🔸️حلقة 70
🔸️ملاك_تحكي:
دورت راسي شوية نغزرلها..فرغت العصير في الكاسة و تكات على الرخامة تحكي
أسيل:صباح الخير
أنا:صباح الخير
أسيل:تحب نوصلك في ثنيتي
أنا:لا عيشك...آدم باش يوصلني معاه
أسيل:هيا باهي...أما فما سؤال محيرني
أنا:تفضل
أسيل:يعني شبيك مكملتش قرايتك قبل...علاش حتى لتوا ؟
أنا:ظروف عزيزتي
أسيل:ظروف كيما شنية ؟ ياخي راجلك السابق كان مانع عليك كلشي ؟
أنا:والله أنا منحبش نحكي على الماضي متاعي أسيل خاطرو حاجة تخصني أنا و كهو
أسيل:مجرد فضول...متوقعتش باش تتغشش هكا يعني حقك متحكيش على الماضي متاعك...مدامك عشت في جحيم مع راجلك القديم
ضيقت عينيا مستغربة من كلامها...أصلا فهمت وين تحب توصل تقريبا...حطت الكاسة من يدها و كملت تحكي
أسيل:أنا باش نمشي توا..منجمش نفطر معاكم...نهارك زين
خرجت من غير ما نجاوبها...أصلا كل مرة تتمادى في تصرفاتها أكثر...حاولت نتناسى لي صار و أنا نقص في الغلة...فقت من سرحتي كي عنقني من تالي و باسني من رقبتي يحكي
آدم:حاضرة صغرونتي
هزيتلو براسي إيه و جبدت روحي منو...نحكي
أنا:خلينا نفطرو قبل...يعني إذا ماكش مشغول
آدم:لااا...أسيل وينها ؟
أنا:خرجت من شوية
آدم:من غير ما تفطر ؟
أنا:منعرفش
آدم:إنتي لباس ؟
أنا:لباس...أما منحبش نتأخر على الكور
آدم:باهي عزيزتي إيجا
كبس على يدي و جبدني معاه...قعدت و تكيت لتالي حط صحن الغلة و قعد بجنبي يحكي
آدم:مبعد نبعثلك الشوفور..إيجا إنتي و إيمان لسوسيتي
أنا:ياخي باش نبداو سطاج من توا ؟
آدم:لاا...أما تهزو ملاحظات باش تعاونكم...حتى السطاج من توا مفيد برشا ليكم
هزيتلو براسي باهي و تبسمت...منجمتش نركز مع كلامو و أنا نخمم في اللي صار الصباح...حتى منعرفش كيفاش كملت فطوري و خرجت معاه...رغم متأكدة أنو حس عليا..أما محبش يظغط عليا..وصلني للفاك و شد الفران على جنب...عدا يدو على شعري و باسني من خدي يحكي
آدم:نشوفك مبعد...رد بالك على روحك و أطلبني في حالة استحقيت حاجة
أنا:باهي يا روحي
آدم:متأكدة باش تكون لباس ؟
أنا:جيست تاعبة شوية و كهو...أما باش نكون لباس
عاودت بستو و هزيت روحي نزلت...شاورتلو بيدي و بعدت عليه شوية...لقيت إيمان تستنى فيا...عنقتها بالوقت...كأني مصدقتش إمتى وصلت...كبست عليا بالوقت تحكي
إيمان:لباس يا روحي ؟
أنا:لا مانيش لباس يا إيمان
إيمان:تعاركت مع آدم ياخي ؟
أنا:لا...مش هكا
إيمان:باهي...شقولك نشربو حاجة مع بعضنا توا
أنا:لا...من غير ما نضيعو الكور...خاطر آدم قالي لي إحنا في فترة حساسة مدام دخلنا روطار
إيمان:باهي عزيزتي...المهم إنتي لباس توا
هزيتلها براسي إيه و دخلت معاها...عديت الساعتين مش قد بعضي...لدرجة مصدقتش إمتى خرجت دخلنا للكافتيريا مع بعضنا...طلبت قهوة و قعدت مقابلتها غزرتلي تحكي
إيمان:ملااك...شبي حالتك هكا...مدام الحكاية متتعلقش بآدم...شنية صار بالظبط ؟
أنا:الموضوع يتعلق بأسيل
إيمان:أسييل ؟ توقعت ماهيش باش تعمل مشاكل بيناتكم
أنا:لااا مش لهدرجة...أما يا إيمان الطفلة هاذي مجاتش تعيش معانا خاطرها متفاهمتش مع أمها نظن الحكاية أكبر من هكا
إيمان:مفهمتش قصدك
أنا:لي نقصدو أنو أسيل من وقت تعرفت عليها و هي تحاول تعرف عليا و على الماضي متاعي مع إيهاب
إيمان:شمدخلها في الماضي متاعك ؟
أنا:منعرفش...يعني حتى كي خبرتها للماضي متاعي يخصني وحدي...قاتلي حقك متحكيش على الماضي متاعك مدامك عشت في جحيم مع راجلك
إيمان:ياخي آدم حكالها على إيهاب ؟
أنا:لااا منتوقعش آدم يعمل حاجة هكا و يحكي على خصوصيتنا مع أختو...أما زادة مستغربة كيفاش عرفت...يعني مدام قالت كلام هكا...معناها عندها علم بكلشي...و رغم هذا ميهمنيش أما نحب نعرف شنية الهدف متاعها من هذا الكل...تي حتى صحبتها طلبت من خوها باش يقبلها في سطاج و تحكي عليها في كل فرصة زادة
إيمان:هدي روحك ملاااك...يعني من كلامك تتوقع لي هي تحب تفرق بينك و بين آدم ؟ تتوقع هو باش يسمح فيك ؟
عديت عينيا على وجها و رجعت شعري لتالي بيديا زوز نحكي
أنا:أنا عندي ثقة في آدم و إن شاء الله منظطرش نخسر الثقة هاذي جرايرها هي...خاطرني نعرف أهميتها عندو
إيمان:منظنش لي آدم ينجم يتخلى عليك...أما زادة لازمك تخبرو باللي قاعد يصير...يمكن هو يحل الموضوع معاها
أنا:إيمان...آدم فرحاان بوجودها معاه بعد السنين هذوما منحبش نخليه يظطر يختار بيناتنا...و لا يضيع وسط مشكلة تافهة...يكفي إني نحطها عند حدها و كهو
إيمان:و رغم هكا نظن لازمك تحكي معاه ملااك يعني عالأقل تعرف إذا كان هو لي حكالها و لا لا
أنا:منعرفش و منحبش نركز على الموضوع هذا أكثر من لازم
نزلت راسي على صوت الميساج...عرفت منو لي الشوفور برا...غزرتلها نحكي
أنا:الشوفور وصل...ياخي باش تمشي معايا لسوسيتي ؟
إيمان:أكيد...حتى كنان يستنى فيا غديكا
تبسمت و هزيتلها براسي...كبست على ساقي و وقفت استندت على الطاولة بالوقت..للحظة حسيت الدنيا الكل دارت بيا...عاودت قعدت و غمضت عينيا نرد في النفس قربت مني تحكي
إيمان:ملااك...شبيك ؟ شفمااا عزيزتي ؟
أنا:لباااس عليا...شوية دوخة و كهو
إيمان:متأكدة ؟
أنا:إي...يمكن خاطرني وقفت بالزربة أكا علاش دخت
إيمان:باهي شد أشرب شوية
شديت كاسة الما من يدها و خذيت رشفة منها...وين
حسيت روحي إرتحت شوية..تنهدت بالقاوي و عاودت وقفت...كبست على يدها و خرجت معاها يمكن ظغطت على روحي برشا اليوم...أكا علاش قررت باش نكمل نهاري...من غير ما نخمم في أسيل و لا في حتى شي آخر غيرها زادة.
#ملاك_آدم❤
VOUS LISEZ
صرخة صمت 🌬
Romansa🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
