صرخة صمت 🌬

الحلقة التاسعة و العشرون

🔸️حلقة 29
🔸️إيمان_تحكي:
مديت يدي شوية و عدلت شعري...رغم إني متوترة أما منحبش نفوت الفرصة هاذي...مدام ملاك نجحت و جابتلي عنوان المعهد الثقافي لرسم...منعرفش إذا باش نوفق في الخطوة هاذي...أما نحب نبدا بيها...بعد نمشي لمقابلات الخدمة...منحبش نضيع وقت أكثر من هكا لازمني نقوم على ساقيا من أول و جديد...هزيت الروسومات متاعي لي رسمتهم قبل الحادثة في يدي حليت الباب و خرجت لقيتها تترشف في قهوتها...قربت منها شوية و قعدت بجنبها نحكي
أنا:خالتي فاطمة...لازمني نخرج توا و يمكن نطول شوية
فاطمة:وه عزيزتي...وين خارجة وحدك و إنتي لتوا مهزيتش صحتك...ساعة كنان عندو علم ؟
أنا:لا و من غير ما تخبرو أماانك...مش لازم يعرف...فما قضيات ورايا لازمني نكملها
فاطمة:باهي عزيزتي...رد بالك على روحك و متحيرنيش عليك
أنا:تهنى خالتي
بستها من يدها و هزيت روحي خرجت من الصالة...رغم أنو يدي لتوا توجع فيا...أما منجمش نصبر أكثر من هكا و نخلي الحمل على ملاك وحدها...خذيت نفس من النسمة الباردة...بالرسمي خير خالتي فاطمة منجمش نردو...أصلا فرق كبير بينها و بين ناناتي اللي نحسها السبب الأول في كلشي عاشتو أمي...خرجت لطريق و شديت طاكسي عطيتو عنوان المعهد و تكيت لتالي...عديت يدي على بلاصة الوجيعة لي في يدي لأخرى و تنهدت بالقاوي محسيتش بالوقت كيفاش تعدا...خلصتو و هزيت روحي نزلت...طلعت راسي شوية...نغزر لإسم المعهد...خذيت نفس طويل و دخلت...قربت من الرسيبسيون نحكي
أنا:صباح الخير
هي:صباح الخير...تفضل
أنا:حبيت نسجل في المعهد...كيما نحب نعرف حقوق التسجيل زادة
هي:تفضل عبي الإستمارة هاذي...و تفضل من هوني فما مختص باش يحكي معاك و يعرف في أما مستوى تنجم تسجل
أنا:باهي عيشك
شديت الإستمارة عليها و دخلت لصالة لي شاورتلي عليها حطيت صاكي و عبيتها بالمعلومات المطلوبة...هزيت راسي على صوت خطوات...نغزر لمرا شوية كبيرة دخلت عندي و تبسمت تحكي
أمل:مرحبا بيك
هزيت روحي وقفت و مديت يدي صافحتها...تبسمت نحكي
أنا:عيشك
أمل:أنا أمل...المشرفة على المتدربين لي هوني
أنا:تشرفت بيك
أمل:تفضل أقعد
خذيت نفس و عاودت قعدت...حطت يديها زوز على الطاولة تحكي
أمل:مدامك تحب تقيد عندنا معناها تحب الرسم
أنا:أكثر من اللي تتصور
أمل:خذيت دروس في رسم من قبل
أنا:لا هاذي أول مرة...نحب نعمل تربص باش نطور من المهارات اللي عندي
أمل:باهي معناها تنجم تبدا من المستوى الأول
هزيتلها براسي إيه و كبست على رسوماتي...حطيتهم قدامها نحكي
أنا:هذوما شوية من رسوماتي لي رسمتهم آخر مرة...أما الباقي خسرتو بسبب ظروف
جبدتهم عندها و ضيقت عينيها مستغربة تتفحص فيهم و حبست عند صورة أمي...تحكي
أمل:إنتي رسمت هذوما ؟
هزيتلها براسي إيه...عاودت تفحصتهم مرة أخرى...تحكي
أمل:متأكدة مخذيتش دروس في الرسم ؟
أنا:لااا...كنت نرسم في الدار و أغلبهم بقلم الرصااص
أمل:استعملت الألوان قبل ؟
أنا:لااا...أكا علاش أنا هوني...نحب نعرف تدريج الألوان و كلشي يخص الرسم
أمل:صراحة مصدومة في اللي نشوف فيه...يعني بالرسمي مش مصدقة الرسمات لي قدامي
قلبي خض بالقاوي من كلامها و نزلت على شفايفي شوية نحكي
أنا:يعني نجم نبدا من مستوى آخر ؟
أمل:قصدك المستوى الأخير
أنا:عيشك
أمل:باهي...عندي عرض ليك...مدام رسوماتك قدامي
أنا:عرض شنوة ؟
أمل:شقولك تقدم دروس في المستوى الأول بخصوص الرسم بالقلم و فرد وقت تتعلم تدريج الألوان و طور مهاراتك أكثر
أنا:صراحة منعرفش...يعني أنا ولا مرة قدمت دروس في الرسم...كنت نرسم جيست خاطرني نحب موهبتي
أمل:و هاذي فرصة باهية ليك زادة...كان تحب خمم و بعد قرر
أنا:و كيفاش بخصوص الوقت ؟
أمل:هاني باش نخليلك الجدول متاع الأوقات الكل و حتى باش يكون عندك راتب أكيد
أنا:نجم نشوف الجدول توا ؟
هزتلي براسها باهي و طلباتو من الطفلة لي كانت برا شديتو عليها نقرا فيه...أغلب الأوقات موجودة صباح يعني اذا كان الراتب مناسب نجم نسجل في الفاك زادة و لا حتى نشوف خدمة أخرى...هزيتلها براسي باهي نحكي
أنا:باهي موافقة...ان شاء الله ننجم نوفق
أمل:والله حسب لي ريتو قدامي منجمش نخليك تضيع من يدي
أنا:عيشك مدام...هاني عبيت الإستمارة هاذي لي تخص التسجيل
أمل:باهي...أنا باش نطلب منهم يحضرولك كونطرا و تنجم توقعها غدوة إن شاء الله
أنا:باهي إن شاء الله...نستأذن منك أنا توا
أمل:باهي نهارك زين
تبسمت و هزيت روحي خرجت من عندها...مش مصدقة الصدفة لي جات في طريقي...فكرة إني نخدم في أكثر بلاصة نحبها متوقعتهاش جملة...فقت من سرحتي على صوت تليفوني...جبدتو من الصاك..لقيتو هو يطلب..خرجت
لبرا و هزيت عليه نحكي
أنا:صباح الخير
كنان:صباح الخير...وينك توا ؟ و كيفاش تخرج وحدك ؟
أنا:جيت لمعهد الرسم...هاني تو كي كملت معاهم و بالعادة نخرج وحدي...أنت علاش تسأل ؟
كنان:نسأل خاطرك مزلت تاعبة و ميجيش تظغط على روحك
جيت باش نحكي أما الكلام وحل في حلقي...كي ريتو شد الفران قدامي بالظبط...جمدت في بقعتي و أنا نغزر لكرهبتو اللي كان يلحقني بيها ديما...فرد وقت نسمع في كنان يحكي
كنان:إيمااان تسمع فيا يااخي ؟
هزيت راسي شوية نغزر للباب لي تحلت و هبط منها استند على الكرهبة و نحى ليناتو...خذيت نفس نحكي
أنا:أميييير ؟؟؟
كنان:شنووة ؟
نزلت تليفوني من غير ما نحس و من غير ما نتحرك من بقعتي زادة...كلشي نجمت نستوعبو إني مظطرة باش نتواجه معاه مرة أخرى....قرب مني بخطوات ثابتة و وقف قدامي بالظبط...هز راسو شوية...قرا إسم المعهد و عاود غزرلي...تبسم يحكي
أمير:هااك بديت تحقق في أحلامك...ساعة كيفاش غابت عليا لي إنتي تحب الرسم ؟
بقيت نغزرلو من غير حتى كلمة...أصلا مدامو وصل لهوني معناها كان يلاحق فيا من الأول...خذيت نفس نحكي
أنا:و أنت معادش عندك عملة أخرى من غير أنك تلاحقني و كهو
أمير:شنعمل ؟ توحشتك عزيزتي
أنا:لاا عااد...متطلعش قاعد تحوم عليا خاطرك خايف أنك تتحبس
أمير:أنا ما نخاف من حتى شي و إنتي أدرى يا روحي...أنا هوني جيست باش نقلك عرضي مزال لتوا...أنا حاجتي بيك إنتي...مقابل أي شي تطلبو و بالمناسبة ميهمنيش إذا تراجعت في القصية و لا كملت فيها
أنا:قبل كنت نتوقع أنك ماكش راجل...أما توا تأكدت أنك مريض زادة...و أنا مستحيل نسمحلك باش تقرب مني مرة أخرى...مهما كان لي باش نخسرو
أمير:حتى أمك ؟
أنا:مدامك مزلت باش تجري ورايا معناها ماكش باش تقرب منها و لا حتى تحاول تضرها
أمير:باهي إنتي أدرى يا روحي...ساعة باش نتقابلو برشا بعد توا
رجع ليناتو و وخر لتالي...بقيت نغزرلو من غير حتى كلمة لدرجة منعرفش كيفاش خدم كرهبتو و مشى...قعدت على الدرجة لي عرضتني نرد في النفس...شوفتو تقززني من روحي و تخليني ننقم عليه...كبست على يدي نهدي في الوجيعة لي في يدي...فقت من سرحتي كي شد الفران بالقاوي قدامي و نزل يحكي
كنان:إيماااان
هزيت راسي شوية نغزرلو...قرب مني أكثر...نزل عندي و حاوط وجهي بيديه زوز يحكي
كنان:إيماان شنية لي صار ؟
أنا:أمير كان هوني من شوية
كنان:مسك ؟ عملك حاجة ياخي ؟
هزيتلو براسي لا...كبس عليا أكثر و عدا عينيه على وجهي يحكي
كنان:إنتي لباس ؟
أنا:مممم لباس
كنان:باهي...قوم معايا توا
كبس على يدي و عاوني وقفت...لتوا نحس في ظهري يوجع فيا بصفة غريبة...قربت معاه بخطوات رزينة...حلي الباب ركبت...تكيت لتالي و خذيت نفس طويل...خلط عليا يحكي
كنان:متأكدة لي إنتي لباس ؟
أنا:إي جيست ظهري يوجع فيا...أنت علاش هوني ؟
كنان:ميهمش علاش أنا هوني...نحب نعرف كلشي صار بالظبط...علاش جيت للمعهد ؟
أنا:حبيت نسجل هوني...باش نكمل نتعلم...أما صارت حاجة معايا...المسؤولة هوني طلبت مني إني نقدم دروس في الرسم بالقلم
كنان:و كيفاش صار هكا
أنا:وريتها رسوماتي متاع آخر مرة
كنان:تشوقت إني نشوفهم
أنا:باااهي...تو كي نرسم حاجات جديدة نخليك تشوفهم
كنان:باهي برشا
تبسمت بالوقت...منحبش شوفة أمير تفسد عليا فرحتي باللي صار...خذيت نفس نحكي
أنا:كنان...كان معندكش مانع وصلني لعنوان قريب من هوني
كنان:و شنية فيه العنوان هذا ؟
أنا:مقابلة عمل...نشوف إذا نجم نخدم بدوام جزئي مدام باش نقري صباح كهو
كنان:أول شي خبرني شنية صا مع أمير بالظبط
أنا:حتى شي مهم...يحبني نكون معاه مقابل أنو يخليني نشوف أمي...يعني نفس الطلب يكرر فيه
عدا يدو على وجهو...و تكى لتالي...كأنو يهدي في أعصابو تنهد بالقاوي يحكي
كنان:أمك باش تكون معاك على قريب...مفما حتى شي يخليك تخاف منو
أنا:مانيش خايفة...مدامو مزال ورايا ماهوش باش يضرها
كنان:مرة أخرى كي يظهر قدامك...أبعد عليه و أدخل لأي بلاصة تحسها آمنة و تطلبني بالوقت...باهي
هزيتلو براسي باهي...و مديت يدي شوية...حطيت الحزام نحكي
أنا:هيا وصلني توا
كنان:إيماان...شقولك تأجل الحكاية...خاطرك مزلت تاعبة زيد حاليا تكفيك الخدمة هوني
أنا:أما هكا نجم نعاون روحي أكثر... عالأقل نجم نقيد في الفاك زادة
كنان:و شنية الخدمة هاذي زادة ؟
أنا:نفس الخدمة لي كنت نخدمها عند عمي محمد
كنان:علاش مترجعش عندو ملا
أنا:منحبش...خلينا نشوفو هاذي توا
هزلي براسو باهي و خدم الكرهبة...عطيتو العنوان و تكيت لتالي...محسيتش بالوقت كيفاش تعدا...شد الفران يحكي
كنان:وصلنا
جيت باش ننزل...سكر الباب من عندو و غزرلي يحكي
كنان:خليك شوية
دور راسو شوية...يثبت في الكافي...غزرت معاه بالوقت متوقعتش البلاصة باش تكون هكا...فوق ماهي معبية كلشي فيها عشوائي من الطاولات...للعمال...عكس الكافي متاع عمي محمد...غزرلي يحكي
كنان:ناوية تخدم هوني ؟
هزيتلو براسي لا...خدم الكرهبة من غير حتى كلمة أخرى و خرج لطريق يحكي
كنان:إنتي باش تكون مرتاحة في معهد الرسم...حاليا متعبش روحك برشا...و كان تحب تخدم حاجة أخرى تنجم ترجع لسي محمد و لا حتى تشوف خدمة أحسن من هوني
هزيتلو براسي باهي و كبست على يدي أكثر...ضيق عينيه يحكي
كنان:لتوا توجعك ؟
أنا:هاني نعمل في اللي طلبو الدكتور...أما مزالت على حالها
كنان:باهي هاني باش نهزك تفحصها مرة أخرى
أنا:لااا كنان أماانك...منحبش نرجع للكلينيك مرة أخرى
كنان:باهي هدي روحك...أما مدامك وقفت في المعهد اليوم...خلينا نحتفلو عند سي محمد...ساعة القهوة عندهم بنينة
تبسمت و هزيتلو براسي باهي...خاطر حتى أنا توحشت الجماعة لي كنت نخدم معاهم...خاصة نادية...فرد وقت حاسة روحي مرتاحة بعد دقايق الظغط لي عشتهم مع أمير...دورت راسي شوية نغزرلو...هاذي من المرات القليلة لي نقعدو مع بعضنا من غير عرك...أول ما تذكرت كلامو متاع آخر مرة...دورت راسي لشباك...نحب ننسى اللي سمعتو منو و منحطوش في راسي أكثر...خذيت نفس من النسمة الباردة..فرحانة بالصدفة لي عرضتني و لي حتى مكنتش نحلم بيها...الرسم كان شغفي الوحيد و لي كنت ديما نقول أنو هو اللي باش ينقذني في الأخير...و أهم شي مزال ناقصني توا...هي أمي و خويا...وقتها قوتي تكمل و معادش نتلفت ورايا...أكا علاش يا ريت يكونو معايا في أقرب فرصة ممكنة.
#إيمان_كنان❤