🔸️حلقة 17
🔸️كنان_يحكي:
عديت عينيا على وجها مستغرب من حالتها...يمكن هاذي ثاني مرة نشوفها في الحالة هاذي بعد نهار المحكمة...لحظة وحدة خلات أكثر من فكرة تجي في مخي...و فقت من سرحتي على صوت سيلين...دورت راسي غزرتلها و قحرتلها نحكي
أنا:أمشي من هوني توا
سيلين:كناان ياخي طرد فيا على خاااطر هاذي
قربت منها شوية...كبست على زندها و قربت بيها للباب من غير شي راني على أعصابي منها...غزرتلها نحكي
أنا:معادش نحب نشوفك هوني زادة...و معادش تحاول أكثر من هكا...خاطر كان نحطك في راسي يا سيلين والله العظيم نعيفك في حياتك
سيلين:على أساس أنا مرتاحة توا...أما باهي يا كناان بااهي
حليتلها الباب...ضربت ساقها عالارض و خرجت سكرتها وراها...خذيت نفس و قربت منها...حطت يدها على صدرها ترد في النفس...وقفت قدامها نحكي
أنا:إيمان شفما ؟ و شبي حالتك هكا ؟
هزت عينيها في وجهي و غزرتلي ندرا كيف...لمعة الدموع كانت واضحة فيهم...رجعت شعرها لتالي بتوتر و غزرتلي تحكي
إيمان:أ..أمير...أمييير
ضيقت عينيا مستغرب و قربت منها أكثر...نزلت راسها شوية...كأنها تتنفس بصعوبة...هذا لي لاحظتو من أول ما دخلت...مديت يدي شوية و هزيتلها راسها نحكي
أنا:كمل
جبدت روحها مني و حطت يديها زوز على راسها بعدت عليا شوية...تدور في وسط البيرو و تحكي فرد وقت
إيمان:قابلتو...قابلتو...قابلتو مرة أخرى...أمير كان معاايااا كان قريب مني مرة أخرى...حتى أنفاسووو ك..كااانت قريبة مني...و يدو تحطت عليااا زااادة سمعت صوووتو و نفس الكلام منووو...كاان قريب مني برشاااا يا كنااان
كبست على يدي مع كلامها لي خرج منها...منعرفش شنية لي حسيتو و لا علاش دخلت بعضي من حالتها و غزلت من اسمو لي سمعتو منها...أصلا كان جا قدامي منعرفش شنية نعمل فيه...خذيت نفس و حاولت ندارك وضعي خاطر بالطريقة هاذي باش تضر روحها أكثر...قربت منها و جبدتها من يدها عنقتها من غير ما نخمم...خاطر مفماش حاجة أخرى تخليني نهديها و نخليها تخرج من حالتها هاذي كبست عليها و مديت يدي شوية...عديتها على طول شعرها نحكي
أنا:ششش متخااافش...هدي رووحك
حسيت بيديها لي كبسو على أجنابي...للحظة لقيت روحي مستغرب من اللي نعمل فيه و من وضعي أصلا منعرفش علاش خفت عليها لهدرجة...خذيت نفس و شيعت راسي لتالي نحكي
أنا:مااكش وحدك بعد توا...مستحيل نخليه يضرك صدقني
جبدت روحها مني شوية و هزتلي براسها لا...تحكي
إيمان:لااا...لااا ياا كنان...تهديدوو كان واضح ليااا
حطت يدها على صدرها تجبد في النفس ورا بعضو قربت منها شوية نحكي
أنا:إيمااان...هدي روحك و أغزرلي
قعدت على الفوتاي و كبست على صدرها أكثر...أصلا واضح أنها نوبة هلع و لا مكانش صار معاها هذا الكل قعدت بجنبها و كبست على يدها نحكي
أنا:حاول أكثر...هيااا إيمان نعرفك قوية و باش تتعدا هاذي زادة
غزرتلي ندرا كيف...عديت عينيا على وجها و تبسمت نطمن فيها و نحكي فرد وقت
أنا:مدامني معاك حد ما ينجم يضرك مرة أخرى...زيد إنتي باش تربح القضية و ترجع حقك و تحقق كلشي تحلم بيه هيا حاول تتعدا الحالة هاذي...باش تنجم تحقق كلشي مبعد
كبست على يدي أكثر...فرد وقت أنفاسها بدات تتنظم تنهدت بالقاوي و طاحت عليا تنهج بالقاوي...كأنها كانت في سباق طويل...حطيت يدي على ظهرها نحكي
أنا:معاادش نحبك تخاف منو مهما صار و توا تخبرني بكلشي صار بالتفصيل
جبدت روحها شوية و بعدت شعرها لي هبط على وجها تحكي
إيمان:ط..طلب مني نرجع معاه...م..مقابل أمي و خوياا و ملاك زادة...ي..يعني حاول يهددني في حالة مقبلتش لي هو باش يضرهم و أنا منجمش نحميهم كيما منجمش نرضخلو...أنا كان نموت منرجعش مع أمير...والله وحش يا كنان...مستحيل يرحمني
مديت يدي متردد بعدتلها بقية خصلات شعرها لي لصقت على خدها مع دموعها...نحكي
أنا:صدقني يا إيمان مستحيل نخليه يضرك و مدام عيلتك في خطر...نعاونك باش تجيبهم لهوني زادة بااهي
غزرتلي ندرا كيف..ورا لمعة عينيها كانت فما حيرة واضحة و كلام واقف ورا ترددها...كبست على يدها أكثر نحكي
أنا:نسمع فيك
إيمان:أ..أمير يعرف لي أنت المحامي متاعي
أنا:وين المشكلة ؟
إيمان:ق..قالي لي هو باش يعطيك الضعف مقابل أنك تتنازل على القضية
بقيت نغزرلها من غير حتى كلمة...هزت راسها شوية تحكي
إيمان:كنان إذا أنت باش توافق على عرضو...خبرني من توا...متبيعنيش كيما المحامي كمال أماانك عالأقل نجم نلقى حل آخر
أنا:إنتي تتوقع مني نوافق على عرضو ؟
إيمان:هو شرا كلشي بفلوسو قبل
أنا:خاطر لقى ناس تبيع روحها...يا سيدي كي إنتي خفت مني...فلوسو شعندي نعمل بيها ؟ أنا نملك لي عندو و أكثر زادة...زيد أنا حتى وقت كان ما عندي شي...مخممتش نبيع ضميري...و كان إنتي باش تتعامل معايا بعد توا...لازمك تاثق فيا و في وعودي هاني أنا وثقت فيك في الوقت لي ما تملك حتى دليل يثبت كلامك و كلشي ضدك
إيمان:أوعدني...أنك ماكش باش تتخلى عليا مهما صار
عديت عينيا على تفاصيل وجها...أما المرة هاذي لقيت روحي ضايع فيهم...كأني أول مرة نغزرلها و هزيتلها براسي إيه نحكي
أنا:وعد
غزرتلي ندرا كيف و تبسمت بالوقت...لتوا وجها أحمر و غزرتها ضايعة...حتى خصلات شعرها باقي لاصقة على أطراف خدودها و قد ما بعدتهم شي...نزلت على شفايفها شوية...قد ما كنت نبعد تركيزي قبل على حركتها هاذي...توا بالظبط أفكاري تمردت عليا و كلشي خممت فيه...في اللحظة هاذي...إني نبوسها و كهوو.
غمضت عينيا بالقاوي و عاودت حليتهم...جبدت روحي شوية و عديت يدي على وجهي...مستغرب من روحي و من اللي كنت باش نعملو...منعرفش أصلا كيفاش خدمت مخي معاها و شنوة فيها خلاني ننسى روحي لهدرجة هزيت روحي وقفت...قربت من البيرو متاعي...عبيت كاسة الما و رجعت بجنبها حطيتو في يدها نحكي
أنا:هيا توا...باش تشرب شوية ما و ترتاح هوني...كان تحب تاكول حاجة نوصيلك عليها
إيمان:لا عيشك...لازمني نرجع للخدمة
أنا:لا ماكش باش ترجع...أنا نحكي مع عرفك
إيمان:أما أنا منحبش شكون يدخل في خدمتي و لا ناخو فلوس مانيش تاعبة فيهم
أنا:نعرف..أما ماكش باش ترجع قبل ما نوصي عليك غديكا بالمعنى الصحيح...أمير معادش يعتب باب الكافي مرة أخرى...زيد حالتك تاعبة و لازمك ترتاح شوية
إيمان:باهي و سامحني عاللي صار...مقصدتش نهد عليك بالطريقة هاذي
أنا:متحطش في بالك...أصلا بعد توا كلشي يصير تعلمني بيه...باهي
إيمان:باهي
أنا:كيفاش تحس في روحك توا ؟
إيمان:أحسن...أما ظاهر عرف وين عايشة توا...مدام عرف لي ملاك صحبتي...يعني فما إجراءات نجم نقوم بيهم باش معادش يتعرضلي
أنا:أنا باش نطعن في قضيتك و هكا قانونيا معندوش حق يقرب منك لين توفى القضية
إيمان:على أساس هو يمشي بالقانون
أنا:أغزرلي هوني...بعد توا تستناني نوصلكم و نرجعكم زادة و في حالة مكنتش موجود...آدم يتصرف
إيمان:لاااا...لا أنا مستحيل نوافق على حاجة هكا...زيد صاحبك واحد مريض و عندو إنفصام في شخصيتو أكا علاش أعفيني منو
أنا:عندو شنية ؟
إيمان:إنفصام
أنا:آدم ؟
إيمان:علاش فما واحد مضيع عقلو هوني من غيرو
أنا:لااا...أما كيفاش نجمت تشخص حالتو
إيمان:ملاك هكا قاتلي...يعني إذا كانت الحكاية صحيحة خليه يشوف دكتور ضروري
ضحكت بالوقت...لدرجة منجمتش نشد روحي من كلامها و من الحالة لي تخايلتو فيها...ضيقت عينيها تحكي
إيمان:شبيك ؟
أنا:شي...هاني باش نخبرو يشوف دكتور في أقرب وقت تهنى
إيمان:يكون أحسن والله
تبسمت و عديت عينيا على وجها...هزت روحها وقفت بالوقت و غزرتلي تحكي
إيمان:نحب نمشي بحذا ملاك...كان معندكش مانع
أنا:أكيد...أما متخرجش من هوني من غير علمي حاول تحط عنادك على جنب...باش القضية تنجح باهي
إيمان:لا مانيش عنيدة...وين جبت الكلام هذا
أنا:للأسف ريت بعينيا...حد ما قالي
عوجت فمها شوية...هزت صاكها و عاودت تبسمتلي تحكي
إيمان:مرسي مرة أخرى
أنا:من غير مزية
عديت عينيا عليها...هاذي أول مرة نحسها مختلفة حتى من لبستها...هزيت روحي وقفت..باش منركزش معاها أكثر من هكا و غزرتلها نحكي
أنا:البيرو متاعها في الدور الأول...خلي نهاد تعاونك
إيمان:باهي
تبسمت و عطاتني بظهرها...أول ما خرجت...خذيت نفس و ترميت على الكرسي...مستغرب من روحي و من اللي صار دقايق لتالي...إيمان ماهيش طفلة متاع وقت و لا حتى قريبة ليا لدرجة إني نخدم مخي معاها...خاصة في الوضع لي هي فيه توا...تكيت لتالي نهرب في الأفكار هذوما الكل من مخي منحبش نخمم فيها أكثر من هكا...خاطر الباب هاذي تسكرت بالنسبة ليا و مستحيل تتحل مرة أخرى و لا نخلي مرا أخرى تدخل لحياتي و تستقر فيها...بعد توا باش نعيش بالطريقة لي نحب عليها و ترضيني كهو فقت من سرحتي على صوت الباب لي تحل...دخل يحكي
آدم:وينك ؟ وين غاطس لتوا ؟
أنا:جابك ربي...هاني نفركسلك على دكتور و معرفتش نختار
آدم:دكتور شنية ؟
أنا:دكتور نفساني
آدم:بالله ؟
أنا:والله
قرب مني شوية و ترمى على الكرسي مقابلني و غمزني يحكي
آدم:هات من تالي من وين باش يداويني بالظبط
أنا:الإنفصام
آدم:شنووة ؟
نزلت راسي للبيسي و خرجت إسم الدكتورة...دورتو عندو نحكي
أنا:أيااا عااد هاذي دكتورة شاطرة و صغيرة...متأكد باش ترتاح معاها
آدم:كنااان شبي ●●●● إنفصام شنية و دكتورة شنية زادة...وليت نشك في الروحي بالرسمي
أنا:والله هذا لي سمعتو عليك و مدامك خويا و عشيري منجمش نخليك تضيع أكثر
آدم:نورني شكون هذا اللي قال عليا هكا
أنا:الطفلة لي عاشق فيها...تستخايلك مريض أكا علاش تلاحق فيها
آدم:ملاااك ؟
أنا:نظن هي كهو اللي في مخك الأيامات هذوما
آدم:شوو الفرخة...ولا عندي إنفصام توا...باااهي حلها عندي
ضحكت بالوقت خاطرني منجمتش نشد أكثر من هكا خاصة كي كشبر و ملامحو تبدلت...جا باش يقوم وقفتو نحكي
أنا:خلييك...متنجمش تمشي لعندها توا
آدم:و السبب ؟
أنا:للأسف إيمان عندها في البيرو
آدم:صااار...توا فهمت شكون ينقلك في الكلام...ساعة الفرخة تحكي عليا لصحبتها
أنا:والله بعد اللي عملتو فيها حقها تحكي عليك
آدم:ميسالش مقبولة منها
أنا:هوكا ولا عندك تطور ملحوظ...بالعادة متضيعش وقتك هكا...الطفلة تستخايلك مريض يعني بالعربي مهبول و لتوا متحبش تسلم
آدم:شنعمل مدامني عاشق فيها...منجمتش نحيها من مخي
أنا:آدم ميطلعش ولا عندك إنفصام بالحق...أنت ولا مرة تعلقت بوحدة هكا
آدم:الحق عليا خاطرني مزلت قاعد هوني
هز روحو وقف...ضحكت بالوقت و غزرتلو...نحكي
أنا:شنية عملنا في الموعد مع الدكتورة
آدم:زييد ●●●●● عليا...أنا نعرف حسابي معاها
أنا:لاا عااد باش تخليها تخاف منك أكثر
آدم:طمن من الناحية هاذي
أنا:على كل حال نحب نسهر الليلة...يعني كان معندكش موعد كي عادتك...نستدعي فيك
آدم:كي العادة ؟
أنا:شي...نحب نبدل جو كهو
آدم:باهي مشات معاك
تبسمت و تكيت لتالي لتوا شايخ عليه و على منظرو ساعة هاذي أول مرة يترفض من طفلة و تجبد عليه بالطريقة هاذي...كيما الله أعلم شنية يستنى فينا أكثر من هكا.
#إيمان_كنان❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
