صرخة صمت 🌬

الحلقة التاسعة و الثلاثون

🔸️حلقة 39
خذيت نفس طويل و قربت منو أكثر...ركبت بجنبو دورت راسي شوية نغزر لشوفور متاعو لي سكر الباب و بعد على الكرهبة شوية...وين حسيت روحي إرتحت كبست على صاكي نحكي
أنا:نسمع فيك
أمير:كيما توقعت بالظبط...إنتي على خاطر أمك و خوك مستعدة تسلم حتى في روحك
أنا:شنية تحب مني ؟
أمير:نجاوبك على السؤال هذا...بعد ما تشوف حاجة مهمة عزيزتي
دورت راسي شوية جات عيني في عينو...تبسم و حط تليفونو في يدي...غزرتلو مستغربة و نزلت راسي...كبست عليه بيدي نحكي
أنا:شنية هذا ؟
أمير:تفرج وحدك عزيزتي
مديت يدي مترددة و خدمت الفيديو...وين حسيت بدني جمد و قلبي خض بالقاوي...بردت و يدي رعشت و أنا نغزر لأمي و هي تطعن في بابا...هزيت عينيا في وجهو مصدومة...الكلام وحل في حلقي و منجمتش نسألو...حتى منجمتش نخمم في اللي باش يصير خواطري دارت من اللي ريتو...و من قربو و من ريحتو زادة...كلشي هوني قاعد يخنق فيا...لدرجة إني منجمتش نتحرك من بقعتي و لا حتى نحاول نفهم كيفاش صور هذا الكل...دقايق عديتهم ساكتة...كأني داخل حلقة فارغة...مهما حاولت مانيش باش نخرج منها...أصلا مستحيل نتحمل كان تصير لأمي حاجة والله نموت...أنا لتوا مش مصدقة لي هي رجعتلي..فقت من سرحتي كي فك التليفون من يدي و سكر الفيديو لي قعد يتعاود...تبسم و تكى لتالي يحكي
أمير:هاني باش نخليلك نسخة منو...تفرج عليه وقت ما تحب يا روحي...حتى تنجم توريه للملازم و لا للمحامي متاعك خير...يعني مدامو شاطر...ينجم يخفف الحكم على أمك
بقيت ساكتة من غير حتى كلمة...خاطرني منجمتش نخمم في اللي باش يصير و لا حتى نرد عليه...كمل يحكي
أمير:يعني أقل عقوبة تنجم تاخوها هي 3 سنين خاطر الفيديو يوضح أنو هي الغالطة مش هو و كيما تعرف إذا لا قدر الله و مات على غفلة...وقتها الحكم يولي مضااعف لدرجة أنك مستحيل تجتمع مع أمك مرة أخرى
هزيت راسي شوية...و غزرتلو بنفس الحقد لي حسيت بيه ناحيتو نهارتها..خاطر منستبعدش أنو باش يحاول يتخلص منو و يخليها توحل في راس أمي...خذيت نفس نحكي
أنا:شنية المطلوب مني ؟ نتنازل على القضية و تاخو براءة من أول و جديد
ضحك و عدا عينيه على وجهي...وين بقيت نغزرلو..نزل بعينيه لبدني و عاود غزر لوجهي يحكي
أمير:القضية كلها على بعضها متهمنيش...بالمختصر ماهوش
باش يهمني إذا إنتي كملت فيها و لا إنسحبت منها
أنا:هات من تالي أمير و قولي شنية تحب مني مقابل الفيديو هذا ؟
أمير:تعرس بيا
قلبي خض بالقاوي من الكلمتين لي سمعتهم منو...من غير ردة فعل و لا حتى نطقت بحرف واحد...صدمني لدرجة منجمتش نزل عينيا من وجهو و لحظة وحدة كانت كافية باش تخليني نسترجع كلشي خلاني نعيشو لتوا...هو مسرقش مني شرفي و إنتهك بدني كهو...سرق مني أحلامي و حرم عليا إني نرقد مرتاحة شهور طويلة كيفاش باش نعرس بيه و نكون معاه تحت سقف واحد ؟ ياخي مزلت باش نقتل روحي أكثر من هكا و نسلمها لواحد كيفو هو ؟ باهي و أمي ؟ شنية باش يصير فيها إذا أثبت التهمة عليها و خلاها تتحبس...و أيمن لي تقريبا ضاع جرايري أنا...أصلا كان مزلت نحارب لتوا...راهو على خاطرهم هوما...خاطر معنديش غيرهم...وسط هذا الكل لقيت كنان بين عينيا...كلامو و تصرفاتو معاياا...و اللي نحس فيه ناحيتو زادة...فقت من سرحتي كي حط كارت في يدي و تبسم يحكي
أمير:مش لازم تجاوبني توا...نحبك تخمم بالقدا و تاخو قرارك عزيزتي
نزلت راسي شوية نغزر للأرقام متاعو...كبست عليها في يدي و حليت الباب نزلت من غير ما نقول حتى كلمة أصلا مفماش داعي باش نحكي في الموضوع أكثر خاطر كلشي واضح...فرد وقت نحس في ساقيا رزنو لدرجة منعرفش كيفاش نجمت نمد الخطوة و نبعد عليه و على كلشي سمعتو زادة...قطرات المطر لي بدات تنزل بردتني أكثر هزيت راسي شوية نغزر لكرهبتو لي شدت الفران على جنب و هبط منها بالوقت...وقفت في بلاصتي نغزرلو متوقعتش باش يرجع اليوم...يمكن أكا علاش مطلبنيش عديت عينيا عليه و كانت أول مرة نعترف قدام روحي لي أنا توحشتو و إستفقدتو معايا أما منجمتش نقرب منو و لا حتى نقدم خطوة أخرى...و دموعي لي حصرتها بكري لقات طريقها على خدي منجمتش نمنعها أكثر و لا حتى نمنع الإحساس الخايب لي تملكني...خاطرني منجمش نستخايل روحي مع أمير في نفس النقطة...كيما منجمش نتخلى على أمي لي ضحات على خاطري و تعبت عليا السنين لي فاتت الكل...قرب مني شوية مع المطر لي قوات كأنو حس عليا...خاطرني منجمتش نقدم ناحيتو...وقف قدامي بالظبط و عدا عينيه على وجهي كانو يسأل فيا شنوة لي صار ؟ عدا صوابعو على خدي مستغرب و من غير ما يقول حرف واحد...عديت عينيا على وجهو و إختصرت المسافة لي تفصلني عليه بخطوة صغيرة و دخلت في حضنو...حطيت راسي على صدرو و دورت يديا زوز عليه...وين لقيت بلاصة دافية نخبي فيها دموعي و نحس بالأمان لي فقدتو دقايق لتالي...غرس يدو في شعري و نزل عليا شوية...منعرفش علاش فضلت الصمت و انا حضنو...خاطرني للحظة وحدة خفت من فكرة إني معادش نجم نقربلو مرة أخرى و لا حتى نكون معاه مرة أخرى...و يمكن باش نخسر بقية حياتي جراير أمير لثاني مرة...أما توا بالظبط...نحب نبقى هوني...في حضنو و كهو من غير ما نخمم في اللي ريتو و سمعتو و لا حتى في اللي جاي زادة..كبست عليه أكثر كي حسيتو يبعد عليا وين عاود عدا يدو على ظهري...محاولة منو باش يهديني أكثر...رغم أنو لتوا ما يعرف حتى شي و لا حتى شنوة اللي صار بالظبط.
خذيت نفس طويل و جبدت روحي منو شوية...عدا عينيه على وجهي مستغرب و مد يدو يبعدلي في خصلات شعري لي لصقت على خدي مع دموعي و المطر لي قاعدة طيح عليها...و يحكي فرد وقت
كنان:شبي صغرونتي ؟ شبي حالتك هكا ؟
هزيتلو براسي لا...فقدت القدرة على الكلام و منجمتش نجاوبو...عاودت عنقتو من غير ما نقول حرف واحد غرس يدو في شعري ضحك يحكي
كنان:مكنتش نعرف لي إنتي باش تتوحشني لهدرجة
تبسمت رغم اللي نحس فيه الكل...جبدني من عندو شوية و باسني من جبيني يحكي
كنان:هيا إيجا معايا توا
خذيت نفس و بعدت عليه شوية...عديت يديا زوز على وجهي نحكي
أنا:لااا...أنا لازمني نمشي توا
كنان:مش قبل ما نفهم شبي حالتك هكا
أنا:كناان...برا أرتاح انت خاطرك تاعب من السفر
كنان:و نخليك في الحالة هاذي...هيا إيجا
كبس على يدي و جبدني معاه...حلي الباب وين ركبت من غير مقاومة مني...خلط عليا...باش يخدم الكرهبة وقفتو نحكي
أنا:لااا من غير ما نبعدو من هوني
كنان:بااهي...أما هاني نستنى باش تفهمني شنية لي صار يا روحي
أنا:ما صار حتى شي...جيست تاعبة شوية و كهو
كنان:تتوقع مني باش نصدقك ؟
أنا:ميسالش نحكيو مبعد...لازمني نرجع لدار توا
كنان:خليك...كان تحب متحكيش مانيش باش نظغط عليك...أما خليك معايا...عالأقل لين نطمن عليك
نزلت عينيا من وجهو و غزرت ليديا...تفاصيل الفيديو تعاودت قدامي...سكرت عينيا بالوقت...هاربة من كلشي صار...يدو لي تحطت على يديا...فيقتني على الواقع كبس عليا يحكي 
كنان:إيمان...مش قتلك ما تخبي عليا حتى شي...هاني كلمتك الصباح و كنت لباس...متطلعش قابلت أمير
هزيت عينيا في وجهو و قلبي خض بالقاوي مع إسمو لي تجبد قدامي...جبدت يديا منو و هزيتلو براسي لا نحكي
أنا:لااا...ما قابلت حتى حد كناان و زيد قتلك تاعبة شوية و كهو
عدا يدو على وجهو...لتوا شعرو مبلول...تنهد بالقاوي يحكي
كنان:باهي عزيزتي...حاول تهدي روحك توا
أنا:علاش مخبرتنيش لي أنت باش ترجع اليوم ؟
كنان:والله مزية لي رجعت...ساعة نوصي في الطحان لآخر باش يرد بالو عليك...نجي نلقاك في الحالة هاذي
أنا:أففف كنان بالله معادش توصيه جملة...والله قريب تجلطت جرايرو
ضحك بالوقت...لي خلاني نتبسم و نخرج شوية من الجو لي أنا فيه...مدلي يدو شوية يحكي
كنان:إيجا هوني تراه
جبدني عندو شوية..حطيت راسي على صدرو منعرفش علاش نحب نعدي وقت أطول معاه...و منبعدش عليه خاصة توا...خذيت نفس نحكي
أنا:كنان...أنت باش تعاود تسافر ؟
كنان:لا يا روحي...و إذا سافرت مانيش باش نخليك ورايا مرة أخرى
أنا:بالله...تتوقع الحكاية بسيطة لهدرجة
كنان:والله أنا من وقت عرفتك وليت ناخو الأمور ببساطة أكثر...و معادش نخمم لبعيد برشا زادة
أنا:معناها مخممتش وين يمكن يهزك إعترافك هذا ؟
هزيت راسي شوية غزرتلو...تبسم و عدا صوابعو على خذي يحكي
كنان:إذا إنتي رضيت بيا وقتها نبدا نحضر لعرسنا
تبسمت بالوقت...كأني نحاول نهرب من كلشي سمعتو قبيل و عديت عينيا على وجهو نحكي
أنا:يعني ولا مرة خممت ترجع لمرتك
كنان:لااا...أنا و سيلين علاقتنا وفات ليها برشا و قبل طلاقنا زادة
مديت يدي مترددة و حطيتها على صدرو...وين باسني من جبيني بالوقت و كبس على ظهري...منعرفش من وين جاتني الجرأة هاذي الكل...أما خفت...خفت من فكرة إني منجمش نقربلو مرة أخرى و لا حتى نحكي معاه زادة دقايق عديتهم في حملتو من غير ما نخمم في أمير و لا في اللي طلبو مني...حليت عينيا نغزر للمطر لي نقصت خذيت نفس طويل و جبدت روحي منو نحكي
أنا:لازمني نمشي خاطر أمي باش تتحير عليا
كنان:باهي...أما خلي تليفونك بجنبك...و أطلبني إذا صارت حاجة و لا حبيت تحكي اللي تخبي فيه عليا توا...و تأكد لي أنا معاك و باش نكون معاك ديما يا روحي...باهي ؟
هزيتلو براسي باهي و حليت الباب نزلت من غير ما نعاود نغزرلو...خاطرني خفت نضعف و نحكي كلشي صار و يمكن بالطريقة هاذي نضر أمي...دخلت لدار لقيتها تحط في الصحون عالطاولة...دارت عندي و تبسمت تحكي
زينب:وينك لتوا يا روحي ؟ شبيك طولت حتى تليفونك مسكر
حطيت صاكي على جنب و قربت منها بالزربة...دورت يديا زوز عليها و عنقتها بقوة الخوف لي عشتو و أنا نشوف في الفيديو هذاكا...عدات يدها على ظهري تحكي
زينب:شبي صغرونتي ؟
خذيت نفس و جبدت روحي منها شوية...تبسمت نحكي
أنا:حتى شي...جيست حسيت روحي توحشتك و لتوا مش مصدقة أنك معايا توا...و لي ماكش باش تبعد عليا مرة أخرى
زينب:ياخي باش تبكي زادة ؟ مش قتلك معادش نحب نشوف دموعك يا عمري
أنا:مانيش نبكي..زيد من بكري ما كليت حتى شي..شنية حضرتلنا
زينب:برا بدل دبشك و إيجا شوف بعينك
انا:ملاك جات ؟
ملاك:هاااني في الكوجينة يا روحي
تبسمت و بستها من خدها...خذيت نفس و دخلت للبيت سكرت الباب ورايا و تكيت عليها...متوقعتش باش يصير معايا هذا الكل يوم...أمير لي يجبد فيا للقاع من جيهة و كنان لي يحاول ينقذني من هذا الكل في جيهة أخرى وين لقيت روحي في الوسط..فرد وقت مستحيل نجم نستخايل روحي عايشة مع أمير تحت سقف واحد و لا حتى يحط يدو المسخة عليا مرة أخرى...كيما منجمش نستخايل حياتي من غير أمي و لا حتى نتحمل أنو هذا الكل يصير عليها...بعد ما تخلات على كلشي جرايري...أكا علاش باش نحاول نلقى حل...حل يخليني ننقذ أمي من المشكلة هاذي و ناخو حقي منو و حق كلش عملو معايا لتوا و مدامو يحب يلعب...باش نكمل معاه للأخير و نخليه يخسر روحو مع اللعبة هاذي زادة.
#إيمان_كنان❤