🔸️حلقة 73
🔸️إيهاب_يحكي:
تكيت على الكرهبة نستنى فيها...غزرت لساعة و عاودت هزيت راسي...منعرفش قداش تعدا وقت بالظبط قبل ما تخرج عندي...عديت عينيا عليها من غير حتى حركة...سيلا من النوع لي متعرفش شنوة يدور في راسها و لا حتى طلعاتها اللي خارج المألوف كيما توا...قربت مني شوية و تبسمت تحكي
سيلا:شقولك ؟
ضحكت و نزلت راسي شوية...نغزر للبسكات متاعها نحكي
أنا:محلااك
سيلا:تعدي روحها...خاطرني عديت نهاري الكل بالكعب...زيد مدام العشا في ريستو فخم...حضرت روحي من فوق
أنا:تفضل مدموزال سيلا...ساعة محلاك في كل حالاتك
سيلا:عيشك سي إيهاب...لطف منك
تبسمتلي و ركبت...سكرت الباب و خلطت عليها شديت ثنية الريستو...محسيتش بالوقت كيفاش تعدا خاطرني غطست في الحديث معاها...الموضوع الوحيد لي محبيتش نحكي فيه هو موضوع أمي خاطرني لتوا منعرفش اذا اللي عملتو...كانت خطوة صحيحة و لا غالطة...مواجهة الماضي مش بالسهولة لي توقعتها خاصة بعد اللي تعديت بيه الكل...حتى لتوا نعتبرها السبب المباشر لي خلاني نعيش غير متوازن و فاقد الثقة في الناس لي دايرة بيا و أول ضحية كانت ملاك...اللي تحملت برشا جرايري و لس كانت مجرد طفلة صغيرة بالنسبة لي عاشتو الكل معايا و رغم إني لتوا مش متقبل فكرة أنها مولاتش مرتي و خذات راجل آخر...أما نرجع و نلوم روحي خاطرني السبب في خسارتها و حياتها من غيري أحسن...يمكن يعوضها على اللي تعدات بيه الكل و يخليها تنسى كمية الظلم و القهر لي شافتها مني في السنين لي فاتت الكل...شديت الفران و تلفت عندها بالرسمي نعتبرها منقذتي من الماضي و من الإنسان المريض لي كان ساكن داخلي...منعرفش إذا وجودها في حياتي كان صدفة و لا القدر كتب أنو يلاقينا بالطريقة هاذي...تبسمت نحكي
أنا:وصلنا
سيلا:باهي برشا...هيا فيسع خاطرني جعت بالرسمي
تبسمت و هزيتلها براسي باهي...خذيت نفس و نزلت وراها...دخلنا مع بعض و خذيت الطاولة لي حجزتها بكري...جبدتلها الكرسي و قعدت مقابلها...ضحكت تحكي
سيلا:منحبكش تفهمني بالغالط أما والله حاسة روحي غريبة شوية
أنا:و السبب ؟
سيلا:خاطر ليا سنين مخرجتش في موعد...يعني بصراحة مانيش عارفة شنوة نعمل
أنا:بسيطة...تنجم تعتبر الخرجة هاذي في إطار خدمتك و أنو الشخص لي مقابلك لازمو موعد كيما هذا باش يرتاح...نظن هكا ترجع لطبيعتك
ضحكت و رجعت شعرها لتالي شوية...تحكي
سيلا:والله كان نمارس خدمتي توا...تفد من أسئلتي و تهرب من هوني في أول فرصة...أكا علاش خلينا نطلبو توا...الماكلة تخلي التوتر لي عندي ينقص شوية
أنا:سيلاا...حاول تاخو نفس عزيزتي...مترصالناش نكملو ليلتنا في الكلينيك
سيلا:إيهاااب يااخي قااعد تفرك فيهم عليا تواا
ضحكت و هزيت يدي شوية شاورت لسرفور غمزتها نحكي
أنا:تفضل...شنوة تحب تاكل ؟
سيلا:لحظة
كبست على ال menu في يدها و طلبت منو اللي تستحقو بعد دقايق...تلفت عندي...تبسمت نحكي
أنا:ناخو نفس الشي...أما قبل جيب حاجة للمدام تشربها
قحرتلي و عدات عينيها على وجهي و غمضتهم في لحظة موجوعة...غزرتلها نحكي
أنا:لبااس مااهو ؟
سيلا:لباس مجرد غصرة كهو
أنا:شربت دواك ؟
سيلا:أكيد شربتو
أنا:في الموعد المحدد ؟
سيلا:والله شربتو...وعدتك لي أنا باش ناخو العلاج اللازم و تأكد أنا مستحيل نكذب عليك في حاجة إيهاب
أنا:بااهي...الأهم توا أنك تركز على علاجك و عليا زادة
سيلا:علاش أنت مريض زادة ؟
أنا:ملا علاش إخترتك باش تكون طبيبتي ؟ خاطرني نرتاح بيك و بوجودك معايا
سيلا:و أنا نفس الشي إيهاب...أنت بالرسمي خليتني نكتشف روحي من أول و جديد...يعني نعرف أنو ظروفنا كانت ضدنا طول الفترة لي فاتت أما
أنا:من غير ما نحطو إحتمالات لعلاقتنا سيلا...يكفي أنو نعطيو فرصة لبعضنا و كهو
سيلا:نعررف...لي قصدتو إيهاب إني نحب نكون واضحة معاك...خاطر إذا أنا عطيت الفرصة هاذي لينا معناها بالرسمي تعديت الماضي متاعي و أنت لازمك تعمل نفس الشي...منحبش نتعلق بيك أكثر و قلبك عند مراا أخرى
أنا:و أنا وعدتك باش نتبدل على خاطرك و مدامني معاك توا معناها بالرسمي نحب على فرصة جديدة معاك إنتي و كهو...سيلا أنا إقتنعت أنو معادش عندي فرصة مع ملاك و لي مستحيل ترجعلي من اللحظة لي عرست فيها...أما ثنيتي مزالت طويلة خاطر منحبش نكون معاك الراجل لي كان قبل و هذا ميصيرش من غير مساعدتك ليا...نحب على فرصة
جديدة معاك إنتي و كهو...خاطر صدقني مشاعري ناحيتك حقيقية و إلا مانيش معاك توا
مدت يدها شوية و كبست على يدي تحكي
سيلا:نعرف الصراع لي أنت تعيش فيه إيهاب خاطرني تعديت بنفس الشي...الفرق الوحيد إني استغرقت سنوات طويلة باش إقتنعت أنو إذا مسكرتش باب الماضي...مستحيل نعرف طعم الحياة يكفي أنك تكون صريح معايا و صدقني باش نعمل نفس الشي...حتى فما حاجة مهمة لازمك تعرفها قبل كلشي
أنا:كيما شنوة ؟
كبست على يدي أكثر و هزت عينيها في وجهي باش تحكي...أما سكتت في لحظة...ضيقت عينيا كي حسيت بشكون واقف عند راسنا...هزيت راسي شوية وين جات عيني في عينها...غزرتلها مستغرب خاطرها آخر وحدة توقعت إني نشوفها توا...تبسمتلي تحكي
أسيل:صدفة حلوة إيهاب...ساعة كنت باش نطلبك مبعد أما باهي برشا كي تلاقينا
أنا:للأسف أنا مشغول توا..نحكيو مبعد
قربت مني و نزلت عندي شوية..استغربت أكثر في جرأتها تبسمت تحكي
أسيل:متأكد ؟ ساعة الموضوع يخص طليقتك ملااك مممم و الأهم من هذا الكل...أنها على قريب باش تولي حرة زادة...هزيت عينيا في وجها و غزرتلها مصدوم..من جرأتها و كلامها و دورت راسي لسيلا لي جبدت يدها من يدي بالوقت...خذيت نفس و عاودت غزرتلها..مدامها تحكي بالطريقة هاذي معناها وصلت و ضرتها خاطرني نعرف ملاك أكثر من أي حد...الإحتمالات الكل جاو لمخي...أولها أنو إستغلها مبعد رماها...مجرد فكرة خلاتني نقوم من بلاصتي بالوقت...و غزرتلها نحكي
أنا:أغزرلي هوني...كان نعرف أنك ضريتها و لا صار عليها شي جرايرك...صدقني ماكش باش تفلت مني
أسيل:هدي روحك...ساعة هذا كان إتفاقنا من الأول أنك تنتقم منها...مش هكا ؟
غزرت لسيلا و تبسمتلها...عديت يدي على وجهي نحكي
أنا:شنية عملتلها ؟
أسيل:حتى شي...شعندي نعمللها...أما صراحة العقد متاعها الكل منك...خرجتهم في خويا و هو عرف يحطها عند حدها...نقصد
قربتلي أكثر...عدات عينيها على وجهي و كملت تحكي
أسيل:نقصد أنو عاملها كيما تستحق...يعني بنفس الطريقة لي كنت تربيها بيها
جبدت روحها لتالي...تبسمت لسيلا لي باقي في بلاصتها من غير حتى حركة و تبسمت تحكي
أسيل:أنا باش نخليكم توا...صحة و بالشفا و معرفة طيبة
غمزتني و عطاتني بظهرها...بقيت نغزرلها مصدوم قد ما حبيت نخلط عليها و نفهم شنوة اللي عملاتو بالظبط...قد ما لقيت روحي عاجز باش نقدم خطوة من شيرة خفت على ملاك لي لقات روحها تعاني في نفس الشي جرايري...خاطرني أنا حليت الثنية لوحدة كيفها و خليتها تقرب منها و من شيرة سيلا لي معايا خذيت نفس و تلفت عندها...مستغرب أكثر من سكوتها...عديت يدي على وجهي و عاودت قعدت نحكي
أنا:أنا باش نفهمك في كلشي صار سيلا
سيلا:شكون هاذي ؟
أنا:أسيل الطهراوي
سيلا:معناها أخت آدم الطهراوي...راجل ملاك
هزيتلها براسي إيه...ضحكت و تكات لتالي...تحكي
سيلا:ياخي متفاهم معاها باش دمر حياة طليقتك
أنا:مش لهدرجة...ساعة متنجمش تحكم عليا قبل ما تسمعني
سيلا:أما سبقت و حكمت إيهاب...أنت حتى في الجلسات متاعك...مجبدتش الحكاية هاذي بالغالط
أنا:سييلااا أسمعني
سيلا:بعد شنوة ؟ أصلا أنا سمعت كلشي لازمني نعرفو و حتى فهمت برشا حاجات أولهم قربكم من بعض و لا مكانتش تجرأت و قربت منك هكاا
أنا:سيلااا فاش تخرف ياخي...قرب شنية و جرأة شنية...أنا دوب قابلتها مرتين و لا ثلاثة...وين نعرف لي هي باش تقرب مني بالطريقة هاذي
سيلا:مش لاازم توضحلي...نظن كان تمشي تصلح لي عملتوه أنت و هي مع الطفلة...و متخليهاش تعاني جرايرك أكثر من هكا
أنا:سيلا أنا ما عملت حتى شي...صحيح أنا قابلت أسيل و الفكرة كانت في راسي...أما ما عملت شي صدقني
سيلا:أنا صدقتك و توقعت لأنت باش تتغير بالحق
عديت عينيا على ملامح الخيبة لي ظهرت على وجها و لي متوقعتش إني نشوفها في النهار من النهارات خاطرني بالرسمي حبيت نتبدل على خاطرها و حكاية أسيل مشات من مخي جملة...حتى إني مكنتش نرد على إتصالاتها في الفترة لي فاتت و لا حتى قابلتها...خاطرني إستوعبت إني ضريت ملاك أكثر من أي حد و معادش نحبها تعاني جرايري أكثر من هكا...غزرت لسرفور لي حط الصحون على الطاولة و جيت لاش نكمل كلامي...قصت عليا كي غزرتلي و عدات عينيها على وجهي تحكي
سيلا:صحة و بالشفا
هزت روحها وقفت قبل ما نلحق نجاوبها...استلمت كبوطها و خرجت...حطيت الفلوس على الطاولة و خلطت عليها استلمت كبوطي بالزربة و طلبت منهم كرهبتي...و خرجت وراها...قربت منها نحكي
أنا:سيلا فااش تعمل بربي ؟
سيلا:من غير ما نحكيو في الموضوع هذا أكثر من هكا
أنا:متنجمش تمشي من غير ما تسمعني سيلا
سيلا:و أنا قتلك مانيش باش نسمعك و ميهمنيش نعرف شنوة صار بالظبط زادة
أنا:باهي كيما تحب...أما أنسى تمشي وحدك في الوقت هذا
سيلا:مانيش صغيرة إيهاب و نعرف ندبر أموري وحدي
أنا:الصبر يا ربي...ياخي ريت الوقت ؟
سيلا:إي ريتووو و نعرف فاااش قاعدة نعمل زادة إرتحت توااا
أنا:سيلااا نعررف روحي غلطت...أما عالأقل خليني نوضح موقفي و شنوة صار بالظبط
قحرتلي و نزلت الدروج...وقفت أول طاكسي متعدية قربت منها بالزربة و جبدتها من يدي...دورتها عندي نحكي
أنا:أنا باش نوصلك
سيلا:منحبش...حتى أحسن حاجة مزلنا في بداية الثنية و معطيتكش فرصة باش نندم عليها مبعد
خذيت نفس و شاورت لطاكسي باش يمشي قحرتلي و ضربتني بيدها تحكي
سيلا:سييبني توااا
أنا:باااهي...مانيش باش نحكي معاك....أما إيجا خليني نوصلك
سيلا:قتلك منحبش...ياخي بالسيف ؟
أنا:منجمش نخليك هوني وحدك...خاطرك جيت معايا و صدقني مانيش باش نحل الموضوع معاك
دورت وجها بالوقت...خذيت نفس و إستلمت مفتاح كرهبتي لي وصلت...شاورتلها نحكي
أنا:تفضل توا
هزت عينيها في وجهي و بعدت عليا...حلت الباب و ركبت...خلطت عليها من غير حتى كلمة...خاطرني نعرف أنها مستحيل تسمعني توا و لا حتى تحاول تفهم لي صار...خاصة بعد الموقف لي تحطت فيه جرايري...فرد وقت منجمتش نحي ملاك من مخي خاطرني بعد اللي ريتو قبيل...نتوقع اي حاجة منها عديت الثنية في صراع مع روحي...خاطر من ناحية منحبش نتراجع على الثنية لي شديتها و من ناحية أخرى منجمش نقدم خطوة أخرى قبل ما نصلح لي صار...مستحيل نخليها تضرها أكثر من هكا...خاطر مهما كان اللي باش تعيشو ملاك بعد طلاقنا محسوب عليا مدامني أنا لي وصلتها هوني...شديت الفران اول ما وصلت...نزلت و ضربت الباب بالقاوي...مخلاتنيش حتى نحكي معاها...تكيت لتالي و تنهدت بالقاوي متوقعتش هذا الكل يصير و لا حتى جا إحتمال لبالي أنو علاقتنا باش توفى قبل ما تبدا..أما الأهم توا إني نصلح كلشي و نفهم شنية وراها و وين تحب توصل بالظبط من هذا الكل.
VOUS LISEZ
صرخة صمت 🌬
Lãng mạn🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
