليل و أشعة لازمك تعملهم...متعاقبش روحك بمرضك
هزت عينيها في وجهي و غزرتلي مستغربة...خذيت نفس و كملت نحكي
أنا:إنتي قاعدة تعاقب في روحك سيلا...هاذي هي الحقيقة الوحيدة...أما تأكد أنو مهما كان اللي عشتو في الماضي...ميستهلش باش تضر روحك جرايرو و لا تخسر روحك أكثر من هكا
سكت مع دموعها لي هبطو...دخلت بعضي شوية خاطرني منعرفش نتصرف في حالات هكا...قربت منها شوية و حطيت يدي على كتفها...جبدتها عندي بالوقت...حطت راسها على صدري...عديت يدي على شعرها نحكي
أنا:ماكش وحدك...أنا باش نكون معاك في كل خطوة بعد توا
غمضت عينيا و خذيت نفس طويل...منعرفش إذا اللي نعمل فيه صحيح و لا غالط...أما بالنسبة لي متأكد منو إني مستحيل نخليها وحدها مهما صار.
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
