🔸️حلقة 32
🔸️ملاك_تحكي:
مديت يدي حليت الباب...نستنى فيهم باش يدخلو ورا بعضهم...أصلا بوجودهم معادش حسيت بالوقت جملة تبسمت نحكي
أنا:سااارة...لينا هيا فيسع
لينا:هاني جيت
عديت يدي على شعرها و ضحكت...خلطت عليهم و سكرت باب الجنينة...هزيت راسي نغزر لمدام عائشة لي قربت مني تحكي
عائشة:ملااك...فما شكون يحب يشوفك ضروري...هاني باش نشد بلاصتك لين ترجع...مطولش برشا
هزيتلها براسي باهي و خرجت من عندها مستغربة حليت الباب و دخلت...ضيقت عينيا نحكي
أنا:إيهااب
هز روحو وقف...عدا عينيه عاى وجهي و تبسم...يحكي
إيهاب:إيجا ملاك
أنا:شتعمل هوني ؟
إيهاب:مانيش باش ناخو من وقتك برشااا...يعني جيست حبيت نحكي معاك و كهو
خذيت نفس و قربت منو شوية...قعدت على الكرسي ل مقابلو...تبسم يحكي
إيهاب:شحاالك ؟
أنا:لبااس...تعودت بحياتي الجديدة
إيهاب:بالسرعة هاذي ؟
أنا:بعد اللي عشتو معاك...يستهل إني نتعود على حياتي الجديدة بسرعة
إيهاب:عندك حق...و مانيش باش نلومك...خاطرك تعبت برشا جرايري...أما أنا معادش لقيت ثنيتي من غيرك يا ملاك و معادش عندي الحق باش نطالب بيك مرة أخرى
أنا:ملا شبيك جيت لهوني ؟
إيهاب:منعرفش...حبيت نشوفك باش نجم نكمل اللي نعمل فيه
أنا:شقصدك ؟
عدا يدو على وجهو و تنهد بالقاوي...هز عينيه في وجهي يحكي
إيهاب:أنا نحب نرتاح من العقد اللي فيا ملاك...بالمعنى الصحيح...نحب نتحرر من الماضي متاعي...أما هذا الكل يولي بلا معنى إذا ملقيتكش في آخر الثنية
عديت عينيا على وجهو...متوقعتش باش يقدم على خطوة هكا...خذيت نفس نحكي
أنا:إيهااب...كان أنت تحب تتبدل بالرسمي...أعمل الشي هذا على خاطرك أنت قبل أي حد...صدقني أنا نتمنالك الخير في كل خطوة تعملها...إجتماعنا من الأول كان غلطة كيما يمكن في آخر الثنية هاذي تلقى الأحسن مني و اللي باش تبادلك نفس المشاعر هذوما
إيهاب:صحيح يمكن نلقى الأقل منك و الأحسن منك...أما و لا وحدة منهم باش تكون كيفك إنتي يا ملاكي
خذيت نفس و هزيت روحي وقفت...عطيتو بظهري و بعدت عليه شوية نحكي
أنا:أنا نحب نسترجع كلشي تسرق مني...نحب نكون حرة و كهو...بعد توا ما فما حتى حد يجبرني على شي و لا يخليني نختار على كيفو
وقف ورايا بالظبط...حسيت بقربو من ريحتو لي قوات في خشمي...تنهد بالقاوي يحكي
إيهاب:قتلك قبل أنا باش نحاول على خاطرك و باش نبقى نحاول لآخر لحظة في حياتي
غمضت عينيا بالقاوي و عاودت حليتهم...كبست على يدي و خرجت من غير ما نقول حتى حرف...منحبش نسمعو أكثر كيما منحبش نخمم في الماضي زادة...رجعت بجنب الصغار و عديت بقية نهاري معاهم...خاطرهم الحاجة الوحيدة لي باش تخليني ننسى كلشي توا...تعدا الوقت معاهم بسرعة...هزيت روحي خرجت...نمد في الخطوة بالسيف...منعرفش على روحي كيفاش وصلت لدار...دقيت الباب حلتلي طاطا زينب...غزرتلي مستغربة تحكي
زينب:لباس يا روحي ؟
قربت منها شوية و عنقتها بالوقت...توا بالظبط بحاجة إني نحس شكون بجنبي و معايا...كبست عليا تحكي
زينب:شبي بنتي ؟
أنا:شي تاعبة شوية و كهو...أكا علاش
زينب:باهي برا بدل دبشك توا...لين نحضرلك قهوتك
أنا:متعبش روحك طاطا...هاني باش نبدل دبشي و نعاونك في العشا...إيمان رجعت ؟
زينب:لا...مزالت لتوا...أطلبها و شوف وينها
أنا:باهي هاني باش نبدل دبشي و نطلبها
زينب:باهي عزيزتي
بستها من خدها و دخلت للبيت...بدلت دبشي كيما جا و هزيت تليفوني باش نطلبها...حطيتو من يدي مع صوت الباب و خرجت نغزرلها...ضيقت عينيا كي ريتها مش قد بعضها...تبسمت كي شافت أمها و عنقتها...تنهدت براحة خاطرني فرحت مدامهم اجتمعو من جديد...يمكن هاذي من المرات القليلة لي نشوفها مرتاحة و ترقد من غير كوابيس...قربت مني و تبسمتلي تحكي
إيمان:ملوكتي إمتى رجعت ؟
أنا:قبلك بشوية يا روحي
إيمان:إنتي لباس ؟
أنا:صراحة لا...خاطرني قابلت إيهاب
إيمان:شنية صار بالظبط ؟
أنا:حتى شي مهم...جيست حاول يحكي معايا...يعني باقي محافظ على تصرفاتو متاع نهار المحكمة
إيمان:غريبة فيه والله
أنا:أخطاك مني و قولي شنية صار مع كنان ؟
إيمان:من غير ما تجبد سيرتو توا...من بكري على أعصابي منو
أنا:مش هو لي وصلك توا ؟
إيمان:لا مريتوش من الصباح...يعني أصلا كي وصلني كان مزروب و لاهي بالتليفون متاعو
أنا:يعني ما قالك حتى شي ؟
إيمان:لااا
أنا:غريبة فيه والله...هيا برا بدل دبشك...لين نحضر قهوة نتفرهدو بيها شوية و نحضرو العشا
إيمان:باهي يا روحي
دخلت للكوجينة...تبسمت كي ريت طاطا زينب لحقت باش تحضرها...صبيت منها...نحكي
أنا:أيمن وين لاهي ؟
زينب:هاني باش نمشي نشوفو توا...خاطرو لتوا مش قد بعضو
هزيتلها براسي باهي و هزيت الصينية...حطيتها على الطاولة...و ترميت عالفوتاي...نستنى فيها...هزيت راسي شوية و طليت من الشباك...ضيقت عينيا و أنا نغزر لكرهبة كنان...و نسمع فيها فرد وقت
إيمان:ريحتها ترد الروح
جيت باش نحكي أما سكت كي ريت طفلة هبطت معاه تعدلت في قعدتي نحكي
أنا:شكون هاذي ؟
إيمان:شفما ؟
أنا:إيجا شوف
قربت مني شوية قعدت بجنبي...تصدمت أكثر كي ريتها لصقت فيه و حطت يدها على ظهرو...وين غزرتلي إيمان بالوقت...استغربت الفازة لدرجة ما نجمت نقول هاذي خاطر مدامها قريبة منو بالطريقة هاذي و وصل جابها هوني...معناها مهمة عندو برشا و هذا لي يفسر كلام إيمان بكري...بأنو كان لاهي و مش مركز معاها جملة...أول ما دخلو و سكر الباب وراه...رجعت لتالي و غزرتلها تعدلت في قعدتها و بعدت شعرها من وجها...تحكي
إيمان:القهوة باش تبرد
أنا:إيماان لباس ماهو ؟
إيمان:مممم...علاش تسأل ؟
أنا:شي...حسيتك مش قد بعضك
إيمان:مفما حتى شي ملاك...زيد أنا شمدخلني فيه...أمورو الخاصة أنا متهمنيش
أنا:صحيح...أما زعمة شكونها ؟ و شبيهم قراب لبعضهم هكا ؟
إيمان:منعرفش ملاك و ميهمنيش زادة
كبست على الفنجان متاعها و تكات لتالي...تلفت لشباك مرة أخرى و ألف سؤال يدور في راسي...يعني مدامو إعترف بمشاعرو لإيمان...علاش حتى يتصرف بالعكس...يعني بالرسمي نجم يتعداها بسهولة بعد ما رفضاتو...فقت من سرحتي على صوتها تحكي
زينب:شبيكم ؟
إيمان:حتى شي أمي...شوية تعب و كهو...هاني باش نقوم نحضر حاجة للعشا
حطت الفنجان من يدها و قامت من جنبي...خذيت نفس نحكي
أنا:متحطش في بالك طاطا...نفسيتها لتوا تاعبة
زينب:نعرف...أصلا هي ديما تخلي في قلبها
أنا:هاني باش نحكي معاها و نرجعلك
هزتلي براسها باهي...حتى هي مغلوب على أمرها...و مزالت تاعبة لتوا...خلي أيمن لي لتوا نفسيتو مش قد بعضها...تنهدت بالقاوي و دخلت للكوجينة نغزرلها...تقص في الخضرة بالزربة...قربت منها نحكي
أنا:إيماان...يااخي باش تلفني حتى أنا
إيمان:قتلك مفما حتى شي ملاك
أنا:شنية صاار الصباح ؟
إيمان:ما صار شي...حسيتو مظغوط باللي يعمل فيه...أكا علاش مانيش باش نسمحلو يوصلني مرة أخرى
أنا:مستحيل...يعني خاصة كي يتعلق الموضوع بيك ماهوش باش يتراجع
أنا:و إنتي صدقت كلامو...زيد إمتي لحق يعرفني هو باش يحبني...أصلا ظاهر فيه طلق مرتو من شهور قليلة كهو و توا لقى البديل فيسع
سكت خاطرني حسيتها مش قد بعضها من الفازة...حضرت معاها العشا من غير حتى كلمة...عبيت صحن و غطيتو نحكي
أنا:باش نهزهم لخالتي فاطمة
إيمان:توااا ؟
أنا:مممم تواا
إيمان:عندهم ضيوف...متطلعش نسيتهم
أنا:لا خاطر ميهمونيش...زيد لازم ديما نعملو حسابها بعد توا...خاطر و لا وحدة منا تنجم تردلها خيرها
إيمان:باهي ملاك على راحتك
كبست على الصحن في يدي...لبست الجيلي متاعي و خرجت من الدار...منعرفش علاش لقيت روحي نحب نتعرف عليها و نفهم اللي قاعد يصير بالظبط...مدامو قال حاجة و يعمل في العكس متاعها...دقيت الباب...حلتلي خالتي فاطمة تحكي
فاطمة:تفضل عزيزتي
تبسمت و دخلت وراها...هزيت راسي شوية نغزرلهم قاعدين جنب بعضهم...لدرجة ملاحظش وجودي جملة جيت باش نحكي أما سكت مع صوت الباب لي تحل مرة أخرى و خلط الهم لي منحبش نقابلو جملة...خاصة بعد آخر مرة...بعدت على جنب باش نتفادى قربو و كلامو زادة و عطيتو بظهري باش ندخل للكوجينة...أما حبست على صوتو يحكي
آدم:حنوووونتي
نطرت من بلاصتها و قربت منو تجري...ترماات في حملتو و دورت يديها زوز عليه...كبس عليها بقوة و تقريبا هزها من الأرض...هزيت حاجبي مع صوتها تحكي
حنين:أدووومتي توحشتك يااا روحي
آدم:و أنااا أكثر يا فرخة
عدا يدو على شعرها و جبدها من عندو شوية...يحكي
آدم:شنية هذااا ؟
حنين:شنووة ؟
آدم:كنااان على أساس كانت مكعبرة شنية صاار فيها
كنان:منفعهاش هوا أمريكا
حنين:ميزيتوش نتوما زوز...أمي فااطمة إيجااا شوف ولادك كيفاش يفركو فيهم عليا
فاطمة:كنااان...آددم
آدم:من أول ساعة بديت تشتكي منا
نزل عليها شوية باسها من راسها و دخل لصالة...من غير ما يتلفت...عبارة مش موجودة قدامو جملة...دخلت للكوجينة و حطيت الصحن على الطاولة نحكي
أنا:الساقط...الواطي...ما يفلت حتى فرصة تجمعو بطفلة
رجعت شعري لتالي و هزيت روحي باش نخرج...دخلت تحكي
فاطمة:وين ماشية عزيزتي ؟
أنا:مكنتش نعرف لي عندكم ضيوف هوني...لازمني نمشي توا...نشوفك غدوة
قربت منها شوية...بستها من خدها و هزيت روحي خرجت بالزربة...لدرجة منعرفش كيفاش وصلت لدار...دقيت الباب بالقاوي...حلتلي إيمان...تحكي
إيمان:شبيك ؟ شفما ؟
أنا:حتى شي...إيجا خلينا ناكلو لقمة بعد نحكيو
خلطت عليا من غير حتى كلمة...منعرفش كيفاش نجمت نعدي اللقمة من الغزول لي ركبني منو...زايد ميحشمش حتى طرف...كملت غسلت الماعون و دخلت للبيت...قعدت في وسط السرير...دخلت ورايا و قعدت بجنبي تحكي
إيمان:شنية لي صار ؟
أنا:حتى شي مهم...جا آدم وقت كنت غديكا
إيمان:شنية عمل زادة ؟
أنا:حتى شي...خاطر هو ما ينجم يقاوم حتى أنثى و طلعت المدموزال ماخذة عقلهم الزوز...لدرجة ولا واحد منهم لاحظ وجودي
إيمان:وااضح و إلا مكانش سي كنان جابها لهوني
أنا:خالتي فاطمة تعرفها زادة...يعني واضح من طريقة كلامها معاها
إيمان:ريت لي هوما الكل نسخة وحدة...يعني أحسن شي معطيتش فرصة لروحي باش نغزر لبعيد
أنا:والله كان ياقف قدامي مرة أخرى...نقتلو الواطي اللي ميحشمش...ساعة مريتش إنتي كيفاش يحضنو فيها و فرحانين بيها زادة
إيمان:منجمتش تعرف شكونها ؟
أنا:لا منجمتش نسأل و مهتميتش باش نعرف...دوب حطيت الصحن و خرجت
إيمان:هكا أحسن
تكيت لتالي من غير حتى كلمة...منعرفش فاش قاعدة نخمم بالظبط...كأنو كلشي مبعثر داخل مخي...من اللي سمعتو من إيهاب و من لي صار ساعة لتالي...مستغربة في غشي منو...اللي معندوش داعي جملة...خاطر في الاصل ميهمنيش و نعرف طلعاتو بالقدا و اللي مستحيل يصبر على طفلة تحلى في عينو...فرد وقت منحبش كلامو معايا لي متناقض مع تصرفاتو...منحبوش يقربلي و يقول حاجات ماهوش باش ينجم يطبقهم...يكفي انو يبقى بعيد عليا و كهو.
#ملاك_آدم❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
