🔸️حلقة 62
🔸️أسيل_تحكي:
هزيت راسي شوية نغزرلها...جبدت الكرسي و قعدت بجنبي...من وقت آدم منعها من سوسيتي...ولات تستلمني في كل وقت...خاصة بعد ما عرس...كل أسئلتها تتمحور على ملاك و عيلتها اللي تحب تتعرف عليهم...طلبت قهوتها من خالتي نصيرة...و غزرتلي تحكي
شذى:تعرف شكون ملاك لي ولات مرت خوك ؟
أنا:رجعنا لنفس السيرة مرة أخرى...إنتي شمدخلك فيه أمي ؟
شذى:والله مدام ماخولي طفلة مطلقة من قبل كيفاش تحبني نتقبلها...جاوبني تراه ؟
أنا:مطلقة ؟
شذى:هذا لي وصلتلو من معارفي...معرسة ليها أكثر من خمس سنين و أول ما طلقت رمات روحها على خوك و جابتو لثنية...أصلا مستغربة كيفاش رضى ياخو وحدة كيفها
أنا:أمي...إنتي شنية مقلقك في الموضووع...حتى كان مطلقة قبل...الأمر يخصو هو...ياخي باش تدخل في حياتو زادة
شذى:مش أنا لي يعفس عليا بالطريقة هاذي...مش بالساهل نعديلو لي عملو فيا الكل
أنا:شنية عمل ؟ تحب تقنعني أنو إنتي ما عندك حتى ذنب في موت رائد و أماني
شذى:ميهمنيش لي سمعتيه منو...يكفي أنك تلتهى في قرايتك و كهو...الباقي باش نتصرف فيه وحدي الأهم توا إني نعرف شكون راجلها الأول
أنا:أمااان...ياخي همك الوحيد ولى ملااك توااا
شذى:متطلعش حبيتها لالة ؟
أنا:منحبهاش...أما زادة متهمنيش علاقتها آدم...كلشي نسعى ليه هو علاقتي مع خويا و كهو...منحبش نخسرو أكثر من هكا و زيد منحبش نكون جزء من ألعابك المسخة أمي...خاطر بالرسمي معنديش إستعداد باش نخسر آدم مرة أخرى
شذى:معناها وليت أنا الغالطة توا ؟
أنا:نظن من الأحسن تاخو بالك من خطواتك أكثر خاطر كان يعرف اللي تعمل فيه و كان يعرف لي أنتي تسعى ورا مرتو المرة هاذي...صدقني باش يخرجك من الفيلا زادة والله أعلم وين باش ترصالك مبعد و صدقني مانيش باش ناقف في صفك مرة أخرى
خذيت نفس و هزيت روحي وقفت...كبست على صاكي و خرجت...خاطر معينيش باش ندخل في نقاش آخر معاها و لا حتى نتبعها في اللي تعمل فيه خاطر نعرف كان يشلق بيها ماهوش باش يعدي اللي قاعد يصير على خير...حليت الباب ركبت و شديت الثنية لأقرب كافي...نظن فطور مع البنات باش يبدل مزاجي شوية و يخرجني من الظغط متاع أمي على الأقل...غطست في أفكاري لدرجة منعرفش على روحي كيفاش وصلت لقيت لبنات لحقو قبلي..جبدت الكرسي و قعدت...غزرت لسرفور لي حط كاسة العصير قدامي يحكي
هو:تفضل مدموزال
أنا:مزال مطلبتش
هو:فطوركم الكل على حساب السيد
دورت راسي شوية نغزر لإيهاب...لي شاورلي بالكاسة متاعو و تبسم...خذيت نفس...كبست على كاسة العصير في يدي و هزيت روحي وقفت...قربت منو و حطيتها على الطاولة متاعو...جبدت الكرسي و قعدت مقابلاتو نحكي
أنا:تنجم توضحلي سر الإهتمام هذا سي إيهاب ؟ فاش قام حتى تخلص فطورنا أنت ؟ ساعة أنت فاش تعمل هوني ؟
إيهاب:مجرد صدفة عزيزتي
أنا:صدفة و لا قاعد تلحق فيا ؟
إيهاب:شقولك في الزوز مع بعضهم ؟
تبسم و تكى لتالي...بقيت نغزرلو من غير حتى كلمة خاطرني متوقعتش يجاوبني بالطريقة هاذي...غزرتلو نحكي
أنا:شنية تحب مني ؟
إيهاب:للأسف منجمتش نحيك من راسي...يعني ماهيش مسألة شنية نحب منك...خاطر يكفي إني نتعرف عليك و كهو
أنا:و شكون قلك لي أنا نحب نتعرف عليك ؟
إيهاب:منظنش باش ترفض زادة
أنا:ياسر واثق من روحك
إيهاب:أكثر من اللي تتوقع
قحرتلو و هزيت روحي وقفت...هز عينيه في وجهي و تبسم يحكي
إيهاب:صحة و عافية
كبس على الشوكة و نزل راسو لصحن...نفخت بالقاوي و رجعت لطاولة...وين فديت أكثر من أسئلتهم...لي خلاني نقوم و نخليهم حتى هوما و منعرفش علاش جاتني رغبة باش نمشيلهم بعد ما تعديت للفاك...شديت الفران على جنب و نزلت...أول ما دقيت الباب...حلتلي و إستقبلتني فرد وقت..دورت عينيا على الدار...كلشي متبدل على آخر مرة جيت فيها...تبسمت نحكي
أنا:حلو الديكور الجديد
ملاك:عيشك أسيل...شنية تحب تشرب ؟
أنا:قهوة
ملاك:باهي تو نرجعلك
تبسمت و هزيتلها براسي باهي...حطيت صاكي و قعدت...رجعت عندي بعد لحظات...حطت القهوة و قعدت تحكي
ملاك:تفضل
أنا:عيشك...وينو آدم ؟
ملاك:مزال باش يرجع...خليك تتعشى معانا
أنا:ميسالش...هاني باش نبقى معاك شوية و نمشي
تبسمت و تكات لتالي...تشرب في قهوتها...خذيت رشفة نحكي
أنا:ملااك...ياخي بالرسمي إنتي كنت معرسة من قبل ؟ نقصد قبل ما تعرس بآدم ؟
ملاك:صحيح
أنا:علاش طلقت ؟
ملاك:مكتوب عزيزتي
تبسمت و هزيتلها براسي باهي...حطيت الفنجان من يدي نحكي
أنا:نعتذر منك...مقصدتش نقلقك بسؤالي...مجرد فضول و كهو
ملاك:ميسالش أسيل...متقلقش روحك
أنا:مرسي برشا على القهوة...أما مدام آدم باش يطول مانيش باش نستناه أكثر
ملاك:باهي عزيزتي...كيما تحب
تبسمت و هزيت روحي وقفت...نزلت راسي على صوت تليفونها...غزرتلي تحكي
ملاك:هوكا يطلب...تحب تحكي معاه ؟ بلكشي تو يرجع
أنا:لا ميسالش...نطلبو أنا مبعد
ملاك:باهي
خذيت نفس و هزيت روحي خرجت..رجعت لكرهبتي و حليت الباب ركبت..معناها الحكاية طلعت صحيحة
و رغم هكا حبها و عرس بيها...مع أنو الكل يعرف أنو مش هو لي يستسلم لمرا بالسهولة هاذي و حتى إهتمامو بيها واضح برشا...لدرجة أنو نسى وجودي تقريبا و ماهوش يطلبني كيما الأول...رغم أنو عايش معاها توا...رجعت شعري لتالي و نزلت على الفيتاس أكثر...نحب نبعد من هوني و كهو...منحبش نخمم في فكرة أنو خويا باش يتخلى عليا مرة أخرى و باش يأسس حياة خاصة بيه...أنا مانيش موجودة فيها.
#أسيل_إيهاب❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
