🔸️حلقة 34
🔸️إيمان_تحكي:
حضرت روحي بالزربة...و خرجت من البيت...لقيت ملاك ديجا خرجت...أصلا من أمس مش قد بعضها بخصوص اللي صار مع آدم...بست أمي و خرجت...خاطرني لازم نتعدا لنزار بعد ما نخرج من المعهد...باش نشوف الحل بخصوص أيمن...يمكن هو ينجم يتصرف باش ندخلو لمدرسة هوني...أحسن ما يضيع أكثر من هكا...أول ما حليت الباب...جات عيني عليه...خذيت نفس و نزلت راسي..زربت في خطواتي باش منتواجهش معاه..خاصة بعد اللي صار آخر مرة...منجمش نغزر في وجهو..عالأقل لين ينسى الفازة...تجاهلت صوتو و كملت في ثنيتي لدرجة منعرفش كيفاش وصلت للمحطة...خاطر منجمش ناخو طاكسي في كل مرة...ركبت في الكار و شديت مقعد جنب الشباك...حسيت بيه كي ترمى بجنبي من ريحتو لي ضربت في خشمي...دورت راسي شوية...غزرتلو مستغربة نحكي
أنا:كنااان ؟
كنان:صباح الخير
أنا:فاش تعمل هوني ياخي ؟
كنان:فاش نعمل ؟ نظن اللي هو باش يوصل الناس الكل يعني مجاتش عليا أنا و كهو
أنا:علاش أنت مستانس بالمواصلات ؟
كنان:هاني باش نستانس من توا
قحرتلو و دورت راسي لشباك...تكى لتالي من غير حتى كلمة...ضربني شوية بيدو يحكي
كنان:السيد يستنى باش تخلص
غزرتلو بالوقت...عدا عينيه على وجهي و تبسم يحكي
كنان:معنديش الصرف
خذيت نفس و دورت راسي شوية...غزرت لروسوفور نحكي
أنا:تفضل
خلصتو و دورت وجهي مرة أخرى...نسمع فيه يحكي
كنان:ياخي باش تبقى متغشة مني هكا
أنا:مانيش متغشة
كنان:مدام هكا علاش متحبش تغزرلي ؟ بالمعنى الصحيح شنية لي يخليك تجاهلني
خذيت نفس و تلفت عندو...عديت عينيا على وجهو نحكي
أنا:مانيش متغشة منك...و إذا كان فما شي بخصوص القضية...نجي للبيرو متاعك
كنان:معناها تحط في حدود بيناتنا ؟
أنا:علاش مش هذا لي لازم يصير ؟
كنان:لا عزيزتي...مفماش داعي لهذا الكل
أنا:هاك أنت حطيتها قبل
كنان:أنا مشيت بكلامك...مدامك حسيت لي قربي منك باش يضرك
كبست على صاكي و دورت وجهي لشباك...نحكي
أنا:هاك خذيت بلاصة كل وحدك...ياخي باش نعدي الثنية متعذبة هكا
كنان:شعندي نعملك...كان سمعتني قبيل متتعذبش هكا زيد مزلت نستنى في جوابك
أنا:مانيش خايفة منك كنان...و نعرف لي أنت ماكش باش تضرني...أما الحدود لي تحكي عليها أنت...مناسبة لينا زوز و ماهيش باش تحطك في مشاكل مستقبلا
كنان:كيما شنية ؟
أنا:منعرفش
كنان:باهي...هيا قوم مدام وصلنا
هزيت روحي خلطت عليه و نزلت وراه...غزرتلو بالوقت نحكي
أنا:أستنى نص ساعة اخرى هوني بلكشي تتعدا كار و ترجعط للمحطة
كنان:مفماش داعي...هاني باش ندخل معاك
أنا:فاش قام حتى تدخل معايا لهوني ؟
كنان:وين المشكلة ؟
أنا:ممنوع
كنان:هيا إيجا...تو نشوفو شكون اللي يمنعني
جيت باش نحكي...سبقني و دخل...خلطت عليه مستغربة من اللي يعمل فيه...لقيت مدام أمل جاية ناحيتنا...تبسمت نحكي
أنا:صباح الخير
أمل:صباح الخير إيمان
غزرت لكنان مستغربة...قربت منو شوية و تبسمت نحكي
أنا:سي كنان يحب يتعرف على المعهد...يمكن يسجل فيه
أمل:كان تحب نوصي شكون يخليك تتعرف على الأقسام لي عندنا
أنا:ميسالش مدام أمل تو نعرفو أنا عليهم
كنان:عيشك مدام أمل
أمل:مرحبا بيك
تبسم و دور راسو غزرلي...قحرتلو و جبدتو من يدو نحكي
أنا:هيا خلينا نمشيو
خلط عليا يضحك...هزيت راسي و قحرتلو نحكي
أنا:ميجيش لي تعمل فيه سي كناان
كنان:حتى شي...هاني نستنى فيك باش تعرفني على المعهد
أنا:عندي درس باش نقدمو توا...معناها لازمك تستنى
كنان:ميسالش هاني نستنى
أنا:معندكش خدمة ياخي ؟
كنان:لاا
بقيت نغزرلو مستغربة...عامل مولا الدار مش هوني..طلعت
الدروج...خلط عليا...هزيت راسي نغزر لطفلة أخرى نازلة لعبت بيها ساقها في لحظة...جات في حضنو بالوقت..كبس عليها يحكي
كنان:لباس مدموزال ؟
هي:لباس عيشك...سامحني منعرفش شنية لي صار
كنان:رد بالك ملا
تبسمت و جبدت روحها منو...هزت راسها شوية تحكي
هي:باهي عيشك
بعدت عليه و كملت نزلت...تلفت وراه يغزرلها و عاود غزرلي...تبسمت نحكي
أنا:كان تحب أخلط عليها باش تطمن أكثر
كنان:لا نظن لي هي سافا توا
قحرتلو و كملت طلعت...خلط عليا للقسم...و ضيق عينيه يحكي
كنان:هاك طلعت تعلم في الكبار
أنا:ملا شنية توقعت ؟
كنان:منعرفش...زيد هذا فاش قام يتعلم في الرسم ؟
هزيت راسي شوية...نغزر لطفل...أصلا هو هوني يتعلم في الرسم بالقلم و باقي الدروس نقراوهم مع بعضنا...غزرتلو نحكي
أنا:هذا سامي...و ياخو دروس معايا زادة...ساعة أنت فاش يقلقك إذا قاعد يتعلم...من غير شي هو موهوب برشا
كنان:و إنتي شبيك مبهورة بيه ؟
أنا:أنا جيست جاوبتك...هيا إيجا خاطرني تأخرت عليهم برشا عليهم
دخل معايا...أصلا القسم عبارة على ورشة...وين عدا الوقت بين اللوحات و كل مرة نحاول نحكي فيها مع سامي يطلبني باش يسأل على حاجة...تأكدت لي يعمل فيها بلعاني...أصلا منعرفش كيفاش نجمت نكمل وسط الظغط متاعو...و أسئلتو لي محبتش توفى...قربت منو شوية نحكي
أنا:فاش تعمل ؟
كنان:حتى شي...إنتي دروس شنية لي تاخو فيها بالظبط
أنا:تنسيق الألوان...يعني ولا مرة رسمت بالالوان المائية و الترابية زادة
كنان:هوكا طلع فما أنواع زادة
أنا:مممم كيما لي شريتهم انت آخر مرة...توقعت بديت تخدم بيهم
عدا يدو على شعرو...هز عينيه في وجهي و تبسم يحكي
كنان:نستنى فيك تعلمني
أنا:حتى نتعلم أنا ساعة...هيا خلينا نمشيو توا
كنان:تفضل
أنا:باااهي
وقفت وراه بعد ما عرفتو على الأقسام لي موجودة هوني بقى واقف جنب لوحة...متاع طفل صغير بالفيلو متاعو بقى يغزرلها دقايق من غير حتى حركة...قربت منو شوية نحكي
أنا:كناان
كنان:مممم
أنا:نمشيو ؟
كنان:نحب ناخو اللوحة هاذي
أنا:منظنش باش يوافقو...زيد شوف هوني...متاع رسام معروف...نعرف اللي أنت تنجم تشريها...أما فما هوني شكون قاعد يتعلم عليها و ياخو الإلهام منها
هزلي براسو باهي...غزرت للوحة مرة أخرى...نعرف لي مهما كان سعرها غالي ينجم يشريها عليهم...أما زادة ميجيش هكا...تلفت عندي يحكي
كنان:خلينا نمشيو
أنا:باهي
خذيت نفس و خلطت عليه...أول ما وصلنا برا..ريت كرهبة أخرى و جنبها طفل...سلمو المفتاح و مشى..ضيقت عينيا نحكي
أنا:كرهبة شكون هاذي ؟
كنان:متاع السوسيتي...أكيد ماكش ناوية ترجع في الكار هيا إيجا
أنا:لا منحبش...أمشي أنت توا...أنا عندي ما نعمل
كنان:شعندك تعمل ؟
أنا:حاجة تخصني
كنان:بالله...على أساس باش تخبرني بكلشي يصي معاك
أنا:باهي...مدامك تحب تعرف...أنا باش نمشي عند نزار و مدام أنت متحبوش...قلت من غير تتعصب على الفارغ
كنان:مدامك متحبنيش نتعصب...تفضل و فهمني فاش قام باش تمشي عندو توا ؟
أنا:أصلا مزال مفهمتش شنية لي يخليك تتعصب منو
كنان:بالله توا وليت متفهمش
أنا:شبيك تغزرلي هكا...ساعة أنا تأخرت برشا و لازمني نمشي
تلفت باش نمشي...جبدني من يدي و رجعني عندو يحكي
كنان:إيجا هووني...إيجااا
أنا:سيبني...فاش تعمل ياخي ؟
كنان:هياا أركب...تو نشوفو حكاية سي نزار لي وليت متستغناش عليه
أنا:شمدخلك كناان ؟ ياخي ريتني ندخل روحي في خصوصيتك
كنان:ملا عندك فضول ناحيتي ؟
أنا:لااا...فضول شنية لي تحكي عليه ياخي
كنان:منعرفش...إنتي خبرني و أنا نجاوبك
أنا:ما نحب نعرف حتى شي
كبس على يدي و جبدني عندو أكثر...عدا عينيه على وجهي...يحكي
كنان:متأكدة ؟
هزيتلو براسي إيه...تبسم و شاورلي للكرهبة...يحكي
كنان:باهي على راحتك...تنجم ترضي فضولك في نهار آخر
أنا:مانيش باش نجي معاك كنان...قتلك عندي ما نعمل
كنان:هاني باش نجي معاك و نشوف الموضوع المهم
أنا:مش لازم
كنان:إيمااان
حليت صاكي و جبدت الورقة لي عطاهالي آخر مرة نحكي
أنا:باش نسألو على الأسماء لي وريتهوملي آخر مرة و باش نحكي معاه بخصوص أيمن زادة
فك الورقة من يدي و عدا عينيه على وجهي...يحكي
كنان:الحكاية هاذي أنا نحلها...و بخصوص أيمن تنجم تحبرني شفما...نسمع فيك
أنا:مش لازم...حكاية بسيطة...من غير ما تعب روحك
كنان:إيماان...قتلك قبل...ماكش بحاجة حد لا نزار و لا غيرو زادة...مهما كانت الحكاية أنا نعاونك باش تحلها...هيا تفضل
مد يدو حلي الباب...خذيت نفس و ركبت بجنبو...خلط عليا و خدم الكرهبة يحكي
كنان:نسمع فيك
جيت باش نحكي...قص عليا صوت تليفون...جبدو و هز عليها يحكي
كنان:حنونتي...نطلبك مبعد...عندي ما نعمل توا
حنين:باهي كناني...نستناك
علق عليها و حط تليفون من يدو...دور راسو غزرلي يحكي
كنان:هاني نسمع فيك توا
أنا:من غير ما تضيع وقتك معايا...مدام عندك شنوة تعمل
كنان:مفما حتى شي أهم منك توا
أنا:واضح
غزرلي و ضيق عينيه...منعرفش كيفاش خرجت معايا الكلمة...نزلت على شفايفي نحكي
أنا:لازمني نحكي مع نزار...بخصوص قراية أيمن
كنان:و كيفاش باش يعاونك هو ؟
أنا:منعرفش..دأما هو يعرف المدرسة لي كان يقرا فيها يمكن ينجم يحكي معاهم و ياخو أوراقو...باش نجم نقيدو هوني...خاطر لتوا نفسيتو تاعبة
كنان:إعتبرها محلولة...من غير ما يدخل سي نزار
أنا:منحبش نتعبك في الموضوع هذا زادة
كنان:فما مدرسة قريبة من الحومة...هي المناسبة ليه
سكت خاطرني عرفتو ميحبش يناقش الموضوع...خاصة مع سيرة نزار...تكيت لتالي من غير ما نزيد كلمة أخرى معاه...شد الفران على جنب...ضيقت عينيا مستغربة...جيت باش نحكي...قص عليا كي تلفت عندي يحكي
كنان:مزلت تحب تقابلو ؟
أنا:لا...فاش قام السؤال هذا توا ؟
كنان:منعرفش...خاطرك مش قد بعضك
أنا:لا لباس عليااا...نحب نمشي لدار و كهو...مدام أنت باش تحل الموضوع
دورت راسي لشباك...باش نتجنب غزرتو...تكى لتالي يحكي
كنان:أنا و حنين أصحاب مش أكثر...يعني الكلام لي قلتو قبل كنت نقصدو...أكا علاش منحبكش تفهمني بالغالط
عديت عينيا على وجهو...مستغربة من كلامو خاطرني متوقعتش لي هو باش يبررلي...فرد وقت حسيت أنو ملزوم باش يفسر بعد الكلام اللي قالو يعني مستحيل يكون يحبني و يعاملها بالطريقة هاذي...خذيت نفس و حاولت نطرد الأفكار لي جات في مخي...أصلا منعرفش علاش قاعدة نخمم فيه بالطريقة هاذي...غزرتلو نحكي
أنا:أموورك متهمنيش كنان
كنان:و رغم هكا...نظن أنك بحاجة تعرف شكون حنين
أنا:لااا مش لازم نعرفها و لا نتعرف عليها
كبست على صاكي و تكيت لتالي...ضحك و عاود خدم الكرهبة...قحرتلو نحكي
أنا:شفما ؟
كنان:حتى شي
أنا:ملا شبيك تضحك ؟
كنان:مفما حتى شي عزيزتي....ياخي باش نتعاركو على هاذي زادة
أنا:كنااان
عاود ضحك و نزل على الفيتاس...عديت عينيا على وجهو و تلفت لشباك...تبسمت بالوقت...منعرفش علاش...أما بالرسمي...طلع حتى هو مضروب في مخو...حتى نعرف روحي مغلطتش...خاطرني لا نحب نعرفها و لا نتعرف عليها زادة...فوق هكا صحبتهم غريبة برشا...نفخت بالقاوي خاطر بالرسمي منحبش نخمم في الموضوع و لا نحطو في راسي جملة...نحب نركز في خدمتي و حياتي لي نرسم فيها و كهو.
#إيمان_كنان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
