🔸️حلقة 57
جبدت روحي شوية منو و كبست على يدو...تبسم يحكي
آدم:هيا إيجا
مد يدو شوية...جبدلي الكرسي قعدت و قعد بجنبي نزلت راسي شوية نغزر لطاولة...تبسمت نحكي
أنا:حبيت المفاجأة
كبس على يدي و باسني منها...هز عينيه في وجهي يحكي
آدم:و أنا حبيتك أكثر يا روحي
تبسمت و كبست على يدو أكثر...خاطرني قاعدة نحس بنفس الشي معاه...أنا زادة حبيتو و إستسلمت للقدر مرة أخرى...أما كلشي كان بإختياري أنا محسيتش بالوقت كيفاش تعدا...خاصة إني حبيت نوعية الأكل لي طلبو...خذيت نفس نحكي
أنا:آدم
آدم:تفضل مدام الطهراوي
تبسمت و هزيت عينيا في وجهو...كبست على يدو نحكي
أنا:بالرسمي مستعد باش تعرس...ساعة ولا حد ينجم يصدق الحقيقة هاذي
آدم:والله و أنا مكنتش نصدقها قبل
أنا:باهي...نجمو نخليو شوية وقت على العرس
آدم:صراحة منظنش باش نصبر عليك أكثر...بالمعنى الصحيح...أنا نحبك تبدا موجودة معايا ديما...حتى كان ماكش مستعدة باش تخلي العرس كامل..وجودك معايا هو اللي يهمني يا روحي
أنا:يعني أنت مستعد باش تستناني
آدم:لآخر لحظة يا عمري
عديت عينيا على وجهو...كبس على يدي و غمزني يحكي
آدم:إيجا معايا تراه
ضيقت عينيا مستغربة...و هزيت روحي وقفت في جرتو...نحكي
أنا:وين ؟
آدم:نحب نوريك حاجة
خلطت عليه من غير حتى كلمة و طلعت الدروج معاه دخلت بعضي كي وصلنا لبيتو...كبست على يدو أكثر خاطرني ما نحب نخمم في حتى إحتمال مدامني عطيتو الثقة متاعي كاملة...مد يدو و حل الباب وين هزيت راسي مستغربة...خاطر آخر مرة جيت هزيت غطا من بيتو...مكانتش فارغة بالطريقة هاذي..جبدت يدي منو و دخلت نحكي
أنا:شنية صار هوني ؟ إمتي فرغتها ؟
قرب مني شوية و عنقني من تالي...كبس على كرشي
و باسني من رقبتي يحكي
آدم:من يومين تقريبا
أنا:و السبب ؟
آدم:مدامها باش تكون خاصة بينا...إنتي باش تهتم بالديكور...يعني نبداو من بيتنا و مبعد نكملو الباقي
جبدت روحي منو شوية و تلفت عندو مستغربة نحكي
أنا:أما توقعت لي أنت باش تنقل للفيلا
مد يدو شوية و عدا صوابعو على خدي...يحكي
آدم:صحيح...أما نظن خطوة هكا غالطة في حقك
أنا:مفهمتكش
آدم:ملاااكي...أنا معنديش إستعداد باش نخسرك بسبب أي حد...و منهم شذى...أنا مستحيل نخلي حد ياقف في وجهك و لا يحاول يستغلك ضدي...حياتنا باش تبدا من هوني...نحبك تبدا مرتاحة في كل خطوة و تركز على الحاجات لي تحبهم و كهو
أنا:أما أختك بحاجتك زادة
آدم:بيتها موجودة هوني...تنجم تجي في الوقت لي تحب عليه
أنا:أنت باش تكون مرتاح هكا ؟
آدم:مدامني معاك أكيد باش نكون مرتاح ملاكي و صدقني إنتي أهم عندي توا من راحتي
حطيت يدي على خدو و قربتلو أكثر...دوب بستو و عنقتو...منعرفش علاش الفكرة هاذي خلاتني نحس براحة غريبة...فرد وقت حبيت فكرة البيت لي فرغها عالأقل كلشي يكون خاص بيا أنا و كهو...أصلا نحب ننسى أنو كان فما شكون في حياتو من قبل...كيما للحظة تمنيت إني عرفتو قبل إيهاب و كان هو الماضي و الحاضر متاعي...كبس عليا يحكي
آدم:شنية قررت ؟
أنا:معنديش فكرة...يعني منحبش نختار وحدي
آدم:بااهي...ملا باش نختارو مع بعضنا
نزلت على شفايفي شوية...وين عدا صوابعو عليهم يحكي
آدم:ملاااك
أنا:شنووة ؟
آدم:حتى شي...أما الفازات هذوما يستفزوني
ضحكو و جبدت روحي منو شوية...وقفت ف نص البيت نحكي
أنا:حبيت الديكور القديم زادة...أما هكا أحسن...زيد من غير ما نخليو كلشي في النوار
آدم:تدلل
أنا:و مش لازم لون الفرش يكون في النوار زادة ؟
قرب مني شوية...و حاوط وجهي بيديه زوز...كبس عليا يحكي
آدم:إنتي حرة ملاكي...تنجم تختار اللي تحب عليه الديكور و لون الفرش و كلشي يخليك تحس بالراحة باهي
عديت عينيا على وجهو و خذيت نفس...نحكي
أنا:و ماهيش باش تكون عندك مشكلة بخصوص الأكل يعني مش لازم كل يوم برنامج معين مش هكا
آدم:ملااكي...أغزرلي هوني تراه..منحبكش تخاف مني يا روحي و لا تحط في بالك لي إنتي باش تعيش نفس الشي مرة أخرى...تنجم تعمل الديكور لي تحب عليه و تختار الألوان لي تخليك مرتاحة و مش لازم طيب يكفي أنك تعمل كسكسي مرة على مرة..والله من غير فاطمة معنديش وين ناكلو
تبسمت و هزيتلو براسي باهي و دورت يديا زوز على رقبتو كبست عليه بكل قوتي...حط يديه زوز على ظهري و باسني من راسي يحكي
آدم:متفاهمين هكا
أنا:متفاهمين
جبدت روحي شوية و كبست على يدو...عديت عينيا على البيت مرة أخرى و غزرتلو نحكي
أنا:آدم مرسي برشا...على كلشي عملتو معايا لتوا يا روحي
آدم:منحبكش تشكرني ملااك...يكفي أنك تبادلني لي نحس فيه ناحيتك...نحبك تاثق فيا و تسلمني قلبك قبل كلشي...كيما نحبك تتغلب على الخوف متاعك و إنتي معايا و حتى أنا مانيش كامل ملاكي و معبي أخطاء و عيوب زادة...باش نتخلص منها و نتغلب عليها معاك يا روحي
أنا:مدامك تحب تتخلص من أخطائك...شبيها رغد مزالت تخدم عندك لتوا ؟
آدم:شقولك نحلو حكاية رغد مبعد...خاطر فما أوراق لازمها تكملهم هي قبل باش ننجم ننقلها لقسم آخر
أنا:كهو الحكاية ؟
آدم:و راس صغاري اللي جايين في الثنية...ساعة تأكد لي أنا مستحيل نخونك و لا نكذب عليك...باهيشي هكا ؟
ضحكت بالوقت..خاطرني متوقعتش يحلف بالطريقة هاذي و هزيتلو براسي باهي...نحكي
أنا:باهي برشا سي آدم
جبدني من يدي شوية...باسني من خدي و عاود عنقني كبست عليه من غير حتى كلمة...توا بالظبط ما نحب نركز على حتى شي آخر من غيرو هو و لي قاعدة نعيش فيه و الفرحة لي حسيتها بعد السنين لي فاتت الكل.
#ملاك_آدم❤
VOUS LISEZ
صرخة صمت 🌬
Lãng mạn🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
