صرخة صمت 🌬

الحلقة الثانية و العشرون

🔸️حلقة 22
علقت عليها و هزيت روحي وقفت...قربت من القارد روب و جبدت دبشي...وقفت في جرتي تحكي
إيمان:ملااك شنية لي قاعد يصير ياااخي ؟
أنا:الواااطي قبل يكون المحامي متاع إيهاب
إيمان:آدم ؟
أنا:علاااش فما مصيبة أخرى غيروو
إيمان:باهي إنتي وين ماشية تواا
أنا:ماااشية عندو...نحب نعرف اللي قاعد يدور في مخو و وين يحب يوصل زاادة
إيمان:باهي...هاني باش نجي معاك ملا و لي باش يصير خليه يصير
أنا:لااا إيمان...إنتي خليك بعيدة...من غير ما توليلك مشكلة مع كنان
إيمان:تتوقع مني باش نخليك وحدك
أنا:متخافش عليا...شي ماهو باش يصير...أنا باش نحكي معاه و نرجع
إيمان:باش تمشي لسوسيتي ؟
هزيتلها براسي إيه...قربت بالزربة و جبدت دبشها تحكي
إيمان:باش نخرجو مع بعضنا ملا
أنا:باهي
كملت حضرت روحي كيما جا...أصلا ما نجمت نركز في حتى حاجة...كلشي يهمني توا إني نوصل عندو و كهو هزيت صاكي و سبقتها...خلطت عليا بعد ما سكرت الباب عديت الثنية على أعصابي من الفازة...خاطرني نتوقع كلشي من إيهاب...خلي عاد كي يعاونو السخطة هذا...حتى كان ماهوش باش يربح القضية...يقعد يعطل فيها...أول ما نزلنا من الكار وقفتني تحكي
إيمان:هاني باش ناخو على كلامك و نخليك تمشي وحدك أما إذا صار شي أطلبني بالوقت...مفهوم
أنا:باهي يا روحي
عنقتها و كملت ثنيتي لسوسيتي...قربت من الرسيبسيون نحكي
أنا:سي آدم وصل ؟
هي:لا أما سي كنان موجود هوني
أنا:إمتى يجي ؟
هي:عالأغلب ماهوش باش يجي اليوم...وصلتنا تعليمات من رغد باش ما نطلعو حتى موعد لسي آدم
أنا:باهي...نجم ناخو عنوان دارو
هي:للأسف هذا الشي خارج خدمتي
هزيتلها براسي باهي...و وخرت خطوة لتالي...دورت راسي نغزر للبيرو تاع سناء...خذيت نفس و قربت منها...نحكي
أنا:صباح الخير
سناء:صباح الخير ملاك...ياخي رجعت للخدمة ؟
أنا:إي أما قبل ما نبدا لازمني نوصل أوراق لسي آدم و صراحة منجمتش نعاود نسأل رغد على العنوان
سناء:باهي...هاني باش نكتبهولك توا
أنا:باهي عيشك
مديت يدي شديت عليها الورقة و خرجت...وقفت طاكسي نحكي
أنا:وصلني للعنوان هذا
هو:باهي
تكيت لتالي...نحس في روحي باش نطرشق...نحسب في الوقت بالثانية...أول ما وصلت...خلصتو و نزلت...كبست على الورقة و كملت ثنيتي لدارو...قربت من الباب و مديت يديا زوز ندق عليه بالقاوي...دقايق عديتهم نضرب في الباب من غير ما نحبس...لين تحل على غفلة...هزيت عينيا من صدرو لوجهو...يحك في عينو و يغزرلي...ظاهر تو وين فاق من النوم...من الشورت و الحالة لي خرج بيها...دوب بدا يستوعب...دزيتو بيديا زوز و دخلت نحكي
أنا:شنية تستخااايل في روحك تعمل ؟ مش قتلك أبعععد عليا و على ثنيتي...شبيك مزلت في جرتي لتوااا...كيفااش تقبل تكون المحامي متاع إيهاااب جااوبني
دورت راسي شوية نغزرلو...قرب من الكنتوار...يعبي في كاستو بالما و خدم ماكينة القهوة يحكي
آدم:كان ناوية تبقى تصيح هكا...أرجع من وين جيت
أنا:تحبني نبقى هااادية بعد عماايلك فيااا ؟
آدم:على أساس راجلك و متحبش فيه...فاش قام تخلع فيه ملا
أنا:شمدخلك ؟ أنت شنية علاااقتك بالموضوع...مدام القضية واضحة...كيفاش تقبل تدافع عليه
آدم:نعمل في واجبي و مدام يحبك أعطيه فرصة أخرى
قربت منو شوية و وقفت قدامو بالظبط...كلشي خممت فيه إني نخليه يتراجع و كهو...مستحيل نخليه يعطلني و يخليني معلقة بإيهاب أكثر من هكا...هزيت يدي في وجهو نحكي
أنا:إسمعني توااا...أنت باش تتنازل على القضية هااذي و مااكش باش تكون المحامي متاعو مهما صاار
آدم:شنية لي يخليني نتنازل عليها ؟ زيد حرام عليك طلق الراجل من غير حتى سبب واضح
أنا:تحب تعرف السبب ملاا
آدم:مش لازم...تنجم تمشي توااا...كان عندك أسباب خليها لنهار المحكمة باش تفيدك
غزرلي ندرا كيف و جا باش يمشي...حطيت يدا زوز على صدرو و وقفتو نحكي
أنا:خلييك...أنت متنجمش تمشي قبل ما تسمعني
نزل راسو شوية غزر ليديا و هز عينيه في وجهي...جبدت روحي شوية نحكي
أنا:الراجل لي أنت باش دافع عليه...سرق 5 سنين من حياتي...5 سنين كانت كافية باش يسلب مني كلشي من غير إسمي كهو..الوقت لي عديتو معاه خلاني ننسى الناس و العالم برا...خاااطر حضرتو حابسني في الدار...نخرج منها بالشهور و وقت يقرر هو...فوق هكا كان يضربني على كلشي...حتى على كاسة ماهيش مغسولة و محبسش هوني...بسبب الشك متاعو أنا خسرت صغاري قبل ما يجو لدنيا و جراير الضرب متاعو...فما إحتمال إني منكونش أم مرة أخرى...تحب تعرف أكثر زادة ؟ اللي باش دافع عليه أنت كان يخوون فيا مع طفلة تخدم معاه...خاطرها أحسن مني و تعطيه كلشي يحب عليه زادة...بالمعنى الصحيح أنا مكنتش نكفيه و لا نقنعو...إيهاب شخص نرجسي و مريض زادة و قد حبو ليا...الهوس متاعو غالب عليه و يخليه يضرني من غير وعي..بالمختصر يعتبرني ملكية خاصة مش مرتو و كان أنت وافقت تكون في صفو..و لا حاولت ترجعني ليه بأي شكل باش تنتقم مني يا آدم...حط في مخك لي أنا مستعدة نقتل روحي و منكونش لعبة بيناتكم
مديت يدي مسحت دمعتي لي هبطت بالسيف عليا و عطيتو بظهري باش نمشي...جبدني من يدي بالوقت و دورني عندو...جيت باش نحكي...قص عليا كي نزل بيد  لأخرى لآخر ظهري و جبدني عندو أكثر...عديت عينيا على وجهو...مصدومة من ردة فعلو و اللي يعمل فيه...آخر شي توقعت إني نلقى روحي محصورة في حضنو مرة أخرى فوق هكا...أنفاسو قوات في وجهي و خلاتني عاجزة باش نستوعب اللي قاعد يصير و لا حتى نخمم في شنوة قاعد يدور في راسو...قص حبل أفكاري كي نزل على شفايفي و حبس...لا كمل و لا جبد روحو لتالي...جمدت بين يديه و مفهمتش شنية لي صارلي بالظبط منعرفش علاش بقيت من غير حتى حركة و لا محاولة مني باش نبعدو...أصلا الراجل هذا بالنسبة ليا مهبول و منظنش عندو مخ يخمم بيه كيفاش وصل يكون محامي ناجح منعرفش...كبس عليا أكثر...لين فصل المسافة لي بيني و بينو...أنفاسو حرقتني بصفة غريبة و شفايفو دوب لامست شفايفي و هو يحكي
آدم:علاش مخبرتنيش...علاش محكيتش هذا الكل وقت اللي ريتو عندي في البيرو
أنا:م..منعرفش...يمكن خفت منك و منو فرد وقت
آدم:مني ؟
هزيتلو براسي إيه...فرد وقت حاولت نجبد روحي منو كبس عليا أكثر و عدا عينيه على وجهي يحكي
آدم:مكنتش نعرف لأنا نخوفك لهدرجة
أنا:أنت كان عرفت بالحقيقة...تطلب مقابل باش تتنازل على القضية
آدم:و شنية المقابل هذا ؟
أنا:منعرفش شنوة يدور في مخك الخامج
آدم:هذا لي طلع معاك...ساعة مكنتش نعرف لي أنا خايب في نظرك لهدرجة
أنا:و أكثر زادة و إلا مكنتش قبلت بالقضية متاعو من الأول
آدم:ملاااك...أنا حبيت نسمع منك الكلام هذا من قبل و لا حتى أمس زادة...المهم أنك تجي و تحكيلي كلشي
أنا:هااك عرفت توا...الباقي عليك أنت...كان تحب تتراجع تكون عملت واجبك في القانون و كان تحب تكمل أنت حر و مانيش باش ندخل في خدمتك
آدم:نحب نعرف كلشي عشتو و تعديت بيه بالتفصيل
أنا:و شنية تفرق معاك...شمدخلك في حياتي ياخي ؟
آدم:تفرق يااا ملااك...تفرق برشااا
أنا:و السبب ؟
غزرلي ندرا كيف و كبس عليا أكثر...أنفاسو قوات في وجهي...دوب لامس شفايفي مرة اخرى و رجعلي خصلات شعري لتالي يحكي
آدم:كان فما سبب لهذا الكل...كان فما سبب لإهتمامي و تعلقي بيك...سبب يخليني منجمش نحيك من عقلي و تفكيري هو العشق...منعرفش كيفاش و إمتى أما عشقتك ملاك...رغم الظروف...رغم حياتي اللي ماشية بالعكس و رغم أنك معرسة زادة و مع إني ولا مرة حطيت عيني على مرت راجل أما هذا اللي صاار
عديت عينيا على وجهو...مصدومة منو و من كلامو لي متوقعتوش جملة...نعرفو خامج و تفكيرو منحرف و معندوش فرانات...أما اللي قالو توا متوقعتوش منو جملة و ما أثر عليا بحتى شكل بخلاف أنو صدمني و كهو...قلت قبل لي إيهاب قتل فيا كل إحساس و كل نبضة قلب زادة و آخر شي نخمم فيه إني نربط روحي براجل مرة أخرى خذيت نفس نحكي
أنا:سيبني آدم...شبيك كبشت فيا هكااا ؟
آدم:مزلت تحبو ؟
أنا:شكون ؟
آدم:راجلك و لي باش يكون طلقيك بعد أسبوع من توا
أنا:ملحقتش باش نحبو
آدم:نفهم منك لي إنتي ما تحس بحتى شي معاه ؟
أنا:ياااخي قاعد تستجوب فيااا ؟ سيبني توااا
آدم:جاوبني ملاك ؟
أنا:لااا خاطر عندي حساسية من المهابل لي كيفو و كيفك أنت
ضحك بالوقت...ضيقت عينا مستغربة منو و من اللي قاعد يعمل فيه...كبست عليا أكثر يحكي
آدم:متأكدة ؟
أنا:من شنوة ؟
آدم:من الحساسية
أنا:مممم خاصة منك أنت
آدم:متحبش تجرب مضادات الحساسية...بلكشي تولي تحبها
أنا:آددم سيبني توااا...سيبني و متخدمش مخك الخامج معايااا
آدم:و راسك مش كيما اللي قاعد يدور في مخك...صحيح مخي خامج...أما معاك إنتي قاعد يمشي بالعكس
أنا:محسوب...نذكرك شنية لي طلبتو مني قبل
آدم:شنعمل حتى إنتي متتقاومش
أنا:آدددم
آدم:باهي يا روح آدم
أنا:سيبني توا
آدم:كان توافق تحكيلي على كلشي من الأول...تو نسيبك
أنا:أفففف منك...أبعد عليا زح...تخنقت منك
آدم:يمشيش تولي تحب تستقر في حضني مبعد
أنا:الصبررر يااا ربي
ضحك و نزل عليا أكثر...دورت وجهي بالوقت خاطرني نعرف لي قاعد يدور في راسو...عينيا وساعو مع شفايفو لي تحطو على خدي...باسني بالوقت و جبد روحو شوية يحكي
آدم:نعتذر على الفجعة لي خليتك تعيشها جرايري و مدامك تحب طلق...مستحيل نخليك معاه لحظة وحدة
رخف يدو على ظهري و جبد روحو بالوقت...دورت راسي شوية و هزيت عينيا في وجهو...مصدومة من الفازة اللي عملها و من الكلام لي قالو زادة...دقايق عديتهم واقفة في بلاصتي...فقت من سرحتي على صوت ماكينة القهوة لي قاعدة تزمر من بكري...فك الكاسة منها و تلفت عندي حطها في يدي يحكي
آدم:هيا شد...إنتي كي متاخوش قهوتك...تولي كي الثور الهايج
نزلت راسي شوية...غزرت للكاسة و عاودت غزرتلو...فرد وقت مخي يعاود في اللي صار و بالظبط في الجرأة متاعو و الحق لي عطاه لروحو مرة أخرى في انو يبوسني كبست على الكاسة أكثر و فرغتها على صدرو...وخر لتالي يحكي
آدم:شبي ●●●● هبلت ؟
أنا:هاااذي باش تتعلم تحفظ حدودك معايا و معادش تقرب مني مرة أخرى
هز راسو غزرلي ندرا كيف...و قرب حل الما...يغسل في صدرو...أصلا من بكري هابط عندي شبه عريان و يزيد يتعدا حدودو زادة...أول ما تلفت عندي...عينيا وساعو من الحمورية لي على صدرو...أما تجاهلت الموقف و قحرتلو نحكي
أنا:لازمني نمشي توا و بالنسبة لقضيتي يكفي أنك تبقى بعيد و كهو...خاطرني عندي ثقة في المحامية متاعي
كبست على صاكي و جيت باش نمشي...أول ما وصلت للباب...حبست و غزرتلو نحكي
أنا:مرة أخرى...ألبس مريولك قبل ما تحل الباب لحد
ضحك و هزلي براسو باهي...خرجت بالوقت...ساعات نستغرب فيه و في تصرفاتو...يمكن بالرسمي يعاني من إنفصام في الشخصية مسكين...حبست نحكي
أنا:مسكين ؟ شكون لي مسكين يا ملاك ؟ تو هذا يقولو عليه مسكين...زيد يستهل لي صار فيه الكل
خذيت نفس و كملت ثنيتي مرتاحة رغم كلشي...لي يهمني أنو ميكونش داعم لإيهاب...فرد وقت كلامو باقي يدور في مخي...خاطرني متوقعتوش منو...كيما نعرف أنو حد كيفو هدفو واضح و عشقو مؤقت...أكا علاش كلامو ميفرقش معايا إذا كان صحيح و لا مجرد كذبة و كهو.
#ملاك_آدم❤