صرخة صمت 🌬

الحلقة الثالثة و الخمسون

🔸️حلقة 53
🔸️ملاك_تحكي:
حطيت الصينية في الفرن و مسحت يديا...دورت راسي شوية و غزرت لكرهبتو من البلار...ضيقت عينيا مستغربة...خاطر مخبرنيش اللي هو باش يجي قربت من الباب بالوقت..نستنى فيه...نزل من الكرهبة و قرب مني...باسني من خدي...يحكي
آدم:كان معندكش شي مهم...نحبك تجي معايا
أنا:صارت حاجة ياخي ؟
آدم:نحب نحكي معاك...يعني أنا بحاجتك توا
أنا:آدم كلشي لباس ؟
آدم:لباس يا روحي طمن
أنا:هياا إيجا...أول ما توصل إيمان نمشيو...خاطر طاطا زينب قاعدة مع أيمن اليوم مدامو ماخو برد
آدم:باهي عزيزتي
كبست على يدو و دخلتو معايا...جبد الكرسي و قعد حضرتلو قهوة بسرعة...حطيتها قدامو و قعدت بجنبو نحكي
أنا:أنت تبدا في الحالة هاذي كي تحكي مع أسيل و لا أمك
آدم:لااا المرة هاذي الحكاية تخصنا إحناا
أنا:مفهمتش عليك ؟ حكاية شنوة اللي تحكي عليها ؟
آدم:هدي روحك...مفما حتى شي من اللي يدور في مخك
جيت باش نحكي...قصت عليا إيمان لي دخلت للمطعم تحكي
إيمان:هاااني جيت
أنا:باهي برشا خاطر أنا و آدم باش نمشيو توا
إيمان:لباس عزيزتي ؟
أنا:لباس يا روحي...يكفي أنك ترد بالك على الحلو لي في الفرن و عس على الشربة و حضر السلاطة زادة و متنساش العصير زادة
إيمان:لحظة...لحظة...ياخي باش نعمل هذوما الكل وحدي...ملاااك أنا مانيش شاطرة كيفك...يمكن نهرد الدنيا هوني
أنا:مفما حتى شي صعيب يكفي أنك تركز و تطلبني كي توحل في حاجة
آدم:و القهوة ؟
أنا:صحيح...متنساش القهوة زادة
إيمان:شبيكم عليا...والله منجمش نوفق في هذوما الكل
أنا:تتعلم عزيزتي...حتى مانيش باش نطول عليك
آدم:هاني باش نسرقها منك ساعة و كهو...باهيشي هكا
هزت براسها باهي و دخلت...أول ما خرجنا دخلو زوز زبائن...غزرتلو نحكي
أنا:والله حاستها باش توحل أكثر
آدم:مانيش باش ناخو من وقتك برشا...خلينا نحكيو و بعدها نرجعك
هزيتلو براسي باهي و حليت الباب ركبت...خلط عليا
و خدم الكرهبة...حسيتو مش قد بعضو كي العادة و محبيتش نسألو أكثر لين يحكي اللي عندو وحدو محسيتش بالوقت كيفاش تعدى رغم الأفكار لي قاعدة تدور في راسي..شد الفران على جنب و غزرلي يحكي
آدم:هيا عزيزتي
خذيت نفس و نزلت معاه...تكى عالكرهبة و شيع راسو لتالي...وقفت قدامو من غير حتى كلمة...حبيت البلاصة و المنظر...خاصة إني ولا مرة جيت لهوني من قبل هزيت راسي و غزرتلو نحكي
أنا:شفما آدم...حيرتني أكثر
نزل راسو شوية...عدا عينيه على وجهي و تنهد بالقاوي يحكي
آدم:أنا بحاجتك ملااك...منجمش نقوم بالخطوة هاذي وحدي
أنا:شنية لي صار آدم ؟
كبس على يدي...وقف مقابلني...و غزرلي يحكي
آدم:أنا قررت نرجع للفيلا مرة أخرى
أنا:معناها خممت في الحكاية
آدم:نظن هذا أحسن حل باش نسترجع أختي مرة أخرى
أنا:أما باقي متردد بخصوص أمك ؟
آدم:منعرفش...ليا سنين مدخلتش للفيلا هذيكا و لا حتى عديت فيها ليلة وحدة...كأنو كلشي غريب عليا يمكن خاطرني عشت كل المدة هاذي وحدي
أنا:أما باش تتعود يا آدم...يعني عالأقل تحاول على خاطر أختك و إذا منجحتش الحكاية تنسحب منها
آدم:نحبك تكون معايا ديما ملاك...نحب كي نرجع في آخر النهار نحط راسي على صدرك و نرتاح...نحب جرعة طاقة منك إنتي
أنا:تعرف بالقدا لي أنا معاك ديما و مستحيل نبعد عليك
آدم:عرس بيا ملاا
أنا:مفهمتكش ؟
كبس على يدي أكثر و عدا عينيه على وجهي يحكي
آدم:نقصد نحبك تكون معايا ديما و في كل لحظة حتى مفماش علاش نستناو أكثر من هكا...أنا حاجتي بيك ملااكي
عديت عينيا على وجهو و جبدت يدي منو...وخرت خطوة لتالي و بعدت خصلات شعري من وجهي نحكي
أنا:بالسرعة هاذي ؟
آدم:عندنا شهور مع بعضنا
أنا:نعررف آددم...أما منظنش أنا مستعدة باش نعرس توا
آدم:والسبب ؟
أنا:آدم أفهمني أماانك...أنا لتوا نحس روحي بحاجة وقت...خاطرني نخاف نعاود نفس التجربة مرة أخرى و نخرج منها خاسرة في الأخير
آدم:تتوقع اللي انا باش نكون كيفو ؟
أنا:مقلتش هكا...أنا جيست مزلت بحاجة وقت باش نتقبل الفكرة و منتعبكش معايا
عدا يدو على وجهو و قرب مني شوية...كبس على يديا زوز يحكي
آدم:أغزرلي هوني ملاكي...كان تحب تتعدا الماضي و اللي عشتو...متهربش منو...مش هذا اللي كنت تقولو ديما...ملا خليني نعاونك يا روحي...خليني نداويك
أنا:ماكش باش تفهمني آدم...أنت لتوا متعرفش لي عديت بيه بالظبط...صدقني كل ليلة في الدار هذيكا كانت عبارة على كابوس...نخاف نرجع نعيش نفس الشي...خاطر حتى إيهاب قبل كان يعاملني كيفك و أكثر...أما مكنتش نعرف إني باش ندخل للجحيم هذا بساقيا
آدم:ملااااك...ملاااك...إذاا إنتي باش تفكر فيه في كل لحظة طبيعي متنجمش تتخلص منو و باش تخليه حاضر بيناتنا ديما
أنا:من غير ما تظغط عليا أمانك
هزلي براسو باهي و جبد روحو مني...تنهد بالقاوي يحكي
آدم:باااهي كيما تحب إنتي...خلينا نمشيو تواا
قربت منو شوية...شديتو من يدو و غزرتلو نحكي
أنا:آدم...أنا بالرسمي بحاجة وقت و كهو
آدم:باهي عزيزتي...إنتي تعرف لأنا باش نستناك ديما
قربلي شوية باسني من راسي و حضني...دورت يديا زوز على ظهرو و كبست عليه من غير حتى كلمة خاطر بالرسمي خايفة من اللي باش يصير و من إحتمال أنو العرس باش يفسد كلشي بيناتنا...حتى إني لتوا مزلت نحس في روحي تاعبة من علاقتي مع إيهاب...كيما لتوا نخاف من فكرة الإرتباط و شنية ممكن ينتج منها...و رغم إني حسيتو مش قد بعضو أما منجمتش نتراجع على الكلام لي قلتو...خاطرني بالرسمي منحسش في روحي مستعدة باش نعرس بيه توا و منحبش نظلمو معايا في حكاية معندوش ذنب فيها.
#ملاك_آدم❤