🔸️حلقة 37
بقيت نغزرلو من غير حتى كلمة...خاطرني حسيتو مكرز و مش قد بعضو...خذيت نفس نحكي
أنا:شبيك ؟
هز حاجبو مستغرب...أصلا هذا السؤال الوحيد لي جا لمخي...تنهدت بالقاوي نهدي في روحي و هزيتلو براسي باهي نحكي
أنا:تفضل
شاورلي بيدو باش نسبقو...قحرتلو و عطيتو بظهري خلط عليا لصالة و تبسم يحكي
كنان:أهلا بيك سي نزار
نزار:عيشك سي كنان
كنان:شنية سبب الزيارة المفاجأة ؟
نزار:فما شي مهم باش نحكي فيه مع مدام زينب و الأحسن انك تكون موجود معانا أنت زادة
كنان:معناها جيت في وقتي
قعد بالوقت و تكى لتالي...خذيت نفس نهدي في روحي و قربت من أمي...قعدت بجنبها و كبست على يدها نحكي
أنا:أسمعو لتالي و تأكد أنو كلشي باش يكون لباس...نوعدك
لي مانيش باش نخلي حد منهم يضرك مرة أخرى يا روحي
زينب:متخافش عليا يا روحي
تبسمت و هزيتلها براسي باهي...و غزرت لنزار لي عدا يدو على وجهو يحكي
نزار:مدام زينب..إنتي باش تقدم إفادتك بخصوص الحادث
زينب:باهي...باش نقول على كلشي صااار...المهم عندي أنو ميقربش من صغاري مرة أخرى
نزار:الإفادة حاضرة يعني إنتي جيست باش تحضر و توقع عليها
زينب:يعني ؟
نزار:يعني مفما حتى دليل يثبت أنو إنتي لي طعنتو
زينب:باهي...و أنا زادة نحب نشتكي بيه
غزرتلها مستغربة...كبست على يدي و هزت عينيها في وجهو...تحكي
زينب:يعني منحبش نطلق منو...من غير ما يتحاسب عاللي عملو فيا الكل
كنان:أول شي لازمنا نتأكدو لي هو باش يعيش و الأهم أنك تبقى خارج دائرة الإتهام...خاطر حتى كان اللي صار دفاع عن النفس...مفما حتى شاهد معاك
زينب:باهي...يكفي أنو باش ياخو حسابو الكل
نزار:معناها تعدا عندي للمركز غدوة
تبسمت و هزتلو براسها باهي...دخلت ملاك لي حطت القهوة قدامهم...نوقز تليفونو بالوقت...علق عليه و هز الفنجان في يدو...يغزر لنزار شوية و يطلع فيا شوية...وين حسيت الجو توتر برشا...فرد وقت تليفونو باقي ينوقز قحرتلو و دورت راسي غزرت لنزار لي حط الفنجان و هز روحو وقف يحكي
نزار:أنا لازمني نمشي توا
هزيت روحي وقفت في جرتو...و غزرتلو نحكي
أنا:نجم نجي مع أمي غدوة ؟
نزار:أكيد إيمان
كنان:حتى أنا لازمني نمشي توا
دورت راسي غزرتلو...معناها خلط لهوني جيست باش ينصب العسة على نزار...خليتو و خلطت عليه لبرا...نحكي
أنا:نزاار
تلفت عندي بالوقت...قربت منو شوية و خذيت نفس نحكي
أنا:مرسي برشااا...عيشك على كلشي بالحق مانيش باش ننسى وقفتك معايا
نزار:أنا معاك ديما إيمان...مدام صاحب الحق موجود ماهوش باش يضيع الحق
تبسمت و هزيتلو براسي باهي...تبسم و حل الباب يحكي
نزار:رد بالك على روحك
أنا:عيشك
أول ما ركب و مشى...تلفت باش نرجع لدار...ضربت فيه بالوقت...وخرت خطوة لتالي و هزيت راسي غزرتلو غمزني يحكي
كنان:شنية حكايتو هذا ؟
أنا:كلشي صار قدامك
كنان:إيماان...إنتي تعرف بالقدا فاش نقصد
أنا:لا منعرفش
كنان:والله إهتمامو بيك واضح...و هاك إنتي تعطيه في الفرصة باش يهتم أكثر
أنا:كنااان...نزار يعمل في الواجب متااعو و كهو...و أنا مانيش بحاجة شكون يهتم بيا
كنان:و شنية تفسر تصرفاتك معاه ؟
أنا:مفهمتكش ؟
كنان:هااك تتصرف معاه على راحتك...و مش مقلقك وجودو معاك جملة
أنا:كنااان وين تحب توصل ياااخي ؟
كنان:نحبك إنتي تفهمني اللي قاعد يصير إيمان...خااطر من قبيل و أنا على أعصابي من اللي قاعد يصير
أنا:شنوة لي قاعد يصير ؟ هوكا حكى كلشي قدامك...شنية مزلت تحب تسمع مني ؟
كنان:نحبك تبعد عليه و معادش تخليه يقرب منك
أنا:والله الأمور متمشيش على كيفك سي كنان...خاطر أنت و نزار نفس الشي بالنسبة ليا...و علاقتي معاكم متتعداش حدود القضية...يعني من غير ما تدخل في حياتي أكثر من هكا و حتى نزار مانيش باش نغزرلو بالطريقة لي في بالك تهنى
كنان:باااهي...مدام قلت لي عندك...معناها كلامي باش يولي زاايد بعد توااا...و قضيتك باش تربحها مش اليوم غدوة...مدامني وعدتك باش نبقى معاك لآخر لحظة و شي ماهو باش يتبدل...رد بالك على روحك
كمل كلامو و مشى...تلفت نغزرلو...ركب و طار بالكرهبة من غير ما يدخل يطمن على خالتي فاطمة...بقيت واقفة في بلاصتي مستغربة من الكلام لي قلتو...خاطر مش هذا لي حبيت نحكي فيه معاه...الحقيقة هي أنو مشاعري بدات تتحرك معاه...و خلاتني نميل ليه...خوفي من الواقع و الظروف لي تجم تكون حاجز بيناتنا تخليني نتصرف معاه عكس اللي نحب عليه...خذيت نفس و رجعت لتالي دخلت لدار و سكرت الباب ورايا غزرت لملاك لي واقفة مع أمي و كبست على يدي نحكي
أنا:أنا باش ندخل نرتاح شوية
حليت الباب و دخلت للبيت من غير ما نستنى كلمة منهم قعدت على طرف السرير نحكي
أنا:هذا اللي كان لازم يصير يا إيماان...لازمو يبعد عليك و لا باش تضيع أكثر
كبست على راسي بيديا زوز و غمضت عينيا...نحب ننسى كلامو لي قالو بكري و غزرتو متاع قبيل...نحب نحي من بالي فكرة أنو يمكن يجي نهار و يتصلح كلشي و يكون في حياتي...أصلا كيفاش يتوقع لي لي فما إحتمال إني نكون مع نزار و نرفضو هو...كبست على تليفوني و حليتو نغزر لرقم متاعو...و عاودت حطيتو نحكي
أنا:فاااش قاعدة نعمل ياااخي ؟
نفخت بالقاوي و تكيت لتالي...ما نحب نعمل حتى شي يمكن إني نندم عليه مبعد...كلشي لقيت روحي نخمم فيه هو كلام ملاك...إذا صار و تخلصت من لعنة أمير و عطيت لروحي فرصة مع كنان...شنية لي باش يصير ؟
#إيمان_كنان❤
VOUS LISEZ
صرخة صمت 🌬
Любовные романы🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
