صرخة صمت 🌬

الحلقة الرابعة و العشرون

🔸️حلقة 24
غرست يدها في شعري...و كبست عليا أكثر...خذيت نفس طويل و جبدت روحي شوية نحكي
أنا:ت..تسكر كلشي في وجهي مرة أخرى...معاادش نعرف شنوة نعمل و لا وين نمشي
ملاك:إيمان هدي روحك و فهمني شنية لي صار ؟ شبي حالتك هكا ؟ ياخي قابلت أمير مرة أخرى
هزيتلها براسي لا...و عديت يديا زوز على وجهي نمسح في دموعي و نحكي
أنا:لاا...أ..أنا قصيت على الخدمة و مول الدار طلع طالب أكثر من اللي توقعت...يعني حتى حاجة ماهي تمشي كيما توقعت و أمي منعرفش وينها و لا شنية عمل فيها اللي ميتسماش بابا...أنااا راني تعبت يا ملاك...معادش نجم نتحمل أكثر من هكا والله
حاوطت وجهي بيديها زوز و كبست عليا...تحكي
ملاك:إيمااان يززي عزيزتي...كلشي يتحل مع الوقت...قلي شنية لي صار باش قصيت على الخدمة ؟
أنا:ك..كنان
ضيقت عينيها مستغربة...خذيت نفس طويل و كملت نحكي
أنا:اليوم مشيت مع كنان للحومة لي تسكن فيها أمو...كان فما دار في نفس الحومة و حكيت مع مولاها...سعرها باهي و تناسبنا الزوز...حتى الحومة محلاها
ملاك:مدامك حبيتها...نجي نشوفها معاك
أنا:ملاك...كنت باش نوافق...أما بعدها مشينا لدارهم و آدم كان موجود زادة
ملاك:آدم ؟ ميطلعش هو سبب حالتك هاذي ؟
أنا:لا أما سمعتو يحكي مع كنان...كان مفكر لي فما حاجة بيناتنا
ملاك:طبيعي خاطر تفكيرو محصور غادي
سكت شوية...وين حسيت دموعي هبطو أكثر...غزرتلي تحكي
ملاك:يا إيمان فهمني شنية لي صار...هاك حيرتني أكثر
أنا:شي ملااك...يمكن تأثرت شوية كهو
ملاك:بالله ؟ قولي شنية سمعت باش وصلت للحالة هاذي
أنا:قالو لي ظروفي متسمحليش باش نكون مع طفلة كيفها
ملاك:كنان ؟
هزيتلها براسي إيه و تنهدت بالقاوي...كان لازمني نحكي لي صار باش نرتاح شوية...ضيقت عينيها تحكي
ملاك:شيقصد بكلامو ؟
أنا:ظروفي واضحة ملاك...الوضع لي أنا فيه و اللي عملو أمير فيا...ماهوش باش يخليني في نفس الكفة...و يشهد عليا ربي...إني ولا مرة خممت فيه بالطريقة هاذي و لا حتى حسيت بحاجة ناحيتو...خاطر الموضوع هذا تسكر بالنسبة ليا و معادش عندي ثقة في حد بعد اللي عشتو و وصلت ليه جراير أمير...أما زادة هذا ميعطيهش الحق يقول عليا هكا...خاطر اللي صار ماهوش ذنبي و مفماش علاش نحشم بيه...اللي لازم يحشم من روحو هو أمير..هو اللي سرقلي حياتي و أحلامي
ملاك:إيجا هوني إيجا
عاودت عنقتني مرة أخرى و كبست عليا...تحكي
ملاك:حتى حد ما عندو الحق يقول عليك كلمة...أصلا مستحيل يلقى وحدة كيفك يا إيمان...معادش تبكي على حاجة متستهلش
أنا:قصيت على الخدمة باش معادش نقابلو مرة أخرى
ملاك:متطلعش تراجعت على القضية ؟
أنا:لاا تو ناخو المواعيد متاعي من عند نهاد
ملاك:الحمد لله...هذا أهم شي توا
جبدت روحي منها و تكيت لتالي...كبست على يديا زوز نحكي
أنا:لازمني نلقى خدمة في أقرب وقت...عالأقل نخرجو من هوني
ملاك:أكيد باش تتحل يا روحي
أنا:إنتي شنية عملت اليوم ؟
ملاك:حكيت مع مدام ذكرى بخصوص القضية...نحب نخلص منو في الجلسة الجاية
أنا:إن شاء الله هاذي تكون آخر جلسة و ترتاح منو
ملاك:إن شاء الله...هذا كلشي نحب عليه توا
أنا:فركست على خدمة ؟
ملاك:للأسف ملقيتش...يعني ضيعت وقتي و كهو
غزرتلها و تبسمت رغم اللي أنا فيه...حطيت يدي على يدها نحكي
أنا:من غدوة نضيعو وقتنا مع بعضنا
ضحكت و قربت مني مرة أخرى...عنقتني تحكي
ملاك:أحسن شي صار في حياتي إني قابلتك
أنا:و أنا مكنتش نعرف كيفاش باش ندبر أموري من غيرك أحسن شي أنك موجودة في حياتي
ملاك:صدقني باش يتحسن كلشي...لازمنا نلقاو خدمة و نرجعو للفاك زادة
أنا:عندك حق...يكفي الوقت لي ضاع منا لتوا
ملاك:هيا قوم توا...لازمك ترتاح شوية...ساعة باش نطيبلك حاجات بنينة الليلة
تبسمت و هزيت روحي معاها...نحس في بدني رزين عالخر...منعرفش كيفاش وصلت لدار...بدلت دبشي كيما جا و قعدت على طرف سريرها...لتوا نحس في أفكاري تهز فيا و تجيب...محسيتش بالوقت كيفاش تعدا...نزلت راسي تغزر لتليفوني لي ينوقز...قريت إسمو من غير ردة فعل معينيش باش نحكي معاه و لا نسمع صوتو توا...دخلت عندي تحكي
ملاك:شكون ؟
أنا:كنان
ملاك:علاش يطلب فيك ؟
أنا:منعرفش على الأغلب عرف لي أنا بطلت من الخدمة
ملاك:ماكش باش تحكي معاه ؟
أنا:لا...منحبش نسمع صوتو توا
ملاك:باهي عزيزتي...هاني باش نكمل العشا و نرجعلك
أنا:باهي...عيش أختي
أول ما خرجت...نزلت راسي نغزر لرقمو مرة أخرى...دوب علق...سكرت تليفوني و طيشتو بعيد عليا...نحب ننسى كلشي صار اليوم و منخممش فيه أكثر من هكا...حطيت راسي على المخدة و غمضت عينيا...تعدات ملامح أمي قدامي...وين قلبي عصر عليا أكثر...خاطر كلشي وصلت ليه لتوا جرايري انا...راسي رزن و هبط عليا النعاس بصفة غريبة...كأنو عندي برشا مرقدتش...دوب سمعتها كي حلت الباب و دخلت...و تليفونها بدا ينوقز...قربت مني تحكي
ملاك:إيمان قوم...ميطلعش هذا رقم كنان لي يطلب عندي ؟
غميت على راسي أكثر...معادش نحب نسمع إسمو أكثر من هكا...و نفخت بالقاوي نحكي
أنا:علق عليه ملاك...منحبش نحكي معاه توا
ملاك:باهي قوم باش تاكل ملا
أنا:منحبش
هزت الغطا من فوقي و حطت يدها على جبيني...تحكي
ملاك:اففف إيمان...هاك باش تطرشق من السخانة
أنا:يمكن خذيت برد...تو نرقد شوية و نرتاح
ملاك:لااا هكا حالتك تزيد
غمضت عينيا بالقاوي و عاودت حليتهم على صوت ميساج لحقها...حلاتو و قربت من الشباك تحكي
ملاك:كنان برا
هزيت روحي شوية تقعدت و غزرتلها مستغربة متوقعتش باش يجي لهوني و لا حتى نقابلو مرة أخرى و أنا في الوضع هذا...خذيت نفس طويل و هزيت روحي وقفت...معملتش حساب إني نشوفو توا...قربت من الشباك و هزيت الريدو شوية نغزرلو...هبط من الكرهبة و تكى عليها كي العادة غزرتلي تحكي
ملاك:شقولك نحكي معاه أنا ؟
أنا:لاا...هاني باش نخرج و نشوف شنية يحب
ملاك:في حالتك هاذي ؟
أنا:متخافش عليا عزيزتي...مانيش باش نطول معاه
ملاك:بااهي إيماان...رد بالك على روحك عيش أختي
هزيتلها براسي إيه و قربت من الكرسي...هزيت الجيلي متاعي...لبستها فوق البيجامة و خرجت عندو...أول ما حليت الباب...جات عيني في عينو...هديت روحي شوية و قربت منو نحكي
أنا:كنان شفما ؟ شتعمل هوني ؟
كنان:نظن إنتي لي لازمك تجاوبني و تفهمني شنوة لي قاعد يصير
أنا:حتى شي ؟ كان تحكي على التليفون...منجمتش نهز عليك خاطرني كنت راقدة
كنان:تعرف بالقدا على شنوة نحكي إيمان
أنا:لا منعرفش
كنان:باهي...هاني باش ناخوك على قد عقلك و نسألك شنية صار باش بطلت من خدمتك ؟ سي محمد غلط معاك في حاجة ؟و لا حد قلقك فيها ؟
أنا:لا ما صار حتى شي من هذا...يكثر خيرو عمي محمد ما عمل معايا كان الباهي
كنان:مدامو باهي معاك...علاش قصيت على الخدمة
أنا:خاطرني تعبت...و معادش نجم نتحمل المسافة من هوني لغديكا يوميا
كنان:ماهوش عذر...خاطرني قتلك باش نوصلك و نرجعك زادة
أنا:مانيش بحاجة مزية منك كنان
ضيق عينيه و غزرلي مستغرب...عدا يدو على وجهو يحكي
كنان:مفهمتكش ؟ مزية شنوة لي تحكي عليها ؟
أنا:كنان...أنا رميت عليك الحمل متاعي عليك أكثر من اللازم...أنت المحامي متاعي مش أكثر...يعني ماكش مظطر تتعب معايا لهدرجة
كنان:علاش ريتني شتكيتلك ؟
أنا:أما هاذي هي الحقيقة
كنان:باهي...باش نعتبر كلامك صحيح...تنجم تفهمني شنوة باش تعمل توا ؟
أنا:ندبر أموري
كنان:و إمتى ناوية تنقل من هوني ؟
أنا:للأسف منجمش نبدل الدار توا...خاطرني بقيت من غير خدمة
كنان:على أساس كنت مستعجلة باش ترجع لخدمتك شنية لي خلاك تبدل قرارك ؟
أنا:قتلك قبل لي أنا تعبت و حسيت روحي قصرت في خدمتي و في حق صحابي...خاطرهم ديما شادين بلاصتي في غيابي
كنان:باهي...تنجم ترجع إنتي و صحبتك لسوسيتي و حد ماهو باش يقلقكم
أنا:عيشك كنان و مقدرة موقفك معايا...أما قتلك قبل ما نحب حتى حد يعمل فيا مزية...تو ندبرو أمورنا وحدنا
كنان:الصبر يا ربي...باهي أعمل اللي في راسك توا و مبعد نشوفو آخرتها معاك
أنا:لازمني نرجع توا...تصبح على خير
نزلت عينيا من وجهو و تلفت باش نمشي...شدني من يدي بالوقت و دورني عندو...غزرتلو مستغربة...كبس عليا يحكي
كنان:متأكدة مفما حتى مشكلة ؟ قتلك قبل ما تخبي عليا حتى شي
جبدت يدي منو...رجعت شعري لتالي...و غزرتلو نحكي
أنا:لا مفما حتى مشكلة...جيست لازمني نرتاح شوية
حطيت يدي على جبيني...راسي رزن بصفة غريبة دوب نجمت نثبت فيه...حسيت بيه كي قرب مني أكثر من ريحتو لي ضربت في خشمي...رجعلي خصلات شعري لتالي يحكي
كنان:إيمان...لباس ماهو ؟ شبيك ؟
خذيت نفس و هزيت عينيا في وجهو...لتوا منعرفش شنية يعمل هوني و لا حتى علاش مهتم بيا و بأموري مدام تفكيرو فيا واضح...بمجرد تذكرت كلامو...جبدت روحي منو و وخرت خطوة لتالي...نحكي
أنا:لباس...جيست تاعبة شوية و حرارتي مرتفعة
كنان:باهي خليني نهزك للكلينيك توا
أنا:لا...يمكن خذيت برد...هاني باش نرقد شوية باش نصبح مليحة
كنان:باهي على راحتك...خلي تليفونك محلول...باش تجم نطمن عليك
أنا:باهي
وخرت لتالي أكثر و عطيتو بظهري...لفيت روحي بالجيلي و نزلت على شفايفي شوية...نمنع في دموعي لي حسيتهم باش يهبطو مرة أخرى...كان أحسن لو مجاش و لا حتى خلاني نشوفو مرة أخرى...خاصة اليوم خاطر كل لحظة نلقى روحي نسترجع في الكلام لي قلتو...فرد وقت نحس لي أمير قريب مني مرة أخرى و أنفاسو قاعدة تتوزع على بدني...أنا تعبت برشا...باش نجمت نتقبل روحي و نغزر لبدني مرة أخرى...منحبش نرجع لنقطة الصفر و للكوابيس لي عشتها في الشهور لي فاتت...أول ما وصلت للباب كبست على البواني و تلفت عندو مرة أخرى...منعرفش علاش عملت هكا...أما لقيت روحي مستغربة فيه و في التناقض متاعو لي بين كلامو و أفعالو...معادش نجم نعرف و لا نستوعب لي قاعد يصير معاياا...أحسن شي بالنسبة ليا...هو إني نبقى بعيدة عليه و منتخطاش حدود قضيتي...خاطر مستحيل نلقى حد كيفو لي باش يتبنى قضيتي و ياخولي حقي من أمير بالقانون...غزرتو ليا خلاتني نكبس على البواني و ندخل لدار من غير ما نتلفت ورايا مرة اخرى...دخلت للبيت...نحيت الجيلي و طيشتها
على جنب...قربت مني تحكي
ملاك:إيمان...لباس يا روحي ؟
هزيتلها براسي إيه و قربت من الشباك...وقفت ورا الريدو من غير ما نهزو...دقايق عداهم واقف بعد ما دخلت لدار مد يدو حل الباب و ركب...بقيت نغزرلو لين خدم كرهبتو و مشى...تكيت على الشباك نحكي
أنا:والله معادش نجم نعرف شنية لي يحب عليه بالظبط معادش نستوعب كمية التناقض لي بين كلامو و أفعالو
ملاك:إيجا ترتاح توا...متعبش روحك أكثر من هكا
كبست على يدها و قعدت على طرف السرير...كليت شوية بعد محاولات منها...و شديت فرشي...غطاتني تحكي
ملاك:متخممش في اللي صار أكثر من هكا...كلشي باش يتحسن مع الوقت يا روحي
تبسمت مع كلامها و غمضت عينيا...أصلا معادش عندي جهد باش نخمم أكثر من هكا و لا حتى نتوقع شي من الايامات لي جاية...هو بالظبط معادش نحب نخمم فيه و لا نحطو في راسي جملة...و لا حتى نخلي كلامو يأثر فيا...تحملت قبل و باش نتحمل توا...كيما اني كنت و باش نبقى قوية لآخر لحظة في حياتي.
#إيمان_كنان❤
#صرخة_صمت🌬
#سمر💙