صرخة صمت 🌬

الحلقة الثالثة و التسعون

🔸️الحلقة 93
🔸️كنان_يحكي:
حليت الباب بالسياسة و دخلت...تبسمت كي لقيتها مزالت راقدة...حطيت الدوسي من يدي و قربت من سريرها...طليت عليها...لقيتها تحرك في يديها و ساقيها و تغزر لسقف...نزلت عليها شوية و هزيتها في حملتي شديتها بالطريقة لي قاتلي عليها زينب و عديت عينيا على وجها نحكي
أنا:ملا بنتي فاقت بكري...ياخي مترقدش إنتي ؟
قربتها من عندي أكثر و خذيت نفس طويل من ريحتها...وين لقيت روحي نسترجع في وجيعة سنين أصلا ولى مرة توقعت إني باش نعيش اللحظة هاذي و لا حتى باش يجي نهار و نهز قطعة مني و من روحي...دوب بستها و بعدتها عليا شوية...نحكي
أنا:محلااك يا روحي
حركة يديها شوية و غمضت عينيها...دورت راسي شوية نغزر لإيمان لي بدات تفيق...و غزرتلنا بالوقت تحكي
إيمان:كناني جيت
أنا:جيت صغرونتي
إيمان:ياخي فاقت مرة أخرى ؟
أنا:نظن باش تعاود ترقد مدامها سكرت عينيها
إيمان:أعطيهالي
رجعتها في وسط سريرها...هزيت الدوسي في يدي و قعدت بجنبها...نحكي
أنا:خليها توا...أول شي أنا توحشت مرتي...و نحب نرتاح شوية في حضنك و ثاني شي فما حاجة مهمة نحبك توقع عليها
إيمان:تخص جنان ؟
أنا:تنجم تشوف وحدك
شدت الدوسي من يدي و حلاتو بالوقت...ضيقت عينيها تحكي
إيمان:مفهمتش كنان
أنا:شنية لي مفهمتوش عزيزتي ؟
إيمان:لي موجود هوني
أنا:والله هاذي أقل هدية نجم نعطيهالك توا
إيمان:كنااان أنت هوني شريت ورشة كاملة...ياخي هاذي أقل هدية ؟
أنا:منعرفش...ساعة حبيت موقعها خاطرها قريبة لسوسيتي...غير هكا نجم نعاونك في الأمور الإدارية في حالة حبيت أنك تخدم فيها
إيمان:أ..أناا...صراحة كناان...أنا بالرسمي معرفتش شنية نقول
أنا:يكفي أنك تعنقني عزيزتي
ضحكت و قربت مني شوية...دورت يديها زوز على رقبتي و كبست عليا بالوقت..عديت يدي على شعرها و خذيت نفس من ريحتها...أصلا معادش نجم نعيش من غيرها...حتى الدار حسيتها غريبة من غيرها و معادش نجم نبقى فيها زادة...جبدت روحها من عندي شوية تحكي
إيمان:كناان...أما انا لتوا مزلت نقرا...نقصد مزال فما برشا حاجات لازمني نتعلمها قبل ما تكون عندي ورشة هكا...يعني أنا نقصد
أنا:ششش..يزي كهو
حاوطت وجها بيديا زوز و سكتها...خاطرني نعرف أنها دخلت بعضها...تبسمت و كملت نحكي
أنا:كمل تعليمك و أعمل على الورشة متاعك زادة
إيمان:أما توا مانيش وحدي...لازمني نهتم ببنتي أكثر كنان
أنا:متخافش عليها...زيد أنا مستحيل نخليك وحدك يا روحي...حاول تاخو نفس توا و ما تخمم في حتى شي آخر
هزتلي براسها إيه...تنهدت براحة كي ريت ضحكتها و عاودت عنقتها...أصلا بعد موت حازم نفسيتها تعبت و ولادتها لي جات أبكر شوية على الموعد...غرست يدي في شعرها نحكي
أنا:ياخي قاعدة تبكي توا ؟
إيمان:أنا نحبك برشااا كناان...صدقني أنا مستحيل نجم نعيش من غيرك جملة
أنا:و أنا نموت عليك يا روحي
بستها من خدها و جبدت روحي منها مع صوت جنان لي بدات تبكي...أصلا نومها متقطع...غزرتلها نحكي
أنا:ياخي لازمها ترضع مرة أخرى ؟
إيمان:نظن هكا...خاطر الطبيبة قالت أنو لازمني نرضعها كل 45 دقيقة
هزيتلها براسي باهي و هزيت روحي وقفت...جبدتها من سريرها و تبسمت نحكي
أنا:صحة النوم يا عمري
إيمان:واضح لي بلاصتي ولات مهددة من توا
أنا:بلاصتك ما يفكها حد...تهنى
تبسمت و حطيتها بين يديها باستها و ضحكت تحكي
إيمان:كناان..أنا بالرسمي قاعدة نحس بحاجات غريبة في كل مرة نهزها في حملتي
أنا:و أنا قاعد يصير معايا نفس الشي زادة...هيا توا رضعها...باش نمشيو لدارنا خاطرني كملت الإجراءات و زينب باش تكون هوني بعد شوية
هزتلي براسها باهي و نزلت راسها تغزرلها...تبسمت و قربت منها...حليت البيجامة من ناحية صدرها و وخرت لتالي نغزرلهم...بالرسمي مزلت نحس في روحي إني قاعد نحلم...تبسمت من غير ما نحس رغم أنها لتوا موجوعة خاصة كي ترضعها...كيما قهمت من الدكتورة أنو حليبها ناقص شوية...يمكن بسبب اللي تعدات بيه آخر مرة...حضور زينب على غفلة خلاني نرتاح أكثر...يمكن خاطرها تعرف كيفاش تتعامل مع الصغرونة أحسن منا...غير هكا فاطمة باش تكون موجودة معانا طول الفترة الجاية...أصلا لتوا منجمتش ننسى فرحتها...حتى هي تعذبت معايا برشا و حياتها الكل كانت ليا أنا و كهو...مهما كان اللي باش نعملو معاها يبقى ناقص بالنسبة ليا...خاطرها كانت عيلتي في الوقت لي لقيت روحي وحدي..حتى إني تعودت على فكرة أنو عيلتي تتكون من فاطمة و آدم...لدرجة إني مكنتش نجم ننسجم مع سيلين بأي شكل رغم إني حاولت برشا بش منظلمهاش معايا أما ظلمت روحها وحدها...فرد وقت اللي عشتو مع إيمان نعتبرو معجزة بالنسبة ليا...خاطر هذا الكل كان حاجة مستحيلة لدرجة إني مكنتش نكلف نفسي و نحلم بيها...خاصة إني عديت حياتي و أنا متقبل حقيقة الخسارة لي عشتها الكل...و توا هذا الكل نعتبرو أكبر تعويض من عند ربي...فقت من سرحتي على صوت زينب لي هزتها في يدها بعد ما شبعت و هي تحكي معاها...غزرت لإيمان لي حطت ساقيها عالأرض و قربت منها شوية نحكي
أنا:رد بالك عزيزتي
إيمان:أنا لباس يا روحي...يكفي إني نخرج من هوني و كهو
أنا:خليني نعاونك باش تحضر روحك
إيمان:ياخي منسحقوش نصائح أخرى من عند الدكتورة ؟
زينب:لا عزيزتي...مدامكم زوز لباس هذا هو الأهم يكفي أنك تهتم بروحك أكثر
إيمان:باهي برشا ملا
بستها من جبينها و عاونتها تاقف بعد ما عاونتها تحضر روحها...زينب إهتمت بجنان و كلشي يخصها يمكن أكثر شي حلو وسط اللي قاعد يصير الكل أنو إحنا باش نرجعو لدارنا 3 أشخاص...بعد ما كنا زوز و كهو.
#كنان_إيمان❤