صرخة صمت 🌬

الحلقة الخامسة و الثلاثون

حلقة 35
عدا يدو على شعرو...علق عليها و بعثلها ميساج...هز راسو شوية و حط تليفون قدامي يحكي
آدم:تفضل
هزيتو في يدي من غير حتى كلمة...كتبت الرقم متاعها و بعدت عليه...دقايق و هزت عليا تحكي
إيمان:ألو
أنا:إيماان...أنا ملااك
إيمان:ملاااك وينك لتوا ؟ من بكري نطلب فيك...ساعة كنت في ثنيتي لروضة
أنا:هدي روحك عزيزتي...أنا لبااس...جيست وحلت وحلة كلبة مع الهم هذااا
إيمان:آدم ؟
أنا:علااش فما غيرو ؟
إيمان:وينكم توا ؟
أنا:منعرفش...كافي معزولة و الأسوء حد ما ينجم يخرج إلا بعد ما يتحسن الجو شوية
إيمان:باهي رد بالك على روحك و طمني عليك كل شوية عيش أختي
أنا:باهي يا روحي تهنى
علقت عليها و نزلت تليفون...نقرا في ميساجها لي لحقو <<باهي أدومتي...نستناك>> زاايد ما يفلت حتى وحدة و على أساس تخلى عليهم...رجعت عندو...لقيتو طلب قهوة أخرى...مرتاح و ما على بالو شي...حطيت تلسفون على الطاولة و شديت الكرسي متاعي...دورت راسي لشباك منحبش نغزرلو...فرد وقت حسيت بيه و هو يغزرلي...تنهد بالقاوي يحكي
آدم:ياخي باش نعديو الوقت هكا
أنا:أنت السبب في اللي إحنا فيه توا...جرايرك أنت منعرفش قداش باش نبقى هوني
آدم:خلي الحكاية تكون إيجابية...عالأقل نتعرفو على بعضنا أكثر
أنا:تهنى وليت نعرفك بالقدا و بالأمارة أنت غني عن التعريف
آدم:بالله ؟ عالأقل فما جانب آخر تنجم تتعرف عليه
أنا:الجانب الأول معروف لناس الكل و الثاني هو أنك
مديت يدي و عملتلو إشارة معناها مريض...ضحك يحكي
آدم:بيك إنتي يا روحي
أنا:ميزيتش توااا
آدم:والله أنا معنديش نية باش نتخلى عليك
أنا:و أنا معنديش نية نكون معاك
آدم:ملااك
هزيت عينيا في وجهو..مع إسمي لي خرج منو...حط يديه زوز على الطاولة و غزرلي يحكي
آدم:صدقني أنا نحكي بجدي و معنديش نية باش نلعب معاك و لا حتى إني نعدي بيك وقيت و قصدت الكلام لي قلتو...أنا حاجتي بيك و باش نحاول نتبدل على خاطرك زادة
أنا:واضح برشااا...على فكرة فما شكون يستنى فيك نظن قريت الميساج التالي لي وصلك
آدم:علاقتي مع حنين...مش كيما في بالك
أنا:متهمنيش علاقتك بيها
عدا يدو على وجهو...وين ملامحو تكبست شوية و هو يحكي
آدم:حنين أخت أماني مرت خويا
ضيقت عينيا مستغربة...خاطر ولا مرة عرف أنو عندو خوه تكى لتالي و كمل يحكي
آدم:سافرت بعد موتهم لأمريكا...نقصد بعد موت خويا و مرتو
بقيت نغزرلو مصدومة...منجمتش نسألو زادة خاطر ملامح وجهو تبدلت...كأنو سمع خبر موتهم توا...خذيت نفس نحكي
أنا:ربي يرحمهم
آدم:آمين...و بالنسبة لحنين تربات معانا...من وقت كنا صغار...خاطرها كانت تسكن في الحومة لي نتوما فيها توا
أنا:أنت كنت تسكن غادي ؟
آدم:لاا أما بابا كان صاحب بو كنان و كان يهزني أنا و رائد باش نلعبو غديكا...وقتها أماني كانت أقل منا بشوية و حنين أصغر منها...و حتى حد ما ينجم يفرق بيناتنا من غير كنان
أنا:تقصد لي نتوما توأم ؟
هزلي براسو إيه و تبسم...سكت شوية و كمل يحكي
آدم:ساعات كنت نغشش أماني و لا نحقرها و توحل فيه خاطرها متفرقش بينا...وقتها يدخل كنان و ينقذ الوضع يعني عدينا صغرنا بالطريقة هاذي و أغلب مشاكلنا كانت من تحت راس حنين
عديت عينيا على وجهو من غير حتى كلمة...منجمتش نقص كلامو و لا حتى نسألو كيفاش و علاش ماتو خاطر مدامو تكلم على الماضي متاع مع خوه...معناها عمل جهد كبير...خاطر الوجيعة كانت واضحة حتى غي صوتو...عدا يدو على وجهو و تبسم يحكي
آدم:على كل مش هذا موضوعنا توا...أنا جيست حبيت نفهمك أنو حنين أختي...ولا مرة خدمت مخي معاها و لا غزرتلها بطريقة أخرى
أنا:كان جيت تعامل الكل كيما حنين متاعك...راهي صورتك أحسن من هكا
آدم:هاني نحسن فيها عزيزتي
أنا:بالله...هاك نص السوسيتي مصوحبها
آدم:كان تقصد في رغد...حتى هي قصيتها معاها
أنا:ما قصدت حد
آدم:و أنا جاوبت حسب سؤالك
أنا:آددم...قتلك قبل أنو حتى كان الكلام لي تقول فيه صحيح...أنا منجمش نخوض تجربة أخرى...خاطرني نخااف...نخاف من علاقة فاشلة...علاقة تقيدني من الجيهات الكل...لي عديتو مع إيهاب مش قليل...راهي خمس سنين...ريت فيهم كل أنواع الضرب و التعذيب النفسي...كان يحبسني بالشهور...باش ما نجم نتواصل مع حد...كان يعتبرني آلة يمشيها كيما يحب هو...وين كان عايش حياتو عادي و مصوحب الطفلة لي تخدم معاه زادة...في رايك أنا نجم نتعدا هذا الكل و نكون معاك ؟ حتى كان وافقت...أنت باش تتعب برشا جرايري و مستحيل تنجم تكمل معايا للأخير...أكا علاش معادش تقرب مني أكثر أمااانك
نطرت الكرسي لتالي و هزيت روحي وقفت...عطيتو بظهري و بعدت عليه...منحبش ننجر ورا كلامو و نصدقو زادة...بلكشي يطلع أسوء من إيهاب و يعمل فيا نفس الشي و يعيش حياتو عادي..منحبش نخسر روحي أكثر من هكا و لا نخلي أحلامي تضيع مني مرة أخرى حليت الباب و خرجت لبرا...المطر قوات أكثر...لدرجة ما نجمت نثبت في حتى شي قدامي...كيما منجمتش نرجع لتالي و نقعد معاه أكثر من هكا...أول ما مديت الخطوة تبليت بكلي و لقيت روحي في وضع أصعب خاطر مفما حتى حد برا في الجو هذا...قلبي خض بالقاوي مع يدو لي كبست على يدي و دورني عندو هزيت راسي شوية نثبت فيه حتى هو تبلل كيفي و أكثر...بقيت نغزرلو من غير حتى كلمة و لا ردة فعل زادة...منعرفش شنية لي صار معايا...جبدني عندو أكثر...حطيت يدي على صدرو محاولة مني باش نبعد عليه أما غزرتو خلاتني عاجزة من غير حتى حركة.
#ملاك_آدم❤