🔸️حلقة 88
🔸️كنان_يحكي:
شديت الفران على جنب...كبست على الدوسيات في يدي و نزلت...دخلت للبيرو متاعو و غزرت لسكرتيرة لي وقفت...نحكي
أنا:كمااال هووني ؟
هي:موجود...شكون نقولو ؟
أنا:متعبش روحك
هي:مفهمتكش مسيو
خذيت نفس و قربت من الباب...كبست على البواني و دخلت عندو...خلطت عليا مروهجة تحكي
هي:مسيو لحظة
كمال:شفما شكوونك أنت ؟
أنا:كناان العامري...نظن أنت أكثر حد تعرف الإسم هذا
كمال:سي كناان ؟ متوقعتش أنك تجيني لهوني تفضل
مد يدو و شاورلها باش تخرج و غزرلي...يحكي
كمال:تحب تشرب حاجة ؟
أنا:أكيد...أما مش توا...خاطر فما حاجات أهم نحبك تطلع عليها
غزرلي مستغرب..طيشت الدوسيات على الطاولة..حل
أول واحد لي يخص التقرير المزور متاع إيمان و الدوسي لي يخص المحكمة زادة...سكرهم يحكي
كمال:على حد علمي القضية هاذي تسكرت
أنا:صحيح...أما نحب نعرف عليها أكثر
كمال:و السبب ؟
أنا:خاطرني أنا المحامي متاعها توا
كمال:مكنتش نعرف لي محامي كيفك باش يستلم قضية فارغة هكا...زيد التقرير الطبي يثبت كلشي
أنا:يثبت شنية ؟
كمال:نظن لي أنت قريتو بالقدا و أكيد كذبت عليك ساعة نظن هاذي باش تكون أول قضية تخسرها يعني من غير ما تفسد سلسلة النجاح متاعك
أنا:التقرير لي في يدك مزور
كمال:التقرير مختوم من عند الطبيب الشرعي
أنا:التقرير الرسمي كان عندك و أنت بيدك عطيتو لأمير أصلان و لتوضيح أكثر أنت بعت القضية هاذي
كمال:أنت قاعد تتهم فيا ؟
أنا:بالظبط...أنا قاعد نتهم فيك أنت
كمال:سامحني و شنية يثبتلك أني بعت القصية هاذي لأمير أصلان ؟ و مش الطفلة لي أنت قاعد دافع عليها هي لي كذبت عليك
أنا:مرتي متكذبش
هز عينيه في وجهي مصدوم و وقف من بلاصتو يحكي
كمال:مفهمتكش ؟ ياخي أنت عرست بيها ؟ ساعة هكا تحمي الموكلين متاعك
قربت منو شوية و جبدتو من كول سوريتو على غفلة دزيتو على الخزانة لي وراه و قحرتلو نحكي
أنا:أغزرلي هووني...أول شي قبل ما تجيب سيرتها على لسااانك تذكر أنها شكوون و مرت شكوون زاادة
و ثاني شي أنت باش تحضر للمحكمة و تعترف باللي عملتووو الكل
كمال:أنا مااا عملت حتى شيي
أنا:تعترف بلساانك..أحسن ما نخليك تعترف بطريقتي
كمال:تهدد فيااا ياخي ؟
أنا:صحيح...أنا قاااعد نهدد فيك تواا...أنت في الحالتين باااش تخسر مهنتك...أما أحسن ما تخسر مهنتك و عيلتك...صدقني المرة هاذي مفما حتى شي باش يوقفني
كمال:أنا إذا شهدت في المحكمة باش نتحبس و نضيع حياة صغاري
أنا:علااش مخممتش فيهم قبل ؟ سااعة علاش مخممتش في الطفلة لي ضيعتلها حقها...أنت باش تخلص حق لي عملتو و عيلتك باش تكون في أماان أحسن ما تزيد دمر كلشي
كبست عليه أكثر...عديت عينيا على وجهو و كملت نحكي
أنا:و تذكر أنو لجوئك لأمير مااهوش باش يفييدك على خااطر الشهود لي في القضية الكل حاضرين أكا علاش متزيدش خسااارة أخرى على خسااارك وااااضح
هزلي براسو إيه...رخفت يديا عليه و وخرت لتالي نحكي
أنا:قدامك 24 ساعة بالظبط...باش تاخو قرارك و إلا أنا باش نتصرف في بلاصتك...ساعة أنت باش تكون أفضل ونيس لأمير أصلان في الحبس
مد يدو و حل فلس سوريتو...وخرت لتالي...عطيتو بظهري و خرجت من عندو...لقيت السكرتيرة متاعو داخلة بعضها...قربت من البيرو متاعها و حطيت الكارت متاعي نحكي
أنا:تنجم تقدم طلب عمل عندنا...خاطر خدمتك هوني وفات
شدت الكارت في يدها و هزتلي براسها باهي..خذيت نفس و خرجت لبرا...ما نحب حتى حد آخر يتضرر جراير القضية...حليت الباب و ركبت...تبسمت كي ريتها تطلب...هزيت عليها نحكي
أنا:شبي حبي ؟
إيمان:وينك لتوا كنان ؟ على أساس باش ترجع بكري
أنا:هاني في الثنية لعندك...إنتي شعاملة ؟
إيمان:والله كيما طلبت حضرتك هاني في الدار كيما طلبت...أمي و أيمن هوني و ملاك زادة...حتى أمي فاطمة هوني معانا
أنا:باهي برشا...ما نحبك تبقى حتى لحظة وحدك
إيمان:والله حتى هوما ينفذو في أوامرك...ساعة مدام حكمت على الكل يقعد معايا..شنية لزوم الرجال
لي واقفين برا ؟
أنا:للأمان عزيزتي...زيد الرجال تابعين للأمن متاع السوسيتي...و هكا نقضي أموري من غير ما نتحير عليك...كيما لازمك تستناس بالوضع هذا طول الأيامات الجايين وااضح ؟
إيمان:بااهي كيما تحب يا روحي
أنا:عيش بنتي لي تسمع الكلام
إيمان:مطولش عليا...خاطرني مانيش باش نرتاح قبل ما نشوفك قدامي
أنا:باهي يا عمري مسافة الثنية و نكون عندك
إيمان:نستنى فيك يا روحي
تبسمت و نزلت التليفون من وذني...أصلا خليتها في الحومة باش تبدل جو معاهم...فرد وقت معادش نأمن عليها و هي وحدها...منعرفش شنية ممكن يصير في غيابي...خدمت الكرهبة و شديت الثنية للحومة...أصلا أنا قدمت على أكثر من خطوة في القضية و كل شاهد ضد أمير يخلي أمورنا تمشي للأحسن...حتى الدكتورة لي كانت مسوؤلة على التقرير الاول...أكدت باش تعاونا بعد ما طلبتها لثاني مرة...غير هكا مزال الشاهد لي زور التقرير و عامل المصنع لي كلفت شكون باش يجيبو لعندي...كيما شهادة حازم ضرورية...إذا كان مزال عندو ذرة شرف ناحية بنتو...و من ناحية أخرى عبير اللي لازمها تحضر و هكا نكون سكرت قائمة الأشخاص لي عدا شهور و هز يخفي فيها و لي باش تكتب نهايتو من الجلسات الأولى...يمكن الشي الوحيد لي خايف منو...هو أنو نفسيتها تتعب..خاصة أنو حبالتها ولات حساسة برشا الفترة هاذي و معاد تتحمل حتى ظغط بعد اللي صار معاها آخر مرة
#كنان_إيمان❤
VOUS LISEZ
صرخة صمت 🌬
عاطفية🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
